Tegnum 16

Timautes Nrug Paulus Hab Xilas Moog

1Paulus moog txug huv lub nroog Dawnpis hab lub nroog Lixathas, kws muaj ib tug ntseeg Yexus hu ua Timautes nyob rua huv. Timautes nam yog ib tug tuabneeg Yudais kws ntseeg Vaajtswv, tabsis Timautes txiv yog tuabneeg Kilis. 2Cov ntseeg kws nyob huv lub nroog Lixathas hab huv lub nroog Ikaunius puavleej qhuas txug Timautes. 3Paulus xaav coj Timautes nrug nwg moog, tes nwg txawm muab Timautes ua kevcai txav. Paulus ua le ntawd, ruaqhov cov Yudais kws nyob rua tej thaaj chaw ntawd puavleej paub tas Timautes txiv yog tuabneeg Kilis. 4Thaus puab moog rua huv txhua lub nroog, puab qha tej kevcai kws cov timthawj hab cov txwjlaug nraag lub nroog Yeluxalees tau pumzoo lawm rua cov ntseeg suavdlawg noog, hab kuas suavdlawg ua lawvle tej kevcai ntawd. 5Yogle ntawd, cov pawg ntseeg txhaj muajzug ntawm saab kev ntseeg tuaj hab najnub muaj tuabneeg lug ntseeg coob zujzug ntxiv.

Paulus Ua Ywgtoog Huv Rhau-as

6Tomqaab ntawd Paulus puab moog thoobplawg huv cheebtsaam Felinkias hab Kalatias, ruaqhov Vaaj Ntsujplig tug Dlawbhuv tsi pub puab moog qha huv xeev Exias. 7Thaus puab moog txug ntawm Mixias nrimteb, puab tub npaajsab moog rua huv lub xeev Npithinias, tabsis Yexus tug Ntsujplig tsi pub puab moog. 8Yogle ntawd puab txhaj cale hlaa dlhau plawg#16:8: hlaa dlhau plawg; lossis hlaa. lub nroog Mixias moog rua lub nroog Rhau-as. 9Mo ntawd Paulus txawm ua ywgtoog pum ib tug txivneej Makedaunias sawvntsug thov nwg has tas, “Thov tuaj paab peb cov kws nyob tim Makedaunias nuav hab!” 10Thaus Paulus ua ywgtoog pum le ntawd, tes peb txawm cale sawbsim npaaj moog rua tim lub xeev Makedaunias, ruaqhov peb paub tseeb has tas Vaajtswv tau hu kuas peb moog qha Txuj Moo Zoo rua cov tuabneeg kws nyob tid.

Lidias Kws Nyob Huv Filipis Lug Ntseeg Vaajtswv

11Peb caij nkoj huv lub nroog Rhau-as ncaajnraim moog rua peg lub povtxwv Xamaulakes, hab nub tomqaab peb moog rua tim lub nroog Ne-apaulis. 12Dlhau ntawd, peb moog rua peg lub nroog Filipis, kws yog ib lub nroog ntawm thawj cheebtsaam huv xeev Makedaunias#16:12: ib lub nroog ntawm thawj cheebtsaam huv xeev Makedaunias; tej phoo ntawv qub kws xuas teg sau, muaj ib lub nroog kws tseemceeb ntawm thawj cheebtsaam huv xeev Makedaunias, lossis ib lub nroog kws tseemceeb ntawm lub cheebtsaam ntawd kws nyob huv xeev Makedaunias. kws yog cov tuabneeg Loos tswjfwm. Peb nyob ntawd tau ob-peb nub.

13Thaus txug nub Xanpataus, peb txawm tawm huv nroog moog rua tom ntug dlej, kws yog ib qhov chaw peb xaav tas yuav muaj cov Yudais moog thov Vaajtswv rua tod. Peb txawm moog nyobtsawg hab nrug cov quaspuj kws nyob tod sisthaam. 14Cov quaspuj ntawd muaj ib tug hu ua Lidias kws yog tuabneeg Thiyatilas, nwg tuaj ua luam muag ntaub tsaamxem. Nwg yog ib tug kws fwm Vaajtswv, tug Tswv txhaj qheb nwg lub sab, ua rua nwg totaub tej lug kws Paulus qha. 15Tomqaab Lidias hab nwg tsev tuabneeg ua kevcai rausdlej taag, nwg has rua peb tas, “Yog mej suav has tas kuv yog ib tug kws ntseeg Vaajtswv lawm tag nua tes thov mej nrug kuv moog hab su huv kuv tsev.” Nwg thov peb heev, ua rua peb yig tsi dlhau le, tes peb txhaj nrug nwg moog rua tom nwg tsev.

Paulus Raug Kaw Huv Filipis

16Muaj ib nub thaus peb taabtom taug kev moog rua tom qhov chaw thov Vaajtswv, peb ntsib ib tug ntxhais qhev, nwg muaj ib tug ntsujplig phem kws ua rua nwg txawj saib moov txug yaav tomntej. Qhov kws nwg txawj saib moov le ntawd, ua rua cov tswv kws yuav nwg lug ua qhev ntawd tau nyaj ntau heev. 17Nwg pheej lawv Paulus peb qaab hab qw nrov-nrov has tas, “Cov txivneej nuav yog Vaajtswv tug kws muaj Fwjchim Tshaajplawg cov tubkhai! Puab tuaj qha txuj kev dlim txim rua mej.” 18Nwg pheej ua le ntawd tau ntau nub; Paulus meemtxom, nwg txhajle tig moog has rua tug ntsujplig phem ntawd has tas, “Ntawm Yexus Khetos lub npe, koj cale tawm huv tug ntxhais nuav moog!” Taamsim ntawd tug ntsujplig phem txawm tawm plawg lawm.

19Thaus cov tswv kws yuav tug ntxhais ntawd lug ua qhev pum tas puab tsi tau nyaj lawm, puab txawm nteg kag Paulus hab Xilas obtug caab moog rua huv plawv nroog kws yog moog cuag tej numtswv. 20Puab coj Paulus obtug moog cuag cov numtswv Loos hab has tas, “Ob tug txivneej nuav yog tuabneeg Yudais, obtug tuaj tsim kev kubntxhuv rua huv peb lub nroog nuav. 21Obtug tuaj qha tej kevcai kws tawmtsaam peb txuj; peb yog tuabneeg Loos, peb yeej tsi leeg yuav tej kevcai ntawd lossis coj tej kevcai ntawd le.” 22Tej pejxeem puavleej koomteg nrug puab tawmtsaam Paulus hab Xilas obtug.

Thaus ntawd cov numtswv txawm muab obtug tej rigtsho dlua pis rhe hab has kuas muab obtug nplawm. 23Tomqaab obtug raug nplawm saab heev, puab txawm coj obtug moog kaw rua huv tsev lojcuj, hab kuas tug kws zuv lub tsev lojcuj zuv obtug zoo-zoo. 24Thaus puab has le ntawd taag, tug kws zuv lub tsev lojcuj txawm muab obtug kaw rua chaav huv plawv hab muab obtug xauv kutaw rua ntawm ob tog ntoo kws nyaav heev.

25Thaus kwvlaam ib taagmo, Paulus hab Xilas tseem taabtom thov Vaajtswv hab hunkauj qhuas Vaajtswv, cov tuabneeg raug txim kws nyob huv tsev lojcuj suavdlawg kuj noog obtug thov Vaajtswv hab hunkauj. 26Thaus ntawd uacav aav txawm tseeg quas nkawg ua rua lub tsev lojcuj uazug koog. Tes taamsim ntawd tej qhovrooj cale qheb taagnrho hab tej saw hlau kws khi cov tuabneeg raug txim tej teg taw txawm nplaam taag huv tuabsi. 27Tug kws zuv lub tsev lojcuj txawm tsim dlheev nruab dlaabndlub lug, hab thaus nwg pum tas tej qhovrooj tub qheb taag lawm, nwg xaav tas ntshe cov tuabneeg raug txim tsiv taag lawm; tes nwg txawm rhu hlo nwg raab ntaaj lug hab yuav rov tua nwg tugkheej. 28Tabsis Paulus qw nrov-nrov has tas, “Tsi xob ua le ko rua koj, peb txhua tug puavleej tseem nyob ntawm nuav!”

29Tug kws zuv lub tsev lojcuj hu kuas ib tug taws teeb, tes nwg txawm dlha ceevnrooj moog rua huv, hab qhau cev hlo ua ibce tsheenyo rua ntawm Paulus hab Xilas kutaw. 30Nwg coj Paulus obtug tawm lug hab nug has tas, “Ob tug tijlaug, kuv yuav ua lecaag, kuv txhaj dlim tau?”

31Obtug teb tas, “Koj hab koj tsev tuabneeg cale ntseeg tug Tswv Yexus, mej txhaj yuav dlim.” 32Obtug qha tug Tswv txujlug rua tug kws zuv lub tsev lojcuj ntawd hab rua taagnrho cov kws nyob huv lub tsev ntawd noog. 33Mo ntawd, hab tuablub sijhawm ntawd, tug kws zuv lub tsev lojcuj txawm coj obtug moog ntxuav obtug tej qhovtxhaab kws raug luas nplawm to. Tes nwg hab nwg tsev tuabneeg txhaj cale ua kevcai rausdlej taamsim ntawd. 34Nwg txawm coj Paulus hab Xilas moog peg nwg tsev hab ua zaub-mov rua obtug noj. Nwg hab nwg tsev tuabneeg zoosab kawg le, ruaqhov puab tau lug ntseeg Vaajtswv lawm.

35Thaus kaajntug, cov numtswv Loos khaiv ib cov tub ceevxwm moog has rua tug kws zuv lub tsev lojcuj has tas, “Cale tso ob tug txivneej ntawd moog.”

36Tug zuv lub tsev lojcuj txhaj has rua Paulus has tas, “Cov numtswv tau tso tuabneeg tuaj has kuas muab koj hab Xilas tso moog, yogle ntawd, meb cale moog kaajsab lug.”

37Tabsis Paulus has rua cov tub ceevxwm has tas, “Puab tub tsi tau taug wb zaaj seb wb puas tau ua txhum, tabsis puab cale muab wb nplawm taabmeeg suavdlawg. Txawm wb tub yog tuabneeg Loos los puab tseem nplawm wb hab muab wb coj moog kaw rua huv tsev lojcuj. Tsaamnua puab ho yuav kuas wb cale tawm tuabywv moog xwb yeej tsi tau kag le! Cov numtswv Loos yuavtsum yog cov kws tuaj kag ntawm nuav hab tso wb tawm.”

38Cov tub ceevxwm rov moog qha tej nuav rua cov numtswv Loos noog. Thaus puab nov tas Paulus hab Xilas obtug yog tuabneeg Loos, puab ntshai kawg le. 39Yogle ntawd, puab txhaj tuaj thovtxim ntawm Paulus hab Xilas obtug. Thaus puab thov taag, puab coj obtug tawm huv tsev lojcuj hab thov kuas obtug tawm huv lub nroog moog. 40Thaus Paulus hab Xilas tawm huv tsev lojcuj moog, obtug txawm moog rua tom Lidias tsev. Obtug tau ntsib cov ntseeg nyob rua tod, tau haslug txhawb puab zug, hab obtug ncaim puab moog lawm.

Currently Selected:

Tegnum 16: HNJ2022

Highlight

Copy