2 Kauleethaus 7
7
1Cov kwvtij kws kuv hlub, vim peb tub muaj cov lug cogtseg nuav lawm, ca peb ntxuav txhua yaam kws ua rua peb saab nqajtawv hab saab ntsujplig tsi dlawbhuv tawm moog kuas taag, hab ca peb ua lub neej dlawbhuv lug ntawm qhov kws peb fwm Vaajtswv.
Paulus Txuj Kev Zoosab
2Thov mej qheb mej lub sab rua peb hab. Peb yeej tsi tau ua txhum rua leejtwg hlo le; tsi tau ua rua leejtwg puamtsuaj, lossis tsi tau dlaag-ntxag leejtwg. 3Kuv has le nuav tsi yog kuv tshev mej. Kuv tub qha rua mej lawm has tas mej yeej nyob rawv huv peb lub sab, txawm yuav caj los ca peb caj uake, txawm yuav tuag los ca peb tuag uake. 4Kuv yeej casab hab kuv qhuas mej kawg le! Txawm yog peb raug txhua yaam teebmeem los kuv yeej tsi poobsab, kuv tseem zoosab kawg le.
5Thaus peb moog txug huv lub xeev Makedaunias lawm, peb yeej tsi tau su hlo le. Teebmeem muaj nyob rua txhua qhov, saabnrau muaj kev tawmtsaam, saabhuv muaj kev txhawj-ntshai. #2Klt 2:13 6Tabsis Vaajtswv tug kws txhawb cov tuabneeg qaugzug lub zug, Nwg txhawb peb lub zug lug ntawm qhov kws Nwg khaiv Titus tuaj saib peb. 7Tsi yog qhov kws Titus tuaj saib peb xwb, tabsis nwg tau tshaabxu rua peb has tas mej txhawb nwg lub zug kawg le. Nwg qha rua peb has tas mej xaav pum kuv npaum lecaag, mej tusab npaum lecaag, hab mej tseem muaj lub sab tivthaiv kuv lecaag; tej ntawd ua rua kuv zoosab ntau npaug ntxiv.
8Txawm yog tsaab ntawv kws kuv sau tuaj rua mej ntawd ua rua mej tusab los xij, kuv yeej tsi khauvxwm has tas uacaag kuv laam sau le ntawd. Kuv kuj ib nyuas khauvxwm hab, thaus kuv pum tas kuv tsaab ntawv ntawd ua rua mej tusab, tabsis tsuas yog tusab ib nyuas ntu xwb. 9Tabsis nwgnuav kuv zoosab kawg, tsi yog vim kuv ua rua mej tusab, tabsis vim qhov kws mej tusab ntawd cale ua rua mej tso mej tej kev txhum tseg. Ruaqhov qhov kws mej tau txais txuj kev tusab ntawd yeej yog lawvle Vaajtswv tug dlejsab lawm, yogle ntawd, peb yeej tsi tau ua rua mej puamtsuaj dlaabtsi hlo le. 10Txuj kev tusab lawvle Vaajtswv dlejsab, ua rua muaj kev hloov dlua sab tshab kws yuav coj moog tau txuj kev cawmdlim, qhov ntawd yeej tsi tsimnyog khauvxwm hlo le! Tabsis txuj kev tusab kws lawvle nplajteb tug dlejsab, qhov ntawd yuav coj moog tau txuj kev pluj-tuag. 11Mej saib seb txuj kev tusab lawv Vaajtswv dlejsab nuav ua tau dlaabtsi rua mej: ua rua mej mobsab hab ua rua mej kubsab lug dlaws mej zaaj has tas mej tsi tau ua txhum, ua rua mej txawj chimsab rua tej kev phem, ua rua mej raag, ua rua mej ntshaw, ua rua mej kubsab, hab ua rua mej npaaj txhij xaav pum txuj kev ncaajnceeg. Nyob rua huv txhua yaam nuav, mej tau ua rua suavdlawg pum tas mej tsi tau ua txhum ib qho le.
12Yogle ntawd, qhov kws kuv sau tsaab ntawv ntawd tuaj rua mej, tsi yog vim has tug kws tau ua txhum lossis tug kws lwmtug tau ua txhum rua nwg. Tabsis kuv sau tuaj qha mej, timntsej timmuag ntawm Vaajtswv, kuas mej pum tas mej muab sab npuab peb npaum lecaag. 13Tub yog vimle ntawd mej txhajle txhawb tau peb zug kawg le.
Tsi yog mej txhawb tau peb zug xwb, peb zoosab kawg le thaus peb pum tas Titus zoosab npaum lecaag, vim mej txhua tug tau ua rua nwg tsi txob tsi txhawj le lawm. 14Kuv qhuas txug mej rua nwg, ruaqhov mej yeej tsi tau ua rua kuv txaajmuag hlo le. Peb tau qha txhua yaam tseeb rua mej lecaag lawm, tej kws peb qhuas txug mej rua Titus, yeej tseeb ib yaam le ntawd. 15Thaus Titus pum tas mej noog nwg lug, hab mej txaistog nwg lug ntawm txuj kev ntshai kws ua ibce tsheenyo, ua rua nwg hajyam hlub mej heev ntxiv. 16Kuv zoosab heev, ruaqhov kuv yeej tsosab tau txhua yaam rua mej.
Currently Selected:
2 Kauleethaus 7: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
