1 Kauleethaus 4

Khetos Cov Timthawj

1Tsimnyog mej yuav tau fwm has tas peb yog Yexus Khetos cov tubkhai hab yog cov kws ceev Vaajtswv tej lug tseeb kws tsi muaj tuabneeg paub. 2Tshaaj qhov ntawd hab, cov kws raug tsaa lug ua tubkhai, puab yuavtsum yog ib cov kws luas pum tas yog tuabneeg ncaajnceeg. 3Txawm yog mej lossis lwmtug yuav txavtxim rua kuv los xij, tej ntawd kuv tsi xaav lecaag. Kuv kag los kuv tub tsi txavtxim rua kuv hab. 4Kuv yeej paub tseeb has tas kuv tsi tau ua txhum, tabsis qhov ntawd tsi tau qha has tas kuv tsi muaj txim. Tug Tswv yog tug kws yuav txavtxim rua kuv.

5Yogle ntawd, mej tsi xob txavtxim rua leejtwg uantej lub sijhawm kws tau teem ca lawm; tog moog txug Nub kws tug Tswv rov lug tsaiv. Nwg yuav muab tej kws tuabneeg ua zais nkoog huv qhov tsausntuj lug nthuav rua nrau qhov pumkev hab yuav muab tej kws tuabneeg lub sab ntshaw lug nthuav qha rua suavdlawg paub. Thaus ntawd, txhua tug yuav tau txais kev qhuas lug ntawm Vaajtswv lawvle kws tsimnyog.

6Cov kwvtij, qhov kws kuv muab Apaulaus hab kuv zaaj coj lug pav rua mej, tub yog kuv xaav muab wb lug ua yaamntxwv rua mej xyum, kuas mej paub lub ntsab ntawm lulug kws has tas, “Tsi xob ua dlhau qhov kws tau sau tseg lawm.” Mej tsi xob qhuas tug nuav hab thuam tug tod. 7Leejtwg ua rua koj zoo dlua lwmtug huv tuabsi? Txhua yaam kws koj muaj tsi yog Vaajtswv muab rua koj lov? Yogle ntawd, uacaag koj tseem khaav cuag le kws tej ntawd tsi yog Vaajtswv muab pub rua koj?

8Mej tub muaj txhua yaam kws mej ntshaw lawm lov? Mej tub dlhau moog ua tuabneeg npluanuj lawm puas yog? Mej tub dlhau moog ua vaajntxwv lawm, tseg peb tsi tau ua lov? Kuv xaav tas kheevlaam mej yog vaajntxwv tag, sub peb txhaj tau nrug mej ua vaajntxwv hab! 9Kuv pum tas Vaajtswv muab peb cov kws yog timthawj tso tuaj tom tw kawg nkaus, zoo ib yaam le cov tuabneeg raug lub txim tuag sawv taabmeeg tej tuabneeg coob-coob, hab ua yeebyaam rua lub nplajteb nuav, rua cov timtswv, hab rua tuabneeg saib.

10Peb yeej ua tuabneeg ruag pub rua Khetos, tabsis mej yog tuabneeg ntse nyob rua huv Khetos. Peb tsi muajzug, tabsis mej muajzug. Mej raug luas fwm, tabsis peb raug luas thuam. 11Txawm yog lub sijhawm taamsim nuav kag los peb tseem tshaib tseem nqhes, peb naav tej tsoogtsho kws qub hab ndluag, peb raug luas ntaus, peb tsi muaj tsev nrug luas nyob, 12peb siv zug khwv heev lug ntawm peb ob txhais teg. Thaus luas foom phem rua peb, peb thov Vaajtswv foom koobmoov zoo rua luas; thaus luas tsimtxom peb, peb ua sabntev nyaj; #Tegnum 18:3 13thaus luas txobthuam peb, peb ua tuabzoo teb luas. Peb zoole tej khoom lamsim kws tuabneeg nplajteb muab povtseg, peb zoole tej khoom seem rua tuabneeg nplajteb lug txug najnub nua!

14Kuv sau tsaab ntawv nuav tuaj rua mej tsi yog kuv xaav ua kuas mej txaajmuag, tabsis kuv sau tuaj ntuag mej ib yaam le kuv cov mivnyuas kws kuv hlub. 15Txawm yog yuav muaj 10,000 leej ua cov saib mej nyob rua huv Khetos, los mej tsuas muaj tuab leejtxiv xwb. Ruaqhov nyob rua huv mej lub neej kws koom nrug Yexus Khetos tes kuv tau dlhau lug ua mej txiv vim kuv yog tug coj Txuj Moo Zoo tuaj rua mej. 16Yogle ntawd, kuv thov kuas mej xyum ua lawvle kuv ua. #1Klt 11:1; Filipi 3:17 17Tub yog vimle nuav kuv txhaj khaiv Timautes kws yog kuv tug tub kws kuv hlub hab yog ib tug tub kws ncaajnceeg rua tug Tswv tuaj qha mej. Nwg yuav qha kuas mej ncuntsoov txug kuv txuj kev ua neej nyob rua huv Yexus Khetos, lawv nraim le tej kuv qha rua txhua pawg ntseeg kws nyob txhua qhov.

18Mej qeeleej cale xyum khaavtheeb, vim mej xaav tas kuv yuav tsi tuaj saib mej lawm. 19Tabsis yog tug Tswv pumzoo, tsi ntev sau nuav kuv yuav tuaj saib mej; thaus ntawd kuv yuav paub tas lub fwjchim kws cov tuabneeg khaavtheeb ntawd muaj yog dlaabtsi, tsi yog paub txug tej lug kws puab has nkaus xwb. 20Ruaqhov Vaajtswv lub Tebchaws tsi yog yaam kws tuabneeg lub ncauj has tabsis yog fwjchim. 21Mej nyam lecaag? Yuav ca kuv nqaa nplawm tuaj cuag mej, lossis yuav ca kuv nqaa txuj kev hlub hab lub sab mogmuas tuaj cuag mej?

Currently Selected:

1 Kauleethaus 4: HNJ2022

Highlight

Copy