1 Kauleethaus 16
16
Paab Nyaj Rua Cov Ntseeg Kws Tuncua
1Zagnua, has txug tej nyaj kws sau moog paab rua cov kws ntseeg Vaajtswv: Mej ua ib yaam le tej kws kuv qha rua cov pawg ntseeg kws nyob huv lub xeev Kalatias ua. #Loos 15:25-26 2Txhua Nubkaaj mej suavdlawg yuavtsum muab tej nyaj kws mej khwv tau lug tshwj mivntsiv ca rua ib qho, ntau hab tsawg lawvle nwg khwv tau, sub thaus kuv tuaj txug txhaj tsi taag yuav sau ntxiv lawm. 3Thaus kuv tuaj txug, kuv yuav sau ntawv qha txug cov tuabneeg kws mej tub pumzoo lawm hab kuas puab coj cov nyaj ntawd moog rua nraag lub nroog Yeluxalees. 4Yog yeej tsimnyog kws kuv yuavtsum tau moog hab, nua los puab maamle nrug kuv moog.
Paulus Tej Homphaj
5Tomqaab kuv moog dlhau lub xeev Makedaunias lawm, kuv yuav tuaj saib mej, ruaqhov kuv yuav tau hlaa lub xeev Makedaunias. #Tegnum 19:21 6Tejzag kuv yuav tuaj nrug mej nyob ib ntus lossis yuav nyob kuas dlhau lub caij ntuj no, tomqaab ntawd kuv yuav moog qhovtwg los mej maamle paab xaa kuv moog. 7Kuv tsi xaav tuaj pum mej ibplag xwb es txawmsiv yuav ncaim mej moog; yog tug Tswv pumzoo, kuv casab has tas yuav tau nrug mej nyob ib ntus.
8Tabsis kuv yuav nyob huv Efexus nuav moog txug nub Pheetekhos, #Levi 23:15-21; 2Kev 16:9-11 9ruaqhov taabtom muaj qhovrooj qheb dlaavfo kws zoo rua kuv ua num heev, txawm yog yuav muaj ntau leej tawmtsaam kuv los xij. #Tegnum 19:8-10
10Yog Timautes tuaj ntawm mej, ua tuabzoo saib es tsi xob ua rua nwg ntxhuvsab thaus nwg tseem nrug mej nyob, ruaqhov nwg kuj ua tug Tswv tegnum ib yaam le kuv ua hab. #1Klt 4:17 11Yogle ntawd, tsi xob pub ib tug twg saib tsi taug nwg. Mej yuavtsum paab xaa nwg moog yaam kaajsab lug sub nwg txhaj yuav rov lug rua ntawm kuv; ruaqhov kuv yeej togntsoov nwg yuav nrug cov kwvtij ntseeg rov lug.
12Zagnua, has txug peb tug kwv Apaulaus. Kuv tub pheej has kuas nwg nrug cov kwvtij suavdlawg tuaj saib mej, tabsis nwg tseem tsi tau paub meej-meej#16:12: nwg tseem tsi tau paub meej-meej; lossis tsi tau yog Vaajtswv tug dlejsab. has tas nwg yuav tuaj lub sijhawm nuav los tsi tuaj. Txawm lecaag los thaus nwg nrhav tau sijhawm lawm, nwg yeej yuav tuaj saib mej xwb.
Cov Lug Xaus
13Mej yuavtsum ceevfaaj, sawv khovkho rua ntawm txuj kev ntseeg, ua sab tawv qhawv, hab cuab zug khovkho. 14Yuavtsum ua txhua yaam lug ntawm txuj kev hlub.
15Mej yeej paub txug Xatefanas hab nwg tsev tuabneeg; puab yog thawj tsev tuabneeg kws lug ntseeg huv lub xeev Akhayas, hab puab txaussab hlo muab puab tugkheej lug paab cov ntseeg Vaajtswv. Cov kwvtij, kuv thov nquahu mej, 16kuas mej noog cov tuabneeg ntawd lug hab noog txhua tug kws nrug puab ua num uake ntawd lug.
17Txawm yog mej tuaj saib tsi tau kuv los kuv yeej zoosab, vim Xatefanas, Fautunatus hab Akhaikus tub tuaj saib kuv lawm. 18Puab ua rua kuv zoosab ib yaam le puab tau ua rua mej zoosab hab. Tsimnyog peb leeg paub cov tuabneeg kws zoole ntawd.
19Cov ntseeg kws nyob huv lub xeev Exias xaa kev nojqaab nyobzoo tuaj rua mej. Akhilas hab Pixilas hab pawg ntseeg kws tuaj sissau uake rua huv obtug tsev los kuj xaa kev nojqaab nyobzoo rua mej hab. #Tegnum 18:2 20Taagnrho cov ntseeg kws nyob tim nuav puavleej xaa kev nojqaab nyobzoo rua mej hab.
Mej ib leeg has nojqaab nyobzoo rua ib leeg hab ib leeg nwj ib leeg ntawm txuj kev dlawbhuv.
21Kuv, yog Paulus, tej lug nojqaab nyobzoo nuav yog kuv txhais teg sau ntaag.
22Yog leejtwg tsi hlub tug Tswv, ca tug ntawd raug foom!
Malanathas, txhais has tas, Tug Tswv, Koj cale lug!
23Thov kuas tug Tswv Yexus txuj moovhlub nyob nrug mej txhua tug.
24Ca kuv txuj kev hlub nyob huv mej txhua tug ntawm Yexus Khetos.
Currently Selected:
1 Kauleethaus 16: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
