1 Kauleethaus 14

Has Ntxiv Txug Tej Khoomplig Kws Lug Ntawm Vaaj Ntsujplig Lug

1Yuavtsum mobsab nrhav txuj kev hlub hab muaj lub sab ntshaw tej khoomplig kws lug ntawm Vaaj Ntsujplig, tshwjxeeb yog qhov khoomplig kws cev Vaajtswv tej lug. 2Tug kws txawj haslug txawv-txawv tsi yog nwg has rua tuabneeg tabsis yog has rua Vaajtswv, ruaqhov tsi muaj leejtwg totaub nwg, vim nwg has tej kws tsi muaj leejtwg paub kws yog lug ntawm Vaaj Ntsujplig lug. 3Tabsis cov kws cev Vaajtswv tej lug yog paab kuas tuabneeg lujhlub, txhawb puab lub zug, hab nplig puab lub sab. 4Tug kws has tau lug txawv-txawv tsuas paab tau nwg tugkheej xwb, tabsis tug kws cev Vaajtswv tej lug, tug ntawd paab tau taagnrho pawg ntseeg.

5Kuv yeej xaav kuas mej txhua tug has tau lug txawv-txawv; tabsis kuv tseem xum kuas mej tau qhov khoomplig kws txawj cev Vaajtswv tej lug. Ruaqhov tug kws cev Vaajtswv tej lug tseem muajnqes heev dlua tug kws has tau lug txawv-txawv, tshwj has tas muaj tuabneeg txhais tau tej lug txawv-txawv ntawd mas txhaj yuav paab tau pawg ntseeg xwb. 6Cov kwvtij, yog thaus kuv tuaj saib mej, kuv cale haslug txawv-txawv rua mej nua kuv puas muaj qaabhau rua mej maj? Yeej tsi muaj hlo le, tshwj has tas kuv coj tej kws Vaajtswv tau qha rua kuv lossis tej kev txawjntse lossis tej kws has txug yaav pegsuab lossis tej lug qhuabqha, mas txhaj yuav muajnqes rua mej xwb.

7Zoole tej khoom paajnruag siv rua kev hunkauj kws tsi cajsa, xwsle lub raaj tshuab lossis lub nogncaas; yog ntaus lub suab ntawd tawm tuaj tsi meej, leejtwg yuav paub tas lub suab ntawd yog lecaag? 8Hab yog tug tuabneeg kws tshuab raajxyu nwg tshuab tsi meej, leejtwg txhaj yuav paub npaaj rua kev ntaus rog?

9Mej los tuabyaam nkaus le ntawd, yog mej tsi has tej lug kws totaub yoojyim, leejtwg yuav totaub tej lug ntawd? Mej tej lug tes tsuas yog laam has lawv cua moog xwb! 10Nyob huv lub nplajteb nuav muaj ntau yaam lug kws tuabneeg has, tabsis yeej tsi muaj ib yaam lug kws yuav tsi muaj lub ntsablug le. 11Tabsis yog kuv tsi paub cov lug kws tug tuabneeg ntawd has, tes kuv hab nwg nyag yog nyag ib tsaav tuabneeg. 12Mej los tuabyaam nkaus le ntawd. Vim mej yeej muaj lub sab ntshaw tej khoomplig ntawm Vaaj Ntsujplig, yogle ntawd, mej yuavtsum xub siv zug nrhav tej khoomplig kws yuav paab tau pawg ntseeg kuas vaammeej tsaiv.

13Yogle ntawd, tug kws has tau lug txawv-txawv, nwg yuavtsum thov kuas Vaajtswv muab qhov khoomplig kws txhais tau tej lug kws nwg has ntawd. 14Ruaqhov thaus kuv thov Vaajtswv ua lug txawv-txawv, tes yog kuv tug ntsujplig ua tug thov xwb, kuv lub hlwb yeej tsi totaub tej lug ntawd le. 15Yogle ntawd, kuv yuav ua lecaag? Kuv yuav nrug kuv tug ntsujplig thov Vaajtswv, tabsis kuv yuav thov lug ntawm kuv txuj kev xaav hab; kuv yuav nrug kuv tug ntsujplig hunkauj, tabsis kuv kuj yuav hu lug ntawm kuv lub sab xaav hab. 16Thaus koj ua Vaajtswv tsaug, yog koj haslug txawv-txawv nkaus xwb, cov tuabneeg kws tsi paub tej lug txawv-txawv ntawd, yuav ua lecaag paub nrug koj has “Amees” rua koj tej lug ua Vaajtswv tsaug ntawd, vim puab tub tsi paub tej kws koj has ntawd le ne? 17Txawm yog koj txawj ua Vaajtswv tsaug npaum lecaag los koj tej lug yeej paab tsi tau lwmtug le.

18Kuv ua Vaajtswv tsaug kws kuv has tau lug txawv-txawv ntau dlua mej txhua tug huv tuabsi. 19Tabsis nyob rua huv pawg ntseeg, mas kuv yeem has tsib lulug kws suavdlawg totaub, sub txhaj yuav cobqha tau lwmtug, zoo dlua le kws kuv has 10,000 lulug txawv-txawv.

20Cov kwvtij, mej tsi xob xaav le tej mivnyuas yau xaav; has txug kev txhum tes mej ua le tej mivnyuas yau kws tsi paub dlaabtsi, tabsis has txug txuj kev xaav tes mej yuavtsum xaav le tej tuabneeg laug xaav. 21Nyob huv Vaajtswv tej Lug tau sau tseg has tas:

“Tug Tswv has tas, Kuv yuav siv lwmtsaav tuabneeg tej lug

has rua Kuv cov tuabneeg.

Kuv yuav siv lwmtsaav tuabneeg tej qhovncauj haslug,

txawm le ntawd Kuv tsaav tuabneeg yuav tsi noog Kuv tej lug.” #Yaxaya 28:11-12

22Yogle ntawd, kev haslug txawv-txawv yog ua lub cim qha rua cov tsi ntseeg, tsi yog ua cim rua cov ntseeg pum. Tabsis kev cev Vaajtswv tej lug yog lub cim qha rua cov ntseeg, tsi yog ua cim rua cov tsi ntseeg pum.

23Yog tas thaus cov ntseeg suavdlawg tuaj uake, es txhua tug cale pib haslug txawv-txawv, hab ho muaj ib cov kws nyob saabnrau lossis cov kws tsi ntseeg tuaj koom, puab yuav tsi has tas mej vwm lawm nua lov? 24Tabsis yog txhua tug cev Vaajtswv tej lug, es ho muaj ib tug kws tsi ntseeg lossis ib tug kws nyob saabnrau tuaj koom, yuav ua rua tug ntawd paub tas nwg yog tuabneeg txhum, hab ua rua nwg paub tas nwg yuav raug txavtxim, 25hab tej kws nwg muab zais huv nruabsab yuav raug muab nthuav tawm, hab nwg yuav txhuscaug ndlua pehawm Vaajtswv, hab leeg has tas, “Vaajtswv nrug mej nyob ntawm nuav tag lau!”

Kev Pehawm Vaajtswv Kws Muaj Hauvpaug Hauvntsis

26Yogle ntawd, cov kwvtij, peb yuav ua lecaag? Thaus mej tuaj uake pehawm Vaajtswv, ib tug hunkauj, ib tug cobqha, ib tug qha tej kws Vaajtswv kuas nwg qha, ib tug haslug txawv-txawv, hab ib tug txhais tej lug txawv-txawv ntawd. Txhua yaam nuav yuavtsum yog ua lug paab rua pawg ntseeg kuas vaammeej. 27Yog leejtwg yuav haslug txawv-txawv, tsuas pub ob leeg lossis ntau kawg peb leeg has xwb, ib leeg has taag ib leeg maamle has, hab yuavtsum muaj ib tug ua tug txhais tej kws puab has ntawd. 28Tabsis yog tsi muaj leejtwg txawj txhais, tes kuas tug kws haslug txawv-txawv ntawd yuavtsum nyob tuabywv huv lub tuamtsev, ca nwg maam has huv nruabsab rua Vaajtswv xwb.

29Ca ob leeg lossis peb leeg cev Vaajtswv lug, dlua le lwmtug ca puab noog seb tej lug ntawd qha lecaag. 30Yog Vaajtswv cevlug rua ib tug kws nyob quastsawg ntawd ua tug qha, tes thawjtug kws taabtom qha cale tsum. 31Mej txhua tug muaj cuabkaav qha Vaajtswv tej lug, ib leeg qha taag ib leeg maamle qha, sub suavdlawg txhaj yuav kawm tau hab txhaj yuav txhawb tau suavdlawg lub zug. 32Tug kws yog xwbfwb cev Vaajtswv lug, nwg yuavtsum paub tswj nwg qhov khoomplig kws yog cev Vaajtswv lug, 33ruaqhov Vaajtswv tsi yog tug Vaajtswv kws ua kuas muaj kev kubntxhuv, tabsis Nwg yog tug Vaajtswv kws ua kuas muaj kev thaajyeeb.

Taagnrho huv cov pawg ntseeg kws yog Vaajtswv cov tuabneeg, 34cov quaspuj yuavtsum nyob tuabywv tsi xob haslug thaus nyob rua huv lub tuamtsev. Puab tsi tau txais kev tsocai kuas has, tabsis puab yuavtsum nyob huvqaab kev tswjfwm lawvle cov Yudais Txuj Kevcai tau has. 35Yog puab xaav paub dlaabtsi, kuas puab nyag nug nyag tug quasyawg tom tsev; ruaqhov nwg yog ib qho kev txaajmuag rua ib tug quaspuj haslug thaus nyob huv lub tuamtsev.

36Vaajtswv Txujlug chiv muaj ntawm mej lug lov? Lossis Vaajtswv Txujlug ntawd tsuas tuaj txug mej nkaus xwb lov? 37Yog leejtwg xaav tas nwg yog ib tug xwbfwb kws cev Vaajtswv lug, lossis tau khoomplig lug ntawm Vaaj Ntsujplig, tug ntawd yeej leeg paub tas tej kws kuv sau tuaj rua mej nuav yog tug Tswv tej lug kws Nwg tau has tseg. 38Tabsis yog nwg tsi leeg paub txug tej nuav, tes mej tsi xob leeg paub txug nwg le hab.

39Yogle ntawd, cov kwvtij, mej cale kubsab lug rua kev qha Vaajtswv tej lug, tabsis tsi xob txwv txug kev haslug txawv-txawv. 40Txhua yaam kws mej ua, mej yuavtsum ua kuas zoo hab tsi xob ua-dlog ua-dlig.

Currently Selected:

1 Kauleethaus 14: HNJ2022

Highlight

Copy