1 Kauleethaus 10

Tej Lug Ceebtoom Txug Kev Pe Mlom

1Cov kwvtij, kuv xaav kuas mej ncuntsoov tas peb cov yawmkoob puavleej nyob huvqaab tauv fuab, hab puab puavleej hlaa dlhau Havtxwv Lab moog huv tuabsi lawm. #Tsiv 13:21-22; Tsiv 14:22-29 2Puab txhua tug puavleej ua kevcai rausdlej nyob rua huv tauv fuab hab huv havtxwv nrug rua Mauxes. 3Puab txhua tug puavleej tau noj tuab cov mov ntawm saab ntsujplig, #Tsiv 16:35 4hab tau haus tuab cov dlej ntawm saab ntsujplig. Puab tau haus cov dlej kws tawm huv lub pobzeb saab ntsujplig kws nrugnraim puab nyob lug, lub pobzeb ntawd yog Khetos. #Tsiv 17:6; Teev 20:11 5Txawm yogle ntawd los Vaajtswv tsi txaussab rua puab feem coob, puab txhaj tuag pawglug tom taj suabpuam. #Teev 14:29-30

6Zagnua, tej xwmtxheej ntawd yog ua yaamntxwv qha rua peb kuas peb tsi xob muaj lub sab ntshaw yaam phem ib yaam le puab tau ntshaw lug lawm. #Teev 11:4 7Tsi xob pe mlom ib yaam le puab tau pe lug lawm. Vaajtswv Txujlug tau has tas, “Cov tuabneeg ntawd nyobtsawg noj nyobtsawg haus, hab puab sawv lug dlha seevcev.” #Tsiv 32:6 8Peb yuavtsum tsi xob ua kev nkauj kev nraug ib yaam le puab ibtxha ntawd tau ua, tuabnub xwb puab tau tuag 23,000 leej. #Teev 25:1-18 9Peb yuavtsum tsi xob sim tug Tswv#10:9: tug Tswv; tej phoo ntawv qub kws xuas teg sau, muaj Khetos. sab ib yaam le puab qeeleej tau sim lug lawm, naab txhaj tum puab tuag pawglug. #Teev 21:5-6 10Peb tsi xob ywg-ywg ib yaam le puab qeeleej tau ywg lug lawm, tug Timtswv kws kaav txuj kev tuag txhaj ua rua puab puamtsuaj taag huvsi. #Teev 16:41-49

11Tej xwm kws puab raug ntawd tub yog ua yaamntxwv qha rua lwmtug, hab tau muab sau ca ua kev ceebtoom qha rua peb, ruaqhov peb nyob rua tam kws lub sijhawm kawg tub lug yuav txug.

12Yogle ntawd, tug kws xaav tas nwg tub sawv khovkho lawm, tug ntawd yuavtsum ceevfaaj zoo nwg txhaj tsi qaug. 13Txhua yaam kev simsab kws mej raug, puavleej yog tej kws suavdlawg ibtxwm raug. Vaajtswv yog tug ncaajnceeg, Nwg yuav tsi ca mej raug kev simsab dlhau qhov kws mej nyaj taug; tabsis thaus mej raug kev simsab, Vaajtswv yuav pub lub zug rua mej kuas mej tiv taug hab yuav tho ib txuj kev rua mej kuas mej tawm tau.

14Yogle ntawd, cov phoojywg kws kuv hlub, mej yuavtsum tsiv tawm ntawm txuj kev kws pe mlom. 15Kuv has rua mej ib yaam le has rua cov tuabneeg kws paubtaab; mej cale khaws kuv tej lug coj moog ua tuabzoo xaav. 16Lub khob kws peb siv thaus peb noj tug Tswv Rooj Mov kws peb ua Vaajtswv tsaug: thaus peb txais lub khob lug haus, yog peb koom nrug Khetos cov ntshaav. Thaus peb ndlais lub ncuav lug noj, yog peb koom nrug Khetos lub cev. #Math 26:26-28; Malak 14:22-24; Lukas 22:19-20 17Ruaqhov tsuas muaj tuablub ncuav xwb, txawm yog peb muaj coob leej los suavdlawg yog ib lub cev, ruaqhov peb koom noj tuablub ncuav xwb.

18Ua tuabzoo saib cov tuabneeg Yixalayees; cov kws noj tej khoom fij ntawm lub thaaj yeej muaj feem ua num rua ntawm lub thaaj puas yog? #Levi 7:6 19Puas yog kuv suav has tas tej mlom lossis tej zaub-mov kws muab fij rua tej mlom ntawd tseemceeb heev? 20Tsi yog le ntawd! Kuv has tas tej kws cov tuabneeg tsi paub Vaajtswv nqaa tuaj fij rua sau lub thaaj yog puab fij rua dlaab xwb, tsi yog fij rua Vaajtswv. Kuv yeej tsi xaav kuas mej muaj feem koom nrug dlaab hlo le. #2Kev 32:17 21Mej yuav haus tug Tswv lub khob hab haus dlaab lub khob yeej tsi tau hlo le. Mej yuav noj tug Tswv rooj mov hab noj dlaab rooj mov yeej tsi tau hlo le. 22Puas yog peb xaav ua kuas tug Tswv khib? Peb xaav tas peb tseem muaj fwjchim dlua Nwg nua lov? #2Kev 32:21

23Suavdlawg pheej has tas, “Peb yeej muaj cai ua tau txhua yaam,” tabsis tsi yog txhua yaam ntawd yuav muajnqes huv tuabsi. “Peb yeej muaj cai ua tau txhua yaam,” tabsis tsi yog txhua yaam ntawd yuav paab tau peb huv tuabsi. #1Klt 6:12 24Mej tsi xob xaam pum yaam kws zoo rua yug xwb, tabsis yuavtsum xaam pum yaam kws zoo rua lwmtug hab.

25Txhua yaam nqaj kws luas muag huv tej kab tej khw mej noj tau huv tuabsi, tsi taag yuav nug, es ua rua mej nyuajsab, 26ruaqhov Vaajtswv Txujlug has tas, “Lub nplajteb hab ibpuas tsaavyaam kws nyob huv lub nplajteb puavleej yog tug Tswv le.” #Nnkauj 24:1

27Yog ib tug kws tsi tau ntseeg hu mej moog noj mov hab mej yeej txavtxim sab moog, mej cale noj tej kws luas rau rua mej noj, tsi taag kws yuav nug, es ua rua mej nyuajsab. 28Tabsis yog muaj tuabneeg qha rua mej has tas, “Tej zaub-mov ntawd tub muab fij rua tej mlom lawm,” tes mej tsi xob noj, vim saib rua tug kws qha rua mej kuas tsi xob nyuajsab. 29Kuv has le ntawd tsi yog has txug mej qhov kev nyuajsab, tabsis yog has txug tug kws qha rua mej ntawd qhov kev nyuajsab.

Qeeleej nug has tas, “Vim lecaag kuv txuj kev ywjpheej ho raug taavkev lug ntawm lwmtug txuj kev nyuajsab? 30Yog kuv tub ua Vaajtswv tsaug rua kuv tej zaub-mov taag lawm, leejtwg tseem yuav muaj cuabkaav has tsi zoo txug tej zaub-mov kws kuv tub ua Vaajtswv tsaug ntawd lawm hab?”

31Yogle ntawd, txawm mej yuav noj yuav haus lossis yuav ua ib yaam dlaabtsi, mej yuavtsum ua txhua yaam kuas Vaajtswv tau ntsejmuag. 32Tsi xob ua ib yaam dlaabtsi kws yuav ua rua cov tuabneeg Yudais lossis Lwmtsaav Tuabneeg lossis Vaajtswv pawg ntseeg xaav yuamkev. 33Mej yuavtsum ua le kuv ua; kuv yeej ua txhua yaam npaum le yuav ua tau kuas hum suavdlawg sab, tsi yog kuv xaav ua kuas zoo rua kuv xwb, tabsis ua kuas zoo rua suavdlawg huv tuabsi, sub puab txhaj yuav dlim tau.

Currently Selected:

1 Kauleethaus 10: HNJ2022

Highlight

Copy