Zaˬkaˬliˇ 5
5
Yaw sahˇ laꞈ kʼoeˇ ya siˬ ya mawˇ-euˬ zaw luꞈ-eu sahˬ boꞈ paˇ yoˆ
1Ngaˇ tiˬ paw paˇ haw gʼeh ngeh, zaw luꞈ-eu sahˬ boꞈ paˇ yoˆ tiˬ yoˆ mawˇ-euˬ ma. 2“Nawˇ aˬ jeˬ mawˇ teˬ” lehˇ, mˬ taˆ gʼaˬ kʼehˇ kʼoeˇ gʼaˬ naˇ haˬ laˇ ngeh, “Yaw mahˇ paw nyiˬ tseˇ caˆ byah-awˇ, yaw jeˇ paw tseˇ caˆ byah-eu sahˬ boꞈ paˇ yoˆ tiˬ yoˆ zaw luꞈ gaˇ mawˇ-euˬ ma” lehˇ ngaˇ ehˇ kʼoꞈ nehˬ-euˬ ma.
3Kʼoeˇ naˇ, aˬ yawꞈ heu loꞈ-ehˇ ehˇ-eu meh. “Miˇ tsaˬ tahˬ kʼawˇ doe ni yaˬ kʼehˇ yaˬ taˬ-euˬ dawˬ deuˬ, sahˬ boꞈ paˇ yoˆ kʼoeˇ yoˆ laꞈ kʼoeˇ boꞈ ahˇ taˬ-euˬ meh. Smˇ kʼoeˬ yawˬ gʼaˬ na luꞈ paˬ tseuˆ tseuˆ dzeh gaˇ ya daˬ-eu gaˇ kawˆ tiˬ paw paˆ boꞈ taˬ-awˇ, jaˬ myawꞈ myawꞈ-awˇ kamˬ-eu tsawˇ haˬ yawˬ gʼaˬ na luꞈ kʼawꞈ, paˬ tseuˆ tseuˆ dzeh gaˇ ya daˬ-eu gaˇ kawˆ tiˬ paw paˆ boꞈ taˬ-euˬ meh. 4Baoˬ huiˬ-eu Sahˬpaˬ Miˬyehˇ neh yaˬ kʼehˇ yaˬ-euˬ heu pyehˬ kʼawˬ gʼeh-awˇ, smˇ kʼoeˬ yawˬ gʼaˬ na luꞈ-euˬ nymˇ hawˇ-eu, jaˬ myawꞈ myawꞈ-awˇ kamˬ-eu tsawˇ haˬ yawˬ gʼaˬ na luꞈ-euˬ nymˇ-ahˇ uˇ keuˆ-iˇ-eu uˬ taꞈ, nymˇ kʼoeˇ deuˬ-euˬ laꞈ kʼoeˇ jawˇ-awˇ, luˬ-iˇ seˇ-iˇ-eu jeˬ bi keuˆ le tehꞈ-a lehˇ, Sahˬpaˬ Miˬyehˇ ehˇ-eu meh.”
Yaw sahˇ laꞈ kʼoeˇ ya mawˇ-euˬ pawˬ tuˇ-ahˇ uˇ-eu zaˬ miˬ zaˬ
5Mˬ taˆ gʼaˬ kʼehˇ kʼoeˇ gʼaˬ mehˬ hu paw paˇ doˆ le-awˇ, “Aˬ jeˬ oe luꞈ nga lehˇ haw sheˇ” lehˇ, ngaˬ-ahˇ ehˇ-eu meh.
6“Aˬ jeˬ-a” lehˇ ngaˇ naˇ haˬ ngeh, “Pawˬ tuˇ meh. Pawˬ tuˇ heu siˬ-aˬ, miˇ kʼahˬ kʼahˬ lah ni-euˬ iˬ baˇ dah zaˇ meh” lehˇ ehˇ-eu meh.
7Pawˬ tuˇ kʼoeˇ siˬ-aˬ, za siˬ neh jahˇ-euˬ kʼawˬ pymˬ tsoꞈ-eu meh. Ngaˇ haw haw-ehˇ jawˇ ngeh, kʼawˬ pymˬ kʼoeˇ pah laˇ-awˇ, laꞈ kʼoeˇ paw zaˬ miˬ zaˬ tiˬ gʼaˬ nuiˇ luꞈ-eu meh.
8“Zaˬ miˬ zaˬ heu gʼaˬ-aˬ, maˬ sui maˬ dawˇ-eu jeˬ pyeuꞈ-eu meh” lehˇ, mˬ taˆ gʼaˬ kʼehˇ kʼoeˇ gʼaˬ ehˇ-awˇ, pawˬ tuˇ laꞈ kʼoeˇ paˇ dehˬ ahˇ kʼoꞈ nehˬ-awˇ, kʼawˬ pymˬ pymˬ tehˬ-euˬ meh. 9Ngaˇ paˇ haw daˆ leꞈ ngeh, hahˬ byaꞈ-euˬ aˬ dahˇ loꞈ-ehˇ gʼaˬ kʼaˆ dui dui-eu aˬ dahˇ tsoꞈ-eu zaˬ miˬ zaˬ nyiˬ gʼaˬ, ngaˇ jawˇ paw zaw ka leꞈ gaˇ ya mawˇ-euˬ ma. Aˬ yawꞈ nyaꞈ pawˬ tuˇ kʼoeˇ siˬ tsi-awˇ paˇ zaw daˆ kʼoꞈ leꞈ-euˬ meh.
10“Aˬ geu paw tsi gʼeh-eu lehˇ gʼeh ta” lehˇ, mˬ taˆ gʼaˬ kʼehˇ kʼoeˇ gʼaˬ-ahˇ ngaˇ naˇ haˬ-euˬ ma. 11Mˬ taˆ gʼaˬ kʼehˇ kʼoeˇ gʼaˬ ehˇ-eu, “Baˬbuˇloˬ miˇ kʼahˬ-ahˇ tsi gʼeh-awˇ, pawˬ tuˇ kʼoeˇ siˬ gʼaˇ duˬ, kʼoeˇ gaˇ uˬ duˬ tahˬ nymˇ tiˬ nymˇ tsoˆ-eu lehˇ gʼeh-eu meh. Uˬ duˬ tahˬ nymˇ kʼoeˇ nymˇ tsoˆ gʼaˬ naˇ, pawˬ tuˇ kʼoeˇ siˬ kʼoeˇ gaˇ bi jaˆ-awˇ, uˬ duˬ tahˬ tehꞈ-a.”
Currently Selected:
Zaˬkaˬliˇ 5: AHK
Highlight
Share
Compare
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
