Zaˬkaˬliˇ 13
13
1Baoˬ huiˬ-eu Sahˬpaˬ Miˬyehˇ ehˇ-eu, “Aˇ nah aˇ yamˬ kʼoeˇ keuˆ laˇ ngeh, Daˬbiˇ-euˬ zaˬ deuˬ uˆ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-euˬ iˬ baˇ yaw jawꞈ yaw laꞈ tsiˬ shawˇ-eu gʼaˇ duˬ, iˇ cuꞈ lawˇ kʼawꞈ tiˬ gawˆ pah tehꞈ-a. 2Aˇ yamˬ kʼoeˇ yamˬ keuˆ laˇ ngeh, miˇ kʼahˬ kʼoeˇ kʼahˬ-ahˇ jaˆ-eu tahˬ pahˬ aˬ ma mawˇ kawˇ deuˬ-euˬ tsawˇ myahˇ ngaˇ shiˆ byoˆ-awˇ, tsawˇ haˬ yawˬ gʼaˬ na luꞈ bi ngehˇ byoˆ jiˇ ma. Miˬyehˇ gʼaˇ duˬ ngehˬ dah-eu tsawˇ haˬ ma lehˇ kʼaˇ ehˇ-eu deuˬ-ahˇ ngaˇ yuˇ dzeh jiˇ-awˇ, tahˬ pahˬ aˬ ma mawˇ kawˇ-ahˇ uˬ duˬ tahˬ mawꞈ-eu nui ma bi byoˆ-iˇ ma. 3Tsawˇ haˬ tiˬ gʼaˬ na Miˬyehˇ gʼaˇ duˬ ngehˬ dah-eu gʼaˬ paˇ geuꞈ laˇ naˇ, ‘Nawˇ Sahˬpaˬ Miˬyehˇ-euˬ dawˬ ngehˬ dah-eu ma lehˇ ehˇ-awˇ jaˬ myawꞈ myawꞈ-eu miˇ neh ya shiˇ tehꞈ-a’ lehˇ aˬ yawꞈ-euˬ zaˬ baw aˬ ma aˬ da aˬ yawꞈ-ahˇ ehˇ tehꞈ-a. Aˬ yawꞈ miˬyehˇ gʼaˇ duˬ ngehˬ dah ngeh, aˬ yawꞈ-euˬ zaˬ baw aˬ ma aˬ da aˬ yawꞈ-ahˇ tsawˆ sehꞈ tehꞈ-a. 4Aˇ yamˬ kʼoeˇ yamˬ keuˆ laˇ ngeh, Miˬyehˇ gʼaˇ duˬ ngehˬ dah-eu tsawˇ haˬ deuˬ yawˬ ha neh yaw sahˇ laꞈ kʼoeˇ ya siˬ ya mawˇ-euˬ gaˇ kawˆ maˬ ehˇ doˆ peuˬ ni shaꞈ dawˇ tehꞈ-a. Miˬyehˇ gʼaˇ duˬ ngehˬ dah-eu deuˬ dm-eu caꞈ hm neh zaꞈ taꞈ-euˬ pehˇ kʼahˬ pehˇ mahˇ dm-awˇ miˇ kʼahˬ zaˬ-ahˇ myawꞈ dzaˬ-eu jeˬ maˬ paˇ jahˇ-aˇ. 5‘Ngaˇ Miˬyehˇ gʼaˇ duˬ ngehˬ dah-eu tsawˇ haˬ maˬ ngeuˇ. Deh yaˇ mˇ dzaˬ-eu tsawˇ haˬ ma. Ngaˬ-euˬ tiˬ ziˇ deh yaˇ mˇ dzaˬ daˆ laꞈ-euˬ ma’ lehˇ ehˇ tehꞈ-a. 6‘Nawˬ-euˬ kʼahˬ-ahˇ maˇ byawꞈ baw-eu teu aˬ jeˬ-a’ lehˇ, tsawˇ haˬ tiˬ gʼaˬ na naˇ haˬ ngeh, ‘Ngaˬ-euˬ cawˬ-euˬ nymˇ-ahˇ laˆ tahˬ-euˬ maˇ byawꞈ ma’ lehˇ aˬ yawꞈ ehˇ tehꞈ-a.”
Miˬyehˇ-euˬ yawˇ bo-eu tsawˇ haˬ-ahˇ sehꞈ-eu dawˬ biꞈ-euˬ
7Sahˬpaˬ Miˬyehˇ Baoˬ huiˬ-eu gʼaˬ,
heu loꞈ-ehˇ dawˬ biꞈ nehˬ-euˬ meh.
“Mi cehˇ-oˇ, noeˬ laˇ-awˇ tuˇ-awˬ.
Ngaˬ-euˬ yawˇ bi bo-euˬ tsawˇ haˬ,
ngaˬ-euˬ dawˬ peh yawꞈ-eu gʼaˬ-ahˇ,
sehꞈ-eu gʼaˇ duˬ yaw kawˇ tuˇ-awˬ.
Yawˇ deuˬ cehˆ byoˆ cehˆ laˆ jiˇ ni,
Yawˇ bo-eu gʼaˬ-ahˇ deuˆ sehꞈ-awˬ.
Yawˇ zaˬ deuˬ-ahˇ ngaˇ kʼehˬ-eu ma.”
8Sahˬpaˬ Miˬyehˇ ehˇ-eu,
“Miˇ kʼahˬ heu kʼahˬ kʼahˬ lah kʼoeˇ taˆ,
smˬ bymˇ nyiˬ bymˇ shiˇ byoˆ jiˇ-awˇ,
smˬ bymˇ tiˬ bymˇ dehꞈ yaꞈ tehꞈ-a.
9Smˬ bymˇ tiˬ bymˇ dzeˇ-eu deuˬ-ahˇ,
miˬ dzaˬ laꞈ kʼoeˇ ngaˇ dzeh puiˆ-awˇ,
pyuˇ baw guiˇ-awˇ shawˇ-eu loꞈ-ehˇ,
shmˇ yaw muiˬ lawˬ haw-euˬ loꞈ-ehˇ,
ngaˇ laˆ muiˬ laˆ shawˇ kʼoꞈ geuꞈ ma.
Ngaˬ-euˬ tsawˇ myahˇ yawꞈ maꞈ kuˇ-awˇ,
yawꞈ maꞈ-ahˇ ngaˇ oˬ toˬ nehˬ ma.
‘Naw maꞈ ngaˬ-euˬ tsawˇ haˬ ma’ lehˇ
aˬ yawꞈ maꞈ-ahˇ ngaˇ ehˇ nehˬ ngeh,
‘Sahˬpaˬ Miˬyehˇ pyeuꞈ-eu Miˬyehˇ’,
nga maꞈ-euˬ Miˬyehˇ ngeuˇ ma lehˇ,
aˬ yawꞈ maꞈ saˇ kiˇ kamˬ tehꞈ-a.”
Currently Selected:
Zaˬkaˬliˇ 13: AHK
Highlight
Share
Compare
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
