Bawˇtsahˬ 8
8
Tsiˇ kʼmˬ ciˬ taˬ-euˬ
1Moˇseˬ-ahˇ Sahˬpaˬ Miˬyehˇ ehˇ nehˬ-eu, 2“Tsiˇ kʼmˬ doꞈ taˬ duˬ kʼoeˇ taˆ tsiˇ kʼmˬ shiꞈ kʼmˬ ciˬ daˆ taˬ ngeh, mehˬ shi paw yaw shehꞈ bya ni ciˬ taˬ-awˬ lehˇ Aˬloˬ-ahˇ ehˇ nehˬ-awˬ.” 3Dawˬ kʼoeˇ dawˬ-ahˇ Aˬloˬ naˇ haˬ geuꞈ-awˇ, tsiˇ kʼmˬ kʼoeˇ deuˬ ciˬ daˆ taˬ ngeh, tsiˇ kʼmˬ doꞈ taˬ duˬ-euˬ mehˬ shi paw mehˬ shiˬ pyawˇ-ehˇ ciˬ taˬ-euˬ meh. 4Moˇseˬ-ahˇ Sahˬpaˬ Miˬyehˇ yaw duˬ duˬ-ehˇ mehˬ nehˬ-euˬ loꞈ-ehˇ, tsiˇ kʼmˬ doꞈ taˬ duˬ kʼoeˇ hmˬ-ahˇ, uˬ duˬ-ahˇ neh dawˬ pehˬ-ahˇ keuˆ ni shuiˇ neh tehˆ taˬ-euˬ meh.
Leˬbiˇ tsawˇ haˬ deuˬ-ahˇ bi muiˬ bi shawˇ laˇ-awˇ a nehˬ-euˬ
5Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 6“Iˇsaˬleˬlaˆ tsawˇ haˬ deuˬ hawˇ-eu Leˬbiˇ tsawˇ haˬ biˇ paˆ-awˇ, Leˬbiˇ tsawˇ haˬ deuˬ bi muiˬ bi shawˇ laˇ-eu zahˇ jahˇ-awˬ. 7Aˬ yawꞈ maꞈ muiˬ laˇ shawˇ laˇ ni heu loꞈ-ehˇ jahˇ-awˬ. Bi muiˬ bi shawˇ laˇ-eu iˇ cuꞈ aˬ yawꞈ maꞈ-ahˇ byaˆ shehˬ nehˬ-awˇ, aˬ yawꞈ maꞈ-euˬ gʼawˇ mawˇ mawˇ lah-ehˇ caꞈ hm jehˆ dzeh-awˇ, mehˬ tsoeˬ lehˬ tsiˬ shawˇ-awˬ lehˇ ehˇ nehˬ-awˬ. 8Mawˇ neˇ mawˇ gaw zaˬ tiˬ mawˇ hawˇ-eu dzaˬ la gʼo cehˇ lawˇ-eu jeˬ gʼaˇ duˬ, saˬ loˬ tsiˇ keuˬ taˬ-euˬ cehˇ meu aˬ yawꞈ maꞈ ya yuˇ laꞈ-awˇ, iˬ baˇ shawˇ-eu lawˇ-eu jeˬ gʼaˇ duˬ mawˇ neˇ mawˇ gaw yawˬ mawˇ yawˬ nawˇ ya yuˇ laꞈ meh. 9Kʼoeˇ naˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ kuˇ uiˬ-awˇ, Leˬbiˇ tsawˇ haˬ deuˬ-ahˇ ngaˇ jawˇ-eu Sehˬ gʼawˆ mehˬ shi bi yawꞈ-awˬ. 10Kʼoeˇ ngeh, Leˬbiˇ tsawˇ haˬ deuˬ-euˬ uˬ duˬ kʼoeˇ taˆ Iˇsaˬleˬlaˆ tsawˇ haˬ deuˬ aˬ laꞈ ya baꞈ daˆ meh. 11Kʼoeˇ naˇ, Leˬbiˇ tsawˇ haˬ deuˬ-ahˇ ngaˬ-euˬ gaˇ bi mˇ-eu gʼaˇ duˬ Iˇsaˬleˬlaˆ tsawˇ haˬ deuˬ neh damˬ nehˬ laꞈ-euˬ laꞈ sawˬ loꞈ-ehˇ, Aˬloˬ neh ngaˬ-ahˇ ya bi a nehˬ laꞈ meh. 12Kʼoeˇ ngeh, mawˇ neˇ mawˇ gaw kʼoeˇ nyiˬ mawˇ-euˬ uˬ duˬ kʼoeˇ taˆ Leˬbiˇ tsawˇ haˬ deuˬ aˬ laꞈ ya baꞈ daˆ meh. Leˬbiˇ tsawˇ haˬ deuˬ bi muiˬ bi shawˇ laˇ-eu zahˇ jahˇ-eu gʼaˇ duˬ, mawˇ neˇ mawˇ gaw kʼoeˇ tiˬ mawˇ-ahˇ iˬ baˇ shawˇ-eu lawˇ-eu jeˬ lawˇ-awˇ, yawˬ mawˇ yawˬ-ahˇ miˬ dzaˬ dzah puiˆ-awˇ lawˇ-eu jeˬ ya lawˇ meh.
13“Leˬbiˇ tsawˇ haˬ deuˬ-ahˇ muiˬ-eu laꞈ sawˬ loꞈ-ehˇ ngaˬ-ahˇ a nehˬ laꞈ-awˇ, Aˬloˬ hawˇ-eu aˬ yawꞈ-euˬ aˬ li deuˬ neh aˬ yawꞈ maꞈ-ahˇ bi haw bi pyaˆ-awˬ. 14Leˬbiˇ tsawˇ haˬ deuˬ ngaˬ-euˬ tsawˇ haˬ pyeuꞈ laˇ ni, kʼoeˇ loꞈ-ehˇ jahˇ-eu laꞈ kʼoeˇ, Leˬbiˇ tsawˇ haˬ deuˬ-ahˇ Iˇsaˬleˬlaˆ tsawˇ jeuˬ nui deuˬ nehˬ-ehˇ biˇ paˆ-awˬ. 15Leˬbiˇ tsawˇ haˬ deuˬ bi muiˬ bi shawˇ laˇ ni mˇ shawˇ nehˬ-awˇ, a nehˬ gʼaˬ naˇ, aˬ yawꞈ maꞈ ngaˬ-euˬ gaˇ mˇ-eu tsawˇ haˬ pyeuꞈ laˇ-eu meh. 16Iˇsaˬleˬlaˆ tsawˇ haˬ deuˬ laꞈ kʼoeˇ dehꞈ beh beh le-euˬ aˬ li aˬ yuiꞈ deuˬ-euˬ jawˇ duˬ-ahˇ aˬ yawꞈ maꞈ-ahˇ ngaˇ taˬ-awˇ, aˬ yawꞈ maꞈ-aˬ, ngaˬ-ahˇ tehꞈ-ehˇ taꞈ-eu tsawˇ haˬ pyeuꞈ-eu ma. 17Iˇjiˇtuˆ miˇ kʼahˬ laꞈ kʼoeˇ, dehꞈ beh beh le-euˬ deuˬ dawˬ tawˆ luꞈ-ahˇ ngaˇ sehꞈ dzeh ngeh, Iˇsaˬleˬlaˆ nymˇ jiˇ aˬ yawꞈ jiˇ yawꞈ laꞈ kʼoeˇ dehꞈ beh beh le-euˬ aˬ li aˬ yuiꞈ deuˬ hawˇ-eu dehꞈ beh beh le-euˬ jeˬ zaˬ deuˬ-ahˇ ngaˬ-euˬ gʼaˇ duˬ yuˇ doˆ taˬ-euˬ ma. 18Nymˬ-mˇ poˆ-aˬ, dehꞈ beh beh le-euˬ deuˬ dah zaˇ, Leˬbiˇ tsawˇ haˬ deuˬ-ahˇ ngaˇ yuˇ-eu ma. 19Iˇsaˬleˬlaˆ tsawˇ haˬ deuˬ gʼaˇ duˬ Sehˬ gʼawˆ laꞈ kʼoeˇ gaˇ bi mˇ-eu gʼaˇ duˬ maˬ ehˇ, Iˇsaˬleˬlaˆ tsawˇ haˬ deuˬ muiˬ-eu shawˇ-eu jawˇ duˬ dawˬ peh le-eu baˬ da neh luˬ-iˇ seˇ-iˇ-eu jeˬ maˬ ya keuˆ le-eu gʼaˇ duˬ maˬ ehˇ, Iˇsaˬleˬlaˆ tsawˇ haˬ deuˬ neh biꞈ-euˬ muiˬ-eu laꞈ sawˬ loꞈ-ehˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ Leˬbiˇ tsawˇ haˬ deuˬ ngaˇ biꞈ nehˬ ma.”
20Moˇseˬ-ahˇ Sahˬpaˬ Miˬyehˇ neh dawˬ biꞈ nehˬ-euˬ loꞈ-ehˇ, Moˇseˬ, Aˬloˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ gʼeh-awˇ, Leˬbiˇ tsawˇ haˬ deuˬ a nehˬ-eu jeˬ mˇ-euˬ meh. 21Leˬbiˇ tsawˇ haˬ deuˬ yawˬ ha-euˬ gʼawˇ mawˇ laˆ muiˬ laˆ shawˇ-awˇ, yawˬ ha-euˬ mehˬ tsoeˬ lehˬ tsiˬ shawˇ-euˬ meh. Kʼoeˇ naˇ, Aˬloˬ gʼaˬ, Leˬbiˇ tsawˇ haˬ deuˬ-ahˇ, muiˬ-eu laꞈ sawˬ loꞈ-ehˇ Sahˬpaˬ Miˬyehˇ-ahˇ a nehˬ-euˬ meh. Aˬ yawꞈ maꞈ bi muiˬ bi shawˇ laˇ-eu gʼaˇ duˬ kʼawꞈ, Aˬloˬ jahˇ-euˬ meh. 22Leˬbiˇ tsawˇ haˬ-ahˇ taꞈ leˇ-awˇ Moˇseˬ-ahˇ Sahˬpaˬ Miˬyehˇ neh dawˬ kʼaˇ biꞈ-euˬ loꞈ-ehˇ, aˬ yawꞈ maꞈ mˇ-euˬ meh. Kʼoeˇ naˇ, Leˬbiˇ tsawˇ haˬ deuˬ-aˬ, Aˬloˬ hawˇ-eu aˬ yawꞈ-euˬ aˬ li deuˬ-euˬ laꞈ oˆ jawˇ-awˇ, Sehˬ gʼawˆ laꞈ kʼoeˇ gaˇ mˇ geuˇ-eu tsawˇ haˬ pyeuꞈ laˇ-euˬ meh.
23Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 24“Nyiˬ tseˇ ngaˬ kʼoꞈ-ahˇ neh laꞈ taˆ paw-euˬ Leˬbiˇ tsawˇ haˬ aˬ yawꞈ gʼaˬ yawꞈ, ngaˇ jawˇ-eu Sehˬ gʼawˆ laꞈ kʼoeˇ yawˬ ha-ahˇ doˇ-eu gaˇ ya mˇ meh. 25Ehˇ kʼawꞈ, aˇ kʼoꞈ ngaˬ tseˇ byah laˇ naˇ, gaˇ maˬ paˇ mˇ ni ya naˬ meh. 26Kʼoeˇ naˇ, Sehˬ gʼawˆ laꞈ kʼoeˇ gaˇ mˇ luꞈ-eu yawˬ ha-euˬ aˬ yuiꞈ aˬ nyiˇ Leˬbiˇ tsawˇ haˬ deuˬ-ahˇ ya caw ba meh. Ehˇ kʼawꞈ, yawˬ haˇ yawˬ ha gaˇ tawˬ-awˇ maˬ ya mˇ-a. Heu-aˬ, Leˬbiˇ tsawˇ haˬ deuˬ-ahˇ nawˇ aˬ joˆ-ehˇ gaˇ ya biˇ mˇ-eu gaˇ kawˆ meh.”
Currently Selected:
Bawˇtsahˬ 8: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
