Bawˇtsahˬ 31
31
Miˇdiˬyaˬ tsawˇ haˬ deuˬ nehˬ-ehˇ guiˇ deuˆ-euˬ
1Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 2“Naw maꞈ-ahˇ miˬyehˇ nui gʼaˬ-ahˇ uˬ duˬ tahˬ ni jahˇ nehˬ laꞈ-euˬ Miˇdiˬyaˬ tsawˇ haˬ deuˬ-ahˇ kʼehˬ nehˬ-awˬ. Kʼoeˇ loꞈ-ehˇ jahˇ kʼoꞈ nehˬ gʼaˬ naˇ, nawˇ ya shiˇ-eu aˇ nah aˇ yamˬ keuˆ le tehꞈ-a.”
3Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Guiˇ deuˆ-eu gʼaˇ duˬ lehˬ hmˬ-awˬ. Miˇdiˬyaˬ tsawˇ haˬ neh Sahˬpaˬ Miˬyehˇ-ahˇ jahˇ nehˬ-euˬ aˇ poeˬ, aˬ yawꞈ maꞈ-ahˇ naw maꞈ guiˇ deuˆ-awˇ kʼehˬ nehˬ leˇ-awˬ. 4Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ, guiˇ deuˆ gaˇ tsawˇ haˬ tiˬ heˇ gʼaˬ bi le-awˬ.”
5Tsawˇ jeuˬ aˬ yawꞈ jeuˬ yawꞈ laꞈ kʼoeˇ tsawˇ haˬ tiˬ heˇ gʼaˬ tseˇ doˆ-awˇ, guiˇ deuˆ leˇ-eu gʼaˇ duˬ tsawˇ haˬ dawˬ tawˆ luꞈ tiˬ muiˇ nyiˬ heˇ gʼaˬ lehˬ hmˬ taˬ-euˬ meh. 6Moˇseˬ-aˬ, tsawˇ haˬ kʼoeˇ deuˬ-ahˇ, muiˬ-eu shawˇ-eu keu ka hawˇ-eu daˇ heh yuˇ luꞈ-eu piˇ ma Eˇlaˬzaˬ-euˬ aˬ li Piˇnaˬhaˇ neh bi uˆ lahˇ-awˇ, guiˇ bi deuˆ leˇ-euˬ meh. 7Moˇseˬ-ahˇ Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Miˇdiˬyaˬ tsawˇ haˬ-ahˇ aˬ yawꞈ maꞈ guiˇ deuˆ leˇ-awˇ, kʼaˬ dzeˇ zaˬ dawˬ tawˆ luꞈ-ahˇ sehꞈ-euˬ meh. 8Miˇdiˬyaˬ tsawˇ haˬ deuˬ-euˬ sahˬpaˬ ngaˬ gʼaˬ pyeuꞈ-eu Eˇbiˇ, Leˬkeˬ, Zuˇlaˆ, Huˇlaˆ hawˇ-eu Leˬbaˇ-ahˇ kʼawꞈ, sehꞈ-euˬ meh. Beˬyoˇ-euˬ aˬ li Baˬlamˬ-ahˇ kʼawꞈ, aˬ yawꞈ maꞈ sehꞈ-euˬ meh.
9Miˇdiˬyaˬ tsawˇ haˬ zaˬ miˬ zaˬ deuˬ hawˇ-eu zaˬ deuˬ-ahˇ Iˇsaˬleˬlaˆ tsawˇ haˬ deuˬ neh nyehꞈ-awˇ, aˬ yawꞈ maꞈ-euˬ jeˬ zaˬ deuˬ hawˇ-eu myawˬ gahˬ deuˬ kʼawꞈ, yuˇ geuꞈ jiˇ nehˬ-euˬ meh. 10Aˬ yawꞈ maꞈ-euˬ meuˬ hawˇ-eu pu dawˬ tawˆ luꞈ-ahˇ kʼawꞈ, miˬ dzaˬ keuˬ puiˆ dzeh-euˬ meh. 11Tsawˇ haˬ hawˇ-eu jeˬ zaˬ ahˇ leˇ-ehˇ, aˬ yawꞈ maꞈ neh kʼaˇ deuˆ za-euˬ jeˬ dawˬ tawˆ luꞈ yuˇ jiˇ-awˇ, 12Yeˬliˇkoˇ meuˬ kʼoeˇ paw baˬ-ahˇ, Yawˇdaˬ lawˇ baˬ lawˇ deh-ahˇ jaˆ-eu Mawˇbaˆ miˇ kʼahˬ deh ga-ahˇ jawˇ luꞈ-eu Moˇseˬ, Eˇlaˬzaˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ deuˬ jawˇ gaˇ yuˇ kʼoꞈ gʼeh-euˬ meh.
Guiˇ maꞈ deuˬ gʼoꞈ le-euˬ
13Moˇseˬ, Eˇlaˬzaˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ kʼoeˇ taˆ aˬ yuiꞈ aˬ tsu geuꞈ-eu tsawˇ haˬ dawˬ tawˆ luꞈ doˆ-iˇ-awˇ, guiˇ guiˇ maꞈ-ahˇ ha leˇ-euˬ meh. 14Guiˇ deuˆ leˇ-eu gʼoꞈ le-euˬ guiˇ maꞈ laꞈ kʼoeˇ, aˇ heˇ gʼaˬ-ahˇ uˆ lahˇ-eu yaw huiˬ deuˬ hawˇ-eu aˇ yaˇ gʼaˬ-ahˇ uˆ lahˇ-eu yaw huiˬ deuˬ-ahˇ Moˇseˬ nui ma pehˇ-eu meh. 15Aˬ yawꞈ ehˇ-eu, “Aˬ jeˬ miˇ neh zaˬ miˬ zaˬ heu deuˬ dawˬ tawˆ luꞈ-ahˇ yaw dehꞈ-ehˇ bi jawˇ teˬ. 16Peˬoˇ lehˇ kuˇ-eu jawˇ duˬ-ahˇ zaˬ miˬ zaˬ heu deuˬ Baˬlamˬ neh mehˬ nehˬ-euˬ loꞈ-ehˇ mˇ-awˇ, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ saˇ jaˇ maˬ ziꞈ ni pyeuꞈ-iˇ-euˬ naw maꞈ ngehˇ teˬ loˇ. Kʼoeˇ baˬ da neh Sahˬpaˬ Miˬyehˇ-euˬ tsawˇ haˬ deuˬ kʼoeˇ taˆ luˬ-iˇ seˇ-iˇ-eu jeˬ keuˆ le-euˬ maˬ ngeuˇ-a loˇ. 17Kʼoeˇ miˇ neh, aˬ li yawˬ gʼaˬ na luꞈ hawˇ-eu, kʼaˬ dzeˇ zaˬ nehˬ-ehˇ kʼaˇ yuꞈ taꞈ haw-euˬ zaˬ miˬ zaˬ yawˬ gʼaˬ na luꞈ-ahˇ nymˬ-mˇ sehꞈ-awˬ. 18Ehˇ kʼawꞈ, aˬ buˇ deuˬ hawˇ-eu kʼaˬ dzeˇ zaˬ neh maˬ bi laˆ ciˆ haw-euˬ miˬ daꞈ daꞈ shuiꞈ deuˬ dawˬ tawˆ luꞈ-ahˇ naw maꞈ cu geuꞈ-awˬ. 19Naw maꞈ laꞈ kʼoeˇ, tsawˇ haˬ sehꞈ-euˬ deuˬ hawˇ-eu shiˇ taˬ-euˬ tsawˇ haˬ-ahˇ kʼaˇ toeˬ ciˆ-eu deuˬ pu laꞈ nyiˇ shiꞈ nah byah ni jawˇ-awˬ. Smˬ nah tiˬ nah hawˇ-eu shiꞈ nah tiˬ nah-ahˇ naw maꞈ-euˬ gʼawˇ mawˇ hawˇ-eu naw maꞈ neh nyehꞈ laꞈ-euˬ zaˬ miˬ aˬ buˇ deuˬ yawˬ haˇ yawˬ ha shawˇ-awˬ. 20Mehˬ tsoeˬ saˬ paˇ dawˬ tawˆ luꞈ maˬ ehˇ, shaˬ kʼoˆ, ciꞈ myehꞈ caꞈ hm, yawˇ caꞈ hm, heu deuˬ neh kʼaˇ jahˇ taˬ-euˬ jeˬ dawˬ tawˆ luꞈ maˬ ehˇ, naw maꞈ ya shawˇ meh.”
21Guiˇ deuˆ leˇ-euˬ gʼoꞈ le-euˬ tsawˇ haˬ deuˬ-ahˇ piˇ ma Eˇlaˬzaˬ ehˇ nehˬ-eu, “Heu-aˬ, Moˇseˬ-ahˇ Sahˬpaˬ Miˬyehˇ neh biꞈ nehˬ-euˬ zahˇ sahˇ kʼoꞈ meh. 22Shuiˇ, pyuˇ, guiˬ shuiˇ, shmˇ, guiˬ ba, za siˬ, 23heu loꞈ-ehˇ gʼeh-eu miˬ dzaˬ maˬ puiˆ dzaˬ nya-eu mˇ myawˬ deuˬ-ahˇ miˬ dzaˬ-ahˇ myawꞈ-eu laꞈ kʼoeˇ ya bi muiˬ ya bi shawˇ laˇ meh. Nui jeˬ-ahˇ iˇ cuꞈ neh tsiˬ shawˇ-eu laꞈ kʼoeˇ ya bi muiˬ ya bi shawˇ laˇ meh. 24Shiꞈ nah tiˬ nah-ahˇ, naw maꞈ yawˬ ha-euˬ mehˬ tsoeˬ ya lehˬ tsiˬ shawˇ meh. Kʼoeˇ naˇ, naw maꞈ shawˇ laˇ-awˇ, pu-ahˇ gʼoꞈ uˇ laˇ nya meh.”
Guiˇ kʼaˇ deuˆ za-euˬ jeˬ biˇ geuꞈ-euˬ
25Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 26“Iˇsaˬleˬlaˆ tsawˇ haˬ aˇ maꞈ aˇ muˇ kʼoeˇ taˆ aˬ yuiꞈ aˬ tsu geuꞈ-eu deuˬ nehˬ-ehˇ, guiˇ kʼaˇ deuˆ za leꞈ-euˬ tsawˇ haˬ maˬ ehˇ, jeˬ zaˬ maˬ ehˇ, nui jeˬ dawˬ tawˆ luꞈ-ahˇ maˬ ehˇ, Eˇlaˬzaˬ naw nyaꞈ gui haw-awˬ. 27Kʼoeˇ deuˬ dawˬ tawˆ luꞈ-ahˇ nyiˬ bymˇ bymˇ-awˇ, guiˇ deuˆ leˇ-euˬ tsawˇ haˬ deuˬ-ahˇ tiˬ bymˇ hawˇ-eu, Iˇsaˬleˬlaˆ tsawˇ haˬ aˇ maꞈ aˇ muˇ deuˬ-ahˇ tiˬ bymˇ biꞈ nehˬ-awˬ. 28Guiˇ deuˆ leˇ-euˬ deuˬ-ahˇ oꞈ-eu shaˬ bymˇ laꞈ kʼoeˇ, tsawˇ haˬ ngaˬ yaˇ gʼaˬ-euˬ tiˬ gʼaˬ maˬ ehˇ, mawˇ neˇ, mahˬ tahˬ laˆ, yawˇ hawˇ-eu ciꞈ myehꞈ deuˬ kʼawꞈ, ngaˬ yaˇ mawˇ-euˬ tiˬ mawˇ maˬ ehˇ, Sahˬpaˬ Miˬyehˇ gʼaˇ duˬ kawˬ taꞈ doˆ-awˬ. 29Kʼoeˇ deuˬ-ahˇ Sahˬpaˬ Miˬyehˇ gʼaˇ duˬ yaw zawˇ muiˬ-eu damˬ-eu jeˬ loꞈ-ehˇ, piˇ ma Eˇlaˬzaˬ-ahˇ biꞈ-awˬ. 30Iˇsaˬleˬlaˆ tsawˇ haˬ deuˬ-ahˇ oꞈ-eu shaˬ bymˇ laꞈ kʼoeˇ, tsawˇ haˬ ngaˬ tseˇ gʼaˬ-euˬ tiˬ gʼaˬ maˬ ehˇ, mawˇ neˇ, mahˬ tahˬ laˆ, yawˇ hawˇ-eu ciꞈ myehꞈ deuˬ kʼawꞈ, ngaˬ tseˇ mawˇ-euˬ tiˬ mawˇ maˬ ehˇ, taꞈ uiˬ-awˇ, Sahˬpaˬ Miˬyehˇ-euˬ Sehˬ gʼawˆ laꞈ kʼoeˇ gaˇ mˇ-eu Leˬbiˇ tsawˇ haˬ deuˬ-ahˇ biꞈ-awˬ.” 31Sahˬpaˬ Miˬyehˇ neh dawˬ kʼaˇ biꞈ-euˬ loꞈ-ehˇ Moˇseˬ hawˇ-eu Eˇlaˬzaˬ aˬ nyaꞈ mˇ-euˬ meh.
32Guiˇ deuˆ leˇ-euˬ deuˬ neh deuˆ za leꞈ-awˇ dzeˇ-eu deuˬ-aˬ, yawˇ hawˇ-eu ciꞈ myehꞈ koꞈ seh shiꞈ muiˇ ngaˬ heˇ mawˇ, 33mawˇ neˇ shiꞈ muiˇ nyiˬ heˇ mawˇ, 34mahˬ tahˬ laˆ koꞈ muiˇ tiˬ heˇ mawˇ hawˇ-eu, 35kʼaˬ dzeˇ zaˬ neh maˬ bi laˆ ciˆ haw-euˬ miˬ daꞈ daꞈ shuiꞈ smˬ muiˇ nyiˬ heˇ gʼaˬ meh. 36Guiˇ deuˆ leˇ-euˬ deuˬ-ahˇ oꞈ-eu shaˬ bymˇ-aˬ, yawˇ hawˇ-eu ciꞈ myehꞈ smˬ seh smˬ muiˇ shiꞈ heˇ ngaˬ yaˇ mawˇ meh. 37Kʼoeˇ deuˬ laꞈ kʼoeˇ, Sahˬpaˬ Miˬyehˇ gʼaˇ duˬ koꞈ yaˇ shiꞈ tseˇ ngaˬ mawˇ kawˬ doˆ nehˬ-euˬ meh. 38Mawˇ neˇ smˬ muiˇ koꞈ heˇ mawˇ oꞈ-awˇ, kʼoeˇ-euˬ laꞈ kʼoeˇ, Sahˬpaˬ Miˬyehˇ gʼaˇ duˬ shiꞈ tseˇ nyiꞈ mawˇ kawˬ doˆ nehˬ-euˬ meh. 39Mahˬ tahˬ laˆ smˬ muiˇ ngaˬ yaˇ mawˇ oꞈ-awˇ, kʼoeˇ laꞈ kʼoeˇ, Sahˬpaˬ Miˬyehˇ gʼaˇ duˬ koꞈ tseˇ tiꞈ mawˇ kawˬ doˆ nehˬ-euˬ meh. 40Kʼaˬ dzeˇ zaˬ neh maˬ bi laˆ ciˆ haw-euˬ miˬ daꞈ daꞈ shuiꞈ tiˬ muiˇ koꞈ heˇ gʼaˬ oꞈ-awˇ, kʼoeˇ laꞈ kʼoeˇ, Sahˬpaˬ Miˬyehˇ gʼaˇ duˬ smˬ tseˇ nyiꞈ gʼaˬ kawˬ doˆ nehˬ-euˬ meh. 41Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Moˇseˬ-aˬ, kawˬ taꞈ za-euˬ kʼoeˇ deuˬ-ahˇ, Sahˬpaˬ Miˬyehˇ gʼaˇ duˬ yaw zawˇ muiˬ-eu damˬ-eu jeˬ loꞈ-ehˇ Eˇlaˬzaˬ-ahˇ biꞈ-euˬ meh.
42Guiˇ deuˆ leˇ-euˬ tsawˇ haˬ deuˬ nehˬ-ehˇ tiˬ gʼaˬ tiˬ paˆ Moˇseˬ biˇ gʼaˬ-awˇ, Iˇsaˬleˬlaˆ tsawˇ haˬ deuˬ-ahˇ oꞈ-eu shaˬ bymˇ-aˬ, 43yawˇ hawˇ-eu ciꞈ myehꞈ smˬ seh smˬ muiˇ shiꞈ heˇ ngaˬ yaˇ mawˇ, 44mawˇ neˇ smˬ muiˇ koꞈ heˇ mawˇ, 45mahˬ tahˬ laˆ smˬ muiˇ ngaˬ yaˇ mawˇ hawˇ-eu, 46kʼaˬ dzeˇ zaˬ neh maˬ bi laˆ ciˆ haw-euˬ miˬ daꞈ daꞈ shuiꞈ tiˬ muiˇ koꞈ heˇ gʼaˬ meh. 47Iˇsaˬleˬlaˆ tsawˇ haˬ aˇ maꞈ aˇ muˇ deuˬ-ahˇ oꞈ-eu shaˬ bymˇ kʼoeˇ bymˇ laꞈ kʼoeˇ, tsawˇ haˬ ngaˬ heˇ gʼaˬ-euˬ tiˬ gʼaˬ maˬ ehˇ, jeˬ zaˬ ngaˬ tseˇ mawˇ-euˬ tiˬ mawˇ maˬ ehˇ, Moˇseˬ yuˇ doˆ-awˇ, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Sahˬpaˬ Miˬyehˇ-euˬ Sehˬ gʼawˆ laꞈ kʼoeˇ gaˇ mˇ-eu Leˬbiˇ tsawˇ haˬ deuˬ-ahˇ biꞈ nehˬ-euˬ meh.
48Kʼoeˇ naˇ, guiˇ maꞈ laꞈ kʼoeˇ aˇ heˇ gʼaˬ kʼoeˇ taˆ uˆ lahˇ-eu yaw huiˬ deuˬ hawˇ-eu aˇ yaˇ gʼaˬ kʼoeˇ taˆ uˆ lahˇ-eu yaw huiˬ deuˬ Moˇseˬ jawˇ gaˇ le-euˬ meh. 49Aˬ yawꞈ maꞈ ehˇ-eu, “Nga maꞈ uˆ lahˇ-eu uˬ moˆ jawˇ-eu guiˇ deuˆ-eu tsawˇ haˬ deuˬ-ahˇ nga maꞈ gui haw ngeh, tiˬ gʼaˬ-iˬ maˬ teˬ-a. 50Kʼoeˇ miˇ neh, nga maꞈ yawˬ gʼaˬ na luꞈ yawˬ ha neh za-euˬ shuiˇ myawˬ guˇ deuˬ, laꞈ duꞈ deuˬ, naˇ mehˇ naˇ yoˆ deuˬ, laꞈ behˬ deuˬ, naˬ bawˇ naˬ yoˆ deuˬ hawˇ-eu lahˇ dah deuˬ yuˇ laꞈ-awˇ, Sahˬpaˬ Miˬyehˇ nga maꞈ-ahˇ haw piˇ nehˬ laꞈ ni, nga maꞈ-euˬ saꞈ laˇ aˇ poeˬ aˬ yawꞈ-ahˇ damˬ nehˬ-eu ma.” 51Shuiˇ myawˬ guˇ kʼoeˇ deuˬ dawˬ tawˆ luꞈ-ahˇ, Moˇseˬ hawˇ-eu Eˇlaˬzaˬ aˬ nyaꞈ ha geuꞈ-euˬ meh. 52Guiˇ guiˇ maꞈ-ahˇ uˆ lahˇ-eu yaw huiˬ kʼoeˇ deuˬ neh damˬ laˇ-euˬ shuiˇ dawˬ tawˆ luꞈ, tiˬ yaˇ nyiˬ tseˇ jawꞈ-i ehˇ gʼaˬ ni byah-eu meh. 53Yaw huiˬ maˬ ngeuˇ-eu guiˇ deuˆ leˇ-euˬ tsawˇ haˬ deuˬ-aˬ, yawˬ ha neh kʼaˇ za-euˬ deuˬ yawˬ ha geuꞈ-euˬ meh. 54Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ bi haw piˇ-eu gʼaˇ duˬ, Moˇseˬ hawˇ-eu Eˇlaˬzaˬ aˬ nyaꞈ Sehˬ gʼawˆ-ahˇ shuiˇ kʼoeˇ deuˬ yuˇ gʼeh-euˬ meh.
Currently Selected:
Bawˇtsahˬ 31: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
