Bawˇtsahˬ 26
26
Tsawˇ myahˇ yuˇ-euˬ nyiˬ poˆ tiˬ poˆ
1Luˬ-iˇ seˇ-iˇ-eu jeˬ keuˆ le gʼaˬ naˇ kʼah, Moˇseˬ hawˇ-eu Aˬloˬ-euˬ aˬ li Eˇlaˬzaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 2“Iˇsaˬleˬlaˆ tsawˇ haˬ aˇ maꞈ aˇ muˇ, aˇ jeuˬ aˇ ca aˬ yawꞈ ca yawꞈ laꞈ kʼoeˇ, nyiˬ tseˇ kʼoꞈ-ahˇ neh laꞈ taˆ paw-euˬ guiˇ kʼaˇ deuˆ nya-eu kʼaˬ dzeˇ zaˬ deuˬ-euˬ tsawˇ myahˇ yuˇ-awˬ.” 3Yeˬliˇkoˇ meuˬ-euˬ nui baˬ-ahˇ, Yawˇdaˬ lawˇ baˬ lawˇ deh jaˆ-eu Mawˇbaˆ miˇ kʼahˬ deh ga-ahˇ, Moˇseˬ hawˇ-eu piˇ ma Eˇlaˬzaˬ aˬ nyaꞈ aˬ yawꞈ maꞈ-ahˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. 4Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ loꞈ-ehˇ, nyiˬ tseˇ kʼoꞈ-ahˇ neh laꞈ taˆ paw-euˬ tsawˇ haˬ deuˬ-ahˇ tsawˇ myahˇ yuˇ-awˬ lehˇ ehˇ nehˬ-euˬ meh.
Heu deuˬ-aˬ, Iˇjiˇtuˆ miˇ kʼahˬ laꞈ kʼoeˇ neh doˆ le-euˬ Iˇsaˬleˬlaˆ tsawˇ haˬ deuˬ pyeuꞈ-eu meh.
5Yaˬkoˆ-euˬ aˬ li aˬ yuiꞈ yuiꞈ saˬ Luˇbeˬ-euˬ zaˬ deuˬ uˆ deuˬ pyeuꞈ-eu Luˇbeˬ tsawˇ jeuˬ-aˬ, Haˬnoˆ aˇ jeuˬ, Paˬloˇ aˇ jeuˬ, 6Heˬzaˬloˬ aˇ jeuˬ hawˇ-eu, Kaˬmiˬ aˇ jeuˬ heu deuˬ meh. 7Aˇ jeuˬ heu deuˬ dawˬ tawˆ luꞈ, oeˬ muiˇ smˬ heˇ shiꞈ yaˇ smˬ tseˇ gʼaˬ byah-eu meh. 8Paˬloˇ-euˬ zaˬ deuˬ uˆ deuˬ-aˬ, Eˇliˇbaˆ hawˇ-eu, 9Eˇliˇbaˆ-euˬ aˬ li Neˬmoeˬlaˇ, Daˬtaˬ hawˇ-eu Aˬbiˇlamˬ meh. Daˬtaˬ hawˇ-eu Aˬbiˇlamˬ aˬ nyaꞈ nmˇ-aˬ, Iˇsaˬleˬlaˆ tsawˇ haˬ aˇ maꞈ aˇ muˇ neh tseˇ doˆ-euˬ aˬ yuiꞈ aˬ tsu pyeuꞈ-awˇ, Moˇseˬ hawˇ-eu Aˬloˬ-ahˇ yehˬ bawˬ sehˇ lu-ehˇ ehˇ-eu laꞈ kʼoeˇ Kawˇlaˆ-euˬ mehˬ nah caw teh-eu deuˬ nehˬ-ehˇ gm leˇ-awˇ, Sahˬpaˬ Miˬyehˇ-ahˇ puiˬ gaˇ keuˬ leˇ-euˬ Daˬtaˬ hawˇ-eu Aˬbiˇlamˬ lehˇ kuˇ-eu kʼoeˇ nyiˬ gʼaˬ meh. 10Tsawˇ haˬ nyiˬ yaˇ ngaˬ tseˇ gʼaˬ miˬ dzaˬ neh bi laˆ luˬ bi laˆ seˇ ngeh nah, miˇ tsaˬ tsawˬ nga laˇ-awˇ bi myoꞈ ahˇ-euˬ laꞈ kʼoeˇ, Kawˇlaˆ hawˇ-eu aˬ yawꞈ-euˬ mehˬ nah caw teh-eu tsawˇ haˬ deuˬ nehˬ-ehˇ aˬ yawꞈ nyaꞈ kʼawꞈ ya shiˇ-euˬ meh. Aˬ yawꞈ maꞈ-aˬ, Iˇsaˬleˬlaˆ tsawˇ haˬ deuˬ bi yahˇ-eu gʼaˇ duˬ saˇ kiˇ pyeuꞈ-eu meh. 11Ehˇ kʼawꞈ, Kawˇlaˆ-euˬ aˬ li deuˬ maˬ ya shiˇ ni dzeuˇ-iˇ-euˬ meh.
12Suˇmoˬ tsawˇ jeuˬ-aˬ, Neˬmoeˬlaˇ aˇ jeuˬ, Yaˬmeˬ aˇ jeuˬ, Yaˬciˬ aˇ jeuˬ, 13Zeˬlahˬ aˇ jeuˬ hawˇ-eu, Shawˇlaˆ aˇ jeuˬ heu deuˬ meh. 14Aˇ jeuˬ heu deuˬ dawˬ tawˆ luꞈ, nyiˬ muiˇ nyiˬ heˇ nyiˬ yaˇ gʼaˬ byah-eu meh.
15Gaˆ tsawˇ jeuˬ-aˬ, Zeˬpoˬ aˇ jeuˬ, Haˬgiˇ aˇ jeuˬ, Shuˇniˬ aˇ jeuˬ, 16Awˇzaˬniˇ aˇ jeuˬ, Eˬliˇ aˇ jeuˬ, 17Aˬyawˇdiˆ aˇ jeuˬ hawˇ-eu Aˬyeˬliˇ aˇ jeuˬ heu deuˬ meh. 18Aˇ jeuˬ heu deuˬ dawˬ tawˆ luꞈ, oeˬ muiˇ ngaˬ yaˇ gʼaˬ byah-eu meh.
19-21Yuˇdaˆ tsawˇ jeuˬ-aˬ, Sheˬlahˬ aˇ jeuˬ, Paˬyehˆ aˇ jeuˬ, Zeˬlahˬ aˇ jeuˬ, Heˬzaˬloˬ aˇ jeuˬ hawˇ-eu Haˬmuˇlaˬ aˇ jeuˬ heu deuˬ meh. (Yuˇdaˆ-euˬ aˬ li Iˇlehˆ hawˇ-eu Awˇnaˬ aˬ nyaꞈ nmˇ Kaˬnaˬ miˇ kʼahˬ-ahˇ shiˇ yaꞈ-euˬ meh.) 22Aˇ jeuˬ heu deuˬ dawˬ tawˆ luꞈ, shiꞈ muiˇ koꞈ heˇ ngaˬ yaˇ gʼaˬ byah-eu meh.
23Iˇsaˬkaˬ tsawˇ jeuˬ-aˬ, Toˇlaˬ aˇ jeuˬ, Puˇhaˬ aˇ jeuˬ, 24Yaˬshuˇbaˬ aˇ jeuˬ hawˇ-eu Shiˇmyoˬ aˇ jeuˬ heu deuˬ meh. 25Aˇ jeuˬ heu deuˬ dawˬ tawˆ luꞈ, koꞈ muiˇ oeˬ heˇ smˬ yaˇ gʼaˬ byah-eu meh.
26Zeˬbuˬluˬ tsawˇ jeuˬ-aˬ, Seˬyehˆ aˇ jeuˬ, Eˇloˬ aˇ jeuˬ hawˇ-eu Yaˬleˬlaˇ aˇ jeuˬ heu deuˬ meh. 27Aˇ jeuˬ heu deuˬ dawˬ tawˆ luꞈ, koꞈ muiˇ ngaˬ yaˇ gʼaˬ byah-eu meh.
28Maˬnaˇseˬ hawˇ-eu Eˇpaˬleˬ aˬ nyaꞈ nmˇ-euˬ aˬ da pyeuꞈ-eu Yoˇsehˆ-euˬ zaˬ deuˬ uˆ deuˬ pyeuꞈ-eu Yoˇsehˆ tsawˇ jeuˬ deuˬ-aˬ, heu deuˬ meh.
29Maˬnaˇseˬ tsawˇ jeuˬ-aˬ, heu loꞈ-ehˇ meh. Maˬnaˇseˬ-euˬ aˬ li Maˬkiˬlaˇ-aˬ, Giˇlaˆ-euˬ aˬ da pyeuꞈ-awˇ, aˇ jeuˬ heu deuˬ dawˬ tawˆ luꞈ, Giˇlaˆ o neh jeuˬ le o le-euˬ meh. 30Yeˬzeuˬ aˇ jeuˬ, Heˬleˇ aˇ jeuˬ, 31Aˬsaˬliˇlaˆ aˇ jeuˬ, Sheˬkmˬ aˇ jeuˬ, 32Sheˬmiˇdaˬ aˇ jeuˬ hawˇ-eu Heˬpaˬ aˇ jeuˬ heu deuˬ meh. 33Heˬpaˬ-euˬ aˬ li Zeˬloˇpeˬhaˇ-aˬ, aˬ li maˬ jawˇ-ehˇ, aˬ buˇ tehꞈ-ehˇ jawˇ-eu meh. Aˬ buˇ kʼoeˇ deuˬ-euˬ tsawˇ myahˇ-aˬ, Maˬhaˬlahˬ, Noˇaˬ, Hawˇgaˬlaˇ, Miˇlaˬkah hawˇ-eu Teuˇzaˬ meh. 34Aˇ jeuˬ heu deuˬ dawˬ tawˆ luꞈ, ngaˬ muiˇ nyiˬ heˇ shiꞈ yaˇ gʼaˬ byah-eu meh.
35Eˇpaˬleˬ tsawˇ jeuˬ-aˬ, Shuˇdeˬlaˇ aˇ jeuˬ, Beˬkeuˬ aˇ jeuˬ hawˇ-eu, Taˬhaˬ aˇ jeuˬ heu deuˬ meh. 36Eˇlaˬnaˆ aˇ jeuˬ-aˬ, Shuˇdeˬlaˇ aˇ jeuˬ-ahˇ neh dehꞈ paˆ le-euˬ meh. 37Aˇ jeuˬ heu deuˬ dawˬ tawˆ luꞈ, smˬ muiˇ nyiˬ heˇ ngaˬ yaˇ gʼaˬ byah-eu meh.
Heu deuˬ-aˬ, Yoˇsehˆ o neh jeuˬ le o le-euˬ zaˬ deuˬ uˆ deuˬ pyeuꞈ-eu meh.
38Beˬyaˬmiˬ tsawˇ jeuˬ-aˬ, Beˬlaˬ aˇ jeuˬ, Aˬshaˇbeˬlaˆ aˇ jeuˬ, Aˬhiˇlamˬ aˇ jeuˬ, 39Sheˬpuˇpamˬ aˇ jeuˬ hawˇ-eu Huˇpamˬ aˇ jeuˬ heu deuˬ meh. 40Aˬlaˬdaˆ aˇ jeuˬ hawˇ-eu Neˬmaˬ aˇ jeuˬ-aˬ, Beˬlaˬ aˇ jeuˬ-ahˇ neh dehꞈ paˆ le-euˬ meh. 41Aˇ jeuˬ heu deuˬ dawˬ tawˆ luꞈ, oeˬ muiˇ ngaˬ heˇ koꞈ yaˇ gʼaˬ byah-eu meh.
42Daˬ tsawˇ jeuˬ-aˬ, Huˇshmˬ aˇ jeuˬ meh. 43Dawˬ tawˆ luꞈ koꞈ muiˇ oeˬ heˇ oeˬ yaˇ gʼaˬ byah-eu meh.
44Aˬshaˬ tsawˇ jeuˬ-aˬ, Iˇmaˬnahˬ aˇ jeuˬ, Iˇshaˬbiˇ aˇ jeuˬ hawˇ-eu, Beˬliˇyaˆ aˇ jeuˬ meh. 45Heˬbeuˬ hawˇ-eu Maˬlaˬkeˬlaˇ aˇ jeuˬ-aˬ, Beˬliˇyaˆ aˇ jeuˬ-ahˇ neh dehꞈ paˆ le-euˬ meh. 46Aˬshaˬ-aˬ, Seˬlahˬ lehˇ myahˇ-euˬ aˬ buˇ tiˬ buˇ jawˇ-eu meh. 47Aˇ jeuˬ heu deuˬ dawˬ tawˆ luꞈ, ngaˬ muiˇ smˬ heˇ oeˬ yaˇ gʼaˬ byah-eu meh.
48Naˬtaˬliˇ tsawˇ jeuˬ-aˬ, Yaˬzeˬlaˇ aˇ jeuˬ, Guˇniˬ aˇ jeuˬ, 49Yeˬzaˬ aˇ jeuˬ hawˇ-eu Shiˇlmˬ aˇ jeuˬ heu deuˬ meh. 50Aˇ jeuˬ heu deuˬ dawˬ tawˆ luꞈ, oeˬ muiˇ ngaˬ heˇ oeˬ yaˇ gʼaˬ byah-eu meh.
51Iˇsaˬleˬlaˆ tsawˇ haˬ dawˬ tawˆ luꞈ, koꞈ seh tiˬ heˇ shiꞈ yaˇ smˬ tseˇ gʼaˬ byah-eu meh.
52Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 53“Tsawˇ haˬ aˇ gʼaˬ yaw myaˬ yaw cuiˆ-ahˇ haw-awˇ, tsawˇ jeuˬ heu deuˬ-ahˇ miˇ kʼahˬ biˇ nehˬ-awˬ. 54Tsawˇ haˬ myaˬ dzehˬ-eu tsawˇ jeuˬ-ahˇ miˇ kʼahˬ yaw huiˬ biˇ nehˬ-awˇ, tsawˇ haˬ cuiˆ dzehˬ-eu tsawˇ jeuˬ-ahˇ miˇ kʼahˬ yaw nyiˇ biˇ nehˬ-awˬ. Tsawˇ jeuˬ yawˬ jeuˬ na luꞈ-ahˇ tsawˇ haˬ yaw myaˬ yaw cuiˆ-ahˇ haw-awˇ, miˇ kʼahˬ biˇ nehˬ-awˬ. 55Ehˇ kʼawꞈ, miˇ kʼahˬ biˇ nehˬ ngeh, tsawˇ jeuˬ kʼoeˇ deuˬ-euˬ aˬ da yaw dzahˇ gʼaˬ-euˬ tsawˇ myahˇ baꞈ-awˇ, shehˆ tsaˬ ya bi tsaˬ geuꞈ meh. 56Myaˬ dzehˬ-eu tsawˇ jeuˬ-ahˇ miˇ kʼahˬ yaw huiˬ oꞈ leˇ-awˇ, cuiˆ dzehˬ-eu tsawˇ jeuˬ-ahˇ miˇ kʼahˬ yaw nyiˇ oꞈ leˇ ni ya biˇ tsaˬ geuꞈ meh.”
57Leˬbiˇ tsawˇ jeuˬ laꞈ kʼoeˇ, Geˬlaˬshoˬ aˇ jeuˬ, Kawˇhaˆ aˇ jeuˬ hawˇ-eu, Meˬlaˬliˇ aˇ jeuˬ heu deuˬ ahˇ-eu meh. 58Aˇ jeuˬ heu deuˬ-euˬ zaˬ deuˬ uˆ deuˬ laꞈ kʼoeˇ, Liˇbaˬniˇ, Heˬbyoˬ, Maˬhaˬliˬ, Muˇshiˬ hawˇ-eu Kawˇhaˆ aˇ jeuˬ heu deuˬ ahˇ-eu meh. Kawˇhaˆ-aˬ, Aˬmaˬlamˬ-euˬ aˬ da meh. 59Aˬmaˬlamˬ-euˬ miˬ zaˬ-euˬ tsawˇ myahˇ-aˬ, Iˇjiˇtuˆ miˇ kʼahˬ-ahˇ dehꞈ le-euˬ Leˬbiˇ-euˬ aˬ buˇ Yawˇjeˬbehˇ pyeuꞈ-eu meh. Aˬ yawꞈ-aˬ, Aˬmaˬlamˬ gʼaˇ duˬ Aˬloˬ hawˇ-eu Moˇseˬ lehˇ myahˇ-euˬ aˬ li nyiˬ li ciˬ-awˇ, Miˇliˬyaˬ lehˇ myahˇ-euˬ aˬ buˇ tiˬ buˇ ciˬ-euˬ meh. 60Aˬloˬ-aˬ, Naˬdehˇ, Aˬbiˇhuˬ, Eˇlaˬzaˬ hawˇ-eu Iˇdaˬmaˬ lehˇ myahˇ-euˬ aˬ li oeˬ li jawˇ-eu meh. 61Naˬdehˇ hawˇ-eu Aˬbiˇhuˬ aˬ nyaꞈ-aˬ, maˬ muiˬ maˬ shawˇ-eu miˬ dzaˬ yuˇ-awˇ Sahˬpaˬ Miˬyehˇ-ahˇ lawˇ-euˬ miˇ neh ya shiˇ-euˬ meh. 62Ba la tiˬ siˬ byah laˇ-euˬ zaˬ nahˬ-ahˇ neh laꞈ taˆ paw-euˬ Leˬbiˇ tsawˇ haˬ kʼaˬ dzeˇ zaˬ dawˬ tawˆ luꞈ, nyiˬ muiˇ smˬ heˇ gʼaˬ byah-eu meh. Iˇsaˬleˬlaˆ tsawˇ haˬ deuˬ-ahˇ maˬ taꞈ ni, aˬ yawꞈ maꞈ-ahˇ tsawˇ myahˇ yuˇ-euˬ meh. Aˬ jeˬ miˇ neh ehˇ naˇ, Iˇsaˬleˬlaˆ miˇ kʼahˬ laꞈ kʼoeˇ, aˬ yawꞈ maꞈ-ahˇ jeˬ biˇ maˬ oꞈ-a.
63Yeˬliˇkoˇ meuˬ-euˬ nui baˬ-ahˇ, Yawˇdaˬ lawˇ baˬ lawˇ deh-ahˇ jaˆ-eu deh saˇ-ahˇ, Iˇsaˬleˬlaˆ tsawˇ haˬ deuˬ-euˬ tsawˇ myahˇ aˬ yawꞈ maꞈ yuˇ ngeh, aˇ jeuˬ heu deuˬ dawˬ tawˆ luꞈ-euˬ tsawˇ myahˇ, Moˇseˬ hawˇ-eu Eˇlaˬzaˬ aˬ nyaꞈ boꞈ-euˬ meh. 64Siˇnaˆ bawˇ tsahˬ bawˇ dahˇ-ahˇ Moˇseˬ hawˇ-eu Aˬloˬ yaw beh poˆ tsawˇ myahˇ yuˇ ngeh, tsawˇ myahˇ kʼaˇ dawˆ-euˬ tsawˇ haˬ dawˬ tawˆ luꞈ tiˬ gʼaˬ-iˬ maˬ paˇ dehꞈ ni shiˇ dzeuˇ jiˇ-euˬ meh. 65Aˬ yawꞈ maꞈ dawˬ tawˆ luꞈ bawˇ tsahˬ bawˇ dahˇ laꞈ kʼoeˇ ya shiˇ jiˇ meh lehˇ ehˇ taˬ-euˬ loꞈ-ehˇ, Yeˬpuˬnehˇ-euˬ aˬ li Gaˬlehˆ hawˇ-eu Nuˬ-euˬ aˬ li Yawˇshuˆ aˬ nyaꞈ maˬ ngeuˇ naˇ, tiˬ gʼaˬ-iˬ maˬ paˇ dehꞈ ni shiˇ dzeuˇ jiˇ-euˬ meh.
Currently Selected:
Bawˇtsahˬ 26: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
