Miˇkaˬ 4
4
Miˇ kʼahˬ dawˬ tawˆ luꞈ Sahˬpaˬ Miˬyehˇ uˆ lahˇ-eu uˬ moˆ nui saˇ oꞈ-eu laꞈ kʼoeˇ ya dehꞈ-eu
(Iˇsaˬyaˇ 2.2-4)
1Aˇ nah heu nah keuˆ le tehꞈ-a.
Uˬ duˬ tahˬ nymˇ nymˇ ma jaˆ-eu
gawˬ jawˬ kʼoeˇ jawˬ goˇ dui dui-awˇ,
gawˬ jawˬ gawˬ duˇ dawˬ tawˆ kʼoeˇ taˆ,
huiˬ dui goˇ dui dui luꞈ tehꞈ-a.
Tsawˇ jeuˬ dawˬ tawˆ kʼoeˇ gaˇ laˇ-awˇ,
2aˬ yawꞈ maꞈ heu loˇ ehˇ tehꞈ-a.
“Sahˬpaˬ Miˬyehˇ-euˬ gawˬ jawˬ-ahˇ,
Yaˬkoˆ-euˬ Miˬyehˇ-euˬ nymˇ-ahˇ,
laˇ-awˬ, aˬ dui daˆ leˇ kaˇ-euˇ.
Yawꞈ-euˬ gaˇ ma-ahˇ cah nya ni,
yawꞈ aˬ dui-ahˇ mehˬ laꞈ tehꞈ-a.”
Sahˬpaˬ Miˬyehˇ zahˇ dawˬ kʼoꞈ dawˬ,
Ziˇoˬ gawˬ jawˬ-ahˇ doˆ le-awˇ,
yawꞈ neh mehˬ-euˬ tsoˆ-euˬ dawˬ deuˬ,
Yeˬluˇsaˬlehˬ-ahˇ doˆ le meh.
3Miˇ kʼahˬ tsawˇ jeuˬ dawˬ ja doˆ gaˇ,
aˬ yawꞈ laˆ tsaˬ laˆ tsahˇ tehꞈ-a.
Dawˬ peh gaˇ mahˇ gʼaˬ kʼaˆ luꞈ-eu,
baoˬ huiˬ-eu miˇ kʼahˬ deuˬ-ahˇ kʼawꞈ,
aˬ yawꞈ ngehˬ tsehˆ daˇ tsehˆ tehꞈ-a.
Miˇ kʼahˬ tsawˇ jeuˬ guiˇ maˬ deuˆ-ehˇ,
guiˇ mˇ-eu jeˬ maˬ paˇ baw-aˇ.
4Tsawˇ haˬ zaˬ yawˬ gʼaˬ yawˬ na luꞈ,
yawˬ ha aˬ gaꞈ baw duˆ uˬ moˆ,
yawˬ ha siˬ guˬ aˬ bawˇ uˬ moˆ,
nui saˇ oꞈ-awˇ ya nuiˇ meh lehˇ,
Baoˬ huiˬ dui dui-eu gʼaˬ pyeuꞈ-eu
Sahˬpaˬ Miˬyehˇ ehˇ taˬ-euˬ meh.
5Tsawˇ jeuˬ yawˬ jeuˬ na luꞈ yawˬ ha-euˬ miˬ yehˇ-ahˇ uˬ duˬ tahˬ-awˇ, yawˬ ha miˬ yehˇ-euˬ ehˇ dawˬ naˇ haˬ luꞈ meh. Ehˇ kʼawꞈ, aˬ dui-aˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ dui uˬ duˬ tahˬ-awˇ, mˬ maˬ maˬ byaˆ zaˇ ziˇ aˬ yawꞈ-euˬ dawˬ naˇ haˬ geuꞈ ma.
Iˇsaˬleˬlaˆ tsawˇ haˬ deuˬ aˬ cawˬ miˇ kʼahˬ-ahˇ neh paˇ gʼoꞈ doˆ laˇ tehꞈ-a
6Sahˬpaˬ Miˬyehˇ ehˇ-eu, “Ngaˬ neh kʼehˬ nehˬ kʼaˆ nehˬ-awˇ aˬ cawˬ miˇ kʼahˬ-ahˇ sheuˬ byoˆ gʼeh-euˬ gaˇ ya daˬ-euˬ tsawˇ haˬ deuˬ-ahˇ ngaˇ paˇ kuˇ uiˬ-eu aˇ nah keuˆ le tehꞈ-a. 7Aˬ yawꞈ maꞈ-aˬ, aˬ kuiˇ kuiˇ tawˆ bi dawˆ-awˇ, iˇ kahˇ-ahˇ gʼawˬ mahˇ kaˬ gaˇ jawˇ luꞈ meh. Ehˇ kʼawꞈ, dzeˇ yaꞈ-euˬ deuˬ-ahˇ ngaˇ yaw shuiꞈ shuiꞈ-ehˇ aˇ dahˬ paˇ beh nehˬ-awˇ, huiˬ-eu tsawˇ jeuˬ paˇ bi pyeuꞈ laˇ ma. Kʼoeˇ ngeh neh naˇ, Ziˇoˬ gawˬ jawˬ-ahˇ neh aˬ yawꞈ maꞈ-ahˇ ngaˇ mˬ maˬ maˬ byaˆ zaˇ ziˇ uˆ lahˇ ma.”
8Kʼoeˇ naˇ, yawˇ bo-eu tsawˇ haˬ loꞈ-ehˇ aˬ yawꞈ-euˬ tsawˇ haˬ deuˬ-ahˇ Miˬyehˇ haw piˇ-euˬ jawˇ duˬ pyeuꞈ-eu Yeˬluˇsaˬlehˬ meuˬ-oˇ, nawˇ-aˬ, nawˬ-euˬ miˇ kʼahˬ laꞈ kʼoeˇ aˬ cawˬ naˆ maˬ tseˇ huiˬ-eu meuˬ paˇ pyeuꞈ laˇ tehꞈ-a. 9Aˬ jeˬ miˇ neh nawˇ yaw kʼaˆ-ehˇ guˇ guˇ-ehˇ ngoeˇ te. Aˬ jeˬ miˇ neh zaˬ baw luꞈ-eu zaˬ miˬ zaˬ tiˬ gʼaˬ loꞈ-ehˇ nawˇ shaˬ zahˬ mˇ luꞈ te. Nawˬ-euˬ sahˬ paˬ hawˇ-eu nawˬ-ahˇ nui noeˬ nui duˇ biꞈ-eu deuˬ maˬ jawˇ-ehˇ pyeuꞈ-iˇ-euˬ miˇ neh te loˇ. 10Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, zaˬ baw-eu shaˬ luꞈ-eu zaˬ miˬ zaˬ tiˬ gʼaˬ loꞈ-ehˇ teuˆ teuˆ-ehˇ ngoeˇ-awˬ. Aˬ jeˬ miˇ neh ehˇ naˇ, nymˬ-mˇ neh naw maꞈ meuˬ laꞈ nyiˇ ya doˆ-iˇ-awˇ, deh ga buˇ deˬ-ahˇ ya jawˇ-iˇ tehꞈ-a. Baˬbuˇloˬ miˇ kʼahˬ-ahˇ naw maꞈ ya jawˇ-iˇ tehꞈ-a. Ehˇ kʼawꞈ, muiˇ-eu deuˬ-euˬ laꞈ-ahˇ neh, kʼoeˇ gaˇ Sahˬpaˬ Miˬyehˇ naw maꞈ-ahˇ ka kʼoꞈ tehꞈ-a. 11Miˇ kʼahˬ gʼawˬ mya ni naw maꞈ-ahˇ guiˇ deuˆ-eu lehˇ uiˬ leˇ taˬ-awˇ, “Yeˬluˇsaˬlehˬ meuˬ-ahˇ laˆ cawˆ ma. Meuˬ teu meuˬ luˬ-iˇ seˇ-iˇ-euˬ gaˇ aˬ dui ya mawˇ tehꞈ-a” lehˇ, aˬ yawꞈ maꞈ lmˬ luꞈ meh. 12Ehˇ kʼawꞈ, Sahˬpaˬ Miˬyehˇ-euˬ nui ma laꞈ kʼoeˇ aˬ joˆ-ehˇ noeˬ luꞈ-eu miˇ kʼahˬ kʼoeˇ deuˬ maˬ siˬ nya-a. Cehˇ diˬ diˬ duˬ-ahˇ baꞈ ahˇ taˬ-euˬ cehˇ dzahˬ loꞈ-ehˇ, aˬ yawꞈ maꞈ-ahˇ tiˬ gaˇ kuˇ uiˬ kuˇ bymˇ-awˇ kʼehˬ nehˬ kʼaˆ nehˬ-eu lehˇ lehˬ hmˬ taˬ-euˬ aˬ yawꞈ maꞈ maˬ siˬ nya-a.
13Sahˬpaˬ Miˬyehˇ ehˇ-eu, “Yeˬluˇ =saˬlehˬ meuˬ-ahˇ jawˇ-eu tsawˇ haˬ deuˬ-oˇ, iˇ-awˇ naw maꞈ-ahˇ muiˇ-eu tsawˇ haˬ deuˬ-ahˇ kʼehˬ nehˬ-iˇ-awˬ. Shmˇ uˬ coeˇ tsoꞈ-awˇ guiˬ kuiˇ sehˬ tsoꞈ-eu mawˇ neˇ mawˇ gaw tiˬ mawˇ loꞈ-ehˇ, naw maꞈ gʼaˬ kʼaˆ ni ngaˇ jahˇ ma. Miˇ kʼahˬ gʼawˬ mya kʼahˬ-ahˇ naw maꞈ deh meuˇ-awˇ, aˬ yawꞈ maꞈ neh ceh za deuˆ za taˬ-euˬ pyuˇ shuiˇ myawˬ gahˬ deuˬ naw maꞈ yuˇ-awˇ, miˇ kʼahˬ dawˬ tawˆ luꞈ-euˬ Sahˬpaˬ Miˬyehˇ pyeuꞈ-eu ngaˬ-ahˇ ya a nehˬ laˇ meh.”
Currently Selected:
Miˇkaˬ 4: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
