Uˬ duˬ 25
25
Aˇ kʼoꞈ shiꞈ kʼoꞈ tiˬ kʼoꞈ
(Dawˬmehˬ 15.1-11)
1Siˇnaˆ gawˬ jawˬ kʼoeˇ taˆ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 2Iˇsaˬleˬlaˆ tsawˇ haˬ deuˬ-ahˇ, zahˇ sahˇ kʼoꞈ heu deuˬ biꞈ nehˬ-awˬ. Sahˬpaˬ Miˬyehˇ naw maꞈ-ahˇ biꞈ-eu lehˇ gʼeh-eu miˇ kʼahˬ-ahˇ naw maꞈ le keuˆ ngeh, Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ, aˬ myah luꞈ, shiꞈ kʼoꞈ tiˬ kʼoꞈ-ahˇ maˬ ka dzaˬ maˬ ka dawˇ ni ya jawˇ meh. 3Koꞈ kʼoꞈ aˇ yamˬ laꞈ kʼoeˇ, naw maꞈ-euˬ deh ma deuˬ, deh yaˇ deuˬ hawˇ-eu aˬ gaꞈ yaˇ kmˇ deuˬ mˇ-awˇ, dzaˬ la gʼo cehˇ hawˇ-eu aˇ siˬ aˇ lu deuˬ jeˬ hmˬ taˬ nya meh. 4Ehˇ kʼawꞈ, Sahˬpaˬ Miˬyehˇ-ahˇ a nehˬ taˬ-euˬ shiꞈ kʼoꞈ tiˬ kʼoꞈ-aˬ, miˇ tsaˬ gʼaˬ naˬ ya bi naˬ-eu aˇ kʼoꞈ pyeuꞈ-eu meh. Naw maꞈ-euˬ deh yaˇ deuˬ, yaˇ deuˬ hawˇ-eu aˬ gaꞈ yaˇ kmˇ deuˬ maˬ ya mˇ-a. 5Tsawˇ haˬ neh maˬ ka-euˬ gaˇ dehꞈ laˇ-euˬ dzaˬ la gʼo cehˇ aˇ sehꞈ deuˬ-ahˇ, naw maꞈ maˬ ya yehˬ maˬ ya pyaˆ dzaˬ-a. Maˬ laˆ saˆ-euˬ gaˇ siˬ laˇ-euˬ aˬ gaꞈ aˇ siˬ naw maꞈ maˬ ya pyaˆ geuꞈ-a. Aˇ kʼoꞈ kʼoeˇ kʼoꞈ-aˬ, miˇ tsaˬ tiˬ byah tiˬ loꞈ gʼaˬ naˬ naˬ-eu aˇ kʼoꞈ meh. 6Aˇ kʼoꞈ kʼoeˇ kʼoꞈ laꞈ kʼoeˇ, miˇ tsaˬ-ahˇ naw maꞈ maˬ ya ka dzaˬ kʼawꞈ, naw maꞈ gʼaˇ duˬ maˬ ehˇ, naw maꞈ-euˬ zaˬ kʼaˆ deuˬ gʼaˇ duˬ maˬ ehˇ, naw maꞈ-ahˇ gʼaˬ mahˇ mahˇ dzaˬ luꞈ-eu tsawˇ haˬ deuˬ gʼaˇ duˬ maˬ ehˇ, naw maꞈ nehˬ-ehˇ jawˇ-eu boeˇ miˬ siˬ kʼaˬ deuˬ gʼaˇ duˬ maˬ ehˇ, dzaˬ dzaˬ dawˇ dawˇ deuˬ, miˇ tsaˬ naw maꞈ-ahˇ biꞈ nehˬ laꞈ tehꞈ-a. 7Naw maꞈ neh cu taˬ-euˬ jeˬ zaˬ deuˬ gʼaˇ duˬ hawˇ-eu, bawˇ tsahˬ jeˬ zaˬ deuˬ gʼaˇ duˬ kʼawꞈ biꞈ nehˬ laꞈ tehꞈ-a. Miˇ tsaˬ neh kʼaˇ bi dehꞈ doˆ laˇ-euˬ jeˬ-ahˇ naw maꞈ dzaˬ nya tehꞈ-a.
Juˬbiˬliˬ Aˇ kʼoꞈ
8Shiꞈ kʼoꞈ tiˬ poˆ, shiꞈ poˆ keuˆ ni, oeˬ tseˇ gʼoeˬ kʼoꞈ byah laˇ ngeh keuˆ ni gui daˆ leꞈ-awˬ. 9Kʼoeˇ naˇ, ba la shiꞈ siˬ tiˬ siˬ, tseˇ nah tiˬ nah Iˬ baˇ sha dzeh-eu aˇ nah-ahˇ, tsawˇ haˬ tiˬ gʼaˬ pyehˬ gʼeh-awˇ, naw maꞈ-euˬ miˇ kʼahˬ doe ni, daˇ heh baw baw-ehˇ bi cah-awˬ. 10Kʼoeˇ loꞈ-ehˇ jahˇ-awˇ, kʼoꞈ tsaˬ tsoˆ taˬ-euˬ aˇ kʼoꞈ pyeuꞈ-eu ngaˬ tseˇ kʼoꞈ tiˬ kʼoꞈ-ahˇ, naw maꞈ miˇ kʼahˬ laꞈ kʼoeˇ kʼaˇ jawˇ-eu jeˬ, ya buˬ ya law-iˇ-eu aˇ kʼoꞈ pyeuꞈ-eu gaˇ kawˆ bi tsaꞈ gaˬ doe-iˇ-awˬ. Kʼaˇ ahˬ dzaˬ-euˬ jeˬ dawˬ tawˆ luꞈ, aˇ kʼoꞈ kʼoeˇ kʼoꞈ keuˆ laˇ ngeh, ahˬ sahˇ gʼaˬ-ahˇ maˬ ngeuˇ naˇ, aˬ yawꞈ-euˬ zaˬ deuˬ uˆ deuˬ-ahˇ ya biꞈ kʼoꞈ-awˇ, ahˬ nehˬ-euˬ zaˬ kʼaˆ deuˬ kʼawꞈ, yawˬ ha-euˬ nymˇ-ahˇ paˇ ya bi gʼoꞈ-iˇ meh. 11Naw maꞈ-euˬ deh yaˇ hawˇ-eu yaˇ deuˬ maˬ ya mˇ dzaˬ-ehˇ, aˬ yawˇ yawꞈ dehꞈ laˇ-euˬ aˇ sehꞈ deuˬ-ahˇ, naw maꞈ maˬ ya yehˬ maˬ ya pyaˆ dzaˬ-a. Naw maꞈ-euˬ aˬ gaꞈ yaˇ kmˇ laꞈ kʼoeˇ, maˬ laˆ saˆ-euˬ gaˇ siˬ laˇ-euˬ aˬ gaꞈ aˇ siˬ deuˬ kʼawꞈ maˬ ya pyaˆ geuꞈ-a. 12Aˇ kʼoꞈ kʼoeˇ kʼoꞈ kʼoꞈ lah ni, naw maꞈ gʼaˇ duˬ muiˬ-eu shawˇ-eu aˇ kʼoꞈ pyeuꞈ-eu meh. Deh ma hawˇ-eu yaˇ laꞈ kʼoeˇ za-euˬ jeˬ tehꞈ-ehˇ naw maꞈ ya dzaˬ meh. 13Kʼaˇ ahˬ dzaˬ dzeuˇ-euˬ jeˬ dawˬ tawˆ luꞈ, aˇ kʼoꞈ kʼoeˇ kʼoꞈ laꞈ kʼoeˇ, ahˬ sahˇ gʼaˬ-ahˇ ya biꞈ kʼoꞈ meh. 14Kʼoeˇ miˇ neh, yawˬ ha-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ-ahˇ miˇ tsaˬ ahˬ nehˬ ngeh maˬ ehˇ, zeuˇ ngeh maˬ ehˇ, kʼaˆ dzaˬ gahˇ dzaˬ-eu jeˬ taˬ mˇ. 15Juˬbiˬliˬ Aˇ kʼoꞈ keuˆ laˇ-eu gʼaˇ duˬ aˇ myaˆ kʼoꞈ dzeˇ-eu hawˇ-eu, aˇ myaˆ ni mˇ za nya paˬ-ehˇ gʼeh-eu gaˇ haw-awˇ, aˇ poeˬ pyehˆ tsehˆ-awˬ. 16Juˬbiˬliˬ Aˇ kʼoꞈ keuˆ laˇ-eu gʼaˇ duˬ, aˇ kʼoꞈ gʼawˬ mya kʼoꞈ dzeˇ naˇ, aˇ poeˬ kʼaˆ dzehˬ-awˇ, aˇ kʼoꞈ ui cuiˆ tehꞈ-ehˇ dzeˇ naˇ, aˇ poeˬ yaˇ dzehˬ tehꞈ-a. Aˬ jeˬ miˇ neh ehˇ naˇ, aˇ myaˆ lehˆ ya ka dzaˬ paˬ-ehˇ gʼeh-eu sawˇ doˆ-awˇ, miˇ tsaˬ ya ahˬ dzaˬ-eu meh. 17Iˇsaˬleˬlaˆ tsawˇ haˬ cawˬ cawˬ, tsawˇ gahˇ taˬ gahˇ dzaˬ. Ehˇ kʼawꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guˆ-awˬ.
Shiꞈ kʼoꞈ tiˬ kʼoꞈ gʼaˇ duˬ loˬ-eu dzaˬ-eu dawˇ-eu jeˬ
18Miˇ kʼahˬ kʼoeˇ kʼahˬ laꞈ kʼoeˇ, naw maꞈ yaw muiˬ paˬ-ehˇ ya dehꞈ ya jawˇ ni, Sahˬpaˬ Miˬyehˇ-euˬ zahˇ dawˬ kʼoꞈ dawˬ deuˬ-ahˇ naw maꞈ naˇ haˬ geuꞈ-awˬ. 19Naw maꞈ loˬ-eu dzaˬ la gʼo cehˇ deuˬ, miˇ kʼahˬ kʼoeˇ kʼahˬ naw maꞈ-ahˇ bi za le-awˇ, yaw muiˬ paˬ-ehˇ ya dehꞈ ya jawˇ tehꞈ-a.
20Ehˇ kʼawꞈ, ka dzaˬ yehˬ dzaˬ-eu maˬ baw-eu shiꞈ kʼoꞈ tiˬ kʼoꞈ laꞈ kʼoeˇ, aˬ jeˬ ya dzaˬ nmˇ lehˇ, tsawˇ haˬ tiˬ gʼaˬ na naˇ haˬ tehꞈ-a. 21Koꞈ kʼoꞈ tiˬ kʼoꞈ laꞈ kʼoeˇ, miˇ tsaˬ-ahˇ Sahˬpaˬ Miˬyehˇ guiˬ lahˬ biꞈ-awˇ, nyiˬ kʼoꞈ dzaˬ loꞈ-eu dzaˬ la gʼo cehˇ bi za le tehꞈ-a. 22Yehꞈ kʼoꞈ tiˬ kʼoꞈ siˬ yoeˬ sehˬ ngeh yamˬ-ahˇ, koꞈ kʼoꞈ tiˬ kʼoꞈ laꞈ kʼoeˇ naw maꞈ neh mˇ za taˬ-euˬ dzaˬ la gʼo cehˇ deuˬ naw maꞈ dzaˬ luꞈ-awˇ, cehˇ laˆ luiˆ yamˬ-ahˇ keuˆ ni dzaˬ loꞈ dawˇ loꞈ tehꞈ-a.
Ahˬ gʼaˬ-euˬ jeˬ zeuˇ kʼoꞈ geuꞈ-eu
23Yawˬ ha-euˬ miˇ tsaˬ maˬ ya ahˬ dzaˬ tsehˆ-a. Aˬ jeˬ miˇ neh ehˇ naˇ, Miˬyehˇ-aˬ, miˇ tsaˬ-euˬ yaw sahˇ gʼaˬ pyeuꞈ-awˇ, naw maꞈ-aˬ, miˇ tsaˬ kʼoeˇ-ahˇ tiˬ kʼehˬ tiˬ yamˬ laꞈ kʼoeˇ ya mˇ dzaˬ tawˬ luꞈ-eu boeˇ miˬ siˬ kʼaˬ deuˬ-ahˇ duˇ-eu meh.
24Miˇ tsaˬ tiˬ tsahˇ na ahˬ ngeh, ahˬ sahˇ gʼaˬ paˇ zeuˇ kʼoꞈ geuꞈ nya ni ya jahˇ tsehˆ meh. 25Iˇsaˬleˬlaˆ tsawˇ haˬ tiˬ gʼaˬ na shaˬ le zahˬ le-awˇ, miˇ tsaˬ ya ahˬ dzaˬ naˇ, aˬ yawꞈ-ahˇ aˬ yuiꞈ aˬ nyiˇ peh dzehˬ-eu gʼaˬ ya zeuˇ kʼoꞈ geuꞈ meh. 26Ahˬ dzaˬ-euˬ miˇ tsaˬ zeuˇ kʼoꞈ paˬ-ehˇ aˬ yuiꞈ aˬ nyiˇ maˬ baw-eu tsawˇ haˬ kʼawꞈ, aˬ kaˇ smˇ muiˬ paˇ muiˬ laˇ-awˇ, zeuˇ kʼoꞈ geuꞈ nya-eu aˇ nah baw tehꞈ-a. 27Kʼoeˇ loꞈ-ehˇ pyeuꞈ laˇ naˇ, zeuˇ sahˇ gʼaˬ-euˬ laꞈ-ahˇ ahˇ leˇ-euˬ aˇ kʼoꞈ deuˬ sawˇ dzeh-awˇ, Juˬbiˬliˬ Aˇ kʼoꞈ-ahˇ teh miˇ leˇ-eu gʼaˇ duˬ loˬ-eu aˇ kʼoꞈ deuˬ-euˬ aˇ poeˬ, zeuˇ sahˇ gʼaˬ-ahˇ paˇ biꞈ nehˬ-awˇ, zeuˇ kʼoꞈ geuꞈ nya meh. 28Ehˇ kʼawꞈ, miˇ tsaˬ kʼoeˇ tsahˇ zeuˇ kʼoꞈ geuꞈ-eu gʼaˇ duˬ biꞈ tsehˆ-eu pyuˇ maˬ jaˆ loꞈ naˇ, Juˬbiˬliˬ Aˇ kʼoꞈ-ahˇ keuˆ ni, zeuˇ sahˇ gʼaˬ-euˬ laꞈ-ahˇ, miˇ tsaˬ kʼoeˇ tsahˇ ya bi jaˆ tawˬ meh. Aˇ kʼoꞈ kʼoeˇ kʼoꞈ keuˆ le ngeh, ahˬ sahˇ gʼaˬ-ahˇ miˇ tsaˬ kʼoeˇ tsahˇ ya biꞈ kʼoꞈ meh.
29Tsawˇ haˬ tiˬ gʼaˬ na meuˬ meuˬ lahˇ laꞈ kʼoeˇ paw jaˆ-eu nymˇ tiˬ nymˇ ahˬ dzaˬ naˇ, ahˬ-euˬ nah-ahˇ neh aˇ dahˬ beh-awˇ, tiˬ kʼoꞈ tiˬ myaˇ maˬ byah laˇ mi naˆ-ehˇ zeuˇ kʼoꞈ geuꞈ nya meh. 30Ehˇ kʼawꞈ, yaw beh kʼoꞈ laꞈ kʼoeˇ nymˇ kʼoeˇ nymˇ aˬ yawꞈ maˬ zeuˇ kʼoꞈ geuꞈ naˇ, nymˇ kʼoeˇ nymˇ-ahˇ aˬ yawꞈ zeuˇ kʼoꞈ geuꞈ nya-eu zahˇ maˬ paˇ jaˆ meh. Zeuˇ sahˇ gʼaˬ hawˇ-eu aˬ yawꞈ-euˬ zaˬ deuˬ uˆ deuˬ, nymˇ kʼoeˇ nymˇ-euˬ yaw sahˇ pyeuꞈ tsehˆ-euˬ meh. Juˬbiˬliˬ Aˇ kʼoꞈ keuˆ le-euˬ kʼawꞈ, ahˬ sahˇ gʼaˬ-ahˇ nymˇ kʼoeˇ nymˇ maˬ ya biꞈ kʼoꞈ-a. 31Ehˇ kʼawꞈ, meuˬ meuˬ lahˇ maˬ baw-eu pu deuˬ laꞈ kʼoeˇ jaˆ-eu nymˇ deuˬ ahˬ taꞈ zeuˇ taꞈ-eu jeˬ-aˬ, miˇ tsaˬ ahˬ taꞈ zeuˇ taꞈ-eu jeˬ-ahˇ duˇ-eu meh. Ahˬ sahˇ gʼaˬ paˇ zeuˇ kʼoꞈ geuꞈ nya-eu zahˇ jaˆ-awˇ, Juˬbiˬliˬ Aˇ kʼoꞈ keuˆ le ngeh, ahˬ sahˇ gʼaˬ-ahˇ paˇ ya biꞈ kʼoꞈ nehˬ-eu zahˇ jaˆ-eu meh. 32Ehˇ kʼawꞈ, Leˬbiˇ aˇ jeuˬ deuˬ-aˬ, aˬ yawꞈ maꞈ jawˇ-eu meuˬ laꞈ kʼoeˇ jaˆ-eu aˬ yawꞈ maꞈ-euˬ myawˬ deuˬ zeuˇ kʼoꞈ geuꞈ mawꞈ naˇ, aˬ geu yamˬ-ahˇ maˬ kaˬ, zeuˇ kʼoꞈ geuꞈ nya meh. 33Leˬbiˇ tsawˇ haˬ tiˬ gʼaˬ na, meuˬ tiˬ meuˬ laꞈ kʼoeˇ jaˆ-eu yawˬ ha-euˬ nymˇ tiˬ nymˇ ahˬ-awˇ, maˬ zeuˇ kʼoꞈ ni bi jaˆ naˇ, Juˬbiˬliˬ Aˇ kʼoꞈ keuˆ le ngeh, nymˇ kʼoeˇ nymˇ aˬ yawꞈ-ahˇ paˇ ya biꞈ kʼoꞈ meh. Aˬ jeˬ miˇ neh ehˇ naˇ, Leˬbiˇ tsawˇ haˬ deuˬ-euˬ meuˬ laꞈ kʼoeˇ jaˆ-eu Leˬbiˇ tsawˇ haˬ deuˬ-euˬ nymˇ deuˬ-aˬ, Iˇsaˬleˬlaˆ tsawˇ haˬ deuˬ laꞈ kʼoeˇ, aˬ myah luꞈ aˬ yawꞈ maꞈ-ahˇ taꞈ-eu nymˇ deuˬ pyeuꞈ-eu meh. 34Ehˇ kʼawꞈ, Leˬbiˇ tsawˇ haˬ deuˬ-euˬ meuˬ jawˬ jawˬ-ehˇ jaˆ-eu jeˬ zaˬ gaˆ kʼahˬ pyeuꞈ-eu miˇ tsaˬ deuˬ-ahˇ, tiˬ jawˇ-iˬ maˬ ya ahˬ dzaˬ-a. Kʼoeˇ-aˬ, mˬ maˬ maˬ byaˆ zaˇ ziˇ aˬ yawꞈ maꞈ-euˬ miˇ tsaˬ pyeuꞈ-eu meh.
Yaw shaˬ zaˬ-ahˇ caw jaw-eu
35Nawˬ-euˬ dawˬ peh jawˇ-eu nawˬ-euˬ tsawˇ jeuˬ Iˇsaˬleˬlaˆ tsawˇ haˬ tiˬ gʼaˬ na shaˬ le-awˇ, maˬ dehꞈ dzaˬ nya ni pyeuꞈ laˇ naˇ, nawˬ-ahˇ gʼaˬ mahˇ mahˇ dzaˬ-eu tsawˇ haˬ-ahˇ nawˇ caw ba-eu loꞈ-ehˇ,aˬ yawꞈ dehꞈ nya jawˇ nya ni, aˬ yawꞈ-ahˇ caw ba nehˬ-awˬ. 36Aˬ yawꞈ kʼoeˇ taˆ jiˇ jeuˬ taˬ yuˇ dzaˬ. Ehˇ kʼawꞈ, Miˬyehˇ-ahˇ guˆ-awˇ, nawˬ-euˬ tsawˇ jeuˬ Iˇsaˬleˬlaˆ tsawˇ haˬ kʼoeˇ gʼaˬ-ahˇ, nawˬ-euˬ dawˬ peh bi jawˇ-awˬ. 37Aˬ yawꞈ-ahˇ nawˇ pyuˇ paˇ nehˬ ngeh, jiˇ jeuˬ taˬ yuˇ. Aˬ yawꞈ-ahˇ dzaˬ dzaˬ dawˇ dawˇ ahˬ nehˬ ngeh kʼawꞈ, jiˇ jeuˬ taˬ laˆ dzaˬ. 38Heu-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ meh. Aˬ yawꞈ-aˬ, naw maꞈ-euˬ Miˬyehˇ ya pyeuꞈ laˇ ni, naw maꞈ-ahˇ Kaˬnaˬ miˇ kʼahˬ biꞈ-eu gʼaˇ duˬ, Iˇjiˇtuˆ miˇ kʼahˬ laꞈ kʼoeˇ neh, naw maꞈ-ahˇ sheuˬ doˆ nehˬ laꞈ-euˬ gʼaˬ pyeuꞈ-eu meh.
Zaˬ kʼaˆ-ahˇ pyehˬ nehˬ-eu
39Nawˬ-euˬ dawˬ peh jawˇ-eu nawˬ-euˬ tsawˇ jeuˬ Iˇsaˬleˬlaˆ tsawˇ haˬ tiˬ gʼaˬ na, shaˬ dui dui le-euˬ miˇ neh, zaˬ kʼaˆ geuꞈ-eu gʼaˇ duˬ aˬ yawꞈ-euˬ gʼawˇ mawˇ aˬ yawꞈ ahˬ dzaˬ naˇ, zaˬ kʼaˆ deuˬ mˇ-eu gaˇ aˬ yawꞈ-ahˇ maˬ ya bi mˇ-a. 40Juˬbiˬliˬ Aˇ kʼoꞈ maˬ keuˆ le kʼoeˇ keuˆ ni, nawˬ nehˬ-ehˇ aˬ yawꞈ jawˇ-awˇ, gʼaˬ mahˇ mahˇ dzaˬ-eu tsawˇ haˬ tiˬ gʼaˬ loꞈ-ehˇ nawˬ-euˬ gaˇ aˬ yawꞈ ya mˇ tehꞈ-a. 41Aˇ yamˬ kʼoeˇ yamˬ keuˆ le naˇ, aˬ yawꞈ hawˇ-eu aˬ yawꞈ-euˬ zaˬ deuˬ nawˬ nehˬ-ehˇ maˬ paˇ jawˇ-ehˇ, aˬ yawꞈ-euˬ aˬ piˬ aˬ bawˇ deuˬ-euˬ myawˬ kmˇ yaˇ kmˇ jaˆ-eu aˬ yawꞈ-euˬ aˬ yuiꞈ aˬ nyiˇ deuˬ jawˇ gaˇ aˬ yawꞈ gʼoꞈ-iˇ tehꞈ-a. 42Iˇsaˬleˬlaˆ tsawˇ haˬ deuˬ-aˬ, Sahˬpaˬ Miˬyehˇ neh Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ aˬ yawꞈ-euˬ zaˬ kʼaˆ deuˬ pyeuꞈ-eu miˇ neh, aˬ yawꞈ maꞈ-ahˇ zaˬ kʼaˆ loꞈ-ehˇ maˬ ya ahˬ dzaˬ-a. 43Aˬ yawꞈ maꞈ-ahˇ taˬ kʼehˬ taˬ kʼaˆ nehˬ. Ehˇ kʼawꞈ, Miˬyehˇ-euˬ ehˇ dawˬ-ahˇ naˇ haˬ geuꞈ-awˬ. 44Naw maꞈ zaˬ kʼaˆ cu mawꞈ naˇ, dawˬ peh jaˆ-eu miˇ kʼahˬ deuˬ laꞈ kʼoeˇ poˆ zeuˇ-iˇ-awˬ. 45Naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ-euˬ zaˬ deuˬ naw maꞈ zeuˇ cu nya meh. Naw maꞈ miˇ kʼahˬ laꞈ kʼoeˇ dehꞈ le-euˬ kʼoeˇ loꞈ-ehˇ gʼeh-eu zaˬ deuˬ-ahˇ naw maꞈ zeuˇ tsehˆ geuꞈ nya meh. 46Aˬ yawꞈ maꞈ ziˇ jiˇ ngeh keuˆ ni, naw maꞈ-euˬ aˬ li deuˬ-euˬ zaˬ kʼaˆ bi geuꞈ-eu gʼaˇ duˬ, naw maꞈ-euˬ aˬ li deuˬ-ahˇ jeˬ biˇ loꞈ-ehˇ a nehˬ yaꞈ nya meh. Ehˇ kʼawꞈ, naw maꞈ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ naw maꞈ maˬ ya kʼehˬ-a.
47Naw maꞈ nehˬ-ehˇ jawˇ-eu boeˇ miˬ siˬ kʼaˬ tiˬ gʼaˬ na smˇ muiˬ muiˬ laˇ -awˇ, naw maꞈ-euˬ tsawˇ jeuˬ Iˇsaˬleˬlaˆ tsawˇ haˬ tiˬ gʼaˬ na shaˬ le-euˬ miˇ neh, boeˇ miˬ siˬ kʼaˬ kʼoeˇ gʼaˬ-euˬ zaˬ kʼaˆ geuꞈ-eu gʼaˇ duˬ maˬ ehˇ, boeˇ miˬ siˬ kʼaˬ kʼoeˇ gʼaˬ-euˬ aˬ yuiꞈ aˬ nyiˇ-euˬ zaˬ kʼaˆ geuꞈ-eu gʼaˇ duˬ maˬ ehˇ, yawˬ haˇ yawˬ ha ahˬ dzaˬ-euˬ ehˇ-awˬ. 48Ahˬ dzaˬ gʼaˬ-euˬ kʼawꞈ, zeuˇ kʼoꞈ geuꞈ nya-eu zahˇ jaˆ meh. Aˬ yawꞈ-euˬ mehˇ nmˇ tsi tsi ni gʼeh-eu deuˬ laꞈ kʼoeˇ, tiˬ gʼaˬ na aˬ yawꞈ-ahˇ zeuˇ kʼoꞈ geuꞈ nya meh. 49Aˬ yawꞈ-euˬ aˬ uiˬ, aˬ zawˇ hawˇ-eu aˬ gʼoe deuˬ maˬ ehˇ, aˬ yawꞈ-euˬ mehˇ nmˇ hawˇ-eu aˬ cah deuˬ maˬ ehˇ, aˬ yawꞈ-ahˇ aˬ yuiꞈ aˬ nyiˇ peh-eu tsawˇ haˬ tiˬ gʼaˬ na maˬ ehˇ, aˬ yawꞈ-ahˇ zeuˇ kʼoꞈ geuꞈ nya meh. Pyuˇ jaˆ loꞈ laˇ naˇ, yawˬ haˇ yawˬ ha kʼawꞈ zeuˇ tsehˆ kʼoꞈ nya meh. 50Aˬ yawꞈ-ahˇ zeuˇ-euˬ yaw sahˇ gʼaˬ nehˬ-ehˇ aˬ yawꞈ ja cawˬ-awˇ, yawˬ haˇ yawˬ ha ahˬ dzaˬ-euˬ nah-ahˇ neh aˇ dahˬ beh-awˇ, Juˬbiˬliˬ Aˇ kʼoꞈ keuˆ le-eu gʼaˇ duˬ loˬ-eu aˇ kʼoꞈ aˇ la hawˇ-eu, gʼaˬ mahˇ mahˇ-eu tsawˇ haˬ tiˬ gʼaˬ za-eu gʼaˬ gaˇ aˇ poeˬ paw sawˇ tsaˬ-awˇ, yawˬ haˇ yawˬ ha ya zeuˇ kʼoꞈ meh. 51Juˬbiˬliˬ Aˇ kʼoꞈ keuˆ le-eu gʼaˇ duˬ aˇ kʼoꞈ gʼawˬ mya kʼoꞈ dzeˇ naˇ, yawˬ haˇ yawˬ ha ahˬ ngeh za-euˬ aˇ poeˬ kʼoeˇ-euˬ myaˬ dzehˬ-eu paˆ biꞈ-awˇ ya zeuˇ kʼoꞈ meh. 52Aˇ kʼoꞈ ui cuiˆ tehꞈ-ehˇ dzeˇ naˇ, aˇ poeˬ biꞈ cuiˆ dzehˬ-awˇ ya zeuˇ kʼoꞈ meh. 53Yaw sahˇ gʼaˬ aˬ yawꞈ-ahˇ, kʼoꞈ kʼoꞈ lah ni gʼaˇ duˬ pyehˆ tsehˆ-awˇ gʼaˬ mahˇ mahˇ dzaˬ-eu tsawˇ haˬ loꞈ-ehˇ ngaˬ tsehˆ naˇ, maˬ ya kʼehˬ maˬ ya kʼaˆ dzaˬ-a. 54Kʼoeˇ loꞈ-ehˇ jahˇ-awˇ, aˬ yawꞈ-ahˇ maˬ zeuˇ kʼoꞈ naˇ, Juˬbiˬliˬ Aˇ kʼoꞈ keuˆ le ngeh hawˇ-eu, aˬ yawꞈ hawˇ-eu aˬ yawꞈ-euˬ zaˬ deuˬ-ahˇ ya pyehˬ nehˬ meh. 55Iˇsaˬleˬlaˆ tsawˇ haˬ tiˬ gʼaˬ-iˬ aˬ cawˬ zaˬ kʼaˆ maˬ ya pyeuꞈ tsehˆ-a. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ-aˬ, Sahˬpaˬ Miˬyehˇ-euˬ zaˬ kʼaˆ deuˬ pyeuꞈ-eu meh. Iˇjiˇtuˆ miˇ kʼahˬ laꞈ kʼoeˇ neh, aˬ yawꞈ maꞈ-ahˇ aˬ yawꞈ sheuˬ doˆ laꞈ-euˬ meh. Aˬ yawꞈ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ meh.
Currently Selected:
Uˬ duˬ 25: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
