Yawˇlaˆ 3
3
Tsawˇ jeuˬ dawˬ tawˆ luꞈ-ahˇ Miˬyehˇ yaˇ kʼaˬ daˇ-eu
1Sahˬpaˬ Miˬyehˇ ehˇ-eu dawˬ-aˬ,
“Aˇ nah aˇ yamˬ kʼoeˇ keuˆ le ngeh,
Yuˇdaˆ miˇ kʼahˬ laꞈ kʼoeˇ maˬ ehˇ,
Yeˬluˇsaˬlehˬ meuˬ-ahˇ maˬ ehˇ,
baw le za le-eu guiˬ lahˬ kʼoeˇ,
aˇ hu loꞈ-ehˇ paˇ biꞈ nehˬ ma.
2Yaˇ kʼaˬ daˇ-eu Deh kʼawꞈ laꞈ kʼoeˇ,
tsawˇ jeuˬ dawˬ tawˆ sheuˬ uiˬ jiˇ-awˇ
ngaˬ-euˬ tsawˇ haˬ deuˬ-euˬ kʼoeˇ taˆ,
yawꞈ maꞈ neh jahˇ doeˇ-euˬ aˇ poeˬ,
yawꞈ maꞈ-ahˇ ngaˇ yaˇ kʼaˬ daˇ ma.
Iˇsaˬleˬlaˆ tsawˇ haˬ deuˬ-ahˇ,
aˬ cawˬ miˇ kʼahˬ-ahˇ teh byaˆ-awˇ,
ngaˬ-euˬ miˇ kʼahˬ Iˇsaˬleˬlaˆ,
aˬ yawꞈ maꞈ nyiˬ paˆ paˆ-euˬ meh.
3Ngaˬ-euˬ tsawˇ haˬ nyehꞈ mi taˬ-euˬ,
shehˆ tsaˬ tsaˬ-awˇ biˇ geuꞈ-euˬ meh.
Nyehꞈ taˬ-euˬ aˬ buˇ aˬ li deuˬ,
zaˬ kʼaˆ zeuˇ laˇ gaˇ ahˬ dzaˬ-awˇ,
za-euˬ pyuˇ neh jiˇ baˬ dawˇ-awˇ,
meh maˬ laˇ-ahˇ byawˬ gʼa-euˬ meh.
4“Duˇlu meuˬ, Siˇdoˬ meuˬ hawˇ-eu, Piˇliˇtiˆ miˇ kʼahˬ laꞈ kʼoeˇ kʼaˇ jaˆ-eu meuˬ dawˬ tawˆ luꞈ-oˇ, naw maꞈ ngaˬ-ahˇ aˬ jeˬ jahˇ-eu lehˇ gʼeh te. Naw maꞈ ngaˬ-ahˇ tiˬ jeˬ paˬ jahˇ kʼoꞈ-eu lehˇ gʼeh te loˇ. Jahˇ kʼoꞈ ma lehˇ ngeuˇ naˇ, naw maꞈ neh kʼaˇ jahˇ-euˬ jeˬ naw maꞈ-euˬ uˬ duˬ kʼoeˇ taˆ yaw kawˇ-ehˇ paˇ keuˆ le ni ngaˇ jahˇ poˆ ma. 5Ngaˬ-euˬ pyuˇ, ngaˬ-euˬ shuiˇ hawˇ-eu, ngaˬ-euˬ myawˬ gahˬ deuˬ naw maꞈ baꞈ-awˇ, naw maꞈ-euˬ uˬ duˬ tahˬ nymˇ deuˬ laꞈ kʼoeˇ baꞈ ahˇ taˬ-euˬ meh. 6Yuˇdaˆ miˇ kʼahˬ zaˬ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ, gaˇ mahˇ kaˬ gaˇ naw maꞈ sheuˬ byoˆ gʼeh-awˇ, Heˬlaˬshaˆ tsawˇ haˬ deuˬ-ahˇ ahˬ dzaˬ-euˬ meh. 7Nymˬ-mˇ poˆ jawˇ, naw maꞈ neh ahˬ dzaˬ taˬ-euˬ jawˇ duˬ-ahˇ neh aˬ yawꞈ maꞈ-ahˇ ngaˇ paˇ sheuˬ kʼoꞈ doˆ laꞈ ma. Naw maꞈ neh aˬ yawꞈ maꞈ-ahˇ jahˇ nehˬ-euˬ loꞈ-ehˇ, naw maꞈ-ahˇ ngaˇ paˇ jahˇ poˆ ma. 8Naw maꞈ-euˬ aˬ buˇ aˬ li deuˬ Yuˇdaˆ tsawˇ haˬ deuˬ-ahˇ ya ahˬ nehˬ gaˇ keuˆ ni ngaˇ jahˇ ma. Aˬ buˇ aˬ li kʼoeˇ deuˬ-ahˇ, gaˇ mahˇ kaˬ gaˇ jawˇ-eu Saˬbyaˬ tsawˇ jeuˬ-ahˇ aˬ yawꞈ maꞈ paˇ ahˬ dzaˬ poˆ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.
9“Miˇ kʼahˬ tsawˇ jeuˬ dawˬ tawˆ luꞈ-ahˇ,
heu loꞈ-ehˇ bi siˬ bi gaˬ-awˬ.
‘Guiˇ deuˆ-eu gʼaˇ duˬ lehˬ hmˬ-awˬ.
Guiˇ deuˆ-eu tsawˇ haˬ kuˇ uiˬ-awˬ.
Guiˇ zaˬ sheuˬ-awˇ mehˬ hu iˇ-awˬ.
10Nyoˬ tsehˬ-ahˇ mi cehˇ tehˆ pyeuꞈ-awˇ,
yehˬ kʼoꞈ-ahˇ gahˬ tehˆ pyeuꞈ jiˇ-awˬ.
Gʼaˬ baˬ dui dui-eu tsawˇ haˬ kʼawꞈ,
guiˇ dzoeˬ aˬ da ma lehˇ lmˬ-awˬ.
11Dawˬ peh jawˇ-eu tsawˇ jeuˬ dawˬ tawˆ,
yaw kawˇ ma-ehˇ luˆ doˆ le-awˇ,
deh kʼawꞈ-ahˇ ga uiˬ jiˇ le-awˬ.’ ”
Nga maꞈ-euˬ Sahˬpaˬ Miˬyehˇ-oˇ,
nawˬ-euˬ guiˇ maꞈ pyehˬ gʼeh leꞈ-awˇ,
aˬ yawꞈ maꞈ-ahˇ guiˇ deuˆ le-awˬ.
12“Tsawˇ jeuˬ dawˬ tawˆ lehˬ hmˬ dah-awˇ,
Yaˇ kʼaˬ daˇ-eu Deh kʼawꞈ laꞈ kʼoeˇ
yawˬ jeuˬ na luꞈ oe keuˆ jiˇ-awˬ.
Sahˬpaˬ Miˬyehˇ pyeuꞈ-eu ngaˇ-aˬ,
dawˬ peh jawˇ-eu tsawˇ jeuˬ deuˬ-ahˇ,
kʼoeˇ gaˇ nuiˇ-awˇ yaˇ kʼaˬ daˇ ma.
13Aˬ yawꞈ maꞈ haiˬ dui dui-eu meh.
Cehˇ yehˬ ngeh pyehˆ tsehˆ-eu loꞈ-ehˇ,
aˬ yawꞈ maꞈ-ahˇ pyehˆ tsehˆ nehˬ-awˬ.
Nawˬ kʼmˬ byah kʼaˇ yoeˇ kaˇ ngeh keuˆ,
aˬ gaꞈ dzaˇ uiˇ lehˬ-eu loꞈ-ehˇ,
aˬ yawꞈ maꞈ-ahˇ lehˬ pyehˆ nehˬ-awˬ.”
14Yaˇ kʼaˬ daˇ-eu Deh kʼawꞈ laꞈ kʼoeˇ
tsawˇ haˬ baˬ maꞈ, tsawˇ haˬ baꞈ muˇ,
uiˬ leˇ bymˇ leˇ-awˇ jawˇ luꞈ meh.
Yaˇ kʼaˬ daˇ-eu Deh kʼawꞈ laꞈ kʼoeˇ,
Sahˬpaˬ Miˬyehˇ-euˬ Aˇ nah kʼoeˇ,
gʼawˬ myahˇ maˬ gʼeh-ehˇ keuˆ le meh.
15Nahˇ ma ba la zahˇ tsui iˇ-awˇ,
aˬ guiˇ yaw shehꞈ maˬ paˇ bya meh.
Miˬyehˇ aˬ yawꞈ-euˬ tsawˇ haˬ deuˬ-ahˇ guiˬ lahˬ biꞈ tehꞈ-a
16Ziˇoˬ gawˬ jawˬ kʼoeˇ taˆ jawˇ-awˇ,
Sahˬpaˬ Miˬyehˇ lmˬ doˆ laˇ ngeh,
Yeˬluˇsaˬlehˬ meuˬ-ahˇ jawˇ-awˇ,
mˬ jeˬ jeˬ-eu loꞈ-ehˇ lmˬ ngeh,
mˬ hawˇ miˇ tsaˬ yaw dzuˬ dzuˬ meh.
Ehˇ kʼawꞈ aˬ yawꞈ-euˬ tsawˇ jeuˬ-ahˇ,
Sahˬpaˬ Miˬyehˇ haw piˇ tehꞈ-a.
17“Kʼoeˇ ngeh jawˇ, Iˇsaˬleˬlaˆ-oˇ,
SahˬpaˬMiˬyehˇ lehˇ kuˇ-eu ngaˇ,
nawˬ-euˬ Miˬyehˇ pyeuꞈ-eu ma lehˇ,
nawˇ siˬ duˬ mawˇ duˬ laˇ tehꞈ-a.
Muiˬ-eu shawˇ-eu ngaˬ-euˬ gawˬjawˬ,
Ziˇoˬ-euˬ kʼoeˇ taˆ ngaˇ jawˇ ma.
Yeˬluˇsaˬlehˬ meuˬ shawˇ laˇ-awˇ,
aˬ cawˬ neh bi deuˆ gʼaˬ-eu jeˬ,
tiˬ jawˇ-iˬ maˬ paˇ keuˆ le meh.
18Aˇ nah aˇ yamˬ kʼoeˇ keuˆ le ngeh,
gawˬ jawˬ aˬ gaꞈ yaˇ mˇ byah-awˇ,
gawˬ duˇ jeˬ zaˬ gaˆ byah jiˇ-awˇ,
Yuˇdaˆ miˇ kʼahˬ lawˇ gawˆ lawˇ baˬ,
iˇ cuꞈ tiˬ byah ni yoeˇ tehꞈ-a.
Sahˬpaˬ Miˬyehˇ-euˬ Nymˇ-ahˇ neh,
lawˇ gawˆ tiˬ gawˆ yoeˇ doˆ le-awˇ,
Aˬ kaˬ shaˆ Deh kʼawꞈ kʼoeˇ kʼawꞈ-ahˇ
iˇ cuꞈ tiˬ loꞈ biꞈ le tehꞈ-a.
19“Iˇjiˇtuˆ hawˇ-eu Eˬdoˬ-aˬ,
Yuˇdaˆ miˇ kʼahˬ-ahˇ guiˇ deuˆ-awˇ,
maˬ lehˬ maˬ ca-eu tsawˇ haˬ-ahˇ,
shiˬ sehꞈ yoeˇ-euˬ jaˆ-eu miˇ neh,
Iˇjiˇtuˆ miˇ kʼahˬ byoˆ le-awˇ,
kʼaˇ shuiꞈ deh ga pyeuꞈ-iˇ tehꞈ-a.
Eˬdoˬ miˇ kʼahˬ gʼeh byoˆ le-awˇ,
bawˇtsahˬ bawˇdahˇ pyeuꞈ-iˇ tehꞈ-a.
20Mˬ maˬ maˬ byaˆ zaˇ ziˇ jiˇ ni,
Yuˇdaˆ miˇ kʼahˬ tsawˇ haˬ behˇ-awˇ,
Yeˬluˇsaˬlehˬ ziˇ baw tehꞈ-a.
21Shiˬ laˆ yoeˇ-euˬ tsawˇ haˬ deuˬ-ahˇ,
maˬ bi dzeuˇ-iˇ ni kʼehˬ nehˬ ma.
Sahˬpaˬ Miˬyehˇ pyeuꞈ-eu ngaˇ-aˬ,
Ziˇoˬ gawˬ jawˬ kʼoeˇ taˆ jawˇ ma.”
Currently Selected:
Yawˇlaˆ 3: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
