Hawˇseˬ 2
2
1Kʼoeˇ miˇ neh, nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ “Ngaˬ-euˬ tsawˇ haˬ” lehˇ hawˇ-eu, “Sahˬpaˬ Miˬyehˇ gaˬ-eu tsawˇ haˬ” lehˇ kuˇ-awˬ.
Saˇ jaˇ maˬ ziꞈ-eu Gawˬmaˬ, saˇ jaˇ maˬ ziꞈ-eu Iˇsaˬleˬlaˆ
2Ngaˬ-euˬ aˬ buˇ aˬ li deuˬ-oˇ,
aˬ ma-ahˇ ja sawˇ mehˬ nehˬ-awˬ.
Aˬ yawꞈ ngaˬ-euˬ miˬ zaˬ maˬ ngeuˇ.
Ngaˇ gʼeh yawꞈ-euˬ yo zaˬ maˬ ngeuˇ.
Meh maˬ laˇ geuꞈ-awˇ dehꞈ jawꞈ-euˬ,
myaˆ pyawˬ kʼaˬ naˆ dzuiꞈ shawˇ dzeh-awˇ,
Aˬ cawˬ yo zaˬ-ahˇ bahˬ mawꞈ-eu,
nui ma kʼoeˇ siˬ laˆ byoˆ-awˬ lehˇ,
naw maꞈ aˬ yawꞈ-ahˇ ja sawˇ-awˬ.
3Dawˬ tsoˆ gʼoˆ-awˇ maˬ dehꞈ paˇ naˇ,
aˬ yawꞈ dehꞈ doˆ le ngeh loꞈ-ehˇ,
mehˬ tsoeˬ lehˆ neˇ-awˇ bi shaˬ ma.
Koˆ dui dui-awˇ gui dui dui-eu,
bawˇ tsahˬ bawˇ dahˇ tiˬ tsahˇ loꞈ-ehˇ,
iˇ cuꞈ mehꞈ-awˇ bi shiˇ leˇ ma.
4Yawꞈ neh baw-euˬ zaˬ deuˬ ahˇ kʼawꞈ,
ngaˬ-euˬ nui ma gʼawˬ shaˬ maˬ gaˬ.
Aˬ jeˬ miˇ nga lehˇ ehˇ naˇ,
meh maˬ laˇ neh baw-euˬ zaˬ meh.
5Zaˬ baw aˬ ma meh maˬ laˇ kʼoeˇ,
shaꞈ dawˇ-eu maˬ baw ni dehꞈ-awˇ,
dawˬ tmˇ heu loꞈ-ehˇ mˇ-eu meh.
‘Dzaˬ-eu dzaˇ muiˬ, dawˇ-eu iˇ cuꞈ,
dm-eu saˬ paˇ, yawˇ zaˬ caꞈ hm,
aˬ gaꞈ dzaˇ uiˇ, saˬ loˬ loˬ tsiˇ,
heu deuˬ biꞈ-eu zaˬ kʼaˬ mehˬ nah,
caw teh gʼeh ma’ lehˇ tmˇ-eu meh.
6Kʼoeˇ baˬ da neh, yawꞈ-euˬ gaˇ ma.
Aˬ gah duˬ gahˬ ngaˇ sheu uiˬ-awˇ,
yawꞈ iˇ gaˇ ma maˬ bi mawˇ ni,
lahˇ goˇ gawˬ -awˇ ciˬ tsoeˬ nehˬ ma.
7Zaˬ kʼaˬ mehˬ nah yawꞈ caw teh kʼawꞈ,
zaˬ kʼaˬ deuˬ-ahˇ maˬ teh miˇ-aˇ.
Zaˬ kʼaˬ kʼoeˇ deuˬ-ahˇ poˆ doe kʼawꞈ,
maˬ poˆ mawˇ nya-ehˇ pyeuꞈ laˇ-awˇ,
‘Kʼaˬdzeˇzaˬ yaw beh gʼaˬ jawˇgaˇ,
ngaˇ paˇ gʼoꞈ poˆ-iˇ shaw-iˬ ma.
Aˇ hu aˬ yawꞈ nehˬ-ehˇ dehꞈ ngeh,
iˬ nah dehꞈ luꞈ-eu naˆ maˬ tseˇ,
maˬ gaˇ dui dui law miˇ-a’ lehˇ,
aˬ yawꞈ ehˇ-eu yaw duˬ baw meh.
8Cehˇ, aˬ gaꞈ dzaˇ uiˇ, saˬ loˬ tsiˇ,
heu deuˬ dawˬ tawˆ yawꞈ-ahˇ biꞈ-awˇ,
Baˬlaˇ-ahˇ uˬ duˬ tahˬ leˇ ngeh,
aˬ yawꞈ zmˬ-euˬ myawˬ gahˬ pyeuꞈ-eu,
Pyuˇkʼoˇ shuiˇkʼoˇ biꞈ-euˬ kʼoeˇ gʼaˬ,
ngaˇ meh lehˇ yawꞈ maˬ siˬ nya-a.
9Kʼoeˇ baˬ da neh, yamˬ law tsaˬ ngeh,
ngaˬ-euˬ cehˇ ngaˇ yuˇ kʼoꞈ jiˇ-awˇ,
aˬ gaꞈ dzaˇ uiˇ yuˇ kʼoꞈ jiˇ ma.
Aˬ yawꞈ gʼawˇ mawˇ bi dm gʼoeˬ-euˬ,
yawˇ caꞈ hm hawˇ-eu saˬ paˇ deuˬ,
ngaˇ yuˇ kʼoꞈ jiˇ-awˇ bi shaˬ ma.
10Yawꞈ-euˬ zaˬ kʼaˬ deuˬ-euˬ mehˬ shi,
yawꞈ-ahˇ neˇ myawˆ ni lehˆ dzeh-awˇ,
ngaˬ-euˬ baoˬ uˬ moˆ bi shaˬ ngeh,
ka kʼoꞈ nehˬ-eu gʼaˬ maˬ jawˇ-aˇ.
11Aˬ yawꞈ bawˬ-iˬ gʼeh-awˇ zahˇ tawˬ-eu,
la shuiꞈ lah-awˇ, jawˇ nah tawˬ-eu,
zahˇ sahˇ kʼoꞈ bawˬ-iˬ dawˬ tawˆ luꞈ-ahˇ,
byoˆ-iˇ jiˇ ni ngaˇ jahˇ nehˬ ma.
12‘Ngaˬ-euˬ zaˬ kʼaˬ deuˬ neh ngaˬ-ahˇ,
byawˬ gʼa poeˬ biꞈ-euˬ meh’ ehˇ-eu,
yawꞈ-euˬ aˬ gaꞈ baw duˆ hawˇ-eu,
siˬguˬ aˇ bawˇ kʼoeˇdeuˬ dawˬtawˆ,
ngaˇ laˆ piˬ laˆ byoˆ jiˇ nehˬ ma.
Bawˇ tsahˬ bawˇ dahˇ bi pyeuꞈ-iˇ-awˇ,
bawˇ tsahˬ jeˬ zaˬ yaw haiˬ deuˬ neh,
bi dzaˬ bi dawˇ byoˆ jiˇ leꞈ ma.
13Baˬlaˇ miˬ yehˇ-ahˇ bawˬ-iˬ gʼeh-awˇ,
yaw saw jeˬ doꞈ damˬ-euˬ uˬ taꞈ,
myawˬ guˇ geuꞈ-awˇ jahˇ gʼeh haw-awˇ,
zaˬ kʼaˬ deuˬ nehˬ-ehˇ cah cah-ehˇ,
ngaˬ-ahˇ aˬ yawꞈ ngehˇ-euˬ miˇ neh,
aˬ yawꞈ-ahˇ ngaˇ kʼehˬ nehˬ ma lehˇ,
Sahˬpaˬ Miˬyehˇ ehˇ taˬ-euˬ meh.
Sahˬpaˬ Miˬyehˇ yawˬ ha-euˬ tsawˇ haˬ-ahˇ gaˬ-eu
14Kʼoeˇ baˬ da neh aˬ yawꞈ-ahˇ ngaˇ,
bawˇ tsahˬ bawˇ dahˇ-ahˇ sheuˬ gʼeh-awˇ,
dawˬ nahˬ yu ni ngehˬ-eu laꞈ kʼoeˇ,
ngaˬ-ahˇ gaˬ kʼoꞈ laˇ ni mˇ ma.
15Aˬ yawꞈ-euˬ aˬ gaꞈ yaˇ kmˇ deuˬ,
aˬ yawꞈ-ahˇ ngaˇ paˇ biꞈ kʼoꞈ-awˇ,
shaˬ zahˬ deh kʼawꞈ kuˇ-euˬ kʼoeˇ tsahˇ,
noeˬ tmˬ duˬ laˇ gʼoˆ bi pyeuꞈ ma.
Aˇ hu aˬ yawꞈ miˬ daꞈ geuꞈ-awˇ,
Iˇjiˇtuˆ miˇ kʼahˬ laꞈ kʼoeˇ neh,
doˆ laˇ ngeh ngehˬ cawˬ-euˬ loꞈ-ehˇ,
ngaˬ-ahˇ ngehˬ cawˬ poˆ laˇ tehꞈ-a.
16Aˬ yawꞈ-euˬ kʼaˬ dzeˇ zaˬ ma lehˇ,
aˬ yawꞈ ngaˬ-ahˇ paˇ kuˇ poˆ-awˇ,
‘Baˬlaˇ’#2.16 ‘Baˬlaˇ’ lehˇ ehˇ-eu Kaˬnaˬ tsawˇ jeuˬ miˬyehˇ-euˬ tsawˇ myahˇ heu myahˇ-euˬ dawˬ tsuiꞈ tiˬ hmˬ-aˬ, ‘sahˬ paˬ’ lehˇ ehˇ mawꞈ-awˇ, dawˬ tsuiꞈ yawˬ hmˬ yawˬ-aˬ, ‘ngaˬ-euˬ kʼaˬ dzeˇ zaˬ’ lehˇ ehˇ mawꞈ-eu meh. lehˇ maˬ paˇ kuˇ-aˇ lehˇ,
Sahˬpaˬ Miˬyehˇ ehˇ taˬ-euˬ meh.
17Baˬlaˇ miˬ yehˇ-euˬ tsawˇ myahˇ kʼoeˇ,
aˬ yawꞈ maˬ paˇ bi kuˇ poˆ ma.
18Aˇ yamˬ kʼoeˇ yamˬ keuˆ laˇ ngeh jawˇ,
ngaˬ-euˬ tsawˇ haˬ heu deuˬ kʼoeˇ taˆ,
maˬ coeˬ maˬ ciˆ nehˬ-eu gʼaˇ duˬ,
bawˇ tsahˬ jeˬ zaˬ dawˬ tawˆ hawˇ-eu,
kʼoeˇ taˆ zaw-eu aˇ jiˇ maˬ ehˇ,
miˇ tsa joe-eu deuˬ-ahˇ maˬ ehˇ,
ngaˇ saˇ jaˇ dzaˬ taꞈ-eu lehˇ ma.
Miˇ kʼahˬ heu kʼahˬ laꞈ kʼoeˇ jaˆ-eu,
guiˇ deuˆ-eu keu ka dawˬ tawˆ luꞈ,
mi cehˇ hawˇ-eu kaˆ dawˬ tawˆ luꞈ,
ngaˇ laˆ piˬ laˆ byoˆ nehˬ jiˇ-awˇ,
ngaˬ-euˬ tsawˇ haˬ heu deuˬ dawˬ tawˆ,
nui saˇ oꞈ-awˇ ya dehꞈ tehꞈ-a.
19Iˇsaˬleˬlaˆ-oˇ, nawˬ-ahˇ ngaˇ,
ngaˬ-euˬ miˬ zaˬ bi geuꞈ-eu ma.
Nawˬ-euˬ kʼoeˇ taˆ saˇ jaˇ ziꞈ-awˇ,
nawˬ-ahˇ gaˬ-eu ngaˬ-euˬ nui gaˬ,
nawˬ-ahˇ ngaˇ gʼawˬ shaˬ gaˬ-eu jeˬ,
tiˬ jawˇ-iˬ maˬ bi tsehˆ leˇ-ehˇ,
tiˬ jawˇ-iˬ maˬ paˇ dehꞈ gʼawˬ ma.
20Ngaˬ-euˬ saˇ jaˇ-ahˇ ngaˇ ziꞈ-awˇ,
nawˬ-ahˇ ngaˬ-euˬ bi pyeuꞈ tsehˆ ma.
Ngaˇ Sahˬpaˬ Miˬyehˇ ngeuˇ meh lehˇ,
nawˇ yaw muiˬ-ehˇ siˬ duˬ tehꞈ-a.
21-22Aˇ nah aˇ yamˬ kʼoeˇ keuˆ laˇ ngeh,
ngaˬ-euˬ tsawˇ jeuˬ Iˇsaˬleˬlaˆ#2.21 Iˇsaˬleˬlaˆ Heˬbyehˇ Jaˇ liꞈ laꞈ kʼoeˇ Iˇsaˬleˬlaˆ-ahˇ Yeˬzaˬleˬlaˇ lehˇ ehˇ taˬ-euˬ meh (Hawˇseˬ 1.4, 11, laꞈ kʼoeˇ haw-awˬ).
shaˇ-euˬ dawˬ-ahˇ ngaˇ naˇ haˬ ma.
Miˇ tsaˬ tahˬ kʼawˇ heu-euˬ kʼoeˇ taˆ,
uˬ yehˇ yehˇ le ni ngaˇ jahˇ ma.
Cehˇ, aˬ gaꞈ, saˬ loˬ heu deuˬ-ahˇ,
miˇ tsaˬ neh bi loˆ le tehꞈ-a.
23Miˇ kʼahˬ heu kʼahˬ jawˇ duˬ laꞈ kʼoeˇ,
ngaˬ-euˬ tsawˇ haˬ deuˬ ziꞈ leˇ-awˇ,
baw le za le ni ngaˇ jahˇ ma.
“Maˬ gaˬ-eu tsawˇ haˬ” lehˇ kuˇ-euˬ,
kʼoeˇ deuˬ-ahˇ ngaˇ gaˬ poˆ nehˬ-awˇ,
“Ngaˬ-euˬ tsawˇ haˬ maˬ ngeuˇ” ehˇ gaˇ,
“Ngaˬ-euˬ tsawˇ haˬ ngeuˇ-eu ma” lehˇ,
ngaˇ paˇ kuˇ poˆ ehˇ poˆ nehˬ ngeh,
“Nawˇ nga maꞈ-euˬ Miˬyehˇ ma” lehˇ,
ngaˬ-ahˇ yawꞈ maꞈ kuˇ laˇ tehꞈ-a.
Currently Selected:
Hawˇseˬ 2: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
