Hawˇseˬ 12
12
1Iˇsaˬleˬlaˆ tsawˇ haˬ deuˬ neh,
mˬ tiˬ ciꞈ mˇ-euˬ shaˇ-euˬ jeˬ,
yaw muiˬ maˬ jaˆ yaw cawˆ tehꞈ meh.
Yaw lehˬ hawˇ-eu yaw ca mˇ-eu,
myaˬ laˇ kʼaˆ laˇ tehˇ tehˬ-eu meh.
Aˬshuˇliˆ-ahˇ saˇ jaˇ dzaˬ-awˇ,
Iˇjiˇtuˆ-ahˇ gaꞈ taꞈ-eu meh.”
2Yuˇdaˆ tsawˇ haˬ deuˬ-euˬ yaw ca,
Sahˬpaˬ Miˬyehˇ ja-eu jaˆ meh.
Iˇsaˬleˬlaˆ deuˬ-euˬ yaw lehˬ,
Sahˬpaˬ Miˬyehˇ kʼehˬ-eu jaˆ meh.
Aˬ yawꞈ maꞈ-ahˇ geuˇ-eu loꞈ-ehˇ,
kʼehˬ-eu kʼaˆ-eu ya daˬ tehꞈ-a.
3Aˬ yawꞈ maꞈ-euˬ aˬ poeˬ Yaˬkoˆ,
uˬ maˆ laꞈ kʼoeˇ uˇ luꞈ ngeh neh,
Iˇsawˇ-euˬ kuiˇ nuiꞈ-ahˇ tsuˆ-awˇ,
aˬ yawꞈ paˇ huiˬ loˆ laˇ ngeh jawˇ,
Miˬyehˇ nehˬ-ehˇ paˇ dawꞈ-euˬ meh.
4Mˬ taˆ gʼaˬ kʼehˇ-ahˇ dawꞈ gʼaˬ-awˇ,
ngoeˇ-awˇ guiˬ lahˬ shaˇ geuꞈ-euˬ meh.
Beˬdeˬlaˇ lehˇ kuˇ-eu tsahˇ-ahˇ,
Miˬyehˇ aˬ yawꞈ jawˇ gaˇ oe-awˇ,
aˬ yawꞈ-ahˇ dawˬ ngehˬ cawˬ-euˬ meh.
5Baoˬ huiˬ dui dui-eu Miˬyehˇ kʼoeˇ,
Sahˬpaˬ Miˬyehˇ lehˇ myahˇ-euˬ meh.
6Yaˬkoˆ-euˬ zaˬ deuˬ uˆ deuˬ-oˇ,
kʼoeˇ baˬ da neh nymˬ-mˇ naw maꞈ,
naw maꞈ-euˬ Miˬyehˇ-ahˇ jah-awˇ,
aˬ yawꞈ jawˇ paw gʼoꞈ laˇ jiˇ-awˬ.
Gʼoeˇ-eu gaˬ-eu jeˬ-ahˇ hawˇ-eu,
yaw tsaˬ yaw dawˇ jeˬ-ahˇ naw maꞈ,
ziꞈ dah ni tsuˆ tehꞈ-eu laꞈ kʼoeˇ,
naw maꞈ-euˬ Miˬyehˇ luˆ le gaˇ,
nui ma oˇ oꞈ-awˇ dawˬ tawˬ-awˬ.
Yaˇ kʼaˬ ya daˇ meh lehˇ ehˇ-eu dawˬ
7Sahˬpaˬ Miˬyehˇ ehˇ-eu dawˬ-aˬ,
“Iˇsaˬleˬlaˆ tsawˇ haˬ deuˬ-aˬ,
Kaˬnaˬ tsawˇ haˬ kʼoeˇ deuˬ loꞈ-ehˇ,
maˬ sui maˬ dawˇ-eu tsawˇ haˬ meh.
Maˬ tsaˬ-eu daˇ leuˇ neh saˆ-awˇ,
mehˇ shuiˇ shuiˇ-eu nui ma ahˇ meh.
8‘Nga maꞈ smˇ muiˬ muiˬ dui dui ma.
Maˬ sui maˬ dawˇ-eu jeˬ laꞈ kʼoeˇ,
pyuˇ shuiˇ laˆ jaˆ taˬ-euˬ meh lehˇ,
tsawˇ haˬ tiˬ gʼaˬ-iˬ nga maꞈ-ahˇ,
maˬ ngehˬ nya-a’ lehˇ ehˇ-eu meh.
9Iˇjiˇtuˆ miˇ kʼahˬ laꞈ kʼoeˇ neh,
naw maꞈ-ahˇ sheuˬ doˆ-euˬ Miˬyehˇ,
Sahˬpaˬ Miˬyehˇ pyeuꞈ-eu ngaˇ-aˬ,
aˇ hu kʼaˇ shuiꞈ deh-ahˇ shaˬ ngeh,
sehˬ gʼawˆ laꞈ kʼoeˇ jawˇ-euˬ loꞈ-ehˇ,
naw maꞈ ya jawˇ poˆ ni jahˇ ma.
10“Bawˇlawˇpeh#12.10 ‘Bawˇlawˇpeh’ lehˇ ehˇ-eu dawˬ tsuiꞈ 9.7-ahˇ haw-awˬ. -ahˇ ngaˇ dawˬngehˬ-awˇ,
yaw sahˇ laꞈ kʼoeˇ ya mawˇ-eu jeˬ,
gʼawˬ mya poˆ ngaˇ byaˬ nehˬ-euˬ ma.
Bawˇlawˇpeh-ahˇ gʼoe-eu laꞈ kʼoeˇ,
ngaˬ-euˬ tsawˇ haˬ-ahˇ mehˬ-euˬ ma.
11Ehˇ kʼawꞈ, tahˬ pahˬ aˬ ma deuˬ-ahˇ,
Giˇlaˆ meuˬ uˬ duˬ tahˬ-euˬ meh.
Kʼaˇ tahˬ-euˬ deuˬ ya shiˇ tehꞈ-a.
Giˇlaˇgaˬlaˇ meuˬ-euˬ laꞈ kʼoeˇ,
mawˇ neˇ mawˇ gaw lawˇ nehˬ-euˬ meh.
Kʼoeˇ gaˇ jaˆ-eu lawˇ duˬ kʼoeˇ deuˬ,
deh liˬ gʼahˇ ceh gʼoˆ bymˇ taˬ-euˬ,
kʼaˬ lo lo bymˇ-ahˇ duˇ tehꞈ-a.”
12Aˬ dui-euˬ aˬ poeˬ Yaˬkoˆ-aˬ,
miˬ zaˬ tiˬ gʼaˬ sheuˬ-euˬ aˇ poeˬ,
aˬ cawˬ-euˬ yawˇ bo nehˬ-euˬ meh.
13Iˇjiˇtuˆ-ahˇ zaˬ kʼaˆ geuꞈ-eu,
Iˇsaˬleˬlaˆ tsawˇ haˬ deuˬ-ahˇ,
ka kʼoꞈ-awˇ sheuˬ gʼeh-eu gʼaˇ duˬ,
aˬ dui Miˬyehˇ neh kʼehˇ doˆ-euˬ,
Bawˇlawˇpeh tiˬ gʼaˬ oe-euˬ meh.
14Sahˬpaˬ Miˬyehˇ nui ma naˇ ni,
Iˇsaˬleˬlaˆ tsawˇ haˬ mˇ-awˇ,
aˬ yawꞈ maꞈ neh mˇ-euˬ yaw lehˬ,
shiˇ gaˇ keuˆ ni daˬ-eu tsaˬ meh.
Sahˬpaˬ Miˬyehˇ myaˆ pyawˬ cawˆ ni,
aˬ yawꞈ maꞈ mˇ-euˬ baˬ da neh,
kʼehˬ-eu jeˬ-ahˇ ya daˬ tehꞈ-a.
Currently Selected:
Hawˇseˬ 12: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
