Aˇ dahˬ 49
49
Yaˬkoˆ aˇ saˬ saˬ-eu dawˬ ngehˬ yaꞈ-euˬ
1Aˬ yawꞈ-euˬ aˬ li deuˬ-ahˇ Yaˬkoˆ kuˇ uiˬ jiˇ-awˇ, heu loꞈ-ehˇ ehˇ nehˬ-euˬ meh. Heu gaˇ uiˬ laˇ-awˬ. Aˬ kaˇ naw maꞈ-euˬ mehˬ shi keuˆ le-eu gaˇ kawˆ ngaˇ naw maꞈ-ahˇ ehˇ nehˬ nyaˇ.
2Yaˬkoˆ-euˬ aˬ li deuˬ-oˇ, tiˬ kawˆ loꞈ-ehˇ
uiˬ laˇ-awˇ naˇ haˬ laˇ-awˬ.
Nawˬ ha mehˇ nmˇ-euˬ aˬ da Iˇsaˬleˬlaˆ-euˬ
dawˬ-ahˇ naˇ haˬ laˇ-awˬ.
3Ngaˬ li aˬ yuiꞈ yuiꞈ saˬ gʼaˬ pyeuꞈ-eu Luˇbeˬ-oˇ,
nawˇ ngaˬ-euˬ gʼaˬ pyeuꞈ-awˇ,
Ngaˬ li dawˬ tawˆ luꞈ laꞈ kʼoeˇ nawˇ kʼahˬ sehˇ
jaˆ dzehˬ-awˇ, gʼaˬ kʼaˆ dzehˬ-eu gʼaˬ meh.
4Nawˇ-aˬ, guˆ laˇ paˬ-ehˇ gʼeh-eu iˇ jeuˬ oe gaˇ
duˇ-eu tsawˇ haˬ meh.
Ehˇ kʼawꞈ, aˬ cawˬ taꞈ-ehˇ huiˬ dzehˬ-eu gʼaˬ,
nawˇ maˬ pyeuꞈ laˇ nya-a.
Aˬ jeˬ miˇ neh ehˇ naˇ, ngaˬ-euˬ ma nyiˇ nehˬ-ehˇ nawˇ joe-awˇ,
Yawˬ ha aˬ da-euˬ yuꞈ zaˇ-ahˇ nawˇ laˆ jawꞈ-euˬ meh.
5Suˇmoˬ hawˇ-eu Leˬbiˇ tiˬ mehˇ nmˇ meh.
Yaw haiˬ jeˬ mˇ-eu gʼaˇ duˬ aˬ yawꞈ nyaꞈ mi cehˇ zmˬ-eu meh.
6Aˬ yawꞈ nyaꞈ bawˬ dzaˬ kʼoeˬ gaˇ ngaˇ maˬ iˇ.
Aˬ yawꞈ nyaꞈ mehˬ bawˬ mˇ gaˇ ngaˇ maˬ ahˇ.
Aˬ jeˬ miˇ neh ehˇ naˇ, tsawˇ haˬ-ahˇ sehꞈ-awˇ,
mawˇ neˇ kuiˇ guˬ yuˇ niˇ gʼa gaˇ keuˆ ni,
aˬ yawꞈ nyaꞈ nui ma pehˇ-eu meh.
7Aˬ nyaꞈ nmˇ nui ma pehˇ-eu jeˬ-ahˇ,
yaˬ kʼehˇ yaˬ nehˬ luꞈ-uˇ.
Aˬ jeˬ miˇ neh ehˇ naˇ, aˬ nyaꞈ nmˇ nui ma pehˇ-eu,
guˆ dui dui laˇ paˬ-ehˇ gʼeh-eu meh.
Aˬ nyaꞈ nmˇ nui kʼaˬ tsoꞈ gaˇ yaˬ kʼehˇ yaˬ nehˬ luꞈ-uˇ.
Aˬ jeˬ miˇ neh ehˇ naˇ, aˬ yawꞈ nyaꞈ-euˬ nui kʼaˬ
aˬ cawˬ-ahˇ gʼawˬ shaˬ gaˬ-eu maˬ siˬ nya-a.
Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ nyaꞈ-ahˇ
tiˬ gʼaˬ tiˬ gaˇ bi jawˇ byoˆ ma.
Iˇsaˬleˬlaˆ tsawˇ jeuˬ deuˬ yaw kaˬ-ahˇ
tiˬ gʼaˬ tiˬ paw bi jawˇ gʼawˬ ma.
8Yuˇdaˆ-oˇ, nawˬ-euˬ mehˇ nmˇ deuˬ nawˬ-ahˇ ya ja ceuˬ tehꞈ-a.
Nawˬ-ahˇ muiˇ-eu tsawˇ haˬ deuˬ-ahˇ kuˬ byahˬ-ahˇ neh
nawˇ nyehꞈ sehꞈ nehˬ tehꞈ-a.
Nawˬ-euˬ mehˇ nmˇ deuˬ nawˬ-euˬ mehˬ shi awˆ byaˆ-awˇ,
nawˬ-ahˇ yaw zeu ya baw tehꞈ-a.
9Yuˇdaˆ-aˬ, aˇ laˬ jaˬ shiˇ-ahˇ duˇ-eu meh.
Aˬ cawˬ-ahˇ kawꞈ sehꞈ dzaˬ gʼaˬ-awˇ, yawˬ ha-euˬ
lo kʼahˬ-ahˇ paˇ gʼoꞈ yuꞈ laˇ-eu meh.
Kʼaˇ cah mawꞈ gaˇ cah-awˇ, kʼaˇ yuꞈ mawꞈ gaˇ yuꞈ kʼawꞈ,
aˬ yawꞈ-ahˇ tiˬ gʼaˬ-iˬ maˬ laˆ ciˆ peuˬ-a.
10Sahˬ paˬ-euˬ gawˬ yoeˬ-ahˇ aˬ yawꞈ tuˆ tehˬ taˬ-awˇ,
Aˬ yawꞈ-euˬ zaˬ deuˬ tiˬ ziˇ saˇ-iˬ tiˬ ziˇ dzoeˬ dzaˬ oꞈ tehꞈ-a.
Aˬ cawˬ tsawˇ jeuˬ deuˬ aˬ yawꞈ jawˇ gaˇ
pyuˇ shuiˇ myawˬ gahˬ taꞈ ha laˇ-awˇ,
Aˬ yawꞈ mehˬ shi awˆ byaˆ-eu laꞈ kʼoeˇ
aˬ yawꞈ ehˇ dawˬ naˇ haˬ tehꞈ-a.
11Muiˬ dui dui-eu aˬ gaꞈ baw duˆ uˬ moˆ,
aˬ yawꞈ-euˬ mahˬ tahˬ laˆ-ahˇ aˬ yawꞈ paꞈ tehꞈ-a.
Shiˬ loꞈ-ehˇ neˇ-eu aˬ gaꞈ dzaˇ uiˇ laꞈ kʼoeˇ,
aˬ yawꞈ-euˬ mehˬ tsoeˬ lehˬ tsiˬ tehꞈ-a.
12Aˬ yawꞈ-euˬ myaˆ nuiˆ neˇ laˇ ngeh keuˆ ni,
aˬ gaꞈ dzaˇ uiˇ aˬ yawꞈ ya dawˇ tehꞈ-a.
Aˬ yawꞈ-euˬ seuˬ ba ceuˬ ni pyeuꞈ laˇ ngeh keuˆ ni,
mawˇ neˇ aˬ coeˇ aˬ yawꞈ ya dawˇ tehꞈ-a.
13Zeˬbuˬloˬ-aˬ, iˬ ma laˆ shaˆ dawˬ peh jawˇ tehꞈ-a.
Aˬ yawꞈ-euˬ iˬ ma laˆ shaˆ lawˇ deh-aˬ,
saˇ baoˬ naˬ duˬ pyeuꞈ laˇ tehꞈ-a.
Aˬ yawꞈ jawˇ-eu miˇ kʼahˬ Siˇdoˬ meuˬ-ahˇ keuˆ ni
jeˇ laˇ tehꞈ-a.
14Iˇsaˬkaˬ yaw dehꞈ dehꞈ-eu gaˇ kawˆ-aˬ,
kʼaˆ daˬ uˬ moˆ yuꞈ ja taˬ-euˬ mahˬ tahˬ laˆ-ahˇ maˬ beu gaˇ-a.
15Ehˇ kʼawꞈ, aˬ yawꞈ yuꞈ duˬ muiˬ dui dui-awˇ,
Yawˬ jawˇ miˇ yawˬ kʼahˬ saˇ ma lehˇ
yawˬ haˇ yawˬ ha noeˬ muiˬ tehꞈ-a.
Kʼaˆ daˬ bi baꞈ daˆ-eu gʼaˇ duˬ daˇ tsuiꞈ awˆ daˬ-awˇ,
Zaˬ kʼaˆ loꞈ-ehˇ aˬ cawˬ neh bi kʼehˇ dzaˬ tehꞈ-a.
16Daˬ-aˬ, aˬ yawꞈ-euˬ tsawˇ jeuˬ-ahˇ uˆ lahˇ tehꞈ-a.
Aˬ yawꞈ-euˬ tsawˇ jeuˬ kʼawꞈ, Iˇsaˬleˬlaˆ tsawˇ jeuˬ
nui deuˬ-ahˇ duˇ tehꞈ-a.
17Daˬ-aˬ, gaˇ ma gaˇ dzeˇ jawˇ-eu aˇ lawˇ-ahˇ duˇ tehꞈ-a.
Doꞈ kʼaˆ-eu aˇ lawˇ kʼoeˇ mawˇ gaˇ ma gaˇ dzeˇ yuꞈ-awˇ,
Mahˬ dziˬ-eu deuˬ sehˇ pyaˆ-ehˇ ga-iˇ ni,
Mahˬ-euˬ kuiˇ nuiꞈ-ahˇ toˆ tehꞈ-a.
18Sahˬpaˬ Miˬyehˇ-oˇ, nawˇ ka kʼoꞈ nehˬ laꞈ gaˇ
ngaˇ loꞈ luꞈ-eu ma.
19Gaˆ-aˬ, tahˇ joe bi joe tehꞈ-a.
Ehˇ kʼawꞈ, aˬ yawꞈ tsawˬ tuˇ laˇ-awˇ, tahˇ joe
kʼoeˇ deuˬ-ahˇ teh byoˆ tehꞈ-a.
20Aˬsaˬ-euˬ miˇ tsaˬ-ahˇ muiˬ-eu dzaˬ dzaˬ dawˇ dawˇ
tiˬ byah ni doˆ tehꞈ-a.
Sahˬ paˬ dzaˬ-eu dzaˬ dzaˬ dawˇ dawˇ aˬ yawꞈ biꞈ nehˬ tehꞈ-a.
21Naˬtaˬliˇ-aˬ, muiˬ-eu kʼaˬ tsehˆ tsehˆ zaˬ puˬ-eu,
cehˆ coeˬ coeˬ gahˇ nya-eu kʼaˬ tsehˆ aˬ ma-ahˇ duˇ-eu meh.
22Yoˇsehˆ-aˬ, lawˇ gawˆ gawˆ zaˬ dawˬ peh jawˇ-eu
bawˇ tsahˬ mahˬ tahˬ laˆ hawˇ-eu,
Gawˬ jawˬ baˬ gʼa-ahˇ jawˇ-eu bawˇ tsahˬ mahˬ mahˬ
paˬ zaˬ-ahˇ duˇ-eu meh.
23Muiˇ-eu deuˬ aˬ yawꞈ-ahˇ beuˆ sehꞈ-eu lehˇ,
Kaˆ hawˇ-eu kaˆ myaˬ yuˇ-awˇ, aˬ yawꞈ mehˬ nah teh-eu meh.
24Ehˇ kʼawꞈ, aˬ yawꞈ-euˬ kaˆ kaˆ poˆ maˬ byehˆ-iˇ-ehˇ,
Aˬ yawꞈ-euˬ laꞈ du deuˇ dui dui ni,
Iˇsaˬleˬlaˆ-ahˇ haw piˇ-eu yawˇ bo-eu yaw sahˇ,
Yaˬkoˆ-euˬ Baoˬ huiˬ-eu Miˬyehˇ-euˬ baoˬ,
aˬ yawꞈ-ahˇ caw ba-eu meh.
25Nawˬ da-euˬ Miˬyehˇ nawˬ-ahˇ caw ba tehꞈ-a.
Nawˬ-ahˇ guiˬ lahˬ yaw dzahˇ biꞈ-eu yaw sahˇ
Baoˬ huiˬ-eu Miˬyehˇ-aˬ,
Mˬ kʼoeˇ taˆ neh yoeˇ le-euˬ uˬ yehˇ iˇ cuꞈ hawˇ-eu
Miˇ tsaˬ dawˬ dah neh doˆ laˇ-euˬ iˇ cuꞈ
biꞈ nehˬ laꞈ tehꞈ-a.
Zaˬ oeˬ sahˇ-awˇ jeˬ zaˬ behˇ ni, aˬ yawꞈ
guiˬ lahˬ biꞈ laꞈ tehꞈ-a.
26Aˇ siˬ hawˇ-eu aˇ yehˆ guiˬ lahˬ biꞈ laꞈ tehꞈ-a.
Aˇ hu ba neh jaˆ-eu gawˬ jawˬ gawˬ duˇ deuˬ pyeuꞈ-eu,
Mˬ maˬ maˬ byaˆ zaˇ ziˇ ziꞈ-eu gawˬ jawˬ
gawˬ duˇ deuˬ laꞈ kʼoeˇ jaˆ luꞈ-eu muiˬ-eu
guiˬ lahˬ deuˬ hawˇ-eu
Nui kʼahˇ shiˇ dui dui paˬ-ehˇ gʼeh-eu jeˬ
dawˬ tawˆ luꞈ biꞈ nehˬ laꞈ tehꞈ-a.
Guiˬ lahˬ yaw dzahˇ heu deuˬ dawˬ tawˆ luꞈ,
Aˬ yawꞈ-euˬ mehˇ nmˇ deuˬ-ahˇ maˬ taꞈ-eu Yoˇsehˆ-euˬ
uˬ duˬ naˇ kʼawˇ kʼoeˇ taˆ keuˆ le luꞈ-uˇ.
27Beˬyaˬmiˬ-aˬ, smˇ dui dui-eu kʼaˬ yehˇ-ahˇ duˇ-eu meh.
Uˬ ciꞈ nah gʼahˇ maˬ tseˇ ni aˬ cawˬ-ahˇ
kawꞈ sehꞈ-awˇ, dzaˬ nawˆ nawˆ tehꞈ-a” lehˇ,
aˬ ha mehˇ nmˇ-ahˇ Yaˬkoˆ ehˇ nehˬ-euˬ meh.
28Tsawˇ haˬ heu deuˬ-aˬ, Iˇsaˬleˬlaˆ tsawˇ jeuˬ tseˇ nyiꞈ jeuˬ pyeuꞈ-awˇ, dawˬ heu deuˬ kʼawꞈ, aˬ yawꞈ maꞈ-euˬ aˬ da ziˇ jiˇ-eu dawˬ peh peh laˇ-awˇ aˬ yawꞈ maꞈ-ahˇ maˬ ya gʼawˬ-iˇ mi naˆ-ehˇ, aˬ li aˬ yawꞈ gʼaˬ yawꞈ-ahˇ kʼaˇ geuˇ-eu loꞈ-ehˇ ehˇ nehˬ yaꞈ-euˬ dawˬ pyeuꞈ-eu meh.
Yaˬkoˆ ziˇ jiˇ-euˬ
29-30Kʼoeˇ naˇ, aˬ yawꞈ-euˬ aˬ li deuˬ-ahˇ Yaˬkoˆ heu loꞈ-ehˇ ehˇ mehˬ nehˬ-euˬ meh. “Nymˬ-mˇ, shiˇ-eu miˇ kʼahˬ-ahˇ ngaˬ-euˬ tsawˇ haˬ deuˬ jawˇ gaˇ ngaˇ iˇ byoˆ gʼeh-eu ma. Kaˬnaˬ miˇ kʼahˬ laꞈ kʼoeˇ, Mamˬliˬ meuˬ-euˬ nahˇ ma doˆ kʼehˬ paw, Maˬpeˬlaˇ lehˇ ehˇ-eu jawˇ duˬ-ahˇ jaˆ-eu ngaˬ bawˇ hawˇ-eu ngaˬ da-ahˇ baꞈ pahˬ taˬ-euˬ Heˬtaˆ tsawˇ jeuˬ, Eˇpaˬloˬ-euˬ lmˬ bymˇ lo kʼahˬ kʼoeˇ kʼahˬ laꞈ kʼoeˇ, ngaˬ-ahˇ baꞈ pahˬ nehˬ laꞈ-awˬ. Lo kʼahˬ kʼoeˇ kʼahˬ jaˆ-eu miˇ tsaˬ kʼoeˇ tsahˇ lmˬ bymˇ geuꞈ-eu lehˇ, Eˇpaˬloˬ-euˬ laꞈ-ahˇ Aˬbyaˬhaˬ neh zeuˇ tsehˆ taˬ yaꞈ-euˬ meh. 31Aˬbyaˬhaˬ hawˇ-eu aˬ yawꞈ-euˬ nymˇ dahˬ Saˬlaˇ-ahˇ kʼoeˇ gaˇ baꞈ pahˬ taˬ-euˬ meh. Leˇaˬ-ahˇ kʼawꞈ ngaˬ neh kʼoeˇ gaˇ baꞈ pahˬ nehˬ-euˬ ma. 32Lo kʼahˬ kʼoeˇ kʼahˬ jaˆ-eu miˇ tsaˬ kʼoeˇ tsahˇ-ahˇ, Heˬtaˆ tsawˇ haˬ-euˬ laꞈ-ahˇ neh zeuˇ tsehˆ taˬ-euˬ meh. Ngaˬ-ahˇ kʼawꞈ, kʼoeˇ gaˇ baꞈ pahˬ nehˬ laꞈ-awˬ.” 33Aˬ yawꞈ-euˬ aˬ li deuˬ-ahˇ Yaˬkoˆ kʼoeˇ loꞈ-ehˇ mehˬ nehˬ tsoˆ nehˬ gʼaˬ ngeh, aˬ za za-ehˇ coˬ yuꞈ gʼeh-awˇ saꞈ gʼawˇ tsehˆ-euˬ meh.
Currently Selected:
Aˇ dahˬ 49: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
