Gaˬlaˬtiˆ 5

Buˬ-iˇ-euˬ miˇ neh zaˬ kʼaˆ taˬ paˇ geuꞈ

1Aˬ dui buˬ-iˇ-euˬ tsawˇ haˬ pyeuꞈ laˇ ni, Ka li neh aˬ dui-ahˇ bi buˬ-iˇ laꞈ-euˬ meh. Kʼoeˇ miˇ neh, buˬ-iˇ-euˬ tsawˇ haˬ loꞈ-ehˇ ziꞈ dah ni jawˇ-awˬ. Zaˬ kʼaˆ taˬ paˇ geuꞈ.

2Ngaˇ Pawˇluˆ heu loꞈ-ehˇ ehˇ-eu ma. Naw maꞈ baˆ kʼoˆ mehˬ dzaˬ yehˬ naˇ, naw maꞈ gʼaˇ duˬ Ka li gaˇ dahˇ maˬ paˇ tsoeˬ meh. 3Ngaˇ tiˬ poˆ paˇ ehˇ nehˬ nyaˇ. Baˆ kʼoˆ mehˬ dzaˬ kʼaˇ yehˬ-euˬ tsawˇ haˬ-aˬ, Zahˇ dawˬ kʼoꞈ dawˬ dawˬ tawˆ luꞈ-ahˇ ya mˇ byah meh. 4Naw maꞈ Zahˇ dawˬ kʼoꞈ dawˬ-ahˇ mˇ byah-eu laꞈ kʼoeˇ Miˬyehˇ-ahˇ tsaˬ leˇ tsahˇ leˇ ni leh jeh-eu tsawˇ haˬ deuˬ-aˬ, Ka li-ahˇ maˬ paˇ taꞈ-ehˇ, Miˬyehˇ gʼawˬ shaˬ gaˬ-eu guiˬ lahˬ-euˬ laꞈ nyiˇ paw jawˇ-eu tsawˇ haˬ deuˬ pyeuꞈ-eu meh. 5Nga maꞈ law nmˇ-aˬ, nga maꞈ-euˬ jah-eu jeˬ laꞈ kʼoeˇ Yaw sahˇ Miˬyehˇ-euˬ baoˬ gaˇ mˇ-eu baˬ da neh Miˬyehˇ-ahˇ tsaˬ leˇ tsahˇ leˇ nya gaˇ noeˬ tmˬ kʼaˇ za ma. 6Aˬ jeˬ miˇ neh ehˇ naˇ, Yeˬsuˇ Ka li laꞈ kʼoeˇ jawˇ-eu tsawˇ haˬ deuˬ gʼaˇ duˬ, baˆ kʼoˆ mehˬ dzaˬ yehˬ-euˬ hawˇ-eu maˬ yehˬ-euˬ tiˬ pawꞈ-iˬ beu gaˇ duˬ maˬ jaˆ-a. Gʼoeˇ-eu gaˬ-eu jeˬ mˇ doˆ shaˇ doˆ laꞈ nya-eu jah-eu kʼoeˇ tiˬ jeˬ tehꞈ-ehˇ gaˇ dahˇ tsoeˬ-eu jeˬ pyeuꞈ-eu meh.

7Dzeuˇ laˇ ngeh naw maꞈ yaw muiˬ paˬ-ehˇ mˇ luꞈ shaˇ luꞈ-eu meh. Yaw tsaˬ yaw dawˇ jeˬ-ahˇ naw maꞈ maˬ naˇ haˬ geuꞈ ni aˬ suˇ gʼaˬ laˆ tsoeˬ-euˬ ta. 8Kʼoeˇ-aˬ, naw maꞈ-ahˇ kuˇ-euˬ gʼaˬ pyeuꞈ-eu Miˬyehˇ neh mˇ-euˬ jeˬ maˬ ngeuˇ-a. 9“Cehˇ meu tiˬ tsmˇ tsmˇ lah-ehˇ bi poˬ laˇ-eu gʼaˇ duˬ dehˬ tseˬ ui cuiˆ tehꞈ-ehˇ ya dawˆ-eu meh” lehˇ ehˇ taˬ-euˬ meh. 10Ehˇ kʼawꞈ, naw maꞈ-ahˇ ngaˇ jah coeˇ-eu nui ma ahˇ te siˬ. Aˬ dui-aˬ, Sahˬpaˬ Yeˬsuˇ laꞈ kʼoeˇ jawˇ luꞈ-eu miˇ neh, ngaˇ jah-eu jeˬ-ahˇ naw maꞈ maˬ jah ni yawˬ paw yawˬ maˬ iˇ pyawˇ-aˇ lehˇ ngaˇ siˬ nya ma. Ehˇ kʼawꞈ, naw maꞈ-ahˇ laˆ shaˬ-eu tsawˇ haˬ aˬ geu gʼaˬ maˬ kaˬ, Miˬyehˇ neh kʼehˬ nehˬ kʼaˆ nehˬ-euˬ jeˬ-ahˇ ya daˬ tehꞈ-a.

11Ehˇ kʼawꞈ aˬ yuiꞈ aˬ nyiˇ Ka li zaˬ deuˬ-oˇ, baˆ kʼoˆ mehˬ dzaˬ ya yehˬ meh lehˇ ngaˇ mehˬ-euˬ law nmˇ-aˬ, kʼehˬ-eu kʼaˆ-eu jeˬ-ahˇ ya daˬ nmˇ loˇ. Ngaˇ kʼoeˇ loꞈ-ehˇ mehˬ-euˬ law nmˇ-aˬ, Ka li-euˬ laꞈ yaꞈ gaˇ kawˆ mehˬ-eu jeˬ-ahˇ taꞈ leˇ-awˇ aˬ cawˬ sahˬ tiꞈ tiꞈ paˬ-ehˇ gʼeh-eu jeˬ maˬ paˇ jaˆ-aˇ. 12Naw maꞈ-ahˇ laˆ shaˬ-eu tsawˇ haˬ kʼoeˇ deuˬ bi iˇ byoˆ jiˇ mawꞈ miˇ-a. Aˬ yawꞈ maꞈ yawˬ haˇ yawˬ ha shawꞈ luꞈ-uˇ.

13Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, bi buˬ-iˇ-eu gʼaˇ duˬ kuˇ doˆ gʼaˬ-euˬ tsawˇ haˬ meh. Ehˇ kʼawꞈ, buˬ-iˇ-euˬ kʼoeˇ-aˬ, naw maꞈ-euˬ shiˬ shaˬ jiˇ nui loˆ mˇ-eu gʼaˇ duˬ taˬ bi pyeuꞈ. Gʼoeˇ-eu gaˬ-eu laꞈ kʼoeˇ tiˬ gʼaˬ tiˇ gʼaˬ ngehˬ gʼeh-awˬ. 14Aˬ jeˬ miˇ neh ehˇ naˇ, Zahˇ dawˬ kʼoꞈ dawˬ dawˬ tawˆ luꞈ, “Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ” lehˇ ehˇ-eu dawˬ kʼoeˇ dawˬ laꞈ kʼoeˇ byah laˇ jiˇ-euˬ meh. 15Ehˇ kʼawꞈ, naw maꞈ bawˇ tsahˬ jeˬ zaˬ yaw haiˬ deuˬ loꞈ-ehˇ tiˬ gʼaˬ tiˇ gʼaˬ coeˬ leˇ naˇ leˇ-eu jeˬ jahˇ luꞈ naˇ, haw taˬ-awˬ, tiˬ gʼaˬ tiˇ gʼaˬ puiˆ byoˆ leꞈ tehꞈ-a.

Yaw sahˇ Miˬyehˇ hawˇ-eu shiˬ shaˬ jiˇ nui kʼahˇ

16Ngaˇ ehˇ mawꞈ-eu-aˬ, heu loꞈ-ehˇ ma. Yaw sahˇ Miˬyehˇ sheuˬ gʼeh-eu mehˬ nah caw teh-awˬ. Shiˬ shaˬ jiˇ nui kʼahˇ mehˬ nah taˬ iˇ. 17Aˬ jeˬ miˇ neh ehˇ naˇ, shiˬ shaˬ jiˇ nui kʼahˇ-aˬ, Yaw sahˇ Miˬyehˇ-ahˇ maˬ tsaˬ leˇ-ehˇ, Yaw sahˇ Miˬyehˇ kʼawꞈ, shiˬ shaˬ jiˇ nui kʼahˇ-ahˇ maˬ tsaˬ leˇ-a. Heu nyiˬ jeˬ-aˬ, tiˬ jeˬ tiˇ jeˬ muiˇ-eu miˇ neh, naw maꞈ yawˬ ha mˇ mawꞈ-eu jeˬ maˬ mˇ nya-a. 18Yaw sahˇ Miˬyehˇ sheuˬ gʼeh-eu mehˬ nah naw maꞈ caw teh naˇ, Zahˇ dawˬ kʼoꞈ dawˬ-euˬ uˬ moˆ naw maꞈ maˬ paˇ jawˇ meh.

19Shiˬ shaˬ jiˇ nui kʼahˇ neh mˇ-euˬ gaˇ deuˬ-aˬ, heu loꞈ-ehˇ bya cehˆ ni mawˇ laˇ-eu meh. Kʼaˬ miˬ sheu-eu, maˬ muiˬ maˬ shawˇ-eu, maˬ tsaˬ maˬ dawˇ-eu laꞈ kʼoeˇ yuꞈ taꞈ joe taꞈ-eu, 20tahˬ pahˬ aˬ ma mawˇ kawˇ-ahˇ uˬ duˬ tahˬ-eu, maw loˬ ja maw-ahˇ gʼoe-eu, tiˬ gʼaˬ tiˇ gʼaˬ muiˇ-eu, dawꞈ-eu ceh-eu, mehˇ juiˇ juiˇ-eu, nui ma pehˇ-eu, yawˬ ha gʼaˇ duˬ tehꞈ-ehˇ shaˇ noeˬ-eu, gʼawˬ-iˇ gʼehˇ-iˇ-eu, aˇ muˇ muˇ paˆ-eu nui ma ahˇ-eu, 21myaˆ naˆ-eu, dzaˬ yehꞈ dawˇ yehꞈ-eu, maˬ tsaˬ maˬ dawˇ-eu bawˬ-iˬ gʼeh-eu, heu loꞈ-ehˇ gʼeh-eu deuˬ mˇ doˆ laꞈ-eu meh. Kʼoeˇ loꞈ-ehˇ dehꞈ-eu tsawˇ haˬ deuˬ-aˬ, Miˬyehˇ Miˇ kʼahˬ-ahˇ maˬ ya uˇ lehˇ-a lehˇ dzeuˇ laˇ ngeh ngaˬ neh naw maꞈ-ahˇ ehˇ-euˬ loꞈ-ehˇ, nymˬ-mˇ kʼawꞈ tiˬ poˆ paˇ ehˇ-eu ma.

22Ehˇ kʼawꞈ, Yaw sahˇ Miˬyehˇ laꞈ kʼoeˇ siˬ le-eu aˇ siˬ deuˬ-aˬ, gʼoeˇ-eu gaˬ-eu, laˬ kʼaˬ cehˇ-eu, nui saˇ oꞈ-eu, nui ma gʼawˬ mahˇ ni taˬ-eu, gʼawˬ shaˬ gaˬ-eu nui ma ahˇ-eu, yaw muiˬ jeˬ mˇ-eu, saˇ jaˇ ziꞈ-eu, 23nui nahˬ nui yu ahˇ-eu, yawˬ ha-euˬ nui ma-ahˇ gʼaˬ leˇ-eu, heu deuˬ meh. Heu deuˬ-ahˇ laˆ tsoeˬ-eu zahˇ dawˬ kʼoꞈ dawˬ tiˬ dawˬ-iˬ maˬ jaˆ-a. 24Yeˬsuˇ Ka li-ahˇ taꞈ-eu tsawˇ haˬ deuˬ-aˬ, shiˬ shaˬ jiˇ nui kʼahˇ hawˇ-eu shiˬ shaˬ jiˇ-euˬ nui noeˬ nui loˆ dawˬ tawˆ luꞈ-ahˇ laˆ sehꞈ jiˇ-euˬ meh. 25Aˬ dui Yaw sahˇ Miˬyehˇ-ahˇ gʼoe-awˇ dehꞈ luꞈ-eu ngeuˇ naˇ, Yaw sahˇ Miˬyehˇ-ahˇ gʼoe-awˇ mehˬ hu paw cah gʼeh kaˇ-euˇ. 26Nui ma huiˬ-eu jeˬ, tiˬ gʼaˬ tiˇ gʼaˬ ceh cawˬ cawˬ-eu jeˬ hawˇ-eu, tiˬ gʼaˬ tiˇ gʼaˬ myaˆ naˆ-eu jeˬ-ahˇ byehˇ dzeh jiˇ kaˇ-euˇ.

Currently Selected:

Gaˬlaˬtiˆ 5: AHK

Highlight

Copy

Compare