Yeˬsaˬgeˬlaˇ 46
46
Sahˬ paˬ zaˬ yo hawˇ-eu zahˇ sahˇ kʼoꞈ bawˬ-iˬ deuˬ
1Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nahˇ ma doˆ kʼehˬ paw neh laꞈ kʼoeˇ pu kaˬ-ahˇ uˇ laˇ-eu lahˇ kʼehˬ kʼoeˇ kʼehˬ, gaˇ mˇ-eu aˇ nah kʼoꞈ nah laꞈ kʼoeˇ ya piˬ tehˬ taˬ meh. Ehˇ kʼawꞈ, jawˇ nah hawˇ-eu la shuiꞈ lah-eu bawˬ-iˬ gʼeh-eu aˇ nah-ahˇ ya pah taˬ meh. 2Dzoeˬ dzaˬ-eu sahˬ paˬ zaˬ yo-aˬ, aˬ yawꞈ neh lawˇ laˇ-euˬ miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ-ahˇ piˇ ma deuˬ lawˇ luꞈ ngeh, laꞈ nyiˇ pu kaˬ-ahˇ neh aˇ lawˆ lawˆ ma kʼoeˇ lawˆ-ahˇ uˇ leˇ-awˇ, laꞈ kʼoeˇ pu kaˬ-ahˇ uˇ leˇ-eu lahˇ kʼehˬ laˇ gʼoˆ bahˬ dawˬ peh ya yawꞈ meh. Lahˇ kʼehˬ kʼoeˇ tsahˇ-ahˇ jawˇ-awˇ uˬ duˬ tahˬ gʼaˬ ngeh, aˬ yawꞈ paˇ ya doˆ le meh. Lahˇ kʼehˬ kʼoeˇ uˬ ciꞈ uˬ taw paw keuˆ ni maˬ piˬ tehˬ-ehˇ ya bi jaˆ meh. 3Jawˇ nah ngeh nah hawˇ-eu la shuiꞈ lah-eu bawˬ-iˬ kʼaˇ gʼeh ngeh, tsawˇ haˬ dawˬ tawˆ luꞈ lahˇ kʼehˬ kʼoeˇ-euˬ mehˬ shi awˆ byaˆ-awˇ, Sahˬpaˬ Miˬyehˇ-ahˇ uˬ duˬ ya tahˬ meh.
4“Jawˇ nah ngeh nah-ahˇ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ bi lawˇ-eu gʼaˇ duˬ, maˇ byawꞈ maˬ baw-eu yawˇ zaˬ koꞈ mawˇ hawˇ-eu, yawˇ aˬ buˬ tiˬ mawˇ, sahˬ paˬ zaˬ yo gʼaˬ ya yuˇ laꞈ meh. 5Yawˇ aˬ buˬ kʼoeˇ mawˇ nehˬ-ehˇ lawˇ caw-eu gʼaˇ duˬ cehˇ meu tiˬ eˇpaˬ hawˇ-eu, yawˇ zaˬ aˬ yawꞈ mawˇ yawꞈ nehˬ-ehˇ lawˇ caw-eu gʼaˇ duˬ, aˬ yawꞈ kʼaˇ lawˇ caw mawꞈ-eu jeˬ yuˇ laꞈ nya meh. Dzaˬ la gʼo cehˇ tiˬ poˆ lawˇ ngeh, saˬ loˬ tsiˇ tiˬ heˬ aˬ yawꞈ ya yuˇ laꞈ meh. 6La shuiꞈ lah-eu bawˬ-iˬ gʼeh ngeh, maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ, yawˇ zaˬ koꞈ mawˇ hawˇ-eu, yawˇ aˬ buˬ tiˬ mawˇ aˬ yawꞈ ya lawˇ meh. 7Mawˇ neˇ mawˇ gaw aˬ yawꞈ mawˇ yawꞈ lawˇ ngeh maˬ ehˇ, yawˇ aˬ buˬ aˬ yawꞈ mawˇ yawꞈ lawˇ ngeh maˬ ehˇ, cehˇ meu tiˬ eˇpaˬ ya lawˇ caw-awˇ, yawˇ zaˬ lawˇ ngeh, aˬ yawꞈ kʼaˇ lawˇ caw mawꞈ-eu jeˬ lawˇ caw nya meh. Kʼoeˇ loꞈ-ehˇ dzaˬ la gʼo cehˇ kʼaˇ lawˇ ngeh, saˬ loˬ tsiˇ tiˬheˬ ya lawˇ caw meh. 8Sahˬpaˬ zaˬ yo kʼoeˇ gʼaˬ, lahˇ kʼehˬ gaˇ ma-ahˇ jaˆ saˬ saˬ-eu aˇ lawˆ lawˆ ma kʼoeˇ tsahˇ-ahˇ neh ya uˇ leˇ-awˇ, aˬ yawꞈ tsahˇ-ahˇ neh paˇ ya gʼoꞈ doˆ le meh.
9“Bawˬ-iˬ kʼaˇ gʼeh ngeh, miˇ kʼahˬ zaˬ deuˬ Sahˬpaˬ Miˬyehˇ-ahˇ uˬ duˬ tahˬ laˇ ngeh jawˇ, laꞈ taˆ paw pyawˬ lahˇ kʼehˬ-ahˇ neh uˇ laˇ-euˬ deuˬ laꞈ oˆ paw pyawˬ lahˇ kʼehˬ-ahˇ neh ya gʼoꞈ doˆ le-awˇ, laꞈ oˆ paw pyawˬ lahˇ kʼehˬ-ahˇ neh uˇ laˇ-euˬ deuˬ laꞈ taˆ paw pyawˬ lahˇ kʼehˬ-ahˇ neh ya gʼoꞈ doˆ le meh. Aˬ geu gʼaˬ maˬ kaˬ, yawˬ ha uˇ leˇ-euˬ paw pyawˬ-ahˇ neh maˬ ya gʼoꞈ doˆ le-a. Yawˬ pyawˬ yawˬ-ahˇ neh ya gʼoꞈ doˆ le-eu meh. 10Sahˬ paˬ zaˬ yo gʼaˬ kʼawꞈ, miˇ kʼahˬ zaˬ deuˬ uˇ leˇ-eu yamˬ-ahˇ ya uˇ leˇ-awˇ, miˇ kʼahˬ zaˬ deuˬ doˆ le ngeh yamˬ-ahˇ ya doˆ le meh. 11Bawˬ-iˬ gʼeh-eu aˇ nah aˇ yamˬ laꞈ kʼoeˇ, dzaˬ la gʼo cehˇ lawˇ ngeh, heu loꞈ-ehˇ ya lawˇ meh. Mawˇ neˇ mawˇ gaw tiˬ mawˇ nehˬ-ehˇ tiˬ eˇpaˬ ya lawˇ-awˇ, yawˇ aˬ buˬ tiˬ mawˇ nehˬ-ehˇ tiˬ eˇpaˬ ya lawˇ meh. Yawˇ zaˬ nehˬ-ehˇ lawˇ ngeh-aˬ, uˬ duˬ tahˬ laˇ-euˬ gʼaˬ kʼaˇ lawˇ mawꞈ-eu jeˬ lawˇ nya meh. Kʼoeˇ loꞈ-ehˇ dzaˬ la gʼo cehˇ kʼaˇ lawˇ ngeh, saˬ loˬ tsiˇ tiˬ heˬ#46.11 b 45.24b-ahˇ haw-awˬ* ya lawˇ caw meh.
12“Dzoeˬ dzaˬ-eu sahˬ paˬ zaˬ yo gʼaˬ, Sahˬpaˬ Miˬyehˇ-ahˇ nui ma keuˆ-awˇ lawˇ nehˬ mawꞈ ngeh, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ lawˇ-eu maˬ kaˬ, cawˬ cawˬ taꞈ-eu lawˇ-eu jeˬ lawˇ-eu maˬ kaˬ, nahˇ ma doˆ kʼehˬ paw neh laꞈ kʼoeˇ pu kaˬ-ahˇ uˇ leˇ-eu lahˇ kʼehˬ kʼoeˇ kʼehˬ ya pah nehˬ meh. Jawˇ nah-ahˇ kʼaˇ lawˇ-eu loꞈ-ehˇ aˬ yawꞈ ya lawˇ-awˇ, aˬ yawꞈ gʼoꞈ doˆ le gʼaˬ ngeh, lahˇ kʼehˬ paˇ ya piˬ tehˬ taˬ-eu meh.
Aˬ yawꞈ nah yawꞈ lawˇ-eu jeˬ
13Sahˬpaˬ Miˬyehˇ ehˇ-eu, “Yawˬ shawˬ na luꞈ, maˇ byawꞈ maˬ baw-eu yawˇ zaˬ tiˬ mawˇ, mawˇ lah-ehˇ dzah puiˆ-awˇ Sahˬpaˬ Miˬyehˇ-ahˇ ya lawˇ meh. Aˬ yawꞈ nah yawꞈ maˬ bi tsehˆ leˇ ni, kʼoeˇ loꞈ-ehˇ ya lawˇ meh. 14Cehˇ meu koꞈ bymˇ tiˬ bymˇ eˇpaˬ-ahˇ#46.14 a 1/6 eˇpaˬ-aˬ, tiˬ ciˇ loˇ ehˇ gʼaˬ ni byah-eu meh.* saˬ loˬ tsiˇ smˬ bymˇ tiˬ bymˇ heˬ#46.14 b 1/3 heˬ-aˬ, tiˬ liˆ ehˇ gʼaˬ ni byah-eu meh.* keuˬ-awˇ dzaˬ la gʼo cehˇ lawˇ-eu jeˬ, yawˬ shawˬ na luꞈ ya lawˇ meh. Sahˬpaˬ Miˬyehˇ-ahˇ kʼoeˇ loꞈ-ehˇ lawˇ-eu jeˬ tiˬ jawˇ-iˬ gʼaˬ maˬ ya bi baˬ-iˇ-a. 15Yawˇ zaˬ, cehˇ meu hawˇ-eu saˬ loˬ tsiˇ heu deuˬ, mˬ maˬ maˬ byaˆ zaˇ ziˇ, Sahˬpaˬ Miˬyehˇ-ahˇ aˬ yawꞈ shawˬ yawꞈ ya lawˇ meh.”
Sahˬ paˬ-euˬ miˇ tsaˬ
16Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ dawˬ biꞈ-eu meh. “Dzoeˬ dzaˬ-eu sahˬ paˬ zaˬ yo tiˬ gʼaˬ, yawˬ ha-euˬ miˇ tsaˬ yawˬ ha-eu aˬ li tiˬ gʼaˬ na-ahˇ laꞈ sawˬ biꞈ nehˬ naˇ, miˇ tsaˬ kʼoeˇ aˬ yawꞈ-euˬ aˬ li-euˬ miˇ tsaˬ pyeuꞈ-iˇ-awˇ, sahˬ paˬ-euˬ aˇ jeuˬ aˇ ca-ahˇ taꞈ-eu miˇ tsaˬ pyeuꞈ-eu meh. 17Ehˇ kʼawꞈ, sahˬ paˬ zaˬ yo kʼoeˇ gʼaˬ aˬ yawꞈ-euˬ gaˇ mˇ-eu tsawˇ haˬ tiˬ gʼaˬ na-ahˇ aˬ yawꞈ-euˬ miˇ tsaˬ biꞈ nehˬ naˇ, buˬ-iˇ law-iˇ-eu aˇ kʼoꞈ#46.17 Ngaˬ tseˇ kʼoꞈ tiˬ poˆ, Iˇsaˬleˬlaˆ tsawˇ haˬ deuˬ-euˬ miˇ kʼahˬ zaˬ pyeuꞈ-eu zaˬ kʼaˆ deuˬ-ahˇ ya pyehˬ nehˬ-awˇ, dziˇ dzoˆ tsoeˬ-eu lehˇ kʼaˇ ahˬ dzaˬ taˬ-euˬ miˇ tsaˬ dawˬ tawˆ luꞈ, ahˬ sahˇ gʼaˬ-ahˇ paˇ ya biꞈ kʼoꞈ jiˇ-eu meh. Aˇ kʼoꞈ kʼoeˇ kʼoꞈ-ahˇ ‘Buˬ-iˇ law-iˇ-eu aˇ kʼoꞈ’ lehˇ kuˇ-eu meh. keuˆ le ngeh, dzoeˬ dzaˬ-eu sahˬ paˬ zaˬ yo-euˬ miˇ tsaˬ paˇ pyeuꞈ kʼoꞈ-iˇ-eu meh. Miˇ tsaˬ kʼoeˇ aˬ yawꞈ-euˬ pyeuꞈ-awˇ, aˬ yawꞈ hawˇ-eu aˬ yawꞈ-euˬ aˬ li deuˬ tehꞈ-ehˇ geuꞈ tsehˆ tsehˆ nya-eu meh. 18Dzoeˬ dzaˬ-eu sahˬ paˬ zaˬ yo-aˬ, miˇ kʼahˬ zaˬ deuˬ-euˬ mˇ myawˬ tiˬ jeˬ-iˬ maˬ ya yuˇ geuꞈ-a. Ngaˬ-euˬ tsawˇ haˬ pyeuꞈ-eu miˇ kʼahˬ zaˬ deuˬ-euˬ miˇ tsaˬ maˬ ya kʼaˆ geuꞈ-eu gʼaˇ duˬ, aˬ yawꞈ-euˬ aˬ li deuˬ-ahˇ miˇ tsaˬ biꞈ ngeh, aˬ yawꞈ-euˬ miˇ tsaˬ tehꞈ-ehˇ ya biꞈ meh.”
Uˬ duˬ tahˬ nymˇ nymˇ ma-euˬ miˬ dzaˬ tsawˬ bu
19Kʼoeˇ naˇ, laꞈ oˆ paw pyawˬ-ahˇ neh laꞈ kʼoeˇ pu kaˬ-ahˇ uˇ leˇ-eu lahˇ kʼehˬ dawˬ peh, laꞈ taˆ paw pyawˬ-ahˇ mehˬ shiˬ pyawˇ-ehˇ tsoˆ taˬ-euˬ kuˆ lawˆ deuˬ-euˬ gʼoˆ kʼehˬ-ahˇ, tsawˇ haˬ kʼoeˇ gʼaˬ ngaˬ-ahˇ sheuˬ gʼeh nehˬ laꞈ-euˬ meh. Kuˆ lawˆ kʼoeˇ deuˬ-aˬ, piˇ ma deuˬ-euˬ muiˬ-eu shawˇ-eu kuˆ lawˆ deuˬ meh. Kuˆ lawˆ kʼoeˇ deuˬ-euˬ nahˇ ma ga kʼehˬ paw dzeˇ tsahˇ-ahˇ aˬ yawꞈ laꞈ noeˇ toeˬ ceh-eu meh. 20Aˬ yawꞈ ehˇ-eu, “Heu tsahˇ-aˬ, iˬ baˇ shawˇ-eu lawˇ-eu jeˬ hawˇ-eu, dziˇ dzoˆ tsoeˬ-eu lawˇ-eu jeˬ gʼaˇ duˬ, piˇ ma deuˬ shaˬ jiˇ kʼoeˇ gaˇ caꞈ-awˇ, dzaˬ la gʼo cehˇ lawˇ-eu jeˬ-ahˇ kʼoeˇ gaˇ ba jaꞈ-eu meh. Muiˬ-eu shawˇ-eu jeˬ laꞈ nyiˇ pu kaˬ-ahˇ yuˇ nyawˬ gʼeh-awˇ, miˇ kʼahˬ zaˬ deuˬ-ahˇ maˬ bi guˬ leˇ-eu gʼaˇ duˬ, aˬ yawꞈ maꞈ kʼoeˇ gaˇ caꞈ-eu meh.”
21Kʼoeˇ naˇ, tsawˇ haˬ kʼoeˇ gʼaˬ ngaˬ-ahˇ laꞈ nyiˇ pu kaˬ-ahˇ sheuˬ doˆ gʼeh-awˇ, laꞈ coeˇ oeˬ coeˇ-ahˇ sheuˬ jawˬ nehˬ laꞈ-euˬ meh. Laꞈ coeˇ aˬ yawꞈ coeˇ yawˬ-ahˇ laꞈ nyiˇ pu kaˬ kaˬ zaˬ tiˬ kaˬ jaˆ-eu ngaˇ paˇ mawˇ-euˬ ma. 22Laꞈ nyiˇ pu kaˬ-euˬ laꞈ coeˇ oeˬ coeˇ-ahˇ, yaw mahˇ paw tseˇ lmˇ byah-awˇ, yaw jeˇ paw shiꞈ lmˇ nui paˆ byah-eu pu kaˬ kaˬ zaˬ jaˆ-eu meh. 23Pu kaˬ yawˬ kaˬ na luꞈ-ahˇ kʼaˬ lo gawˬ lahˇ taˬ-awˇ, kaˇ pyawˇ dawˬ peh miˬ dzaˬ tsawˬ bu jahˇ taˬ-euˬ meh. 24“Heu deuˬ-aˬ, miˇ kʼahˬ zaˬ deuˬ neh kʼaˇ hehˇ laꞈ-euˬ lawˇ-eu shehˇ-eu jeˬ-ahˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu tsawˇ haˬ deuˬ ya caꞈ-eu jawˇ duˬ meh” lehˇ, tsawˇ haˬ kʼoeˇ gʼaˬ ngaˬ-ahˇ ehˇ-eu meh.
Currently Selected:
Yeˬsaˬgeˬlaˇ 46: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
