Doˆ-iˇ 36
36
1“Muiˬ-eu shawˇ-eu Sehˬ gʼawˆ tsoꞈ-eu gʼaˇ duˬ, loˬ-eu jeˬ dawˬ tawˆ luꞈ-ahˇ aˬ joˆ-ehˇ ya jahˇ-eu gaˇ kawˆ siˬ nya-eu, Sahˬpaˬ Miˬyehˇ neh noeˬ doˆ mˇ doˆ nya-eu tsawˇ gahˇ biꞈ taˬ-euˬ Baˬzeˬlaˇ, Oˬhoˬliˆ hawˇ-eu, laꞈ myawˬ laꞈ muˆ mˇ nya-eu tsawˇ haˬ dawˬ tawˆ luꞈ, Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ, yawˬ jeˬ na luꞈ ya mˇ meh.”
Iˇsaˬleˬlaˆ tsawˇ haˬ deuˬ laꞈ sawˬ gʼawˬ mya ni yuˇ laꞈ-euˬ
2Sahˬpaˬ Miˬyehˇ neh laꞈ myawˬ laꞈ muˆ mˇ nya-eu zaˬ siˬ tsawˇ gahˇ biꞈ taˬ-euˬ nui ma keuˆ-eu tsawˇ haˬ deuˬ pyeuꞈ-eu, Baˬzeˬlaˇ, Awˬhawˇleˬbaˇ hawˇ-eu, gaˇ yaw muiˬ paˬ-ehˇ mˇ nya-eu tsawˇ haˬ deuˬ-ahˇ, Moˇseˬ kuˇ-awˇ, “Gaˇ mˇ dahˬ beh-awˬ” lehˇ ehˇ nehˬ-euˬ meh. 3Muiˬ-eu shawˇ-eu Sehˬ gʼawˆ tsoˆ-eu gʼaˇ duˬ, Iˇsaˬleˬlaˆ tsawˇ haˬ neh kʼaˇ damˬ taˬ-euˬ jeˬ dawˬ tawˆ luꞈ, aˬ yawꞈ maꞈ-ahˇ Moˇseˬ biꞈ nehˬ-euˬ meh. 4Kʼoeˇ naˇ, gaˇ mˇ luꞈ-eu laꞈ myawˬ laꞈ muˆ nya-eu tsawˇ haˬ kʼoeˇ deuˬ Moˇseˬ jawˇ gaˇ le-awˇ, 5“Sahˬpaˬ Miˬyehˇ neh bi mˇ-euˬ gaˇ deuˬ mˇ gaˇ geuꞈ-eu mˇ myawˬ deuˬ, loˬ-eu naˆ maˬ tseˇ, aˇ dzehˬ dzeuˇ leˇ ni, Iˇsaˬleˬlaˆ tsawˇ haˬ deuˬ yuˇ laꞈ luꞈ meh” lehˇ dzawˇ nehˬ leˇ-euˬ meh.
6Kʼoeˇ miˇ neh, Muiˬ-eu shawˇ-eu Sehˬ gʼawˆ tsoˆ gaˇ geuꞈ-eu mˇ myawˬ deuˬ, Iˇsaˬleˬlaˆ tsawˇ haˬ deuˬ tiˬ gʼaˬ-iˬ maˬ paˇ ya damˬ laˇ meh lehˇ, Iˇsaˬleˬlaˆ tsawˇ haˬ-euˬ sehˬ gʼawˆ doe ni, Moˇseˬ dawˬ biꞈ gʼeh-euˬ meh. Kʼoeˇ ngeh, tsawˇ haˬ tiˬ gʼaˬ-iˬ Sehˬ gʼawˆ kʼoeˇ gʼawˆ tsoˆ gaˇ geuꞈ-eu mˇ myawˬ maˬ paˇ damˬ laˇ ni naˬ leˇ-euˬ meh. 7Aˬ yawꞈ maꞈ neh damˬ taˬ-euˬ mˇ myawˬ deuˬ-aˬ, gaˇ mˇ jiˇ ngeh keuˆ ni loˬ-eu naˆ maˬ tseˇ dzehˬ leˇ taˬ-euˬ meh.
Sahˬpaˬ Miˬyehˇ jawˇ-eu Sehˬ gʼawˆ tsoˆ-euˬ
(Doˆ-iˇ 26.1-37)
8Gaˇ mˇ-eu tsawˇ haˬ deuˬ laꞈ kʼoeˇ, aˬ cawˬ naˆ maˬ tseˇ laꞈ myawˬ laꞈ sawˆ nya dzehˬ-eu deuˬ, Sahˬpaˬ Miˬyehˇ jawˇ-eu sehˬ gʼawˆ tsoˆ-euˬ meh. Nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, Jeˬluˇbeˬ aˇ baˇ aˇ boꞈ boꞈ taˬ-euˬ saˬ paˇ tseˇ dzeh yuˇ-awˇ tsoˆ-euˬ meh. 9Saˬ paˇ kʼoeˇ tseˇ dzeh luꞈ tiˬ kawˆ hui ni ahˇ-awˇ, yaw mahˇ paw nyiˬ tseˇ nyiꞈ caˆ, yaw jeˇ paw oeˬ caˆ byah-eu meh. 10Saˬ paˇ kʼoeˇ aˬ yawꞈ maꞈ yuˇ-awˇ, ngaˬ dzeh tiˬ gaˇ guꞈ tawꞈ-awˇ, nyiˬ kahˇ tehꞈ-ehˇ guꞈ pyeuꞈ-euˬ meh. 11Saˬ paˇ kʼoeˇ nyiˬ kahˇ luꞈ-euˬ gaˇ dzeˇ dzeˇ saˬ dzeh mehˬ dzaˬ caw caw-ehˇ, nyoeˇ leuˬ leuˬ-eu saˬ paˇ neh laꞈ ma guꞈ tsoꞈ-eu meh. 12Yaw beh kahˇ-euˬ saˬ paˇ paˇ dzeh yaw beh dzeh mehˬ dzaˬ caw caw-ehˇ, laꞈ ma ngaˬ tseˇ hmˬ guꞈ tsoꞈ-awˇ, laꞈ ma kʼoeˇ deuˬ nehˬ-ehˇ dawˇ ni, nyiˬ kahˇ tiˬ kahˇ-euˬ saˬ paˇ paˇ dzeh gaˇ dzeˇ dzeˇ saˬ dzeh mehˬ dzaˬ caw caw-ehˇ, laꞈ ma ngaˬ tseˇ hmˬ paˇ guꞈ tsoꞈ-euˬ meh. 13Saˬ paˇ kʼoeˇ nyiˬ kahˇ tiˬ gaˇ gʼeu tawꞈ nya ni, shuiˇ kuˆ seuˬ ngaˬ tseˇ hmˬ aˬ yawꞈ maꞈ jahˇ-euˬ meh.
14Kʼoeˇ naˇ, ciꞈ myehꞈ caꞈ hm neh zaꞈ taˬ-euˬ saˬ paˇ tseˇ nyiꞈ dzeh yuˇ-awˇ, Sehˬ gʼawˆ-ahˇ dehˬ kaˬ-eu gʼaˇ duˬ aˬ yawꞈ maꞈ jahˇ-euˬ meh. 15Saˬ paˇ kʼoeˇ deuˬ aˬ yawꞈ tiˬ kawˆ hui ni bi ahˇ-awˇ, yaw mahˇ paw smˬ tseˇ caˆ, yaw jeˇ paw oeˬ caˆ byah ni aˬ yawꞈ maꞈ zaꞈ-euˬ meh. 16Saˬ paˇ kʼoeˇ deuˬ yuˇ-awˇ, ngaˬ dzeh tiˬ gaˇ koꞈ dzeh tiˬ gaˇ guꞈ tsoꞈ-awˇ, nyiˬ kahˇ guꞈ doˆ-euˬ meh. 17Yaw beh kahˇ-euˬ gaˇ dzeˇ dzeˇ saˬ dzeh mehˬ dzaˬ caw caw-ehˇ, laꞈ ma ngaˬ tseˇ hmˬ guꞈ tsoꞈ-awˇ, nyiˬ kahˇ tiˬ kahˇ-euˬ gaˇ dzeˇ dzeˇ saˬ dzeh mehˬ dzaˬ caw caw-ehˇ laꞈ ma ngaˬ tseˇ hmˬ paˇ guꞈ tsoꞈ-euˬ meh. 18Saˬ paˇ kʼoeˇ nyiˬ kahˇ tiˬ gaˇ gʼeu tawꞈ-eu gʼaˇ duˬ, guiˬ shuiˇ kuˆ seuˬ ngaˬ tseˇ hmˬ aˬ yawꞈ maꞈ jahˇ-euˬ meh. 19Sehˬ gʼawˆ-ahˇ dehˬ kaˬ-eu gʼaˇ duˬ, saˬ paˇ paˇ ma nyiˬ kahˇ aˬ yawꞈ maꞈ guꞈ-euˬ meh. Yaw beh kahˇ-ahˇ, naˬ yawˬ neˇ taˬ-euˬ yawˇ aˬ buˬ-euˬ caꞈ hm neh guꞈ-awˇ, nyiˬ kahˇ tiˬ kahˇ pyeuꞈ-eu kʼoeˇ taˆ dehˬ kaˬ-eu kahˇ-ahˇ, shawˇ jehˆ ni gʼeh-eu shaˬ kʼoˆ neh guꞈ-euˬ meh.
20Sehˬ gʼawˆ-ahˇ cawˬ tuˇ jeˬ-ahˇ taw-eu gʼaˇ duˬ, aˬ yawꞈ maꞈ teˇ byaꞈ taꞈ-euˬ meh. 21Teˇ byaꞈ aˬ yawꞈ byaꞈ yawꞈ, yaw mahˇ paw tseˇ caˆ, yaw jeˇ paw tiˬ caˆ tiˬ toˇ byah-eu meh. 22Teˇ byaꞈ kʼoeˇ tiˬ byaꞈ tiˇ byaꞈ taw tsaꞈ nya-eu gʼaˇ duˬ, teˇ byaꞈ aˬ yawꞈ byaꞈ yawꞈ-ahˇ aˬ kuiˇ nyiˬ kahˬ jahˇ tsoꞈ-euˬ meh. Teˇ byaꞈ dawˬ tawˆ luꞈ-ahˇ, kʼoeˇ loꞈ-ehˇ aˬ kuiˇ jahˇ tsoꞈ-euˬ meh. 23Laꞈ oˆ paw pyawˬ gʼaˇ duˬ teˇ byaꞈ nyiˬ tseˇ byaꞈ taꞈ-euˬ meh. 24Teˇ byaꞈ kʼoeˇ nyiˬ tseˇ byaꞈ, aˬ yawꞈ byaꞈ yawꞈ-euꞈ aˬ kuiˇ nyiˬ kahˬ cawˬ ahˇ-eu gʼaˇ duˬ, kaˇ pyawˇ dawˬ pehˬ-ahˇ, pyuˇ daˇ kʼahˇ dawˬ tawˆ luꞈ oeˬ tseˇ kʼahˇ jahˇ tsoꞈ-euˬ meh. 25Sehˬ gʼawˆ laꞈ taˆ paw pyawˬ gʼaˇ duˬ, teˇ byaꞈ nyiˬ tseˇ byaꞈ taꞈ-euˬ meh. 26Teˇ byaꞈ kʼoeˇ nyiˬ tseˇ byaꞈ aˬ yawꞈ byaꞈ yawꞈ-euˬ aˬ kuiˇ nyiˬ kahˬ cawˬ ahˇ-eu gʼaˇ duˬ, pyuˇ daˇ kʼahˇ oeˬ tseˇ hmˬ jahˇ-euˬ meh. 27Nahˇ ma ga kʼehˬ paw pyawˬ-ahˇ taw-eu gʼaˇ duˬ, teˇ byaꞈ koꞈ byaꞈ taꞈ-euˬ meh. 28Laꞈ coeˇ nyiˬ coeˇ-ahˇ taw-eu gʼaˇ duˬ, teˇ byaꞈ nyiˬ byaꞈ taꞈ-euˬ meh. 29Laꞈ coeˇ-ahˇ taw-eu teˇ byaꞈ kʼoeˇ nyiˬ byaꞈ-ahˇ, dawˬ pehˬ-ahˇ neh uˬ duˬ-ahˇ doˆ ni laˆ tsaꞈ-euˬ meh. Laꞈ coeˇ nyiˬ coeˇ-ahˇ taw-eu teˇ byaꞈ kʼoeˇ nyiˬ byaꞈ-ahˇ kʼoeˇ loꞈ-ehˇ jahˇ-awˇ tsaꞈ-euˬ meh. 30Kʼoeˇ loꞈ-ehˇ, teˇ byaꞈ yehꞈ byaꞈ hawˇ-eu pyuˇ daˇ kʼahˇ tseˇ koꞈ kʼahˇ jahˇ-euˬ meh. Teˇ byaꞈ tiˬ byaꞈ gʼaˇ duˬ pyuˇ daˇ kʼahˇ nyiˬ kʼahˇ meh.
31Sehˬ gʼawˆ kaˇ pyawˇ taw gaˇ geuꞈ-eu gʼaˇ duˬ, aˬkaˬshaˇ daˇ kawˬ yuˇ-awˇ, laꞈ law tseˇ ngaˬ kahˬ aˬ yawꞈ maꞈ pyaꞈ-euˬ meh. Ngaˬ kawˬ-aˬ, Sehˬ gʼawˆ laꞈ oˆ paw pyawˬ-ahˇ kaˇ pyawˇ taw gaˇ geuꞈ-eu gʼaˇ duˬ meh. 32Ngaˬ kawˬ-aˬ, sehˬ gʼawˆ laꞈ taˆ paw pyawˬ-ahˇ kaˇ pyawˇ taw gaˇ geuꞈ-eu gʼaˇ duˬ pyeuꞈ-awˇ, ngaˬ kawˬ-aˬ, nahˇ ma ga kʼehˬ paw pyawˇ-eu sehˬ gʼawˆ naˇ kʼah paw pyawˬ-ahˇ kaˇ pyawˇ taw gaˇ geuꞈ-eu gʼaˇ duˬ meh. 33Gʼahˇ ceh tsaˬ-eu laꞈ law kʼoeˇ kawˬ-aˬ, Sehˬ gʼawˆ-euˬ kʼoeˇ dzeˇ heu dzeˇ miˇ ni mahˇ-eu meh. 34Teˇ byaꞈ kʼoeˇ deuˬ-ahˇ shuiˇ yaw-awˇ, shuiˇ yaw taˬ-euˬ laꞈ law kʼoeˇ deuˬ-ahˇ tsoꞈ nya-eu gʼaˇ duˬ, shuiˇ daˇ kʼahˇ tsoꞈ-euˬ meh.
35Nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, Jeˬluˇbeˬ aˇ baˇ aˇ boꞈ boꞈ taˬ-euˬ saˬ paˇ yuˇ-awˇ, lawˆ kaˬ taw paˆ-eu saˬ paˇ paˇ ma jahˇ-euˬ meh. 36Saˬ paˇ paˇ ma kʼoeˇ hmˬ sheu taw-eu gʼaˇ duˬ, shuiˇ yaw taˬ-awˇ, shuiˇ kuˆ seuˬ tsoꞈ taˬ-euˬ aˬkaˬshaˇ daˇ kawˬ kʼawˇ zeuˇ oeˬ zeuˇ aˬ yawꞈ maꞈ jahˇ-euˬ meh. Kʼoeˇ naˇ, kʼawˇ zeuˇ kʼoeˇ oeˬ zeuˇ ka tuˇ-eu gʼaˇ duˬ, pyuˇ zeuˇ dahˇ oeˬ hmˬ jahˇ-euˬ meh. 37Sehˬ gʼawˆ gʼoˆ kʼehˬ-ahˇ taw-eu gʼaˇ duˬ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, aˇ boꞈ boꞈ taˬ-euˬ saˬ paˇ paˇ ma guꞈ-euˬ meh, 38Saˬ paˇ paˇ ma kʼoeˇ taw-eu gʼaˇ duˬ, kuˆ seuˬ tsoꞈ-awˇ, uˬ dzo hawˇ-eu laꞈ law-ahˇ shuiˇ yaw taˬ-euˬ kʼawˇ zeuˇ ngaˬ zeuˇ hawˇ-eu, kʼawˇ zeuˇ kʼoeˇ deuˬ ka tuˇ-eu gʼaˇ duˬ guiˬ shuiˇ zeuˇ dahˇ ngaˬ hmˬ jahˇ-euˬ meh.
Currently Selected:
Doˆ-iˇ 36: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
