Doˆ-iˇ 30
30
Yaw saw jeˬ doꞈ damˬ-eu lawˇ duˬ
(Doˆ-iˇ 37.25-28)
1“Aˬkaˬshaˇ daˇ kawˬ yuˇ-awˇ, yaw saw jeˬ doꞈ damˬ-eu lawˇ duˬ tiˬ hmˬ jahˇ-awˬ. 2Tiˬ caˆ oeˬ bawˬ byah ni taꞈ-awˇ, yaw goˇ paw nyiˬ caˆ bi goˇ-awˬ. Laꞈ coeˇ oeˬ coeˇ-ahˇ tsoꞈ doˆ-eu uˬ coeˇ oeˬ kahˬ kʼawꞈ, tiˬ poˆ tehꞈ-ehˇ, lawˇ duˬ aˬ yawꞈ-ahˇ bi tsoꞈ tawꞈ-awˬ. 3Lawˇ duˬ-euˬ uˬ dzo pyawˬ naˬ oeˬ pyawˬ luꞈ hawˇ-eu, uˬ coeˇ deuˬ-ahˇ maˇ jawˆ ni gʼeh-eu shuiˇ yaw-awˇ, lawˇ duˬ jawˬ jawˬ-ehˇ shuiˇ daˇ bahˇ bahˇ-awˬ. 4Shuiˇ daˇ kʼahˇ nyiˬ kʼahˇ jahˇ-awˇ, kʼaˆ baꞈ kawˬ cawˬ ahˇ-awˇ baꞈ nya ni, lawˇ duˬ kʼoeˇ paˆ ma paˆ-ehˇ, shuiˇ daˇ bahˇ-euˬ laꞈ oˆ paw dzeˇ, laꞈ naˬ loꞈ-ehˇ jahˇ tsoꞈ-awˬ. 5Aˬkaˬshaˇ daˇ kawˬ neh kʼaˆ baꞈ kawˬ jahˇ-awˇ, shuiˇ yaw-awˬ. 6Dawˬ ma saˇ jaˇ bahˬ keuˆ-ahˇ lawˆ kaˬ taw paˆ taˬ-euˬ saˬ paˇ-euˬ laꞈ nyiˇ paw, lawˇ duˬ kʼoeˇ hmˬ bi jaˆ-awˬ. Kʼoeˇ tsahˇ-ahˇ ngaˇ naw maꞈ-ahˇ tahˬ puˬ le ma. 7Yawˬ shawˬ na luꞈ, Aˬloˬ tsiˇ kʼmˬ laˆ saˆ doꞈ laˇ ngeh, lawˇ duˬ kʼoeˇ hmˬ kʼoeˇ taˆ, yaw saw jeˬ aˬ yawꞈ ya doꞈ taˬ meh. 8Uˬ ciꞈ uˬ taw paw aˬ yawꞈ tsiˇ kʼmˬ laˆ saˆ doꞈ laˇ ngeh kʼawꞈ, kʼoeˇ loꞈ-ehˇ ya jahˇ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, yaw saw jeˬ doꞈ-awˇ damˬ-eu heu, tiˬ jawˇ-iˬ maˬ ya bi tsehˆ leˇ-a. 9Maˬ doꞈ kʼmˬ-eu yaw saw jeˬ maˬ ehˇ, jeˬ zaˬ sehꞈ-awˇ lawˇ-eu jeˬ maˬ ehˇ, dzaˬ la gʼo cehˇ lawˇ-eu jeˬ maˬ ehˇ, lawˇ duˬ kʼoeˇ hmˬ kʼoeˇ taˆ maˬ ya jahˇ-a. Kʼoeˇ-euˬ kʼoeˇ taˆ aˬ gaꞈ dzaˇ uiˇ shehˆ daˆ-awˇ maˬ ya lawˇ-a. 10Iˬ baˇ ya buˬ-iˇ ni, tiˬ kʼoꞈ tiˬ poˆ sehꞈ-awˇ lawˇ-euˬ jeˬ zaˬ-eu shiˬ yuˇ-awˇ, lawˇ duˬ kʼoeˇ hmˬ-euˬ uˬ coeˇ oeˬ kahˬ-ahˇ toeˬ lehꞈ-eu laꞈ kʼoeˇ, lawˇ duˬ shawˇ-eu zahˇ Aˬloˬ ya mˇ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, yawˬ kʼoꞈ na luꞈ kʼoeˇ loꞈ-ehˇ ya mˇ meh. Lawˇ duˬ heu hmˬ-aˬ, maˇ maˇ ni shawˇ jehˆ ni gʼeh-awˇ, Sahˬpaˬ Miˬyehˇ pyeuꞈ-eu ngaˬ-ahˇ damˬ nehˬ taˬ-euˬ lawˇ duˬ ya bi pyeuꞈ meh.”
Sahˬpaˬ Miˬyehˇ jawˇ-eu Sehˬ gʼawˆ gʼaˇ duˬ doˆ-eu ka-eu
11Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 12“Naw maꞈ Iˇsaˬleˬlaˆ tsawˇ haˬ deuˬ-euˬ tsawˇ seˬ yuˇ luꞈ ngeh, tsawˇ haˬ yawˬ gʼaˬ na luꞈ, yawˬ ha-euˬ gʼawˇ mawˇ shaˬ zahˬ guˆ gaˆ maˬ ya puˬ ni, yawˬ ha gʼaˇ duˬ yawˬ ha aˇ poeˬ ya dawˆ meh. 13Tsawˇ seˬ yuˇ ngeh tsawˇ myahˇ kʼaˇ dawˆ-euˬ tsawˇ haˬ dawˬ tawˆ luꞈ, yawˬ ha-ahˇ kʼaˇ doˇ-eu loꞈ-ehˇ pyuˇ ya dawˆ meh. Tsawˇ haˬ yawˬ gʼaˬ na luꞈ, kʼoeˇ loꞈ-ehˇ pyuˇ dawˆ-awˇ, ngaˬ-ahˇ ya damˬ meh. 14Nyiˬ tseˇ kʼoꞈ laꞈ taˆ paw-euˬ kʼaˬ dzeˇ zaˬ dawˬ tawˆ luꞈ, tsawˇ seˬ gʼoˆ ngeh tsawˇ myahˇ ya dawˆ-awˇ, yawˬ ha-ahˇ doˇ-eu pyuˇ kʼawꞈ, tiˬ poˆ tehꞈ-ehˇ ya dawˆ meh. 15Yawˬ ha-euˬ gʼawˇ mawˇ gʼaˇ duˬ pyuˇ dawˆ ngeh, smˇ muiˬ deuˬ maˬ ya dawˆ dzehˬ-ehˇ, iˇ shaˬ deuˬ kʼawꞈ maˬ ya dawˆ teˬ-a. 16Iˇsaˬleˬlaˆ tsawˇ haˬ deuˬ jawˇ gaˇ, pyuˇ heu deuˬ taꞈ uiˬ-awˇ, ngaˇ jawˇ-eu sehˬ gʼawˆ gʼaˇ duˬ zmˬ-awˬ. Heu-aˬ, aˬ yawꞈ maꞈ neh, yawˬ ha-euˬ gʼawˇ mawˇ gʼaˇ duˬ taꞈ uiˬ taˬ-euˬ pyuˇ pyeuꞈ-awˇ, aˬ yawꞈ maꞈ-ahˇ ngaˇ noeˬ keuˆ-eu laꞈ kʼoeˇ haw piˇ nehˬ ma.”
Guiˬ shuiˇ sehˇ byehˇ
17Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 18“Guiˬ shuiˇ aˬ kuiˇ tsoꞈ-eu guiˬ shuiˇ sehˇ byehˇ tiˬ hmˬ jahˇ-awˬ. Sehˇ byehˇ kʼoeˇ-ahˇ, sehˬ gʼawˆ hawˇ-eu lawˇ duˬ-euˬ yaw kaˬ-ahˇ bi jaˆ-awˇ, iˇ cuꞈ shehˆ ahˇ taˬ-awˬ. 19Aˬloˬ hawˇ-eu aˬ yawꞈ-euˬ aˬ li deuˬ, iˇ cuꞈ kʼoeˇ neh aˬ kuiˇ aˬ laꞈ ya dzuiꞈ shawˇ meh. 20Sehˬ gʼawˆ-ahˇ uˇ leˇ ngeh maˬ ehˇ, dzaˬ dzaˬ dawˇ dawˇ lawˇ-eu gʼaˇ duˬ, lawˇ duˬ dawˬ peh le ngeh maˬ ehˇ, aˬ yawꞈ maꞈ maˬ ya shiˇ-eu gʼaˇ duˬ, aˬ myah luꞈ kʼoeˇ loꞈ-ehˇ ya dzuiꞈ shawˇ meh. 21Aˬ yawꞈ maꞈ maˬ ya shiˇ-eu gʼaˇ duˬ, aˬ kuiˇ aˬ laꞈ ya dzuiꞈ shawˇ-eu jeˬ pyeuꞈ-eu meh. Heu-aˬ, aˬ yawꞈ maꞈ hawˇ-eu aˬ yawꞈ maꞈ-euˬ zaˬ deuˬ uˆ deuˬ mˬ maˬ maˬ byaˆ zaˇ ziˇ ya mˇ-eu zahˇ sahˇ kʼoꞈ tiˬ jeˬ meh.”
Tseˇ doˆ-euˬ deuˬ-ahˇ lehꞈ-eu tsiˇ
22Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 23“Muiˬ dui dui-eu yaw saw jeˬ pyeuꞈ-eu, muˇ laˬ dzaˇ uiˇ smˇ jawꞈ-i koꞈ kaˇ, saw dui dui-eu cawˬ kʼaˬ cawˬ piˇ tiˬ jawꞈ-i yehꞈ kaˇ, saw dui dui-eu pawˬ coeˇ tiˬ jawꞈ-i yehꞈ kaˇ, 24cawˬ kʼaˬ cawˬ piˇ yawˬ jeˬ yawˬ smˇ jawꞈ-i koꞈ kaˇ, heu deuˬ-ahˇ, kaˇ daˬ-ahˇ tsaˬ ni saˆ byah-awˇ, saˬ loˬ tsiˇ maˇ tsaꞈ oeˬ tsaꞈ lehˬ hmˬ taˬ-awˬ. 25Tseˇ doˆ-euˬ deuˬ-ahˇ lehꞈ-eu tsiˇ pyeuꞈ laˇ ni, heu deuˬ dawˬ tawˆ luˬ keuˬ-awˬ. 26Ngaˇ jawˇ-eu sehˬ gʼawˆ maˬ ehˇ, dawˬ ma saˇ jaˇ bahˬ keuˆ maˬ ehˇ, 27hawˬ jeh hawˇ-eu kʼmˬ maˬ oeˬ tsaꞈ deuˬ maˬ ehˇ, tsiˇ kʼmˬ doꞈ taˬ duˬ hawˇ-eu kʼoeˇ gaˇ zmˬ-eu keu ka deuˬ maˬ ehˇ, yaw saw jeˬ doꞈ-awˇ damˬ-eu lawˇ duˬ maˬ ehˇ, 28miˬ dzaˬ dzah puiˆ-awˇ lawˇ-eu jeˬ lawˇ-eu lawˇ duˬ maˬ ehˇ, kʼoeˇ gaˇ zmˬ-eu keu ka deuˬ maˬ ehˇ, aˬ kuiˇ aˬ laꞈ dzuiꞈ shawˇ duˬ sehˇ byehˇ hawˇ-eu sehˇ byehˇ aˬ kuiˇ maˬ ehˇ, kʼoeˇ deuˬ dawˬ tawˆ luꞈ-ahˇ tsiˇ lehꞈ ngeh, tsiˇ kʼoeˇ neh lehꞈ-awˬ. 29Myawˬ kʼoeˇ deuˬ-ahˇ, kʼoeˇ loꞈ-ehˇ jahˇ-awˇ a nehˬ ngeh, maˇ maˇ ni muiˬ laˇ shawˇ laˇ-awˇ, kʼoeˇ gaˇ kʼaˇ toeˬ ciˆ leˇ-eu tsawˇ haˬ aˬ geu gʼaˬ maˬ kaˬ, nui jeˬ aˬ geu jeˬ maˬ kaˬ, yaw muiˬ yaw shawˇ-euˬ baoˬ kʼoeˇ baˬ da neh, guˬ leˇ tehꞈ-a. 30Kʼoeˇ naˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ tsiˇ lehꞈ-awˇ, ngaˬ-euˬ gaˇ mˇ-eu piˇ ma bi geuꞈ-eu gʼaˇ duˬ, aˇ yaˬ biꞈ nehˬ-awˬ. 31Iˇsaˬleˬlaˆ tsawˇ haˬ deuˬ-ahˇ nawˇ heu loꞈ-ehˇ ehˇ nehˬ-awˬ. ‘Tseˇ doˆ-euˬ deuˬ-ahˇ lehꞈ-eu muiˬ-eu shawˇ-eu tsiˇ kʼoeˇ jeˬ-aˬ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, ngaˬ-euˬ gʼaˇ duˬ aˬ myah luꞈ ya zmˬ-eu tsiˇ pyeuꞈ-eu meh. 32Tsiˇ kʼoeˇ jeˬ-ahˇ, piˇ ma maˬ ngeuˇ-eu tsawˇ haˬ kʼoeˇ taˆ maˬ ya shehˆ daˆ-a. Tsiˇ kʼoeˇ jahˇ doˆ ngeh keuˬ-euˬ myawˬ kʼoeˇ deuˬ paˇ keuˬ-awˇ, kʼoeˇ gaˇ duˇ-eu tsiˇ nui jeˬ maˬ ya jahˇ doˆ-a. Kʼoeˇ-aˬ, muiˬ-eu shawˇ-eu jeˬ pyeuꞈ-eu baˬ da neh, muiˬ-eu shawˇ-eu jeˬ loꞈ-ehˇ, naw maꞈ ya taˬ huiˬ meh. 33Tsiˇ kʼoeˇ jeˬ-ahˇ duˇ-eu tsiˇ jahˇ doˆ-euˬ tsawˇ haˬ aˬ geu gʼaˬ maˬ kaˬ, piˇ ma maˬ ngeuˇ-eu tsawˇ haˬ tiˬ gʼaˬ na kʼoeˇ taˆ tsiˇ kʼoeˇ shehˆ daˆ nehˬ-euˬ tsawˇ haˬ aˬ geu gʼaˬ maˬ kaˬ, ngaˬ-euˬ tsawˇ haˬ lehˇ ngaˇ maˬ paˇ sawˇ nehˬ meh’ lehˇ ehˇ nehˬ-awˬ.”
Doꞈ damˬ-eu yaw saw jeˬ
34Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Saw dui dui-eu yaw saw jeˬ pyeuꞈ-eu, muˇ laˬ, aˬ nyoˆ nyoˆ kʼawꞈ, gaˬ baˬ naˬ hawˇ-eu shawˇ jehˆ ni gʼeh-eu lawˇ baˬ heu deuˬ tiˬ kawˆ myaˆ ni yuˇ-awˬ. 35Kʼoeˇ deuˬ yuˇ-awˇ, gʼawˇ mawˇ-ahˇ bi saw-eu tsiˇ yaw saw jeˬ jahˇ-eu loꞈ-ehˇ, doꞈ damˬ-eu yaw saw jeˬ jahˇ doˆ-awˬ. Muiˬ laˇ shawˇ laˇ-awˇ, shawˇ jehˆ ni bi pyeuꞈ-iˇ-eu gʼaˇ duˬ, saˬ deuꞈ ui cuiˆ dawˆ-awˬ. 36Kʼoeˇ loꞈ-ehˇ jahˇ gʼaˬ ngeh, ui cuiˆ yuˇ doˆ-awˇ, kʼaˬ lehˇ loꞈ-ehˇ tahˬ loeˇ-awˬ. Tahˬ loeˇ gʼaˬ-euˬ kʼoeˇ ngaˇ jawˇ-eu sehˬ gʼawˆ laꞈ kʼoeˇ yuˇ laꞈ-awˇ, dawˬ ma saˇ jaˇ bahˬ keuˆ dawˬ peh byaˆ shehˬ-awˬ. Doꞈ damˬ-eu yaw saw jeˬ heu-ahˇ, maˇ maˇ ni muiˬ-eu shawˇ-eu jeˬ loꞈ-ehˇ taˬ huiˬ taˬ mahˇ-awˬ. 37Doꞈ damˬ-eu yaw saw jeˬ heu jahˇ doˆ gaˇ keuˬ-euˬ myawˬ deuˬ yuˇ-awˇ, kʼoeˇ gaˇ duˇ-eu yaw saw jeˬ naw maꞈ maˬ ya jahˇ geuꞈ-a. Doꞈ damˬ-eu yaw saw jeˬ kʼoeˇ-aˬ, ngaˬ-ahˇ damˬ nehˬ gʼaˬ-euˬ muiˬ-eu shawˇ-eu jeˬ pyeuꞈ-eu meh lehˇ naw maꞈ siˬ nya-awˇ, taˬ huiˬ taˬ mahˇ-awˬ. 38Tsawˇ haˬ tiˬ gʼaˬ na, kʼoeˇ gaˇ duˇ-eu yaw saw jeˬ jahˇ-awˇ, yawˬ ha-euˬ gʼawˇ mawˇ yaw saw bi saw-eu gʼaˇ duˬ zmˬ naˇ, tsawˇ haˬ kʼoeˇ gʼaˬ-ahˇ ngaˬ-euˬ tsawˇ haˬ lehˇ maˬ paˇ sawˇ ma.”
Currently Selected:
Doˆ-iˇ 30: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
