Doˆ-iˇ 22
22
Tsoeˬ kʼoꞈ nehˬ-eu jeˬ-ahˇ taꞈ leˇ-eu zahˇ
1“Tsawˇ haˬ tiˬ gʼaˬ na, mawˇ neˇ maˬ kaˬ, yawˇ maˬ kaˬ, tiˬ mawˇ na kʼoeˬ-awˇ, sehꞈ dzaˬ-euˬ maˬ ehˇ, ahˬ dzaˬ-euˬ maˬ ehˇ, mawˇ neˇ tiˬ mawˇ gʼaˇ duˬ mawˇ neˇ ngaˬ mawˇ ya tsoeˬ kʼoꞈ nehˬ-awˇ, yawˇ tiˬ mawˇ gʼaˇ duˬ yawˇ oeˬ mawˇ ya tsoeˬ kʼoꞈ nehˬ meh. 2Smˇ kʼoeˬ tiˬ gʼaˬ, smˇ kʼoeˬ kʼoeˬ luꞈ gaˇ aˬ cawˬ mawˇ-awˇ bi sehꞈ naˇ, sehꞈ-eu gʼaˬ kʼoeˇ taˆ iˬ baˇ maˬ jaˆ-a.
3“Ehˇ kʼawꞈ, nahˇ ma doˆ laˇ gʼaˬ-awˇ neh smˇ kʼoeˬ-ahˇ sehꞈ naˇ, sehꞈ-eu gʼaˬ kʼoeˇ taˆ iˬ baˇ jaˆ-eu meh. Aˬ jeˬ miˇ neh ehˇ naˇ, smˇ kʼoeˬ kʼoeˇ gʼaˬ aˬ yawꞈ neh kʼoeˬ-euˬ aˇ poeˬ tsoeˬ kʼoꞈ nehˬ tehꞈ-a. 4Tsoeˬ kʼoꞈ-eu tiˬ jeˬ-iˬ maˬ jaˆ naˇ, yawˬ ha-euˬ gʼawˇ mawˇ ahˬ-awˇ ya bi tsoeˬ tehꞈ-a.
5“Mawˇ neˇ maˬ ehˇ, mahˬ tahˬ laˆ maˬ ehˇ, yawˇ maˬ ehˇ, bi kʼoeˬ-awˇ, kʼoeˬ-euˬ gʼaˬ-euˬ aˬ laꞈ laꞈ kʼoeˇ yaw dehꞈ-ehˇ jawˇ-eu ya mawˇ naˇ, nyiˬ bymˇ ya bi lawˬ dzehˬ tehꞈ-a.
6“Tsawˇ haˬ tiˬ gʼaˬ yawˬ ha-euˬ yaˇ-ahˇ miˬ dzaˬ keuˬ ngeh, aˬ cawˬ-euˬ yaˇ-ahˇ bi doꞈ nyawˬ-iˇ-awˇ, maˬ yehˬ-euˬ cehˇ puiˆ dzaˬ-euˬ maˬ ehˇ, cehˇ cehˇ bymˇ puiˆ dzaˬ-euˬ maˬ ehˇ, miˬ dzaˬ keuˬ-eu gʼaˬ ya tsoeˬ meh.
7“Tsawˇ haˬ tiˬ gʼaˬ, yawˬ gʼaˬ yawˬ-euˬ pyuˇ hawˇ-eu aˇ poeˬ kʼaˆ-eu myawˬ gahˬ deuˬ jeˬ hmˬ nehˬ-eu gʼaˇ duˬ nui ma tsaˬ-awˇ, aˬ yawꞈ-euˬ nymˇ-ahˇ jeˬ hmˬ taˬ ngeh, smˇ kʼoeˬ bi kʼoeˬ-awˇ, smˇ kʼoeˬ nyehꞈ mi naˇ, smˇ kʼoeˬ kʼoeˇ gʼaˬ nyiˬ bymˇ ya tsoeˬ kʼoꞈ meh. 8Ehˇ kʼawꞈ, smˇ kʼoeˬ maˬ nyehꞈ mi nya naˇ, pyuˇ shuiˇ myawˬ gahˬ jeˬ hmˬ nehˬ-euˬ gʼaˬ-ahˇ, uˬ duˬ tahˬ-eu jawˇ duˬ-ahˇ sheuˬ gʼeh-awˇ, aˬ cawˬ-euˬ myawˬ aˬ yawꞈ maˬ kʼoeˬ-aˬ lehˇ, kʼoeˇ gaˇ ya bi kamˬ meh.
9“Mawˇ neˇ, mahˬ tahˬ laˆ, yawˇ, dm gʼaˬ dm lmˇ hawˇ-eu, nui jeˬ aˬ geu jeˬ maˬ kaˬ, byoˆ-iˇ-euˬ paˇ mawˇ kʼoꞈ ngeh, tsawˇ haˬ nyiˬ gʼaˬ yaw kaˬ yaw sahˇ tawˬ-awˇ tsawˇ pyehˇ pyehˇ-eu laꞈ kʼoeˇ, dawˬ ja doˆ laˇ naˇ, uˬ duˬ tahˬ-eu jawˇ duˬ-ahˇ aˬ yawꞈ nyaꞈ-ahˇ ya sheuˬ gʼeh-eu meh. Iˬ baˇ ahˇ-eu meh lehˇ Miˬyehˇ neh laꞈ noeˇ bi toeˬ-euˬ gʼaˬ-aˬ, yawˬ gʼaˬ yawˬ-ahˇ nyiˬ bymˇ paˇ ya tsoeˬ kʼoꞈ nehˬ meh.
10“Tsawˇ haˬ tiˬ gʼaˬ na, yawˬ gʼaˬ yawˬ-euˬ mahˬ tahˬ laˆ maˬ ehˇ, mawˇ neˇ maˬ ehˇ, yawˇ maˬ ehˇ, jeˬ zaˬ nui jeˬ maˬ ehˇ, cu paˆ paˆ ngeh, jeˬ zaˬ kʼoeˇ mawˇ shiˇ-euˬ maˬ ehˇ, byoˆ-euˬ maˬ ehˇ, mawˇ-euˬ tsawˇ kaˬ maˬ jawˇ naˇ, 11tsawˇ haˬ kʼoeˇ gʼaˬ uˬ duˬ tahˬ-eu jawˇ duˬ-ahˇ le-awˇ, aˬ cawˬ-euˬ jeˬ zaˬ aˬ yawꞈ maˬ kʼoeˬ-aˬ lehˇ ya kamˬ meh. Jeˬ zaˬ kʼoeˇ mawˇ aˬ cawˬ neh bi kʼoeˬ-euˬ jeˬ maˬ ngeuˇ naˇ, yaw sahˇ gʼaˬ ya smˬ-awˇ, cu paˆ paˆ-euˬ gʼaˬ lawˬ nehˬ-eu maˬ loˬ-a. 12Ehˇ kʼawꞈ, jeˬ zaˬ kʼoeˇ mawˇ aˬ cawˬ neh bi kʼoeˬ-euˬ jeˬ pyeuꞈ naˇ, cu paˆ paˆ-euˬ gʼaˬ yaw sahˇ gʼaˬ-ahˇ ya lawˬ nehˬ meh. 13Bawˇ tsahˬ jeˬ zaˬ yaw haiˬ deuˬ neh kawꞈ sehꞈ dzaˬ-euˬ jeˬ pyeuꞈ naˇ, maˬ dzaˬ jiˇ ni dzeˇ laˇ-euˬ deuˬ yuˇ kʼoꞈ laꞈ-awˇ, ya mehˬ laˇ-eu meh. Bawˇ tsahˬ jeˬ zaˬ yaw haiˬ deuˬ neh bi kawꞈ sehꞈ dzaˬ-euˬ jeˬ zaˬ gʼaˇ duˬ, cu paˆ paˆ-eu gʼaˬ, yaw sahˇ gʼaˬ-ahˇ maˬ ya lawˬ nehˬ-a.
14“Tsawˇ haˬ tiˬ gʼaˬ, yawˬ gʼaˬ yawˬ-ahˇ jeˬ zaˬ tiˬ mawˇ shaˇ ngaˬ-awˇ, yaw sahˇ gʼaˬ maˬ jawˇ gaˇ jeˬ zaˬ kʼoeˇ mawˇ laˆ tahˬ laˆ naˇ-euˬ maˬ ehˇ, shiˇ-euˬ maˬ ehˇ, shaˇ ngaˬ-euˬ gʼaˬ ya lawˬ meh. 15Ehˇ kʼawꞈ, yaw sahˇ gʼaˬ-euˬ mehˬ shi kʼoeˇ loꞈ-ehˇ pyeuꞈ laˇ naˇ, lawˬ-eu maˬ loˬ-a. Jeˬ zaˬ kʼoeˇ mawˇ-ahˇ aˇ poeˬ biꞈ-awˇ shaˇ ngaˬ taˬ-euˬ jeˬ pyeuꞈ naˇ, shaˇ ngaˬ poeˬ tehꞈ-ehˇ ya biꞈ kʼoꞈ meh.
Dehꞈ jeˬ dehꞈ kawˆ hawˇ-eu Uˬ duˬ tahˬ-eu jeˬ-ahˇ taꞈ leˇ-eu zahˇ
16“Tsawˇ haˬ tiˬ gʼaˬ, shawˇ jehˆ ni gʼeh-eu miˬ daꞈ tiꞈ gʼaˬ-ahˇ bahˬ naˇ, zahˇ shaˇ poeˬ biꞈ-awˇ, miˬ daꞈ kʼoeˇ gʼaˬ-ahˇ ya sheuˬ dahˬ dzaˬ meh. 17Ehˇ kʼawꞈ, aˬ da gʼaˬ, aˬ yawꞈ-euˬ aˬ buˇ miˬ daꞈ-ahˇ, tsawˇ haˬ kʼoeˇ gʼaˬ-ahˇ maˬ bi mˇ dzaˬ-iˇ mawꞈ naˇ, tsawˇ haˬ kʼoeˇ gʼaˬ, aˬ da gʼaˬ-ahˇ zahˇ shaˇ poeˬ ya biꞈ-eu meh.
18“Nehꞈ seu piˇ seu-eu zaˬ miˬ zaˬ aˬ geu gʼaˬ maˬ kaˬ, ya sehꞈ dzeh meh.
19“Jeˬ zaˬ nehˬ-ehˇ joe-eu tsawˇ haˬ-ahˇ ya sehꞈ meh.
20“Sahˬpaˬ Miˬyehˇ pyeuꞈ-eu ngaˬ-ahˇ maˬ ngeuˇ ni, miˬyehˇ nui gʼaˬ-ahˇ lawˇ-eu shehˇ-eu tsawˇ haˬ-ahˇ ya sehꞈ byoˆ meh.
21“Boeˇ miˬ siˬ kʼaˬ-ahˇ yehˬ bawˬ sehˇ lu-ehˇ maˬ ya jahˇ-a. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ, naw maꞈ boeˇ miˬ siˬ kʼaˬ pyeuꞈ haw-euˬ meh. 22Miˬ coeˬ miˬ ma deuˬ hawˇ-eu muˇ coe aˬ nmˇ deuˬ-ahˇ yehˬ bawˬ sehˇ lu-ehˇ maˬ ya gʼeh-a. 23Naw maꞈ kʼoeˇ loꞈ-ehˇ gʼeh naˇ, aˬ yawꞈ maꞈ ngoeˇ-awˇ caw ba nehˬ laꞈ lehˇ ngaˬ-ahˇ shaˇ ngeh, aˬ yawꞈ maꞈ-euˬ shaˇ dawˬ-ahˇ ngaˇ aˬ diˇ aˬ maˇ naˇ haˬ ma. 24Kʼoeˇ ngeh, ngaˇ nui ma pehˇ laˇ-awˇ, naw maꞈ-ahˇ guiˇ deuˆ-eu laꞈ kʼoeˇ bi shiˇ ma. Naw maꞈ-euˬ miˬ zaˬ deuˬ miˬ coeˬ miˬ ma pyeuꞈ-iˇ-awˇ, naw maꞈ-euˬ zaˬ deuˬ aˬ da maˬ baw ni ya jawˇ tehꞈ-a.
25“Shaˬ-eu zahˬ-eu tsawˇ haˬ deuˬ-ahˇ nawˇ pyuˇ paˇ nehˬ ngeh, jiˇ jeuˬ yuˇ dzaˬ-eu pyuˇ paˇ-eu tsawˇ haˬ deuˬ loꞈ-ehˇ taˬ jahˇ. 26Tsawˇ haˬ tiˬ gʼaˬ na, aˇ bui biꞈ daˇ-awˇ, nawˬ-ahˇ pyuˇ shaˇ paˇ laˇ naˇ, nahˇ ma maˬ ga ahˇ mi naˆ-ehˇ, aˇ bui kʼoeˇ aˬ yawꞈ-ahˇ biꞈ kʼoꞈ nehˬ-awˬ. 27Aˬ jeˬ miˇ neh ehˇ naˇ, aˬ yawꞈ yaw gaˆ gaˆ ngeh dm-eu gʼaˇ duˬ, aˇ bui kʼoeˇ tiˬ kahˇ jaˆ-eu tehꞈ meh. Maˬ ngeuˇ naˇ, aˬ yawˬ aˬ joˆ-ehˇ yuꞈ nmˇ. Caw ba nehˬ laꞈ-awˬ lehˇ aˬ yawꞈ ngoeˇ-awˇ ngaˬ-ahˇ shaˇ ngeh, ngaˇ naˇ haˬ ma. Aˬ jeˬ miˇ neh ehˇ naˇ, ngaˇ-aˬ, gʼawˬ shaˬ gaˬ nya-eu nui ma ahˇ-eu ma.
28“Miˬyehˇ-ahˇ yehˬ bawˬ sehˇ lu-ehˇ maˬ ya ehˇ niˇ gʼa-a. Naw maꞈ-ahˇ uˆ lahˇ-eu aˬ yuiꞈ aˬ tsu-ahˇ yaˬ kʼehˇ maˬ ya yaˬ-a.
29“Naw maꞈ-euˬ dzaˬ la gʼo cehˇ, aˬ gaꞈ dzaˇ uiˇ hawˇ-eu, saˬ loˬ tsiˇ deuˬ keuˆ le ngeh, ngaˬ-ahˇ ya lawˇ meh.
“Dehꞈ beh deh le-euˬ naw maꞈ-euˬ aˬ li aˬ yuiꞈ deuˬ ngaˬ-ahˇ ya biꞈ laꞈ meh. 30Dehꞈ beh beh le-euˬ naw maꞈ-euˬ mawˇ neˇ deuˬ hawˇ-eu yawˇ deuˬ, ngaˬ-ahˇ ya biꞈ laꞈ meh. Jeˬ zaˬ deuˬ laꞈ kʼoeˇ, dehꞈ beh beh le-euˬ aˬ buˬ deuˬ-ahˇ, shiꞈ nah keuˆ ni aˬ ma mawˇ nehˬ-ehˇ maˬ gʼawˬ-iˇ ni bi jawˇ-awˇ, yehꞈ nah tiˬ nah keuˆ laˇ naˇ, ngaˬ-ahˇ ya lawˇ meh.
31“Naw maꞈ-aˬ, ngaˬ-euˬ tsawˇ haˬ pyeuꞈ-eu miˇ neh, bawˇ tsahˬ jeˬ zaˬ yaw gʼeh deuˬ neh kawꞈ sehꞈ-euˬ jeˬ zaˬ shaˬ jiˇ maˬ ya dzaˬ-a. Shaˬ jiˇ kʼoeˇ deuˬ aˬ kuiˬ-ahˇ ya bi dzaˬ meh.
Currently Selected:
Doˆ-iˇ 22: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
