Doˆ-iˇ 14
14
Iˬ ma laˆ shaˆ Yaw neˇ-ahˇ tsehˆ doˆ-euˬ
1Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. 2“Iˇsaˬleˬlaˆ tsawˇ haˬ deuˬ-ahˇ, naˇ kʼah paw paˇ jiˆ kʼoꞈ laˇ-awˇ, Miˇdaˬgawˇlaˬ meuˬ hawˇ-eu Iˬ ma laˆ shaˆ Yaw neˇ-euˬ yaw kaˬ-ahˇ, Baˬlaˇzeˬpoˬ meuˬ dawˬ peh jaˆ-eu Piˇhaˬhiˇyoˆ meuˬ mehˬ shi, sehˬ gʼawˆ gʼawˆ-awˇ naˬ-awˬ lehˇ ehˇ nehˬ-awˬ. 3Iˇsaˬleˬlaˆ tsawˇ haˬ deuˬ-aˬ, bawˇ tsahˬ-ahˇ cah cah-ehˇ jawˇ-awˇ, bawˇ tsahˬ bawˇ dahˇ laꞈ kʼoeˇ tiˬ gaˇ-iˬ iˇ tsaˬ laˇ tsaˬ maˬ siˬ ni, zahˬ leˇ taˬ-awˇ jawˇ-eu nga lehˇ, Iˇjiˇtuˆ sahˬ paˬ noeˬ tehꞈ-a. 4Aˬ yawꞈ-ahˇ ngaˇ nui ma bi gʼahˇ-awˇ, naw maꞈ-euˬ mehˬ nah bi caw teh ma. Sahˬ paˬ kʼoeˇ gʼaˬ hawˇ-eu aˬ yawꞈ-euˬ guiˇ maꞈ deuˬ-ahˇ ngaˇ guiˇ deuˆ gʼaˬ ngeh, aˬ cawˬ ngaˬ-ahˇ taˬ huiˬ taˬ mahˇ tehꞈ-a. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu gaˇ, Iˇjiˇtuˆ tsawˇ haˬ deuˬ ya siˬ tehꞈ-a.” Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-ahˇ kʼaˇ ehˇ nehˬ-euˬ loꞈ-ehˇ mˇ-euˬ meh.
5Iˇsaˬlaˬleˇ tsawˇ haˬ deuˬ cehˆ doˆ dzeuˇ-euˬ gaˇ kawˆ sahˬ paˬ kʼoeˇ gʼaˬ-ahˇ aˬ cawˬ tsaꞈ gaˬ ngeh, aˬ yawꞈ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ nui ma paˇ laˇ-awˇ, “Aˬ dui maꞈ gʼaˇ duˬ shaˬ laˇ-euˬ nga. Iˇsaˬleˬlaˆ tsawˇ haˬ deuˬ-ahˇ aˬ dui maꞈ bi cehˆ doˆ dzeuˇ-euˬ miˇ neh, zaˬ kʼaˆ maˬ paˇ jawˇ ngaˇ” lehˇ ehˇ-eu meh. 6Sahˬ paˬ kʼoeˇ gʼaˬ-aˬ, aˬ yawꞈ-euˬ guiˇ deuˆ-eu mahˬ laˆ lawˬ deuˬ hawˇ-eu, guiˇ guiˇ maꞈ deuˬ lehˬ hmˬ-euˬ meh. 7Guiˇ paw taꞈ leˇ-eu yaw huiˬ yaw mahˇ deuˬ neh bi uˆ lahˇ-euˬ muiˬ dui dui-eu mahˬ laˆ lawˬ koꞈ yaˇ laˇ ahˇ leˇ-ehˇ, mahˬ laˆ lawˬ gʼawˬ mya ni aˬ yawꞈ lehˬ hmˬ-euˬ meh. 8Sahˬ paˬ kʼoeˇ gʼaˬ-ahˇ Sahˬpaˬ Miˬyehˇ nui ma bi gʼahˇ-awˇ, tiˬ jeˬ-ahˇ-iˬ kʼahˬ maˬ lahˇ ni doˆ-iˇ luꞈ-eu Iˇsaˬleˬlaˆ tsawˇ haˬ deuˬ-euˬ mehˬ nah aˬ yawꞈ caw teh-euˬ meh. 9Mahˬ deuˬ maˬ ehˇ, mahˬ laˆ lawˬ deuˬ maˬ ehˇ, mahˬ laˆ lawˬ teh-eu tsawˇ haˬ deuˬ maˬ ehˇ, dawˬ tawˆ luꞈ kuꞈ-eu Iˇjiˇtuˆ guiˇ maꞈ kʼoeˇ maꞈ, Iˇsaˬleˬlaˆ tsawˇ haˬ deuˬ-euˬ mehˬ nah caw teh-awˇ, iˬ ma laˆ shaˆ Yaw neˇ-euˬ gaˇ dzeˇ, Piˇhaˬhiˇyoˆ meuˬ hawˇ-eu Baˬlaˇzeˬpoˬ meuˬ dawˬ peh sehˬ gʼawˆ gʼawˆ-awˇ naˬ luꞈ gaˇ, teh miˇ le-euˬ meh.
10Iˇjiˇtuˆ sahˬ paˬ hawˇ-eu aˬ yawꞈ-euˬ guiˇ maꞈ deuˬ aˬ yawꞈ maꞈ jawˇ gaˇ oe luꞈ gaˇ Iˇsaˬleˬlaˆ tsawˇ haˬ deuˬ ya mawˇ ngeh, guˆ dui dui-awˇ, caw ba nehˬ laꞈ lehˇ, Sahˬpaˬ Miˬyehˇ-ahˇ guˇ-awˇ shaˇ-euˬ meh. 11Aˬ yawꞈ maꞈ Moˇseˬ-ahˇ ehˇ-eu, “Iˇjiˇtuˆ miˇ kʼahˬ-ahˇ lmˬ bymˇ maˬ jaˆ-eu miˇ neh, bawˇ tsahˬ bawˇ dahˇ laꞈ kʼoeˇ bi shiˇ-eu lehˇ, nga maꞈ-ahˇ nawˇ heu gaˇ sheuꞈ leꞈ teˬ loˇ. Nga maꞈ-ahˇ nawˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ leꞈ-euˬ miˇ neh aˬ jeˬ keuˆ le-euˬ nga lehˇ haw sheˇ. 12Heu loꞈ-ehˇ pyeuꞈ laˇ tehꞈ-a lehˇ, aˬ dui maꞈ maˬ doˆ le mi naˆ-ehˇ, nawˬ-ahˇ nga maꞈ maˬ ehˇ-aˬ loˇ. Iˇjiˇtuˆ miˇ kʼahˬ laꞈ kʼoeˇ bi jawˇ yaꞈ nehˬ laꞈ-awˬ. Iˇjiˇtuˆ tsawˇ haˬ deuˬ-euˬ zaˬ kʼaˆ geuꞈ yaꞈ ma lehˇ, nawˬ-ahˇ nga maꞈ ehˇ nehˬ-euˬ maˬ ngeuˇ-a loˇ. Kʼoeˇ gaˇ jawˇ-awˇ aˬ cawˬ-euˬ zaˬ kʼaˆ ya geuꞈ-eu-aˬ, heu gaˇ, bawˇ tsahˬ bawˇ dahˇ-ahˇ oe-awˇ ya shiˇ-eu naˆ maˬ tseˇ zaˬ dzehˬ tehꞈ-a.”
13Moˇseˬ ehˇ kʼoꞈ nehˬ-eu, “Taˬ guˆ. Kʼaˬ duˬ ni jawˇ-awˬ. Sahˬpaˬ Miˬyehˇ aˬ joˆ-ehˇ jahˇ-awˇ naw maꞈ-ahˇ ka kʼoꞈ-eu gaˇ, iˬ nah naw maꞈ ya mawˇ tehꞈ-a. Iˬ nah naw maꞈ ya mawˇ luꞈ-eu Iˇjiˇtuˆ tsawˇ haˬ heu deuˬ-ahˇ, naw maꞈ tiˬ jawˇ-iˬ maˬ paˇ ya mawˇ-aˇ. 14Naw maꞈ tiˬ jeˬ-iˬ jahˇ-eu maˬ loˬ-a. Naw maꞈ gʼaˇ duˬ Sahˬpaˬ Miˬyehˇ guiˇ deuˆ tehꞈ-a.”
15Moˇseˬ-ahˇ Sahˬpaˬ Miˬyehˇ ehˇ-eu, “Aˬ jeˬ miˇ neh caw ba nehꞈ laꞈ-awˬ lehˇ naw maꞈ guˇ te. Mehˬ hu paw iˇ-awˬ lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. 16Nawˬ-euˬ gawˬ yoeˬ cawˬ diˇ-awˇ, iˬ ma laˆ shaˆ kʼoeˇ taˆ cawˬ ja-awˬ. Iˇ cuꞈ nyiˬ paˆ-ehˇ paˆ-iˇ-awˇ, Iˇsaˬleˬlaˆ tsawˇ haˬ deuˬ gui coˇ ni gʼeh-eu miˇ tsaˬ-ahˇ nawˬ nawˬ-ehˇ, iˬ ma laˆ shaˆ ya tsehˆ doˆ tehꞈ-a. 17Iˇjiˇtuˆ tsawˇ haˬ deuˬ-ahˇ ngaˇ nui ma bi gʼahˇ dui dui laˇ-awˇ, aˬ yawꞈ maꞈ kʼawꞈ, Iˇsaˬleˬlaˆ tsawˇ haˬ deuˬ mehˬ nah caw teh uˇ gʼeh leꞈ tehꞈ-a. Kʼoeˇ ngeh, sahˬ paˬ kʼoeˇ gʼaˬ kʼoeˇ taˆ maˬ ehˇ, aˬ yawꞈ-euˬ guiˇ maꞈ kʼoeˇ taˆ maˬ ehˇ, aˬ yawꞈ-euˬ mahˬ laˆ lawˬ deuˬ kʼoeˇ taˆ maˬ ehˇ, mahˬ laˆ lawˬ teh-eu tsawˇ haˬ deuˬ kʼoeˇ taˆ maˬ ehˇ, ngaˇ guiˇ deuˆ gʼaˬ-awˇ, aˬ cawˬ ngaˬ-ahˇ taˬ huiˬ taˬ mahˇ tehꞈ-a. 18Aˬ yawꞈ maꞈ-ahˇ ngaˇ guiˇ deuˆ gʼaˬ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ tehꞈ-a.”
19Iˇsaˬleˬlaˆ guiˇ maꞈ-euˬ mehˬ hu paw jawˇ-eu Miˬ yehˇ-euˬ gʼaˬ kʼehˇ kʼoeˇ gʼaˬ, naˇ kʼah paw jiˆ gʼoꞈ le-euˬ meh. Mˬ dmˇ kʼawˇ zeuˇ kʼoeˇ zeuˇ kʼawꞈ, naˇ kʼah paw jiˆ kʼoꞈ le-awˇ, 20Iˇsaˬleˬlaˆ tsawˇ haˬ hawˇ-eu Iˇjiˇtuˆ tsawˇ haˬ yaw kaˬ-ahˇ jawˇ-iˇ-euˬ meh. Mˬ dmˇ kʼoeˇ Iˇjiˇtuˆ tsawˇ haˬ jawˇ gaˇ zahˇ tsui ni bi pyeuꞈ-iˇ-awˇ, Iˇsaˬleˬlaˆ tsawˇ haˬ-ahˇ yaw shehꞈ bya nehˬ-euˬ meh. Kʼoeˇ miˇ neh, guiˇ guiˇ maꞈ kʼoeˇ nyiˬ maꞈ, uˬ ciꞈ miˇ lah ni, tiˬ maꞈ tiˇ maꞈ dawˬ peh maˬ iˇ peh nya ni jawˇ-euˬ meh.
21Iˬ ma laˆ shaˆ kʼoeˇ taˆ Moˇseˬ aˬ laꞈ cawˬ ja ngeh, Sahˬpaˬ Miˬyehˇ nahˇ ma doˆ kʼehˬ paw neh jaˬ lehˇ lehˇ ma bi baw gʼeh leꞈ-awˇ, iˬ ma laˆ shaˆ iˇ cuꞈ bi baw kʼoꞈ gʼeh-euˬ meh. Jaˬ lehˇ kʼoeˇ bahˬ uˬ ciꞈ miˇ lah-ehˇ baw-euˬ miˇ neh, iˇ cuꞈ nyiˬ paˆ-ehˇ paˆ-iˇ-awˇ, iˬ ma laˆ shaˆ gui coˇ ni pyeuꞈ-iˇ-euˬ meh. 22Iˇsaˬleˬlaˆ tsawˇ haˬ deuˬ-aˬ, kaˇ pyawˇ loꞈ-ehˇ nyiˬ paw paˆ luꞈ iˇ cuꞈ dahˬ goˇ taˬ-euˬ gʼahˇ ceh, gui coˇ ni gʼeh-eu miˇ tsaˬ-ahˇ nawˬ-awˇ, iˬ ma laˆ shaˆ tsehˆ doˆ-euˬ meh. 23Iˇjiˇtuˆ tsawˇ haˬ deuˬ kʼawꞈ, Iˇsaˬleˬlaˆ tsawˇ haˬ deuˬ mehˬ nah caw teh-awˇ, mahˬ deuˬ, mahˬ laˆ lawˬ deuˬ hawˇ-eu mahˬ laˆ lawˬ teh-eu tsawˇ haˬ dawˬ tawˆ luꞈ, Iˇsaˬleˬlaˆ tsawˇ haˬ deuˬ-euˬ mehˬ nah caw caw-ehˇ, iˬ ma laˆ shaˆ laꞈ kʼoeˇ iˇ uˇ gʼeh-euˬ meh. 24Sahˬpaˬ Miˬyehˇ-aˬ, uˬ bya maˬ bya shawˇ laˇ mi naˆ-ehˇ, mˬ dmˇ kʼawˇ zeuˇ hawˇ-eu miˬ dzaˬ kʼawˇ zeuˇ jaˆ gaˇ neh Iˇjiˇtuˆ guiˇ maꞈ jawˇ gaˇ haw ka gʼeh-awˇ, laˆ bahˬ laˆ baˆ nehˬ-awˇ bi shaˬ-euˬ meh. 25Aˬ yawꞈ maꞈ-euˬ mahˬ laˆ lawˬ aˇ beuˆ suꞈ-iˇ-awˇ, maˬ teh gahˇ nya ni bi pyeuꞈ-iˇ-euˬ meh. “Sahˬpaˬ Miˬyehˇ Iˇsaˬleˬlaˆ tsawˇ haˬ paw jawˇ-awˇ, aˬ dui-ahˇ guiˇ deuˆ luꞈ-eu nga. Aˬ dui maꞈ heu gaˇ neh doˆ-iˇ kaˇ-euˇ” lehˇ, Iˇjiˇtuˆ tsawˇ haˬ deuˬ ehˇ-eu meh.
26“Iˇjiˇtuˆ tsawˇ haˬ deuˬ maˬ ehˇ, aˬ yawꞈ maꞈ-euˬ mahˬ laˆ lawˬ deuˬ maˬ ehˇ, mahˬ laˆ lawˬ teh-eu deuˬ maˬ ehˇ, dawˬ tawˆ luꞈ kʼoeˇ taˆ iˇ cuꞈ bi dahˬ pymˬ-eu gʼaˇ duˬ, iˬ ma laˆ shaˆ kʼoeˇ taˆ nawˬ-euˬ aˬ laꞈ cawˬ ja-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh. 27Kʼoeˇ ngeh, Moˇseˬ aˬ laꞈ cawˬ ja-awˇ, mˬ bya laˇ ngeh, iˇ cuꞈ kʼoeˇ deuˬ aˬ yawꞈ yaw oeˇ loꞈ-ahˇ paˇ dahˬ dzm laˇ-euˬ meh. Iˇjiˇtuˆ tsawˇ haˬ kʼoeˇ deuˬ iˇ cuꞈ dahˬ pymˬ laꞈ gaˇ cehˆ dzeuˇ-eu lehˇ leh jeh kʼawꞈ, Sahˬpaˬ Miˬyehˇ aˬ yawꞈ maꞈ-ahˇ iˬ ma laˆ shaˆ laꞈ kʼoeˇ biˬ puꞈ nehˬ-euˬ meh. 28Iˇ cuꞈ kʼoeˇ paˇ dahˬ pymˬ-awˇ, Iˇsaˬleˬlaˆ tsawˇ haˬ deuˬ mehˬ nah caw teh luꞈ-eu mahˬ laˆ lawˬ deuˬ-ahˇ maˬ ehˇ, mahˬ laˆ lawˬ teh-eu tsawˇ haˬ deuˬ hawˇ-eu Iˇjiˇtuˆ guiˇ maꞈ dawˬ tawˆ luꞈ-ahˇ maˬ ehˇ,dahˬ pymˬ byoˆ jiˇ-euˬ meh. Dzeuˇ-iˇ-euˬ tiˬ gʼaˬ-iˬ maˬ jawˇ-a. 29Ehˇ kʼawꞈ, Iˇsaˬleˬlaˆ tsawˇ haˬ deuˬ-aˬ, kaˇ pyawˇ loꞈ-ehˇ nyiˬ paw paˆ luꞈ iˇ cuꞈ dahˬ goˇ taˬ-euˬ gʼahˇ ceh, gui coˇ ni gʼeh-eu miˇ tsaˬ-ahˇ nawˬ-awˇ, iˬ ma laˆ shaˆ cehˆ doˆ-euˬ meh.
30Kʼoeˇ ngeh nah, Iˇjiˇtuˆ tsawˇ haˬ deuˬ-euˬ aˬ laꞈ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ ka kʼoꞈ nehˬ-awˇ, Iˇjiˇtuˆ tsawˇ haˬ deuˬ iˬ ma laˆ shaˆ lawˇ deh-ahˇ yaw shiˇ-ehˇ ga luꞈ gaˇ, Iˇsaˬleˬlaˆ tsawˇ haˬ deuˬ ya mawˇ-euˬ meh. 31Iˇjiˇtuˆ tsawˇ haˬ-ahˇ gʼaˬ leˇ-euˬ Sahˬpaˬ Miˬyehˇ-euˬ huiˬ dui dui-eu baoˬ-ahˇ Iˇsaˬleˬlaˆ tsawˇ haˬ deuˬ ya mawˇ ngeh, Sahˬpaˬ Miˬyehˇ-ahˇ aˬ yawꞈ maꞈ guˇ-awˇ, Sahˬpaˬ Miˬyehˇ hawˇ-eu aˬ yawꞈ-euˬ zaˬ kʼaˆ Moˇseˬ-ahˇ ja ceuˬ-euˬ meh.
Currently Selected:
Doˆ-iˇ 14: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
