Doˆ-iˇ 1
1
Iˇjiˇtuˆ miˇ kʼahˬ laꞈ kʼoeˇ, Iˇsaˬleˬlaˆ tsawˇ haˬ deuˬ kʼehˬ-eu kʼaˆ-eu jeˬ-ahˇ ya daˬ-euˬ
1Yawˬ ha-euˬ miˬ sawˇ zaˬ deuˬ sheuˬ-awˇ, Yaˬkoˆ nehˬ-ehˇ, 2Iˇjiˇtuˆ miˇ kʼahˬ-ahˇ iˇ-euˬ Yaˬkoˆ-euˬ aˬ li deuˬ-aˬ, heu deuˬ meh. Luˇbeˬ, Suˇmoˬ, Leˬbiˇ, Yuˇdaˆ, 3Iˇsaˬkaˬ, Zeˬbuˬloˬ, Beˬyaˬmiˬ, 4Daˬ, Naˬtaˬliˇ, Gaˆ hawˇ-eu Aˬsaˬ meh. 5Yaˬkoˆ-euˬ zaˬ deuˬ uˆ deuˬ pyeuꞈ-eu heu deuˬ dawˬ tawˆ luꞈ shiꞈ tseˇ gʼaˬ byah-eu meh. Aˬ yawꞈ-euˬ aˬ li Yoˇsehˆ-aˬ, aˬ yawꞈ maꞈ-euˬ mehˬ hu neh, Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu meh. 6Aˇ kʼoꞈ aˇ la myahˇ laˇ ngeh, Yoˇsehˆ maˬ ehˇ, aˬ yawꞈ-euˬ mehˇ nmˇ deuˬ maˬ ehˇ, aˬ yawꞈ maꞈ nehˬ-ehˇ tiˬ cawˬ pyeuꞈ-eu tsawˇ haˬ deuˬ maˬ ehˇ, ziˇ dehꞈ jiˇ-euˬ meh. 7Ehˇ kʼawꞈ, aˬ yawꞈ maꞈ-euˬ zaˬ deuˬ uˆ deuˬ pyeuꞈ-eu Iˇsaˬleˬlaˆ tsawˇ haˬ deuˬ behˇ laˇ-awˇ, myaˬ dui dui laˇ-euˬ miˇ neh, Iˇjiˇtuˆ miˇ kʼahˬ laꞈ kʼoeˇ jawˇ byah-euˬ meh.
8Kʼoeˇ ngeh, Yoˇsehˆ-ahˇ maˬ siˬ nya-eu sahˬ paˬ yaw shuiꞈ tiˬ gʼaˬ Iˇjiˇtuˆ miˇ kʼahˬ-ahˇ uˆ lahˇ-euˬ meh. 9Sahˬ paˬ kʼoeˇ gʼaˬ aˬ yawꞈ-euˬ tsawˇ haˬ deuˬ-ahˇ ehˇ nehˬ-eu, “Iˇsaˬleˬlaˆ tsawˇ jeuˬ heu deuˬ tsawˇ haˬ myaˬ dui dui-eu miˇ neh aˬ dui kʼahˬ lahˇ duˬ jaˆ-eu meh. 10Guiˇ pyeuꞈ laˇ naˇ, aˬ dui-ahˇ muiˇ-eu deuˬ nehˬ-ehˇ aˬ yawꞈ maꞈ gm leˇ-awˇ, aˬ dui-ahˇ guiˇ deuˆ laˇ tehꞈ-a. Kʼoeˇ naˇ, miˇ kʼahˬ heu kʼahˬ laꞈ kʼoeˇ neh aˬ yawꞈ maꞈ doˆ-iˇ tehꞈ-a. Aˬ yawꞈ maꞈ tsawˇ haˬ heu naˆ maˬ tseˇ maˬ myaˬ laˇ nya ni, aˬ dui tiˬ jeˬ paˬ ya jahˇ meh.” 11Kʼoeˇ miˇ neh, aˬ yawꞈ maꞈ-ahˇ gaˇ yaw kʼaˆ-ehˇ bi mˇ-awˇ, nui ma bi cawˆ-iˇ-eu gʼaˇ duˬ, zaˬ kʼaˆ deuˬ gaˇ mˇ gaˇ haw-eu tsawˇ haˬ deuˬ-eu aˬ laꞈ laꞈ kʼoeˇ a nehˬ-euˬ meh. Sahˬ paˬ-euˬ myawˬ taˬ-eu gʼaˇ duˬ, Piˇdmˬ hawˇ-eu Laˬmaˬsehˇ meuˬ aˬ yawꞈ maꞈ ya tso-eu meh. 12Ehˇ kʼawꞈ, Iˇjiˇtuˆ tsawˇ haˬ deuˬ aˬ yawꞈ maꞈ-ahˇ ngehˬ-ehˇ kʼehˬ naˇ, aˬ yawꞈ maꞈ tsawˇ haˬ ngehˬ-ehˇ paˇ behˇ laˇ-awˇ, Iˇjiˇtuˆ miˇ kʼahˬ doe ni ngehˬ-ehˇ paˇ jawˇ byah gʼeh-euˬ meh. 13Kʼoeˇ ngeh, Iˇjiˇtuˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ guˆ laˇ taˬ-euˬ meh. Kʼoeˇ miˇ neh, Iˇsaˬleˬlaˆ tsawˇ haˬ deuˬ-ahˇ zaˬ kʼaˆ bi geuꞈ-awˇ, kʼehˬ nehˬ kʼaˆ nehˬ-eu laꞈ kʼoeˇ, gaˇ bi mˇ-euˬ meh. 14Iˇsaˬleˬlaˆ tsawˇ haˬ deuˬ-ahˇ aˬ yawꞈ maꞈ gʼawˬ shaˬ maˬ gaˬ ni, nymˇ tsoˆ gaˇ maˬ ehˇ, deh yaˇ mˇ gaˇ maˬ ehˇ, maˬ mˇ coeˇ gaˇ keuˆ ni myawˬ kʼaˆ bi mˇ-euˬ meh.
15Kʼoeˇ naˇ, Heˬbyehˇ tsawˇ haˬ zaˬ miˬ zaˬ deuˬ aˬ nyiˇ ciˬ gaˇ laˆ saˆ nehˬ-eu zaˬ miˬ zaˬ nyiˬ gʼaˬ pyeuꞈ-eu Shiˇpaˬlahˬ hawˇ-eu Puˇhaˬ-ahˇ Iˇjiˇtuˆ sahˬ paˬ kuˇ-awˇ, dawˬ ngehˬ cawˬ-euˬ meh. 16“Heˬbyehˇ tsawˇ haˬ zaˬ miˬ zaˬ deuˬ aˬ nyiˇ ciˬ gaˇ naw nyaꞈ laˆ saˆ ngeh, aˬ li dehꞈ le naˇ laˆ sehꞈ-awˬ. Ehˇ kʼawꞈ, aˬ buˇ dehꞈ le naˇ, maˬ laˆ sehꞈ ni bi buˬ-iˇ-awˬ” lehˇ, zaˬ miˬ zaˬ kʼoeˇ nyiˬ gʼaˬ-ahˇ sahˬ paˬ ehˇ nehˬ-euˬ meh. 17Ehˇ kʼawꞈ, zaˬ miˬ zaˬ kʼoeˇ nyiˬ gʼaˬ Miˬyehˇ-ahˇ guˆ-eu miˇ neh, sahˬ paˬ neh ehˇ taˬ-euˬ loꞈ-ehˇ maˬ mˇ-ehˇ, dehꞈ le-euˬ aˬ li deuˬ-ahˇ maˬ laˆ sehꞈ ni bi jawˇ-euˬ meh. 18Kʼoeˇ ngeh, zaˬ miˬ zaˬ kʼoeˇ nyiˬ gʼaˬ-ahˇ bi kuˇ laˬ-iˇ-awˇ, “Naw nyaꞈ aˬ jeˬ miˇ neh kʼoeˇ loꞈ-ehˇ mˇ teˬ. Aˬ jeˬ miˇ neh aˬ li deuˬ-ahˇ maˬ laˆ sehꞈ ni bi dehꞈ teˬ” lehˇ naˇ haˬ-euˬ meh.
19Zaˬ miˬ zaˬ kʼoeˇ nyiˬ gʼaˬ ehˇ-eu, “Heˬbyehˇ tsawˇ jeuˬ zaˬ miˬ zaˬ deuˬ-aˬ, Iˇjiˇtuˆ tsawˇ jeuˬ zaˬ miˬ zaˬ deuˬ-ahˇ maˬ duˇ-a. Aˬ yawꞈ maꞈ aˬ nyiˇ ciˬ-eu yaw awˬ miˇ neh, nga nyaꞈ maˬ iˇ keuˆ mi naˆ-ehˇ zaˬ dehꞈ le gʼaˬ-euˬ meh.” 20Aˬ nyiˇ ciˬ gaˇ laˆ saˆ-eu zaˬ miˬ zaˬ kʼoeˇ nyiˬ gʼaˬ-ahˇ Miˬyehˇ yaw muiˬ-ehˇ ngehˬ gʼeh nehˬ-euˬ miˇ neh, Iˇsaˬleˬlaˆ tsawˇ haˬ myaˬ laˇ behˇ laˇ luꞈ-eu meh. 21Zaˬ miˬ zaˬ kʼoeˇ nyiˬ gʼaˬ Miˬyehˇ-ahˇ yaw zeu baw-eu miˇ neh, aˬ yawꞈ nyaꞈ-ahˇ kʼawꞈ zaˬ gʼawˬ mya ni Miˬyehˇ bi jawˇ le-euˬ meh. 22Kʼoeˇ naˇ, “Kʼaˇ dehꞈ le-euˬ Heˬbyehˇ tsawˇ jeuˬ aˬ li deuˬ-ahˇ Niˬlaˇ lawˇ baˬ laꞈ kʼoeˇ biˬ puꞈ-awˬ. Ehˇ kʼawꞈ, aˬ buˇ deuˬ bi dehꞈ-awˬ” lehˇ, aˬ yawꞈ-euˬ tsawˇ haˬ deuˬ-ahˇ sahˬ paˬ dawˬ biꞈ-euˬ meh.
Currently Selected:
Doˆ-iˇ 1: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
