Dawˬmehˬ 27
27
Kʼaˬ lo teˇ byaꞈ kʼoeˇ taˆ boꞈ taˬ-euˬ Miˬyehˇ-euˬ zahˇ dawˬ kʼoꞈ dawˬ deuˬ
1Kʼoeˇ naˇ, Moˇseˬ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ Iˇsaˬleˬlaˆ tsawˇ haˬ deuˬ-ahˇ ehˇ nehˬ-eu, “Iˬ nah ngaˇ naw maꞈ-ahˇ mehˬ nehˬ tsoˆ nehˬ-euˬ jeˬ dawˬ tawˆ luꞈ-ahˇ naˇ haˬ geuꞈ-awˬ. 2Yawˇdaˬ lawˇ baˬ tsehˆ doˆ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh biꞈ laꞈ-euˬ miˇ kʼahˬ-ahˇ nawˇ le uˇ ngeh nah, muiˬ-eu kʼaˬ lo deuˬ nawˇ ya ka tuˇ-awˇ, kʼaˬ lo kʼoeˇ deuˬ-ahˇ laꞈ nyiˇ paw miˇ tsaˬ ya maˇ meh. 3Zahˇ dawˬ kʼoꞈ dawˬ heu deuˬ hawˇ-eu mehˬ nehˬ tsoˆ nehˬ-euˬ dawˬ heu deuˬ dawˬ tawˆ luꞈ, kʼaˬ lo kʼoeˇ deuˬ kʼoeˇ taˆ ya boꞈ taˬ meh. Nawˬ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ saˇ jaˇ dzaˬ taˬ-euˬ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ-ahˇ nawˇ jawˇ uˇ keuˆ leˇ-awˇ, 4Yawˇdaˬ lawˇ baˬ kʼoeˇ paw baˬ-ahˇ nawˇ jawˇ ngeh, iˬ nah ngaˇ nawˬ-ahˇ mehˬ nehˬ tsoˆ nehˬ taˬ-euˬ loꞈ-ehˇ, Eˇbaˬlaˇ gawˬ jawˬ kʼoeˇ taˆ kʼaˬ lo kʼoeˇ deuˬ ka tuˇ-awˇ, laꞈ nyiˇ paw miˇ tsaˬ maˇ-awˬ. 5Shmˇ dzahˬ taꞈ neh maˬ taꞈ-euˬ kʼaˬ lo yuˇ-awˇ, kʼoeˇ gaˇ lawˇ duˬ tiˬ tsahˇ gawˬ-awˬ. 6Aˬ jeˬ miˇ neh ehˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ nawˬ neh gawˬ-euˬ lawˇ duˬ aˬ geu hmˬ maˬ kaˬ, shmˇ dzahˬ taꞈ neh maˬ taꞈ-euˬ kʼaˬ lo neh tehꞈ-ehˇ ya gawˬ meh. Miˬ dzaˬ dzah puiˆ-awˇ lawˇ-eu jeˬ-ahˇ, kʼoeˇ gaˇ nawˇ ya lawˇ meh. 7Cawˬ cawˬ taꞈ-eu lawˇ-eu jeˬ kʼawꞈ, kʼoeˇ gaˇ lawˇ-awˇ dzaˬ-eu laꞈ kʼoeˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi guiˬ lahˬ-ahˇ ya ja ceuˬ meh. 8Laꞈ nyiˇ paw miˇ tsaˬ maˇ taˬ-euˬ kʼaˬ lo kʼoeˇ deuˬ kʼoeˇ taˆ, Miˬyehˇ-euˬ zahˇ dawˬ kʼoꞈ dawˬ aˬ yawꞈ dawˬ yawꞈ yaw muiˬ paˬ-ehˇ mawˇ shawˇ laˇ ni ya boꞈ taˬ meh.”
9Kʼoeˇ naˇ, Moˇseˬ hawˇ-eu Leˬbiˇ tsawˇ haˬ piˇ ma deuˬ Iˇsaˬleˬlaˆ tsawˇ haˬ dawˬ tawˆ luꞈ-ahˇ ehˇ nehˬ-eu, “Iˇsaˬleˬlaˆ tsawˇ jeuˬ-oˇ, ciˬ cuˇ ni jawˇ-awˇ naˬ bawˇ ciˬ kʼmˇ taˬ-eu laꞈ kʼoeˇ, ngaˇ ehˇ gaˇ naˇ haˬ sheˇ. Iˬ nah nawˇ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ jeuˬ pyeuꞈ laˇ-euˬ meh. 10Kʼoeˇ miˇ neh, aˬ yawꞈ ehˇ dawˬ naˇ haˬ-awˇ, iˬ nah ngaˇ naw maꞈ-ahˇ biꞈ luꞈ-eu aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-euˬ mehˬ nah caw teh-awˬ.”
Maˬ naˇ haˬ geuꞈ-eu deuˬ kʼoeˇ taˆ yaˬ kʼehˇ yaˬ-eu jeˬ keuˆ le-eu
11Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Moˇseˬ heu loꞈ-ehˇ ehˇ nehˬ-euˬ meh. 12“Naw maꞈ Yawˇdaˬ lawˇ baˬ tsehˆ doˆ gʼaˬ-awˇ, Iˇsaˬleˬlaˆ tsawˇ haˬ deuˬ kʼoeˇ taˆ guiˬ lahˬ biꞈ-awˇ dawˬ ngehˬ gʼeh nehˬ ngeh, Suˇmoˬ tsawˇ jeuˬ, Leˬbiˇ tsawˇ jeuˬ, Yuˇdaˆ tsawˇ jeuˬ, Iˇsaˬkaˬ tsawˇ jeuˬ, Yoˇsehˆ tsawˇ jeuˬ hawˇ-eu Beˬyaˬmiˬ tsawˇ jeuˬ heu deuˬ, Geˬlaˬzmˬ gawˬ jawˬ kʼoeˇ taˆ ya yawꞈ meh. 13Kʼoeˇ naˇ, yaˬ kʼehˇ yaˬ-eu dawˬ ngehˬ ngeh, Luˇbeˬ tsawˇ jeuˬ, Gaˆ tsawˇ jeuˬ, Aˬshaˬ tsawˇ jeuˬ, Zeˬbuˬluˬ tsawˇ jeuˬ, Daˬ tsawˇ jeuˬ hawˇ-eu Naˬtaˬliˇ tsawˇ jeuˬ heu deuˬ, Eˇbaˬlaˇ gawˬ jawˬ kʼoeˇ taˆ ya yawꞈ meh. 14Leˬbiˇ tsawˇ haˬ deuˬ, yaw kʼaˆ ehˇ guˇ-awˇ, heu loꞈ-ehˇ ya ehˇ meh.
15“ ‘Kʼaˬ lo neh maˬ ehˇ, daˇ kawˬ neh maˬ ehˇ, shmˇ, shuiˇ, pyuˇ, guiˬ shuiˇ, heu deuˬ neh maˬ ehˇ, tahˬ pahˬ aˬ ma mawˇ kawˇ tehˆ-awˇ uˬ duˬ tahˬ kʼoeˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ. Tahˬ pahˬ aˬ ma mawˇ kawˇ-ahˇ uˬ duˬ tahˬ-eu jeˬ-ahˇ Sahˬpaˬ Miˬyehˇ maˬ haw nahˇ-a’ lehˇ guˇ-awˇ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
16“ ‘Yawˬ ha-euˬ aˬ da aˬ ma-ahˇ yaw zeu maˬ baw-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
17“ ‘Yawˬ ha-ahˇ nymˇ kaˬ taꞈ-eu tsawˇ haˬ-euˬ nymˇ kaˬ teh jiˆ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu je keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
18“ ‘Myaˆ behꞈ-ahˇ gaˇ ma mehˬ bahˬ nehˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ yaˬ ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
19“ ‘Boeˇ miˬ shiˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ-ahˇ maˬ tsaˬ maˬ dawˇ-eu laꞈ kʼoeˇ yaˇ kʼaˬ ja gʼaˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
20“ ‘Yawˬ ha aˬ da-euˬ miˬ zaˬ tiˬ gʼaˬ na nehˬ-ehˇ bahˬ-eu laꞈ kʼoeˇ, yawˬ ha aˬ da-ahˇ mˇ lehˬ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
21“ ‘Jeˬ zaˬ nehˬ-ehˇ kʼaˬ miˬ sheu taꞈ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
22“ ‘Yawˬ ha-euˬ dmˇ ma ci ci ni gʼeh-eu gʼaˬ nehˬ-ehˇ maˬ ehˇ, ma caw dmˇ ma nehˬ-ehˇ maˬ ehˇ, yuꞈ taꞈ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
23“ ‘Yawˬ ha-euˬ aˬ mawˬ zaˬ miˬ zaˬ gʼaˬ nehˬ-ehˇ yuꞈ taꞈ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
24“ ‘Tsawˇ haˬ-ahˇ ciˬ cuˇ ni sehꞈ kʼoeˬ-eu tsawˇ haˬ kʼoeˇ taˆ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
25“ ‘Laˆ lehˬ laˆ ca taˬ-euˬ maˬ jaˆ-eu tsawˇ haˬ-ahˇ sehꞈ-eu gʼaˇ duˬ pyuˇ yuˇ dzaˬ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
26“ ‘Miˬyehˇ-euˬ zahˇ dawˬ kʼoꞈ dawˬ hawˇ-eu mehˬ nehˬ tsoˆ nehˬ-eu jeˬ dawˬ tawˆ luꞈ-ahˇ maˬ naˇ haˬ geuꞈ-eu tsawˇ haˬ kʼoeˇ taˆ, Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ’ lehˇ, Leˬbiˇ tsawˇ haˬ deuˬ ya ehˇ meh.
“Kʼoeˇ ngeh, tsawˇ haˬ dawˬ tawˆ luꞈ, ‘Aˬ meˬ’ lehˇ ya ehˇ kʼoꞈ meh.
Currently Selected:
Dawˬmehˬ 27: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
