Gʼaˬkʼehˇ 6

Caw mˇ caw shaˇ-eu shiꞈ gʼaˬ tseˇ doˆ-euˬ

1Zaˬ lahˇ deuˬ myaˬ laˇ luꞈ-eu aˇ nah aˇ yamˬ kʼoeˇ laꞈ kʼoeˇ, Heˬlaˬsaˇ dawˬ ngehˬ-eu Yuˇdaˆ tsawˇ haˬ deuˬ hawˇ-eu, Yuˇdaˆ dawˬ ngehˬ-eu Yuˇdaˆ tsawˇ haˬ deuˬ yaw kaˬ dawˬ ja doˆ-euˬ meh. Aˬ jeˬ miˇ neh ehˇ naˇ, aˬ yawꞈ nah yawꞈ loˬ-eu jeˬ biˇ nehˬ ngeh, aˬ yawꞈ maꞈ-euˬ miˬ coeˬ miˬ ma deuˬ-ahˇ yaw muiˬ paˬ-ehˇ maˬ biˇ oꞈ doe nehˬ nga lehˇ, Heˬlaˬsaˇ dawˬ ngehˬ-eu Yuˇdaˆ tsawˇ haˬ deuˬ ehˇ-eu meh. 2Kʼoeˇ miˇ neh, jah-eu tsawˇ haˬ dawˬ tawˆ luꞈ-ahˇ gʼaˬ kʼehˇ tseˇ nyiꞈ gʼaˬ neh kuˇ uiˬ-awˇ, heu loꞈ-ehˇ ehˇ nehˬ-euˬ meh. “Nga maꞈ pyuˇ shuiˇ-ahˇ taꞈ leˇ-eu gaˇ heu deuˬ mˇ-eu baˬ da neh Miˬyehˇ dawˬ kawˬ mehˬ-eu paw teˬ-iˇ naˇ, maˬ muiˬ-a. 3Kʼoeˇ miˇ neh aˬ yuiꞈ aˬ nyiˇ deuˬ-oˇ, naw maꞈ laꞈ kʼoeˇ Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-awˇ, tsawˇ gahˇ byah-eu tsawˇ haˬ shiꞈ gʼaˬ tseˇ doˆ-awˬ. Aˬ yawꞈ maꞈ-ahˇ gaˇ heu hmˬ bi mˇ ma. 4Nga maꞈ-aˬ, guiˬ lahˬ shaˇ-eu hawˇ-eu dawˬ mehˬ mehˬ-eu jeˬ tehꞈ-ehˇ aˇ yamˬ tiˬ byah ni mˇ ma.”

5Gʼaˬ kʼehˇ deuˬ kʼoeˇ loꞈ-ehˇ ehˇ gaˇ, aˇ muˇ muˇ lah-ehˇ nui ma tsaˬ-awˇ, tsawˇ haˬ heu deuˬ-ahˇ tseˇ doˆ-euˬ meh. Jah-eu nui ma tiˬ byah ni ahˇ-awˇ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu Saˬteˬpaˬ, Piˇliˇpuˆ, Bawˇkawˬ, Niˇgaˬnawˬ, Tiˇmoˬ, Baˬmeˬnaˇ, Niˇgawˇla heu deuˬ meh. Niˇgawˇla-aˬ, yaw beh Aˬdiˇawˬ meuˬ-ahˇ jawˇ-euˬ lawˇ ciꞈ zaˬ pyeuꞈ-awˇ, dzeuˇ laˇ ngeh Yuˇdaˆ tsawˇ haˬ-euˬ zahˇ tiˬ poˆ tawˬ haw-euˬ meh. 6Aˇ muˇ neh aˬ yawꞈ maꞈ-ahˇ gʼaˬ kʼehˇ deuˬ jawˇ gaˇ sheuˬ gʼeh-awˇ, gʼaˬ kʼehˇ deuˬ guiˬ lahˬ shaˇ-awˇ, aˬ yawꞈ maꞈ kʼoeˇ taˆ aˬ laꞈ baꞈ daˆ nehˬ-euˬ meh.

7Kʼoeˇ loꞈ-ehˇ jahˇ-eu laꞈ kʼoeˇ, Miˬyehˇ-euˬ dawˬ kawˬ mehˬ hu paw maˬ naˬ leˇ ni gaˬ doe-iˇ luꞈ-eu meh. Yeˬluˇsaˬlehˬ meuˬ laꞈ kʼoeˇ zaˬ lahˇ deuˬ tiˬ jawˇ saˇ-iˬ tiˬ jawˇ myaˬ laˇ luꞈ-awˇ, piˇ ma gʼawˬ mya gʼaˬ jah-eu tsawˇ haˬ pyeuꞈ laˇ-euˬ meh.

Saˬteˬpaˬ-ahˇ nyehꞈ-euˬ

8Miˬyehˇ neh guiˬ lahˬ tiˬ byah ni biꞈ taˬ-awˇ, baoˬ tiˬ byah ni ahˇ-eu Saˬteˬpaˬ-aˬ, aˬ cawˬ-euˬ mehˬ shi zahˬ dui dui leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ mˇ mehˬ-euˬ meh. 9Kuˇleˬniˬ meuˬ hawˇ-eu Aˬleˬsaˬduˇ meuˬ-ahˇ jawˇ-eu Yuˇdaˆ tsawˇ haˬ deuˬ ahˇ leˇ taˬ-euˬ, Buˬ-iˇ-euˬ tsawˇ haˬ deuˬ#6.9 ‘Buˬ-iˇ-euˬ tsawˇ haˬ deuˬ’ lehˇ ehˇ-eu-aˬ, yaw beh a cawˬ -euˬ zaˬ kʼaˆ geuꞈ-awˇ, aˇ nah hawˇ-eu zeuˇ piˇ-awˇ bi buˬ-iˇ-euˬ, maˬ ngeuˇ naˇ, aˬ cawˬ neh pyehˬ nehˬ-awˇ bi buˬ-iˇ-euˬ Yuˇdaˆ tsawˇ haˬ deuˬ-ahˇ ehˇ-eu meh. -euˬ uˬ duˬ tahˬ nymˇ lehˇ ehˇ-eu aˇ muˇ kʼoeˇ muˇ-ahˇ taꞈ-eu tsawˇ haˬ deuˬ hawˇ-eu, Giˇliˇciˆ miˇ kʼahˬ hawˇ-eu Aˬshaˆ miˇ kʼahˬ-ahˇ jawˇ-eu Yuˇdaˆ tsawˇ haˬ tiˬ paˆ na deuˬ tuˇ laˇ-awˇ, Saˬteˬpaˬ-ahˇ tsawˇ pyehˇ pyehˇ-euˬ meh. 10Ehˇ kʼawꞈ, Yaw sahˇ Miˬyehˇ neh Saˬteˬpaˬ-ahˇ tsawˇ gahˇ biꞈ taˬ-euˬ miˇ neh, aˬ yawꞈ maꞈ maˬ pyehˇ gʼaˬ nya-a. 11Kʼoeˇ miˇ neh, tsawˇ haˬ tiˬ paˆ na deuˬ-ahˇ aˬ yawꞈ maꞈ laꞈ nmꞈ nmꞈ-awˇ, “Tsawˇ haˬ heu gʼaˬ Moˇseˬ hawˇ-eu Miˬyehˇ-ahˇ bahˬ leˇ-eu dawˬ ngehˬ-euˬ nga maꞈ gaˬ-euˬ ma” lehˇ bi ehˇ-euˬ meh. 12Kʼoeˇ loꞈ-ehˇ jahˇ-eu laꞈ kʼoeˇ, miˇ kʼahˬ zaˬ deuˬ, tsawˇ mawˬ tsawˇ kʼaˆ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ nui ma pehˇ laˇ ni kawˆ-euˬ meh. Aˬ yawꞈ maꞈ Saˬteˬpaˬ-ahˇ nyehꞈ-awˇ, Baꞈ dzah#6.12 ‘Bahꞈ dzah’ lehˇ ehˇ-eu dawˬ tsuiꞈ, Maꞈtehˬ 26.59-ahˇ haw-awˬ mehˬ shi sheuˬ gʼeh-euˬ meh. 13Kʼoeˇ naˇ, jaˬ myawꞈ myawꞈ-eu gʼaˇ duˬ aˬ yawꞈ maꞈ neh mehˬ gahˇ taˬ-euˬ tsawˇ haˬ deuˬ sheuˬ ahˇ laꞈ-awˇ, heu loꞈ-ehˇ bi ehˇ-euˬ meh. “Tsawˇ haˬ heu gʼaˬ-aˬ, aˬ dui-euˬ muiˬ-eu shawˇ-eu Uˬ duˬ tahˬ nymˇ nymˇ ma hawˇ-eu Moˇseˬ-euˬ Zahˇ dawˬ kʼoꞈ dawˬ-ahˇ bahˬ leˇ-eu dawˬ maˬ tsehˆ leˇ ni ngehˬ luꞈ meh. 14Naˬzaˬlehˇ tsawˇ haˬ Yeˬsuˇ heu gʼaˬ, Uˬ duˬ tahˬ nymˇ nymˇ ma heu laˆ cawˆ-awˇ, Moˇseˬ neh biꞈ laꞈ-awˇ tawˬ ka leꞈ-euˬ zahˇ sahˇ kʼoꞈ dawˬ tawˆ luꞈ laˆ paˇ jiˇ tehꞈ-a lehˇ, tsawˇ haˬ heu gʼaˬ ehˇ-eu nga maꞈ gaˬ-euˬ ma.” 15Baꞈ dzah-ahˇ kʼaˇ nuiˇ luꞈ-eu tsawˇ haˬ dawˬ tawˆ luꞈ, Saˬteˬpaˬ-ahˇ haw tsoˆ taˬ-euˬ meh. Kʼoeˇ ngeh, aˬ yawꞈ-euˬ myaˆ pyawˬ kʼoeˇ, mˬ taˆ gʼaˬ kʼehˇ-euˬ myaˆ pyawˬ-ahˇ duˇ gaˇ aˬ yawꞈ maꞈ ya mawˇ-euˬ meh.

Currently Selected:

Gʼaˬkʼehˇ 6: AHK

Highlight

Copy

Compare