2 Gawˇliˬtu 12

Yaw sahˇ laꞈ kʼoeˇ Pawˇluˆ ya siˬ ya mawˇ-euˬ gaˇ kawˆ

1Kʼahˬ sehˇ jehˆ-eu jeˬ gaˇ dahˇ maˬ tsoeˬ kʼawꞈ, ngaˇ kʼahˬ sehˇ ya jehˆ meh. Nymˬ-mˇ ngaˇ Sahˬpaˬ Yeˬsuˇ neh pah mehˬ nehˬ laꞈ-euˬ yaw sahˇ laꞈ kʼoeˇ ya siˬ ya mawˇ-euˬ gaˇ kawˆ ja ma. 2Dzeuˇ laˇ-euˬ tseˇ oeˬ kʼoꞈ-ahˇ, mˬ kʼoeˇ taˆ goˇ dui dui-eu tiˆ-ahˇ bi ciˬ daˆ leꞈ-euˬ Ka li zaˬ tiˬ gʼaˬ-ahˇ ngaˇ siˬ nya ma. (Gaˇ kawˆ kʼoeˇ maˇ maˇ ni pyeuꞈ dzeuˇ yaꞈ-euˬ jeˬ ngeuˇ-eu maˬ siˬ. Yaw sahˇ laꞈ kʼoeˇ ya siˬ ya mawˇ-euˬ jeˬ pyeuꞈ-eu maˬ siˬ. Ngaˬ-ahˇ maˬ ehˇ duˬ nya nya. Miˬyehˇ tiˬ gʼaˬ tehꞈ-ehˇ siˬ duˬ-eu meh.) 3Ngaˇ tiˬ poˆ paˇ ehˇ-eu ma. Tsawˇ haˬ kʼoeˇ gʼaˬ-ahˇ Baˬlaˬdiˇsuˆ miˇ kʼahˬ-ahˇ bi ciˬ daˆ keuˆ-euˬ ngaˇ siˬ nya ma. (Heu hmˬ kʼawꞈ, gaˇ kawˆ kʼoeˇ maˇ maˇ ni pyeuꞈ dzeuˇ yaꞈ-euˬ jeˬ ngeuˇ-eu maˬ siˬ. Yaw sahˇ laꞈ kʼoeˇ ya siˬ ya mawˇ-euˬ jeˬ pyeuꞈ-eu maˬ siˬ. Ngaˬ-ahˇ maˬ ehˇ duˬ nya nya. Miˬyehˇ tiˬ gʼaˬ tehꞈ-ehˇ siˬ duˬ-eu meh.) 4Kʼoeˇ gaˇ, tsawˇ haˬ zaˬ maˬ ehˇ mehˬ nya-eu maˬ ja doˆ peuˬ-eu jeˬ-ahˇ, tsawˇ haˬ kʼoeˇ gʼaˬ ya gaˬ-euˬ meh. 5Kʼoeˇ miˇ neh, tsawˇ haˬ kʼoeˇ gʼaˬ-euˬ gaˇ kawˆ ja-eu maˬ ngeuˇ naˇ, ngaˬ-euˬ gaˇ kawˆ ngaˇ kʼahˬ sehˇ maˬ paˇ jehˆ ma. 6Ngaˇ kʼahˬ sehˇ jehˆ mawꞈ lawˬ naˇ kʼawꞈ, aˬ dzawˬ aˇ gah miˇ neh maˬ ngeuˇ. Aˬ jeˬ miˇ neh ehˇ naˇ, ngeuˇ gaˇ keuˆ ni tehꞈ-ehˇ jehˆ-eu ma. Ehˇ kʼawꞈ, ngaˇ kʼahˬ sehˇ maˬ jehˆ. Aˬ jeˬ miˇ neh ehˇ naˇ, ngaˬ neh mˇ-euˬ jeˬ-ahˇ ya mawˇ-awˇ ngaˬ neh ngehˬ-euˬ dawˬ-ahˇ ya gaˬ-euˬ uˬ taꞈ-ehˇ, tsawˇ haˬ tiˬ gʼaˬ-iˬ ngaˬ-ahˇ maˬ bi noeˬ huiˬ mawꞈ nya.

7Yaw sahˇ laꞈ kʼoeˇ pah mehˬ nehˬ laꞈ-euˬ gʼawˬ mya jeˬ-ahˇ ngaˇ ya mawˇ-euˬ baˬ da neh, ngaˇ nui ma maˬ ya huiˬ maˬ ya mahˇ ni, ngaˬ-euˬ shiˬ shaˬ jiˇ gʼawˇ mawˇ-ahˇ daˇ ceh tsawˆ ahˇ nehˬ laꞈ-euˬ meh. Kʼoeˇ-aˬ, ngaˇ nui ma maˬ ya huiˬ maˬ ya mahˇ ni nehꞈ Saˬdaˬ-euˬ gʼaˬ kʼehˇ neh ngaˬ-ahˇ kʼehˬ nehˬ kʼaˆ nehˬ laꞈ-euˬ jeˬ pyeuꞈ-eu meh. 8Shaˬ zahˬ kʼoeˇ yuˇ dzeh nehˬ laꞈ-eu gʼaˇ duˬ, smˬ poˆ keuˆ ni Sahˬpaˬ Yeˬsuˇ-ahˇ ngaˇ shaˇ-euˬ ma. 9Ehˇ kʼawꞈ, aˬ yawꞈ ngaˬ-ahˇ ehˇ-eu, “Ngaˬ-euˬ guiˬ lahˬ yaw dzahˇ nawˬ-euˬ gʼaˇ duˬ loꞈ luꞈ meh. Aˬ jeˬ miˇ neh ehˇ naˇ, nawˇ gʼaˬ baˬ luꞈ ngeh, ngaˬ-euˬ baoˬ nawˬ-euˬ gʼaˇ duˬ byah dzehˬ-eu meh.” Ka li-euˬ baoˬ ngaˬ-ahˇ haw piˇ nehˬ laꞈ nya ni, ngaˇ gʼaˬ baˬ-eu gaˇ kawˆ laˬ kʼaˬ cehˇ cehˇ-ehˇ kʼahˬ sehˇ jehˆ ma. 10Kʼoeˇ miˇ neh, gʼaˬ baˬ-eu jeˬ, yehˬ bawˬ sehˇ lu-ehˇ gʼeh nehˬ laꞈ-eu jeˬ, shaˬ-eu zahˬ-eu jeˬ, kʼehˬ-eu kʼaˆ-eu jeˬ, nui ma shaˬ zahˬ ya mˇ-eu jeˬ, heu deuˬ-ahˇ Ka li gʼaˇ duˬ ngaˇ laˬ kʼaˬ cehˇ cehˇ-ehˇ daˬ-eu ma. Aˬ jeˬ miˇ neh ehˇ naˇ, ngaˇ gʼaˬ baˬ-eu kʼoeˇ-aˬ, gʼaˬ kʼaˆ-eu jeˬ pyeuꞈ-eu ma.

Gawˇliˬtu Ka li zaˬ deuˬ gʼaˇ duˬ Pawˇluˆ nui ma keuˆ-eu

11Ngaˇ aˬ dzawˬ aˇ gah-euˬ dawˬ ngehˬ la. Kʼoeˇ loꞈ-ehˇ ngehˬ ni naw maꞈ neh teh suꞈ nehˬ laꞈ-euˬ meh. Naw maꞈ ngaˬ-ahˇ noeˬ muiˬ nehˬ laꞈ paˬ-ehˇ gʼeh-eu meh. Ngaˇ-aˬ, gaˇ dahˇ tsoeˬ leˇ-eu tsawˇ haˬ maˬ ngeuˇ kʼawꞈ, naw maꞈ-euˬ huiˬ dzehˬ mahˇ dzeuˬ-eu gʼaˬ kʼehˇ kʼoeˇ deuˬ taꞈ-ehˇ tiˬ pawꞈ-iˬ maˬ nyiˇ teˬ. 12Ngaˇ maˇ maˇ ni gʼaˬ kʼehˇ pyeuꞈ-eu gaˇ kawˆ bi siˬ bi mawˇ duˬ-euˬ zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ-ahˇ, nui ma gʼawˬ mahˇ ni taˬ-eu laꞈ kʼoeˇ naw maꞈ-ahˇ mˇ mehˬ-euˬ ma. 13Pyuˇ shuiˇ caw ba nehˬ laꞈ lehˇ naw maꞈ-ahˇ ngaˇ maˬ shaˇ-euˬ kʼoeˇ tiˬ jeˬ maˬ ngeuˇ naˇ, Ka li zaˬ aˇ muˇ nui deuˬ-ahˇ naˆ maˬ tseˇ naw maꞈ-ahˇ ngaˬ neh jahˇ doeˇ nehˬ-euˬ aˬ jeˬ jaˆ ta. Ehˇ kʼawꞈ, ngaˬ-euˬ yaw lehˬ-ahˇ aˬ joˆ-ehˇ gʼeh-awˇ neh kʼawꞈ iˬ baˇ tiˬ poˆ pyehˬ nehˬ laꞈ lehˇ shaˇ-eu ma.

14Ngaˇ naw maꞈ jawˇ gaˇ smˬ poˆ tiˬ poˆ oeˇ-eu lehˇ lehˬ hmˬ dah taˬ-euˬ ma. Naw maꞈ-ahˇ ngaˇ tiˬ jeˬ-iˬ maˬ shaˇ. Aˬ jeˬ miˇ neh ehˇ naˇ, ngaˇ geuꞈ mawꞈ-eu-aˬ, naw maꞈ ma. Naw maꞈ-euˬ pyuˇ shuiˇ maˬ ngeuˇ. Zaˬ deuˬ-aˬ, aˬ da aˬ ma gʼaˇ duˬ pyuˇ shuiˇ maˬ ya poˆ-a. Aˬ da aˬ ma tehꞈ-ehˇ zaˬ deuˬ gʼaˇ duˬ pyuˇ shuiˇ ya poˆ-eu meh. 15Ngaˇ kʼaˇ jaˆ-eu jeˬ dawˬ tawˆ luꞈ hawˇ-eu ngaˬ-euˬ gʼawˇ mawˇ dawˬ tawˆ luꞈ, naw maꞈ-ahˇ caw ba-eu gʼaˇ duˬ laˬ kʼaˬ tiˬ cehˇ damˬ-eu ma. Ngaˇ naw maꞈ-ahˇ gaˬ dui dui-eu miˇneh naw maꞈ ngaˬ-ahˇ ui cuiˆ tehꞈ-ehˇ gaˬ te loˇ.

16Ngaˬ-euˬ gʼaˇ duˬ naw maꞈ-ahˇ maˬ bi shaˬ-aˬ lehˇ ehˇ gaˇ keuˆ ni naw maꞈ nui ma tsaˬ tehꞈ-a. Ehˇ kʼawꞈ, naw maꞈ tiˬ gʼaˬ na ngaˬ neh yaw gahˇ zmˬ-awˇ naw maꞈ-ahˇ kʼmˇ paꞈ-euˬ nya lehˇ ehˇ tehꞈ-a. 17Ngaˇ naw maꞈ jawˇ gaˇ tsawˇ haˬ kʼehˇ gʼeh leꞈ-awˇ mehˇ shuiˇ shuiˇ dzaˬ-euˬ jaˆ ta loˇ. 18Tiˇtuˆ-ahˇ naw maꞈ jawˇ gaˇ iˇ-eu gʼaˇ duˬ ngaˇ shaˇ-awˇ, aˬ yuiꞈ aˬ nyiˇ Ka li zaˬ kʼoeˇ gʼaˬ-ahˇ aˬ yawꞈ nehˬ-ehˇ bi oe caw-euˬ ma. Tiˇtuˆ naw maꞈ-ahˇ mehˇ shuiˇ shuiˇ dzaˬ le-euˬ nga lehˇ ehˇ mawꞈ-eu nya loˇ. Tiˇtuˆ nga nyaꞈ nui ma tiˬ gaˇ taꞈ-awˇ, kuiˇ toꞈ tiˬ gaˇ ciˬ-euˬ maˬ ngeuˇ-a loˇ.

19Naw maꞈ-euˬ mehˬ shi nga maꞈ yawˬ haˇ yawˬ ha ja muiˬ-eu nga lehˇ tehꞈ-ehˇ naw maꞈ noeˬ luꞈ te loˇ. Gaˬ-eu aˬ yuiꞈ aˬ nyiˇ deuˬ-oˇ, kʼoeˇ loꞈ-ehˇ maˬ ngeuˇ. Miˬyehˇ-euˬ mehˬ shi Ka li bi ngehˬ mawꞈ-eu dawˬ tehꞈ-ehˇ nga maꞈ ngehˬ-awˇ, nga maꞈ kʼaˇ mˇ kʼaˇ shaˇ-euˬ jeˬ dawˬ tawˆ luꞈ, naw maꞈ bi huiˬ bi mahˇ laˇ-eu gʼaˇ duˬ tehꞈ-ehˇ pyeuꞈ-eu ma. 20Ngaˇ naw maꞈ jawˇ gaˇ oe keuˆ ngeh, ngaˇ bi dehꞈ mawꞈ-eu loꞈ-ehˇ naw maꞈ maˬ dehꞈ-ehˇ, naw maꞈ bi dehꞈ mawꞈ-eu loꞈ-ehˇ ngaˇ maˬ dehꞈ ni pyeuꞈ-iˇ gaˇ kʼahˬ lahˇ miˇ-a. Iˬ dehˬ iˬ ceh doˆ-eu, tiˬ gʼaˬ tiˇ gʼaˬ myaˆ naˆ-eu, nui ma pehˇ-eu, yawˬ ha gʼaˇ duˬ tehꞈ-ehˇ toˆ-eu, aˬ cawˬ-ahˇ dawˬ doeˇ ngehˬ daˆ-eu, aˬ cawˬ gaˇ kawˆ ja bu ja doeˇ-eu, nui ma huiˬ-eu mahˇ-eu, aˇ muˇ muˇ-awˇ suˬ saˬ-eu laꞈ kʼoeˇ lawꞈ gʼa-eu, heu deuˬ-ahˇ ya mawˇ-eu baw le lehˇ ngaˇ kʼahˬ lahˇ miˇ-a. 21Ngaˇ paˇ oe ngeh, ngaˬ-euˬ Miˬyehˇ ngaˬ-ahˇ naw maꞈ-euˬ mehˬ shi tiˬ poˆ paˇ bi shaꞈ dawˇ laꞈ-awˇ, dzeuˇ laˇ ngeh maˬ muiˬ maˬ shawˇ-eu jeˬ hawˇ-eu maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu jeˬ mˇ-euˬ tsawˇ haˬ deuˬ iˬ baˇ maˬ noeˬ poˆ-ehˇ jawˇ-eu baˬ da neh ngaˇ myaˆ biˇ ya doˆ le gaˇ kʼahˬ lahˇ dui dui nya.

Currently Selected:

2 Gawˇliˬtu 12: AHK

Highlight

Copy

Compare