MATIUS 17
17
Pinoinggayo i Yesus
(Mar. 9.2-13, Luk. 9.28-36)
1Tontok#2Pt. 1.17-18 dit onom o tadau do mantad diri, om angatai no di Yesus i Pitrus om i Yakub om i Yohanis i tobpinai di Yakub, do minongoi dot id iso' o nuluhon dit akawas, dot iyolo-yolo'. 2Om kosimban noddi o korupa-rupao' di Yesus di maso diyolo'd poingontong dau. Rabas nopoddi di Yesus nga' iyo pod tadau tu' mogulinau, om i pakayan dau nga' kosorong tomod o kopurako'. 3Om kokito no di tolu o tumatanud di Yesus, i Musa om i Ilia do monokiboro-boros di Yesus. 4Om boros kaddi di Pitrus dot id di Yesus, “Tuhan, osonong no kopio do hiti toko'. Ondung orohian ko, oi Tuhan, om popowonsoi oku do tolu o kiim do hiti: iso' o diya', oi Tuhan, om iso' o di Musa, om iso' o di Ilia,” ka dau.
5Nga'#Kwn. 22.2, Sin. 2.7, Yos. 42.1, Mat. 3.17, 12.18, Mar. 1.11, Luk. 3.22, Pnu. 18.15 maso po di Pitrus do moro-boros om kokulumutai no iyolo'd haun di mogulinau tomod, om haro'ddi o minomoros do mantad id haun diri do poingkaa, “Iti no i Tanak ku di kosianan kopio ku. Iyau no i kohubayaan do ginawo ku. Om pokinongou kou no dau!” ka.
6Om soira'ddi norongou di tumatanud di Yesus i boros diri, om nongooris tomod diri iyolo' gisom do kongotungub nopo iyolo' do hiri'd tana'. 7Nga' rikot no i Yesus do minongoi pangama' diyolo'. Om boros ka dau, “Ingkakat kou! Kada' kou kooris!” ka dau. 8Om hangog noddi iyolo', om aiso' no o nokito diyolo', do suwai ko' i Yesus poo.
9Om di nopoddi ruminuhuk iyolo' di nuluhon, om bilinai no di Yesus iyolo' do poingkaa, “Kada' dokoyu posunudo' dot id disai nopo i nokito dokoyu di tiinu'ddi, dot a' po apasi kawagu o Tanak do Tulun do mantad id kapatayon,” ka dau.
10Om#Mal. 4.5 uhoto' no di tumatanud di Yesus i Yesus, boros ka diyolo', “Nokuro tu' i Ilia po o mogulu'd rumikot, ka di guru do Tourat?” ka.
11Om boros ka di Yesus do suminimbar, “Atantu' no do rumikot i Ilia om iyau no o posodia' do koinsanai'd nunu nopo. 12Nga'#Mat. 11.14 poboroson ku dot id dokoyu, do nokorikot no i Ilia, nga' a' i' iyau notutunan do tulun, om wonsoyo' nopo diyolo' dot id dau o nunu nopo i korohian diyolo'. Om iyo nogiddi o wonsoyon diyolo' dot id Tanak do Tulun,” ka dau.
13Om kongosuhut noddi i tumatanud di Yesus dot i Yohanis Gampamatis o komoyon di Yesus diri.
Minomolingos i Yesus do Tanak di Norusadan do Rusod dot Araat
(Mar. 9.14-29, Luk. 9.37-43a)
14Om soira'ddi guminuli' i Yesus om i tolu o tumatanud dau'ddi do hiri'd tulun dot ogumu', om rikot no o songulun o kusai do minongoi otud dot id toguang di Yesus. 15Om boros ka di kusai, “Tuan, kosianai no di tanak ku, tu' kakaran#17.15 Kakaran: ko' bolintuongon, ko' tahahadan. Antangan o Kamus. iyau. Om adalaan no kopio o toruol dau gisom dot asaru' no iyau do kosubo dot id tapui om asaru' nogi' dot aratu' dot id waig. 16Om nakaatod ku no daa iyau dot id tumatanud nu nga' a' i' iyolo' nokolingos dau,” ka dau.
17Om boros ka di Yesus, “Atuuk ku dokoyu'dti! Sumansala' kou no kopio iyokoyu om a' otumbayaan. Songkuro po tuu o koloido' ku do poinsugku' kasai' dokoyu om papalanut do ginawo ku dot id dokoyu? Ngoyo' hitio' i tanak diri!” ka dau. 18Om suhuo' noddi di Yesus do sumoliwan i rusod dot araat dit id suang di tanak diri. Om soliwan noddi i rusod dot araat, om diiri i' om diiri do nolingasan i tanak.
19Om ongoi noddi i tumatanud di Yesus do hiri'd di Yesus dot iyolo-yolo', om uhoto' no diyolo' iyau. Boros ka diyolo', “Guru, nokuro tu' a' iyahai milo do minonunsub di rusod dot araat diri?” ka diyolo'.
20Om#Mat. 21.21, Mar. 11.23, 1Ko. 13.2 boros ka di Yesus do suminimbar, “A' ogirot o kotumbayaan dokoyu. Ilaai no dokoyu! Dot ondung haro o kotumbayaan dokoyu dot ongoirad nopod linsou dit okooro', om milo kou no do moro-boros dot id nulu-nulu diti do poingkaa, ‘Undaliu do mantad hiti om ongoi'd hiilo',’ ka, om atantu' no do mundaliu no kopio ilo nulu-nulu. Iso' po nga' aiso' i' ot a' dokoyu milo'd wonsoyon! 21[Nga' rusod nopod araat do miagal diti om sambayang poo om puasa o kosunsub,]” ka dau.#17.21 Haro o piro-piro solinan do popooput diti ayat 2. Antangan o Mar. 9.29.
Pinoboros kawagu di Yesus i Kapatayon Dau
(Mar. 9.30-32, Luk. 9.43b-45)
22Tontok di tuminimung i tumatanud di Yesus do hilo'd Galilia, om boros ka di Yesus dot id diyolo', “A' no alaid om patahakon no i Tanak do Tulun dot id kuasa'd tulun. 23Om patayon nondo iyau, nga' kotolu nopondod tadau om posion i' kawagu iyau,” ka dau.
Om tumongob tomod ngai'ddi i tumatanud dau.
Pambayar di Sukai di Walai'd Sasambayangan dot Agayo
24Tontok#Ksn. 30.13, 38.26 di nokorikot i Yesus om i tumatanud dau do hilo'd Kapornaum, om rikot no i gomponimung do sukai di Walai'd Sasambayangan dot Agayo dot id di Pitrus om ponguhot nod, “Mambayar i' i guru dokoyu do sukai di Walai'd Sasambayangan dot Agayo ko' amu'?” ka.
25Om boros ka di Pitrus do suminimbar, “Mambayar!” ka dau.
Om koguli' poddi i Pitrus om pogulu no i Yesus do minoro-boros dau. Boros ka dau, “Simun, poingkuro o diya'd tosorou? Isai tuu it apatut do mambayar do lisin ko' sukai dot id raja' do pomogunan diti? Iri tuu i rayat ko' iri po bansa'd suwai?” ka dau.
26Om boros ka di Pitrus do suminimbar, “I bansa'd suwai,” ka.
Om boros kaddi di Yesus, “Iyo nopoddi, om rayat nopo om a' i' minog do mambayar. 27Nga' iyo piya'ddi nga' kada' to i' potogodo' iyolo'. Nga' ongoi pangapon do hilo'd tasik. Om onuon no i sada' dit id gulu nu kaapon. Om okito nu nondo o tusin do hiri'd kabang di sada' do kabagal do pambayar to di sukai do koontok dato. Om onuon no i tusin om patahakon no dot id diyolo' do pambayar to di sukai to di Walai'd Sasambayangan dot Agayo,” ka dau.
Currently Selected:
MATIUS 17: BDK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2007, Pertubuhan Bible Malaysia Copyright © 2007, Bible Society of Malaysia
