YOHOSKIOL 8

I PINOINTALANG DO KOINDUWO DOT ID DI YOHOSKIOL DO PASAL DO KINOROHINGAN

8.1—10.22

I Modsubak do Tingolig do Hilo'd Yorusalim

1Tontok di tadau'd kolimo di tulan do koonom, di koonom do toun dahai dot id pomogunan do pisangod, om songirikau ngai' iyahai di piro-piro o boyoon do Yohuda di nangatanggayan do pisangod do hiri'd walai ku. Om sigog i' do porintao' oku di Rusod do Tuhan, it Asawat Kopio. 2Tingaha'#Ykl. 1.27 oku no om kokito ku o koiyo-iyo'd tulun dot id suang do pinointalang. Mantad nopod hiri'd tawak dau om gisom do hiri'd siriba' om miagal pod tapui o kokitanan, om mantad nod hiri'd tawak om gisom do hiri'd sawat om mogulinau poo do miagal do tambaga' di kinisasan o kokitanan. 3Om poroloyo' no dau o koiyo-iyo'd longon om ngoyo' no gayato' o tobuk ku. Om id suang nopod pinointalang diti nga' pinoinsawat oku di Rusod do Kinorohingan om tanggayai oku no do hilo'd Walai'd Sasambayangan dot Agayo di hilo'd Yorusalim. Om pokoyoo oku no dau do hiri'd wawayaan di ponong id utara di Walai'd Sasambayangan dot Agayo. Om haro o tingolig di katagadan kopio'd Kinorohingan do hiri.

4Om#Ykl. 1.28 hilo' nod nokito kawagu ku i tulinau do kosorong kopio do popointalang do nakarapou o Kinorohingan dot Israil, do miagal nopo di nokito ku do tontok di hilo' oku'd tisan di Bawang do Kibar. 5Om boros kad Kinorohingan dot id doho', “Oi tulun, ontong ponong hilo'd utara,” ka dau. Om ontong oku no. Om kokito ku no i tingolig do katagadan kopio'd Kinorohingan do hiri'd toning di pananaraban do porsombahan dit id toning di wawayaan di suangon.

6Om boros kad Kinorohingan dot id doho', “Oi tulun, okito nu i' it osiliu do dinondo? Antangai pogi' iti piningwansayan do tulun dot Israil do hiti dit araat kopio, i moguyung diri doho' do minsodu' diti walai ku. Om haro po o tokito nu do pokitanan ku diya' dot araat ko' mantad diti,” ka dau.

7Om igitai oku no dau do hiri'd wawayaan di natad ponong id soliwan om pointongo' oku no dau do luang do hiri'd tolig. 8Om boros ka dau, “Oi tulun, raladai iti luang diti,” ka dau. Om raladai ku no iri om kokito ku no o wawayaan. 9Om boros ka dau dot id doho', “Suang pogi' om antangan i' o karaaton om i kososomu' tomod do pingwonsoyon diyolo'd hiti,” ka dau. 10Om soruang oku no om pingontong oku no. Om notongkop pod lukisan do mogisuayan o tulanut om nintorusan di sosomu'#8.10 nintorusan di sosomu': Mogodu do mangakan do piro-piro o nintorusan di natantu' do sosomu', i Tourat di Musa. om piro-piro o lukisan do tingolig di tukuon do tulun dot Israil, o hiri'd limput. 11Haro o turu' nohopod o boyoon do tulun dot Israil do hiri, om hiri nogi' i Yaasania, i tanak di Sapan. Om ongkiinigit ngai' nopo iyolo' do podtutudan do kominyan, om mogolisun tomod i kominyan. 12Om uhoto' oku nod Kinorohingan do poingkaa, “Oi tulun, okito nu no iti lisok-lisokon do tulun dot Israil do momonsoi? Sumambayang ngai' nopo iyolo' dot id bilik di noponu' pod tingolig. Om ponguwaan nopo diyolo' nga' poingkaa, ‘A' no iyahai'd Tuhan okito! Tu' notongkiadan no dau iti pomogunan diti,’ ka diyolo',” ka dau.

13Om boros kaddi do Tuhan dot id doho', “Okito nu pondo iyolo' do mingwonsoi dit araat ko' mantad dilo',” ka. 14Om pokoyoo' oku no dau do hiri'd wawayaan ponong id utara di Walai'd Sasambayangan dot Agayo om pointongo' oku no dau do tongoondu' do mogihad do kinapatayan di Tamus,#8.14 Tamus: I ponokokinorohingan di sorohon do matai do tontok di rumiou o totonomon (ko' di lumahanggang o roun do kayu), om masi nondo kawagu do sumuni kawagu i totonomon. Om pogihadan nondo di tongoondu' i kapatayon di ponokokinorohingan diti. i ponokokinorohingan diyolo'.

15Om uhoto' oku nod Tuhan, “Oi tulun, okito nu i' ilo'? Om haro po o tokito nu dit araat ko' mantad diti,” ka dau. 16Om pokoyoo' oku no dau do hiri'd natad di ponong id suang di Walai'd Sasambayangan dot Agayo. Om hilo' no dot id toning di wawayaan di sumuang di bilik dit olidang, it id pialatan di pananaraban do porsombahan om i ralan, do haro o duwo nohopod om limo o tulun. Songintolikud iyolo' di bilik dot olidang om songingotud ngai' do potimbaba' ponong id koulayon do tumuku' dot id tadau di mulai nogi'.

17Om boros kad Tuhan dot id doho', “Oi tulun, nokito nu i' iri? A' nopo apaas-paasan iti tulun do Yohuda do mingwonsoi di wowonsoyon di koindaraat tomod do miagal di nokito nu, om a' iyolo' apaasan do popintongkop do kororongit do hiti'd pomogunan. Tu' rumikot po iyolo' do hiti'd walai ku do mingwonsoi do miagal diri, gisom do monubuan po do kototogod ku. Antangai pogi' nga' magaayi-ayi' no moti' kopio iyolo' do mongindaraat doho' tu' mingwonsoi po diti kososomu' kopio.#8.17 diti kososomu' kopio: I kowoyo-woyoo' do tumuku' dot id tingolig, do kowoyo-woyoo' nopo om tumungub. 18Om opurimanan nondo diyolo' o kawagato' do kototogod ku. Om a' ku no iyolo' insianan om a' ku ompunan. Om tumotos piya daa iyolo' do popinggiak do sambayang diyolo' dot id doho' nga' a' oku no mokinongou,” ka dau.

Currently Selected:

YOHOSKIOL 8: BDK

Highlight

Copy

Compare