भजनसंग्रह 144
144
विजयको लागि परमेश्वरलाई राजाको धन्यवाद
1मेरो रक्षक, परमप्रभुको प्रशंसा गर!
उहाँले मलाई लडाइँको लागि तालिम दिनुहुन्छ
र युद्धको लागि मलाई तयार पार्नुहुन्छ।
2उहाँ मेरो रक्षक र बचाउनुहुने,
मेरो आश्रय र मुक्तिदाता हुनुहुन्छ
र आफ्नो रक्षाको लागि म उहाँमाथि भरोसा राख्दछु।
उहाँले जाति-जातिहरूलाई दमन गरेर मेरो अधीनमा गराउनुहुन्छ।
3 #
अय्यूब 7:17,18; भजनसंग्रह 8:4 हे परमप्रभु, मानिस को हो
र तपाईंले त्यसको वास्ता गर्नुहुन्छ?
मरणशील मानिसलाई किन ध्यान दिनुहुन्छ?
4ऊ एक मुट्ठी सासझैँ छ,
उसको आयु हटिजाने छायाँजस्तो छ।
5हे परमप्रभु, आकाश फारेर तपाईं ओर्लनुहोस्,
पर्वतहरूलाई छुनुहोस्
र तिनीहरूले धुवाँ निकाल्नेछन्।
6बिजुली चम्काउनुहोस् र आफ्ना शत्रुहरूलाई छिन्न-भिन्न पार्नुहोस्;
काँड हानेर तिनीहरूलाई धपाउनुहोस्।
7माथिबाट ओर्लनुहोस्,
गहिरा पानीबाट तानेर मलाई निकाल्नुहोस् र मलाई बचाउनुहोस्;
विदेशीहरूको शक्तिबाट मलाई छुटकारा दिनुहोस्।
8ती विदेशीहरूले कहिल्यै साँचो कुरा गर्दैनन्
र किरिया खाएर पनि झूटा बोल्छन्।
9हे परमेश्वर, म तपाईंलाई एउटा नयाँ भजन गाएर सुनाउनेछु,
म वीणा बजाएर तपाईंलाई भजन सुनाउनेछु।
10राजाहरूलाई तपाईंले विजय दिनुहुन्छ
र आफ्नो दास दाऊदलाई बचाउनुहुन्छ!
11मेरा निष्ठुर शत्रुहरूदेखि मलाई बचाउनुहोस्,
कहिल्यै सत्य नबोल्ने र किरिया खाएर पनि झूट बोल्ने
विदेशीहरूको शक्तिदेखि मेरो उद्धार गर्नुहोस्।
12हाम्रा छोराहरू आफ्ना जवानीपनमा बलियो भई
उम्रेका बोटहरूजस्ता होऊन्!
राजदरबारका कुना-कुनालाई सिँगार्ने खम्बाहरूजस्ता
हाम्रा छोरीहरू होऊन्!
13हाम्रा भकारीहरू हरेक प्रकारका अन्नले भरिऊन्।
हाम्रा भेडाहरूले हजारौं-हजार गरेर बच्चा ब्याऊन्।
14गाई-वस्तुहरूको गर्भ नतुहोस् र धेरै ब्याऊन्।
हाम्रा सडकहरूमा दु:ख-कष्टका हाहाकार नसुनिओस्!
15जुन देशमा यी कुराहरू सत्य भएका छन्, त्यो देश खुसी देश हो।
जसका परमेश्वर परमप्रभु हुनुहुन्छ, ती मानिसहरू खुसी होऊन्।
Currently Selected:
भजनसंग्रह 144: सरल नेपाली
Highlight
Share
Copy
Want to have your highlights saved across all your devices? Sign up or sign in
Simple Nepali Holy Bible © Nepal Bible Society, 2008.
