Pelandai Solomon 7
7
Ku Lelaki
1Naka meh pemanah gaya kaki nuan bekasut,
O indu ke udu bajik!
Pah nuan baka batu ti berega
ti ditempa orang ke landik engkebang.
2Pusat nuan baka mangkuk
ti nadai kala enda ngundan wain ti udah dichampur.
Perut nuan baka tugung gandum
ti dikelingi bungai bakung.
3Tusu nuan baka dua iku anak rusa,
baka dua iku kijang.
4Rekung nuan baka menara ti digaga ari gading.
Mata nuan baka letung ti di nengeri Hesbon,
semak pintu Batrabim.
Idung nuan baka menara Lebanon
ti ngayung nengeri Damaskus.
5Pala nuan baka Bukit Karmel
lalu buk nuan kepai-kepai baka kain ungu
ti narit ati raja.
6Naka meh pemanah enggau pemajik gamal nuan
O ambai ke pemadu bajik!
7Raras tubuh nuan manah baka batang kayu engkerema,
lalu tusu nuan baka tangkai buah iya.
8Aku deka niki kayu engkerema nya
lalu ngambi buah iya.
Dipeda aku tusu nuan baka tangkai buah anggur,
lalu kesuh seput nuan bebau rengut baka buah epal,
9lalu mulut nuan baka wain ti pemadu manah.
Indu
Enti pia awakka wain nya rarat terus ngagai ambai aku,
rarat ngagai mulut enggau ngeli iya.#7.9 mulut enggau ngeli iya; Hebrew: mulut orang ke tinduk
10Aku endang enggi ambai aku, lalu iya endang inginka aku.
11Datai kitu meh nuan O sulu aku. Aram tua mupuk ngagai menua pesisir
lalu bemalam ba sebelah genturung pendiau.#7.11 genturung pendiau; Tauka: padang
12Tua deka dani tumu pagi lalu meresa batang anggur,
deka meda enti sida udah belabuh bekantuk
deka meda enti bungai anggur udah ngerembai
lalu kayu delima udah bebungai.
Dia ila baru aku deka ngayanka pengerindu aku ke nuan.
13Nuan ulih ensium bau jayau,
lalu semua buah ti manah bisi semak mua pintu tua.
O wai sulu, aku udah nyimpan ke nuan
pengerindu ti lama enggau pengerindu ti baru.
Currently Selected:
Pelandai Solomon 7: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
