Pelandai Solomon 5
5
Ku Lelaki
1Aku udah tama ngagai kebun aku,
O ambai enggau bini aku.
Aku benung ngumpul rempah enggau mur aku.
Aku benung makai ai manyi enggau idang manyi.
Aku benung ngirup wain enggau ai tusu.
Ku Bala Indu Ti Bukai
Makai meh kita, O bala ambai, lalu ngirup
datai ke kita nyau mabuk laban pengerindu!
Lagu Ti Keempat
Ku Indu
2Lebuh aku tinduk, ati aku mengkang dani.
Aku bemimpi ninga ambai aku nekung pintu.
Ku Lelaki
Awakka aku tama, O wai sulu
ambai aku, burung achang aku.
Pala aku nyau basah laban ambun,
lalu buk aku nyau basah laban bias ujan.
Ku Indu
3Aku baru udah muka gari aku,
nya alai nama kebuah aku enda tau enda begari baru?
Aku udah masu kaki aku,
nya alai nama kebuah aku enda tau enda ngamahka kaki aku baru?
4Ambai aku megai pintu,
lalu ati aku gaga laban iya nyau semak.
5Aku sedia deka ngasuh iya tama.
Jari aku dibalut mur
tunjuk aku dibalut ai mur,
lebuh aku megai gagang pintu.
6Aku muka pintu ke ambai aku,
tang iya udah nadai agi dia.
Naka meh pengingin aku deka ninga nyawa iya!
Aku ngiga iya, tang nadai tetemuka iya.
Aku ngangauka iya, tang nadai ninga iya nyaut.
7Orang ke nyaga nengeri tetemuka aku.
Sida malu aku, lalu tubuh aku rajai.
Bala jejaga ke ba kuta nengeri ngerampas tungguk pala aku.
8Besemaya meh kita enggau aku, kita indu Jerusalem,
enti kita tetemuka ambai aku,
padahka ngagai iya, aku nyau lembut tulang inginka iya.
Ku Bala Indu
9Nuan indu ke pemadu bajik,
kati ambai nuan lain agi ari semua orang bukai?
Nama utai ti manah ba iya
ti ngasuh kami patut besemaya enggau nuan?
Ku Indu
10Ambai aku sigat sereta kering.
Ari sepuluh ribu iku lelaki, ka semina siku aja ti baka iya.
11Mua iya baka emas tulin,
lalu buk iya ngelegetang,
chelum baka bulu burung kak.
12Mata iya manah baka burung achang ti ba tebing sungai,
burung achang ti dibasu ngena ai tusu, ti bediri ba tebing sungai.#5.12 ti bediri ba tebing sungai; Enda terang dalam Hebrew
13Kuyu iya manah baka kebun
ti penuh laban sayur enggau rempah.
Mulut iya baka bungai bakung,
basah laban ai mur.
14Jari iya manah raras,
lalu iya ngena tinchin ti nyangkum batu ti berega.
Tubuh iya baka gading ti alus,#5.14 baka gading ti alus; Enda terang dalam Hebrew
ti nyangkum batu nilam.
15Pah iya baka tiang batu marmar ti burak
ti diengkah dalam sangkum emas.
Iya baka raja, baka Bukit Lebanon
ti ngundan kayu sidar ti tinggi.
16Mulut iya manis disium.
Semua utai ba iya narit ati aku magang.
Nya meh gaya ambai aku,
indu Jerusalem.
Currently Selected:
Pelandai Solomon 5: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
