Matthew 13
13
Jaku Sempama Pasal Penabur Benih
(Mark 4.1-9; Luke 8.4-8)
1Ba hari nya mega Jesus pansut ari rumah lalu duduk ba tebing danau. 2#Luk 5.1-3. Mayuh amat orang begelumu ngelingi Iya. Nya alai Iya nepan sebuah perau, lalu nudukka Diri dia, lalu bala orang mayuh bediri ba tebing. 3Iya lalu madahka mayuh macham utai ngagai sida ngena jaku sempama. Ku Iya, “Orang siku naburka benih. 4Lebuh iya naburka benih, sekeda leka benih nya labuh ba jalai raya. Burung datai, lalu makai benih nya. 5Sekeda labuh ba tanah ti bebatu ti nadai mayuh tanah, lalu leka benih nya matuk tekala nya, laban tanah dia mabu, 6tang lebuh mata panas niki, sida kena panchar mata panas nya lalu layu laban sida nadai urat. 7Leka benih ti bukai labuh ba madang duri, lalu duri nya tumbuh lalu ngalahka sida. 8Benih ti bukai labuh ba tanah ti ami, lalu bebuah, sekeda mansutka seratus, sekeda enam puluh, lalu sekeda tiga puluh.
9Awakka orang ke bisi pending, ninga.”
Tuju Ngena Jaku Sempama
(Mark 4.10-12; Luke 8.9-10)
10Udah nya sida murid datai lalu bejaku enggau Iya, “Nama kebuah Nuan bejaku ngagai sida ngena jaku sempama?”
11Ku Iya nyaut sida, “Kita udah diberi penemu pasal misteri#13.11 Tauka: resia Perintah serega, tang penemu nya apin diberi ngagai sida. 12#Mat 25.29; Mrk 4.25; Luk 8.18; 19.26. Laban orang ke bisi utai, deka diberi mayuh agi, lalu iya deka ngembuan mayuh agi utai, tang orang ke nadai utai, indah utai ti mimit ti dikemisi iya deh deka dirampas ari iya. 13Nya kebuah Aku bejaku ngagai sida ngena jaku sempama, ngambika sida merening, tang enda meda, mending, tang enda ninga tauka mereti. 14#Isa 6.9-10 (Septuagint). Ba sida tu meh jaku nabi Isaiah dikamatka:
‘Kita amat deka mending, tang enda mereti,
lalu kita amat merening, tang enda meda.
15Laban sida enda nemu berunding,
lalu pending sida bengal,
lalu sida udah nutup mata sida,
enggai ke sida meda ngena mata sida,
lalu ninga ngena pending sida,
lalu mereti ngena ati sida,
lalu nguingka diri ngagai Aku,
lalu Aku ngeraika sida.’
16 #
Luk 10.23-24; Jhn 8.56; Heb 11.13; 1 Pet 1.10-12. “Tang beberekat meh mata kita, laban sida meda, enggau pending kita, laban sida ninga. 17Enggau bendar Aku madah ngagai kita, mayuh nabi enggau orang ke lurus ingin deka meda utai ti dipeda kita, tang nadai meda utai nya, lalu ingin deka mendingka utai ti dipendingka kita, tang nadai ninga utai nya.
Jesus Nerangka Reti Jaku Sempama Penabur Benih
(Mark 4.13-20; Luke 8.11-15)
18“Nya alai pendingka sempama penabur benih. 19Lebuh orang ninga pesan pasal Perintah Allah Taala, lalu enda meretika pesan nya, Sitan datai lalu ngerampas utai ti udah ditaburka ngagai ati orang nya. Nya meh leka benih ti labuh ba jalai raya.
20Nyadi benih ti labuh ba tanah ti bebatu nya orang ke ninga pesan nya lalu tekala nya nerima iya enggau ati ti gaga. 21Tang iya nadai urat, lalu semina tan enda lama aja. Lebuh iya dituntung penusah tauka pemerinsa ketegal pesan nya, iya lalu tekala nya mungkir.
22 #
Mat 19.23; 1 Tim 6.9-10, 17. Benih ti labuh ba madang duri nya orang ke ninga pesan nya, tang pengangkun iya ke dunya, enggau ke pengaya ngalahka pesan nya, lalu pesan nya enda ulih bebuah.
23Nyadi benih ti labuh ba tanah ti ami nya orang ke ninga pesan nya, lalu meretika iya. Iya lalu bebuah, siku seratus leka, siku enam puluh, lalu siku tiga puluh.”
Sempama Pasal Rumput
24 #
Mrk 4.26-29. Jesus madahka siti agi jaku sempama ngagai sida. Ku Iya, “Perintah Allah Taala tau dibandingka enggau orang siku ke nanam leka benih ti manah ba umai iya. 25Tang lebuh iya tinduk, munsuh datai lalu nanam leka rumput ba madang gandum nya, lalu mupuk ari endur nya. 26Nya alai lebuh gandum nya tumbuh, lalu murai, rumput mega pegari. 27Bala orang gaji iya datai lalu bejaku ngagai iya, ‘Tuan, ukai enda nuan naburka benih ti manah ba umai nya? Nama kebuah umai nya bisi rumput?’ 28Ku tuan nya nyaut, ‘Nya utai dikereja munsuh.’ Lalu ku sida bejaku ngagai iya, ‘Kati nuan deka ngasuh kami nyabut rumput nya?’ 29Tang ku iya nyaut, ‘Anang, enggai ke kita techabutka gandum lebuh kita nyabut rumput. 30Awakka gandum enggau rumput nya sama tumbuh nyentuk ngagai maya ngetau. Lebuh maya ngetau ila aku deka bejaku enggau orang ke ngetau, ngasuh sida ngumpul rumput nya dulu, nanchang lalu nunu rumput nya, lalu nyimpan gandum dalam setor aku.’ ”
Jaku Sempama Pasal Leka Mustard
(Mark 4.30-32; Luke 13.18-19; Matthew 17.20)
31Jesus madahka siti agi jaku sempama ngagai sida. Ku Iya, “Perintah serega nya baka igi mustard#13.31 mustard; Tu ukai ensabi tang siti bansa kayu ti tumbuh ngagai kira 3 meter peninggi. ti dibai orang siku, lalu ditanam iya ba umai iya. 32Igi mustard nya leka ti pemadu mit ari semua leka utai, tang lebuh iya udah tumbuh, puchuk iya besai, lalu iya nyadi kayu, datai ke burung nyau begagaka tansang ba sebelah dan iya.”
Jaku Sempama Pasal Ragi
33 #
Luk 13.20-21; Gal 5.9; P-kal 18.6. Jesus madahka siti agi jaku sempama ngagai sida. “Perintah serega nya baka ragi ti diambi siku indu lalu dichampurka iya enggau empat puluh liter tepung, datai ke semua tepung nya nyau kembai magang.”
Jesus Bejaku Ngena Jaku Sempama
(Mark 4.33-34; John 10.6; 16.25)
34Semua utai nya dipadahka Jesus ngagai orang mayuh#13.34 Tauka: orang Judah ngena jaku sempama. Iya enda nyebut utai ngagai sida enti enda ngena jaku sempama. 35#Mas 78.2. Tu ngamatka jaku ti udah disebut beseruanka siku nabi:
“Aku deka bejaku ngena jaku sempama,
Aku deka nyebut pasal utai ti udah dilalaika kenyau ari penumbuh dunya.”
Jesus Nerangka Jaku Sempama Pasal Rumput
36Udah nya Iya ninggalka orang mayuh, lalu pulai ke rumah. Sida murid Iya lalu datai ngagai Iya, ku sida, “Padahka ngagai kami reti sempama pasal rumput ti ba umai nya.”
37Ku Jesus nyaut, “Orang ke naburka benih ti manah nya Anak Mensia. 38#Jhn 8.44; 1 Jhn 3.10. Umai nya dunya tu, lalu benih ti manah nya nembiak Perintah Allah Taala. Rumput nya nembiak Sitan, 39lalu munsuh ke nanam leka rumput nya Sitan. Maya ngetau nya pengujung dunya, lalu orang ke ngetau nya bala melikat. 40Baka rumput ti digumpul lalu ditunu, baka nya meh gaya utai ti deka nyadi lebuh pengujung dunya: 41#Mat 24.31. Anak Mensia deka ngirumka bala melikat Iya, lalu sida deka muai ari Perintah Iya semua utai ti ngasuh bedosa, enggau semua orang ke ngereja penyai, 42#Mat 13.50; 8.12; 22.13; 24.51; 25.30; Luk 13.28. lalu nikauka sida ngagai serumbung api, alai orang deka nyabak sereta begerit ngeli. 43#[2] Esr 7.27. Udah nya baru orang ke lurus deka manchar baka mata hari dalam Perintah Apai sida. Awakka orang ke bisi pending, ninga.
Jaku Sempama Pasal Reta Ti Dilalaika
44“Perintah serega mega baka reta ti berega ti dilalaika dalam sebidang tanah, ti ditemu orang siku lalu dilamun iya baru. Enggau ati ti gaga iya mupuk lalu nyual semua reta iya, lalu meli tanah nya.”
Jaku Sempama Pasal Batu Ti Berega
45“Perintah serega mega baka siku orang dagang ke begigaka batu mutiara ti manah. 46Iya tetemuka sigi batu mutiara ti berega amat, mupuk lalu nyual semua reta iya, lalu meli batu mutiara nya.
Jaku Sempama Pasal Jala
47 #
Mat 13.40-42. “Perintah serega mega baka jala ti ditibarka ngagai danau, lalu bulih semua macham ikan. 48Lebuh jala nya nyau penuh laban ikan, orang lalu narit jala nya ke tebing, duduk lalu nyimpan ikan ti manah dalam bakul, tang muai ikan ti enda manah. 49Baka nya meh gaya utai ti deka nyadi lebuh pengujung dunya. Bala melikat deka datai lalu nyeraraka orang ke jai ari orang ke lurus, 50lalu nikauka sida ke jai ngagai serumbung api, alai sida deka nyabak sereta begerit ngeli.
51“Kati kita meretika semua utai tu?”
“Mereti,” ku sida nyaut.
52Lalu ku Iya bejaku ngagai sida, “Nya alai semua pengajar Adat ti udah dilatih bekereja ke Perintah serega nya baka orang ke bempu rumah, ke mansutka ari setor iya utai ti baru, enggau utai ti lama.”
Jesus Enda Diterima Di Nasaret
(Mark 6.1-6; Luke 4.16-30)
53 #
Mat 7.28; 11.1; 19.1; 26.1. Lebuh Jesus udah tembu madahka semua jaku sempama nya, Iya lalu mupuk ari endur nya. 54#Mrk 6.1-6; Luk 4.16-30. Lebuh Iya datai ba menua Iya Empu, Iya ngajar orang mayuh dalam balai gempuru. Sida alit ati ke Iya lalu ku sida bejaku, “Dini alai orang tu bulih penemu-dalam tu, enggau kereja ajih tu? 55Ukai enda Iya tu anak tukang kayu? Ukai enda indai Iya benama Maria? Lalu ukai enda Iya tu menyadi James, Josep, Simon enggau Judas? 56Ukai enda semua menyadi indu Iya bisi ditu enggau kitai? Nya alai dini alai Iya bulih semua utai tu?” 57#Jhn 4.44. Nya alai sida nulak Iya. Tang ku Jesus bejaku ngagai sida, “Nabi endang dibasa orang, kelimpah ari di menua enggau dalam ruang bilik iya empu.” 58Lalu Iya nadai ngereja mayuh kereja ajih dia, laban sida enda arap.
Currently Selected:
Matthew 13: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia