Jop 38
38
TUHAN Nyaut Jop
1Udah nya TUHAN lalu bejaku ngagai Jop ari biaubalai nya.
Ku TUHAN
2“Sapa nuan nya ti berani betanyaka penemu-dalam ari Aku,
ngena jaku ti beli sereta kusung?
3Bediri terit
lalu saut tanya Aku.
4Kati nuan bisi dia lebuh Aku ngaga dunya?
Enti nuan amat mayuh penemu, padahka nya ngagai Aku.
5Sapa ngeletak pemesai dunya?
Sapa nerantingka tali kena nyukat pemesai dunya?
Kati nuan nemu semua saut ke semua tanya nya?
6Nama utai ti ngasuh tungkat dunya bediri?
Sapa nudukka batu pemun dunya?
7 # [2]
Bar 3.34. Pagi nya, semua bintang belagu sama sereta,
lalu bala orang serega#38.7 bala orang serega; Peda 1.6 manjung gaga ati.
8 #
Jer 5.22. Sapa nikupka pintu kena nagang ai tasik masuk#38.8 nagang ai tasik masuk: Peda 26.12
lebuh ai nya pansut ari pusat dunya?
9Aku tu ke mungkur tasik ngena mua hari
lalu mungkus iya ngena pemetang.
10Aku tu ke ngeletak garis entara darat enggau tasik
lalu nagang ai tasik tama nengah pintu ti bekalang.
11Ku Aku bejaku enggau ai tasik, ‘Naka tu aja! Anang ngelui tu!
Gelumbang nuan ti balat enda tau ngalun ngelui tu.’
12Jop, kati nuan, dalam sepemanjai umur nuan, bisi udah kala ngasuh hari siang?
13Kati nuan udah kala ngasuh merekah pajar merintah dunya
lalu ngusak orang ke jai pansut ari endur alai sida ke belalai?
14Penampak mata hari ngasuh bukit enggau lebak ayan nyata
baka lepi kain,
nyengala baka chop ti ditekanka ba tanah liat.
15Penampak siang hari kelalu terang ke orang ke jai
lalu nagang sida ngayanka pemangah sida.
16Kati nuan bisi udah kala bejalai ngagai mata ai ti ba buntut tasik?
Kati nuan udah kala bejalai nengah buntut tasik?
17Kati orang bisi udah kala mandangka ngagai nuan pintu
ti nyaga dunya pemati ti petang?
18Kati nuan nemu pemesai dunya?
Padahka ngagai Aku, enti nuan nemu semua utai nya.
19Kati nuan nemu asal penatai penampak
tauka asal penatai pemetang?
20Kati nuan ulih madahka ikas entara pemetang enggau penampak,
tauka ngasuh seduai iya pulai baru lebuh seduai iya udah datai?
21Aku nemu nuan ulih ngereja nya, laban nuan tuai amat umur
lalu nuan endang bisi dia lebuh dunya digaga!
22Kati nuan udah kala tama ngagai bilik setor,
endur alai Aku ke naruh seleju enggau ujan batu?
23Aku naruh sida nyendiaka maya penusah nyadi
maya orang beperang.
24Kati nuan udah kala bejalai ngagai endur alai mata hari pansut,
tauka ngagai endur alai penatai ribut ti muput ari timur?
25Sapa ke numbak parit ke ujan ti lebat
lalu ngelasi jalai keguntur enggau kilat?
26Sapa ngasuh ai ujan labuh ba endur ti nadai mensia?
27Sapa meri ai ngagai menua ti rangkai, sereta aus,
lalu ngasuh rumput tumbuh?
28Kati ujan tauka ambun bisi apai?
29Sapa indai ais enggau batu seleju,
30ti ngasuh ai bebali nyadi batu
lalu ngasuh ai tasik meku?
31 #
Jop 9.9; Amo 5.8. Kati nuan ulih ngerempungka bintang tujuh
tauka muka tanchang bintang banyak?
32Kati nuan ulih ngatur pejalai bintang ari musin siti ngagai musin siti
lalu ngatur pejalai bintang tiga enggau bintang tujuh?
33Kati nuan nemu adat ti merintah langit.
Kati nuan ulih neritka adat nya ngagai dunya?
34Kati nuan ulih manjung merintah mua hari
lalu ngasuh sida manjah nuan ngena ujan?
35Lalu enti nuan ngasuh kilat nyelar,
kati iya deka datai ngagai nuan, lalu bejaku, ‘Tu aku, tuan’?
36Sapa madahka ngagai burung ibis#38.36 burung ibis; Burung di menua Ejip dulu kelia, ti dikumbai nemu madahka maya Sungai Nile deka bah
tauka madahka ngagai manuk sabung hari deka ujan?
37Sapa chukup bepenemu-dalam lalu ulih ngitung mua hari?
Sapa ulih nyingitka mua hari ngambika sida mansutka ujan,
38ujan ti ngasuh amau betekang?
39Kati nuan ngiga pemakai ke singa,
ngambika anak singa kenyang
40lebuh sida belalai dalam lubang sida
tauka gali ngipa ba alai sida ke belalai?
41Sapa nupi burung kak
lebuh sida terebai segau-segau lapar,
lebuh anak sida nyabak minta pemakai ngagai Aku?
Currently Selected:
Jop 38: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
