Jop 17
17
1Aku nyau deka mati. Aku enda tentu ulih enseput agi.
Aku nadai utai dianti agi, semina nganti kubur aja.
2Aku meda pemalat orang ngelanyaika aku.
3Aku endang betul ati, Allah Taala. Terima meh leka jaku aku.
Nadai orang bukai deka nyukung utai ti disebut aku.
4Nuan udah nutup ati sida ngambika sida enda mereti.
Anang nejuka sida ngalahka aku diatu.
5Jaku-dalam ti dulu kelia madahka siku orang nyual pangan iya kena ngulihka duit,
lalu bala anak iya merinsa ketegal nya.#17.5 orang nyual…merinsa ketegal nya; Tauka: orang meri pangan diri makai, tang bala anak iya empu lapar
6Diatu orang ngena jaku-dalam tu ngelaban aku.
Sida datai lalu ngeludah mua aku.
7Ati aku balat tusah datai ke mata aku nyau rapa.
Semua tubuh aku balat amat kurus.
8Orang ke ngumbai diri nadai penyalah tekenyit ati,
lalu semua sida nuduhka aku enda arapka Allah Taala.
9Orang ke ngumbai diri lurus
majak ngumbai diri ngena.
10Tang enti sema semua sida datai magang lalu bediri di mua aku,
aku tetap nadai tetemuka sida nya bisi penemu-dalam.
11Umur aku nyau deka abis. Perambu aku udah puntan magang.
Aku nadai pengadang agi.
12Tang bala pangan aku ngumbai malam siang hari.
Sida ngumbai penampak nyau semak,
tang aku nemu diri agi mengkang dalam pemetang.
13Semina dunya pemati aja ti diadang aku,
alai aku deka gali lalu tinduk dalam pemetang.
14Aku deka ngumbai kubur nyadika apai aku,
lalu ulat ti makai aku
deka dikumbai aku indai enggau menyadi indu aku.
15Nya alai dini alai pengadang aku?
Sapa bisi meda pengadang aku?
16Pengadang enda mupuk enggau aku
lebuh aku nurun ngagai dunya pemati.
Currently Selected:
Jop 17: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
