Hebrew Jaku Pemuka
Jaku Pemuka
Surat Ngagai Orang Hebrew ditulis ngagai seraban orang Kristian ke nyau deka ngelengkaka pengarap, laban sida majak disakal orang. Orang ke nulis surat tu meransang sida ngambika sida tan dalam pengarap. Iya madahka Jesus Kristus nya pemandang ti bendar, ti penudi ari Allah Taala. Ku iya, (1) Jesus nya Anak Allah Taala, ti udah belajar ngasika Apai lebuh Iya natka pemerinsa. Nyadi laban Jesus nya Anak Allah Taala, Iya lebih agi bekuasa ari sida nabi ke disebut dalam Sempekat Lama, bekuasa agi ari sida melikat, enggau ari Moses empu. (2) Allah Taala udah ngumbai Jesus nya Imam ke meruan belama iya, ke bekuasa agi ari sida imam ke disebut dalam Sempekat Lama, (3) Jesus nya meh orang ke ngelepaska sida ke arap ari dosa sida, ari penakut, enggau ari kuasa pemati. Jesus nyadi Imam Besai ke meri pengelepas ti bendar. Pengelepas nya meh utai ti dipandangka semua atur sembah enggau piring jelu dalam pengarap orang Hebrew.
Orang ke nulis surat tu madahka pasal pengarap sekeda orang Israel ti tebilang dulu kelia (bagi 11) kena iya meransang sida ke arap ngambika sida tegap dalam pengarap. Dalam bagi 12, iya meransang orang ke macha surat tu meruan arap datai ke ujung. Sida patut merening ngagai Jesus, lalu natka semua pemerinsa enggau penusah ti nuntung sida. Bup tu ditutup ngena jaku lalau, enggau jaku tangkan.
Nadai orang nemu sapa ke nulis surat tu, tang dipelabaka ukai Paul, laban jalai orang ke nulis surat tu mansutka leka jaku bisi lain mimit ari chara Paul.
Ripih isi surat tu
Pun jaku: Kristus mandangka Allah Taala (1.1-3)
Kristus bekuasa agi ari sida melikat (1.4—2.18)
Kristus bekuasa agi ari Moses seduai Josua (3.1—4.13)
Pemesai kuasa Jesus ti nyadi Imam (4.14—7.28)
Pemesai kuasa sempekat Kristus (8.1—9.22)
Pemesai kuasa piring Kristus (9.23—10.39)
Pemesai kuasa pengarap (11.1—12.29)
Ngerinduka ati Allah Taala (13.1-19)
Sampi penutup (13.20-21)
Jaku ti penudi (13.22-25)
Currently Selected:
Hebrew Jaku Pemuka: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia