Esekiel 16

Jerusalem Enda Tetap Ati

1Ku TUHAN bejaku baru ngagai aku, 2“Anak mensia, padahka ngagai Jerusalem penyai iya, 3lalu padahka ngagai iya utai ti disebut TUHAN Allah Taala ngagai iya:

“Nuan diadaka di menua Kanaan. Apai nuan orang Amor, lalu indai nuan orang Iti.#16.3 orang Amor…orang Iti: Orang Israel ngumbai orang Amor enggau orang Iti kamah ulah, sereta nyembah engkeramba 4Lebuh nuan ada, nadai orang ngetas tali entemuni nuan, tauka meri nuan mandi, tauka ngunsut nuan ngena garam,#16.4 ngunsut nuan ngena garam; Nitihka adat orang di menua Palestin, anak ke baru ada diunsut bidan ngena garam dichampur enggau ai sereta enggau minyak, lalu dibedung tujuh hari. Jaku-dalam Hebrew bisi ngena seleka agi leka jaku ti enda terang reti tauka medung nuan. 5Nadai orang kasihka nuan lalu ngereja utai nya ke nuan. Lebuh nuan ada, nadai orang rinduka nuan. Nuan dibuai ba padang.

6“Udah nya aku mansa, lalu meda nuan kual-kual malai darah nuan empu. Nuan dibalut darah, tang Aku enggai nejuka nuan mati. 7Aku ngasuh nuan mansang besai baka kayu ti galak. Nuan nyadi kering sereta tinggi, lalu nyadi indu ke biak.#16.7 indu ke biak; Enda terang dalam Hebrew Tusu nuan manah gaya, lalu buk nuan udah tumbuh, tang nuan telanjai nadai utai mungkur.

8“Lebuh Aku mansa baru, Aku nemu nuan nyau deka bisi ambai. Aku nyerayung tubuh nuan ti telanjai ngena baju luar Aku, lalu besemaya deka rinduka nuan. Endang sigi amat, Aku ngaga sempekat deka jadi enggau nuan, lalu nuan deka diempu Aku,” ku TUHAN Allah Taala bejaku.

9“Udah nya Aku ngambi ai lalu masu darah nya ari nuan. Aku ngunsut nuan ngena minyak kana. 10Aku ngerasukka ba nuan baju panjai ti udah disulam, lalu meri nuan kasut ti digaga ari kulit ti pemadu manah, meri nuan tanchang buk ti digaga ari kain linin, enggau baju luar ti digaga ari sutera. 11Aku ngelekatka batu ti berega gelang enggau tenggak ba nuan. 12Aku meri nuan tinchin idung, enggau antin, enggau siti makota ti manah gaya. 13Nuan bisi perengka emas enggau pirak, lalu gari nuan digaga ari kain linin enggau kain sutera ti udah disulam. Roti ti digaga ari tepung ti pemadu alus, ai manyi enggau minyak kana nyadika pemakai nuan. Pemajik nuan nyau beperenching, baka ke tau nyadi kuin. 14Nama nuan tebilang ba semua bansa ketegal pemajik nuan, laban Aku udah ngaga nuan ngemajik nya,” ku TUHAN Allah Taala bejaku.

15“Tang nuan ngambi ulih ba pemajik nuan, enggau ba nama nuan ti tebilang, lalu nuan tinduk enggau semua orang ke datai ngagai nuan. 16Nuan ngena sekeda gari nuan ngias endur alai nuan besembah, lalu baka indu sundal, nuan meri tubuh diri ngagai semua orang. 17Nuan ngambi perengka pirak enggau perengka emas ti udah diberi Aku ngagai nuan, lalu nuan ngena utai nya begagaka anak patung ti lelaki, lalu nuan butang enggau sida. 18Nuan ngambi kain ti udah disulam ti udah diberi Aku ngagai nuan, lalu nuan ngengkahka iya ba anak patung, lalu nuan meri ngagai anak patung nya minyak kana enggau menyan ti udah diberi Aku ngagai nuan. 19Aku meri nuan pemakai - tepung ti pemadu alus, minyak kana, enggau ai manyi - tang nuan meri utai nya nyadika piring kena nuan minta diri dikerinduka bala engkeramba,” ku TUHAN Allah Taala bejaku.

20“Udah nya nuan ngambi bala anak lelaki enggau bala anak indu ke diadaka nuan ke Aku, lalu nuan nyerahka sida nyadika piring ngagai engkeramba. Kita enda tetap ati ngagai Aku. Kati nya enda chukup? 21Nama kebuah kita enda tau enda ngambi bala anak Aku, lalu ngaga sida nyadika piring engkeramba? 22Lebuh nuan nyadi indu sundal, nuan nadai sekali ingatka pengidup diri lebuh nuan agi mit menya - telanjai, kual-kual malai darah nuan empu.”

Pendiau Jerusalem Ti Nyadi Indu Sundal

23Ku TUHAN Allah Taala bejaku, “Tulah! Tulah meh nuan! Nuan udah ngereja semua penyai nya, lalu udah nya 24ba sebelah tisi jalai raya nuan begagaka endur alai besembahka engkeramba, enggau endur alai nyundal. 25Nuan ngamahka pemajik gamal diri nyundal. Nuan nyerahka tubuh diri ngagai semua orang ke mansa, lalu nuan majak nyundal tiap hari. 26Nuan nejuka orang ke kanji ti berimbai pendiau enggau nuan, iya nya orang Ejip, tinduk enggau nuan, lalu nuan nyungkak Aku ringat ngena pengawa nuan ti nyundal.

27“Diatu Aku udah ngedarka jari Aku deka ngukum nuan, lalu ngambi pulai baru berekat ti udah diberi Aku ngagai nuan. Aku udah nyerahka nuan ngagai orang Pilistin ti begedika nuan, lalu kejika ulah nuan ti kamah.

28“Laban nuan enda puas ati enggau orang bukai, nuan lalu belanda nitihka orang Asiria. Nuan nyadi indu sundal sida, tang sida pen enda mega ulih ngemuaska ati nuan. 29Nuan mega nyadi indu sundal ke orang Babilon, bansa orang ke bedagang, tang sida pen enda mega ulih ngemuaska nuan.”

30Tu utai ti disebut TUHAN Allah Taala: “Nuan udah ngereja semua utai tu baka sundal ti enda nemu malu. 31Ba genap jalai raya nuan udah ngaga endur alai besembah, lalu nuan nyundal. Tang nuan ukai ngulihka duit baka indu sundal ti bukai. 32Nuan tu baka indu ke butang enggau orang ke enda dikelala, lalu nuan enda rinduka laki nuan. 33Indu sundal diberi duit, tang nuan meri pemeri ngagai semua ambai nuan. Nuan ngupah sida datai ari semua endur lalu tinduk enggau nuan. 34Nuan tu ukai indu sundal ke selama. Nadai orang mejalka nuan nyundal. Nuan enda dibayar orang, tang nuan ke mayar sida! Nuan tu lain ari indu sundal ti bukai.”

Allah Taala Ngukum Jerusalem

35Jerusalem, nuan tu ke sundal! Nya alai dingaka utai ti disebut TUHAN.

36Tu utai ti disebut TUHAN Allah Taala: “Nuan muka gari ari tubuh nuan, lalu baka indu sundal, nuan nyerahka diri ngagai bala ambai nuan, enggau ngagai semua engkeramba, lalu nuan munuh bala anak nuan nyadika piring engkeramba nya. 37Ketegal nya, Aku deka ngempuruka semua bala ambai nuan ti dulu suba, sida ke dikerinduka nuan, enggau sida ke dipegedika nuan. Aku deka ngasuh sida bekelingika nuan. Udah nya Aku deka ngeruntun gari ari tubuh nuan, lalu ngasuh sida meda nuan telanjai. 38Aku deka ngukum nuan laban nuan butang sereta munuh orang, lalu laban Aku ringat pedis ati ke nuan, Aku deka ngukum nuan ngena pemati. 39Aku deka ngasuh sida bekuasa atas nuan, lalu sida deka ngeruntuhka semua endur alai nuan nyundal, enggau alai nuan nyembah engkeramba. Sida deka ngerampas gari enggau batu ti berega ari nuan, lalu ninggalka nuan telanjai.

40“Sida deka ngasuh orang mayuh nuku nuan ngena batu, lalu sida deka mepat nuan ngena pedang. 41Sida deka nunu rumah nuan, lalu nejuka sida ke indu meda nuan diukum. Aku deka ngasuh nuan badu agi nyadi indu sundal, lalu ngasuh nuan badu agi meri pemeri ngagai bala ambai nuan. 42Nya baru Aku deka badu agi ringat, lalu enda agi bemunyi, enda agi ringat tauka ninding. 43Nuan enda ingatka chara Aku ngintu nuan lebuh nuan agi biak, lalu nuan udah nyungkak Aku ringat ketegal semua utai ti udah dikereja nuan. Nya kebuah Aku udah ngasuh nuan mayar semua utai nya. Nama kebuah nuan nambahka kereja ti kamah ngagai semua penyai bukai ti udah dikereja nuan?” TUHAN Allah Taala udah bejaku.

Baka Nya Indai, Baka Nya Mega Anak Indu Iya

44Ku TUHAN bejaku, “Jerusalem, semua orang deka bejaku ngena jaku-dalam tu pasal nuan: ‘Labang indai, labang anak.’ 45Nuan tu amat anak indai nuan. Indai nuan begedika laki enggau anak diri. Nuan tu sebaka enggau menyadi indu nuan, ke begedika laki enggau anak sida. Nuan enggau nengeri bukai ti menyadi indu nuan endang saum indai. Indai kita indu orang Iti, lalu apai kita orang Amor.

46“Menyadi indu nuan ke tuai nya Samaria sama enggau genturung pendiau ti di utara. Menyadi indu nuan ke biak nya Sodom sama enggau genturung pendiau ti di selatan. 47Kati nuan, Jerusalem, puas ati nitihka abi-kaki seduai iya, lalu nunda seduai iya ti jai? Enda, laban enda lama da agi nuan deka ngereja utai ti lebih jai agi ari ti dikereja seduai iya.

48Ku TUHAN Allah Taala bejaku, “Laban Aku tu Allah Taala ti idup Aku madahka ngagai nuan, menyadi indu nuan Sodom enggau genturung pendiau iya nadai kala udah ngereja penyai baka ke udah dikereja nuan enggau genturung pendiau nuan. 49Sodom enggau bala anak indu iya sumbung laban sida mayuh utai diempa, lalu diau dalam pemaik sereta nadai utai ngawa, tang iya enggau bala anak iya enda ngintu orang ke seranta enggau orang ke merinsa pendiau. 50Sida sumbung sereta kieh ati lalu ngereja utai ti dipegedika Aku, nya alai Aku ngerusak sida lebuh Aku meda nya.

51“Dosa Samaria enda bulih setengah dosa nuan. Utai ti udah dikereja nuan lebih agi jai ari penyai ti udah dikereja Samaria. Enti penyai nuan dibandingka enggau penyai menyadi indu nuan, seduai iya baka ke nadai penyalah. 52Diatu nuan enda tau enda ngasaika pemalu diri. Dosa nuan lebih agi jai ari dosa menyadi indu nuan, datai ke seduai iya baka ke nadai penyalah enti dibandingka enggau nuan. Nuan diatu patut nemu mirah mua laban malu, laban menyadi nuan baka ke tuchi enti dibandingka enggau nuan.”

Sodom Enggau Samaria Didirika Baru

53Ku TUHAN bejaku ngagai Jerusalem, “Aku deka ngasuh Sodom enggau genturung pendiau iya, Samaria enggau genturung pendiau iya kaya-raja baru. Aku deka mega ngasuh nuan nyadi kaya-raja. 54Nuan deka malu ke diri empu, lalu pemalu nuan nya deka ngasuh menyadi indu nuan ngelala pemesai pengaya seduai iya. 55Seduai iya deka nyadi kaya-raja baru, lalu nuan enggau genturung pendiau nuan deka mega nyadi kaya-raja baru. 56Ukai enda nuan tu ti ketawaka Sodom lebuh maya nuan ti sumbung suba, 57sebedau penyai ti dikereja nuan ditemu orang? Diatu nuan nyau sebaka enggau iya - diketawaka orang Edom, orang Pilistin, enggau orang bansa bukai ke berimbai pendiau enggau nuan, ke begedika nuan. 58Nuan enda tau enda natka pemerinsa ketegal utai ti kamah, ti jai ti udah dikereja nuan.” TUHAN Udah bejaku.

Sempekat Ti Meruan Belama Iya

59Ku TUHAN Allah Taala bejaku, “Aku deka ngukum nuan nitihka utai ti udah dikereja nuan, laban nuan udah enda bebasaka semaya diri, lalu mungkir ari sempekat. 60Tang Aku deka ngamatka sempekat ti udah digaga Aku enggau nuan lebuh nuan agi biak suba, lalu Aku deka ngaga siti sempekat ti deka meruan belama iya enggau nuan. 61Nya baru nuan deka ingatka ulah nuan suba, lalu malu ke ulah nya lebuh Aku ngambi menyadi indu nuan ke tuai enggau ke biak lalu meri seduai iya ngagai nuan baru nyadika anak indu nuan, taja ukai ketegal sempekat Aku enggau nuan. 62Aku deka ngaga sempekat enggau nuan. Nya baru nuan deka nemu Aku endang TUHAN. 63Aku deka ngampun semua penyalah ti udah dikereja nuan, tang nuan deka ingatka sida, lalu malu bejaku.” TUHAN Allah Taala udah bejaku.

Currently Selected:

Esekiel 16: BK

Highlight

Copy

Compare