Ulang Adat 27
27
Adat Allah Taala Dituliska Ba Batu
1Udah nya Moses enggau bala tuai orang Israel, bejaku ngagai orang mayuh, “Kita enda tau enda ngasika semua pesan ti diberi aku ngagai kita sehari tu. 2#Jos 8.30-32. Lebuh kita udah meraka Sungai Jordan, lalu datai ba menua ti diberi TUHAN Allah Taala kita ngagai kita, kita enda tau enda nirika berapa igi lampang batu ti besai, ngechat batu nya enggau kapu. 3Tuliska semua leka adat tu ba batu nya lebuh kita udah meraka sungai nya, deka mansang ngagai menua ti diberi TUHAN ngagai kita, menua ti kaya sereta ami, munyi ti udah disemaya TUHAN Allah Taala aki ini kita ngagai kita. 4Nya alai lebuh kita udah meraka Sungai Jordan, dirika lampang batu nya ba Bukit Ebal, munyi ti diasuh aku kereja kita sehari tu, lalu chat batu nya enggau kapu. 5#P-sut 20.25. Gaga siti alta ke TUHAN Allah Taala kita dia ari batu ti nadai kala dipansap ngena besi. 6Giga batu ti tau dikena enda ibuh dipansap. Udah nya beri piring tunu kita ngagai TUHAN Allah Taala kita ba alta nya. 7Beri mega piring pemaik, lalu empa piring nya dia, rami gaga di mua TUHAN Allah Taala kita. 8Kita enda tau enda nuliska semua leka jaku adat tu enggau terang ba semua lampang batu nya.”
9Udah nya Moses enggau bala imam Lewi lalu bejaku ngagai semua orang Israel, “Anang ragak, kita orang Israel, lalu pendingka aku. Sehari tu kita udah nyadi nembiak TUHAN Allah Taala kita. 10Nya alai kita enda tau enda ngasika Iya lalu nitihka semua pesan enggau adat Iya ti diberi aku ngagai kita sehari tu.”
Sumpah Enti Enda Ngasi
11Sehari nya Moses mega bejaku ngagai orang Israel, 12#U-dat 11.29; Jos 8.33-35. “Lebuh kita udah meraka Sungai Jordan, tu bagi raban bansa ti enda tau enda bediri ba Bukit Gerisim lebuh jaku berekat disebut: Raban bansa Simeon, Lewi, Judah, Isakar, Josep, enggau Benjamin. 13Lalu tu bagi raban bansa ti deka bediri ba Bukit Ebal lebuh jaku sumpah disebut: Raban bansa Reuben, Gat, Aser, Sebulun, Dan enggau Naptali. 14Udah nya orang Lewi deka nyebut leka jaku tu enggau nyawa ti inggar ngagai semua orang Israel:
15 #
P-sut 20.4; 34.17; Lew 19.4; 26.1; U-dat 4.15-18; 5.8. “Barang sapa ngaga engkeramba, tauka ngaga anak patung, utai ti dipegedika TUHAN, lalu belalai nirika utai nya, deka tulah.” Lalu semua orang mayuh deka nyaut, “Amin!”
16 #
P-sut 20.12; U-dat 5.16. “Barang sapa enda bebasaka apai indai diri, deka tulah.” Lalu semua orang mayuh deka nyaut, “Amin!”
17 #
U-dat 19.14. “Barang sapa mindahka pak kelai entara, deka tulah.” Lalu semua orang mayuh deka nyaut, “Amin!”
18 #
Lew 19.14. “Barang sapa nguluka orang ke buta nengah jalai ti salah, deka tulah.” Lalu semua orang mayuh deka nyaut, “Amin!”
19 #
P-sut 22.21; 23.9; Lew 19.33-34; U-dat 24.17-18. “Barang sapa ngerampas hak orang kampar, orang ke patu balu, deka tulah.” Lalu semua orang mayuh deka nyaut, “Amin!”
20 #
Lew 18.8; 20.11; U-dat 22.30. “Barang sapa ngemaluka apai iya, laban iya beleman enggau siku ari bini apai iya, deka tulah.” Lalu semua orang mayuh deka nyaut, “Amin!”
21 #
P-sut 22.19; Lew 18.23; 20.15. “Barang sapa beleman enggau jelu, deka tulah.” Lalu semua orang mayuh deka nyaut, “Amin!”
22 #
Lew 18.9; 20.17. “Barang sapa beleman enggau menyadi indu tauka menyadi indu tiri diri, deka tulah.” Lalu semua orang deka nyaut, “Amin!”
23 #
Lew 18.17; 20.14. “Barang sapa beleman enggau mentua indu diri, deka tulah.” Lalu semua orang mayuh deka nyaut, “Amin!”
24“Barang sapa udah belalai munuh orang, deka tulah.” Lalu semua orang mayuh deka nyaut, “Amin!”
25“Barang sapa nerima gaji munuh orang ke nadai penyalah, deka tulah.” Lalu semua orang mayuh deka nyaut, “Amin!”
26 #
Gal 3.10. “Barang sapa enda ngasika semua adat tu, deka tulah ditinggang sumpah.” Lalu semua orang mayuh deka nyaut, “Amin!”
Currently Selected:
Ulang Adat 27: BK
Highlight
Copy
Compare
Share
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia
