Ulang Adat 18

Ungkup Ke Bala Imam

1“Semua imam Lewi, semua raban bansa Lewi, enda tau nerima ungkup tanah tauka pesaka di menua Israel, tang sida deka beridup ba piring ti diberi ngagai TUHAN. 2#P-pau 18.20. Sida enda tau bempu pesaka tanah baka raban bansa ti bukai. TUHAN Empu deka nyadika pesaka sida, munyi ti udah disemaya Iya ngagai sida.

3“Tu ungkup ti diberi orang Israel ngagai sida imam ari piring ti diberi sida, nemuka piring nya jelu sapi tauka bedus: berang, rang enggau perut raya jelu nya. 4Utai ti terubah ulih kita ari gandum, wain, enggau minyak kana kita, enggau bulu bedus ti terubah ulih kita ari bedus kita, enda tau enda diberi ngagai sida, 5laban TUHAN Allah Taala kita udah milih raban bansa Lewi enggau peturun sida ari semua raban bansa kita, bekereja dalam nama TUHAN belama iya.

6“Enti orang Lewi, sebarang maya iya deka, angkat ari sebarang nengeri ti udah alai iya diau di menua Israel, lalu datai ngagai endur ti deka dipilih TUHAN, 7iya tau bekereja dia dalam nama TUHAN Allah Taala iya, baka orang Lewi ti bukai ke bekereja dia. 8Iya enda tau enda diberi pemakai ngemayuh ti diberi ngagai imam ti bukai, taja pen iya bisi penatai duit ari rega reta tengkira ti dijual sida sebilik.#18.8 Enda terang dalam Hebrew.

Enda Tau Nunda Orang Ke Enda Nemu Allah Taala

9“Lebuh kita datai di menua ti diberi TUHAN Allah Taala kita ngagai kita, kita enda tau nunda pengawa ti jai ti dikereja orang bansa bukai ke diau di menua nya. 10#Lew 19.26; P-sut 22.18. Anang nyerahka anak kita lalu nunu sida ba alta nyadika piring. Lalu anang betilitka nasit, tauka beburung, tauka bedukun, tauka bemanang, 11#Lew 19.31. tauka bekenaka pengaruh, tauka betanya ngagai antu, tauka betanya ngagai semengat orang ke udah mati. 12Laban TUHAN Allah Taala kita begedika orang ke ngereja utai ti jai baka nya. Nya kebuah Iya muru mayuh bengkah bansa ari mua kita. 13#Mat 5.48. Kita enda tau enda, enggau pengabis ati kita, mengkang taluk ngagai TUHAN Allah Taala kita. 14Taja pen orang ke diau di menua ti baru deka dialahka kita, mendingka manang, mendingka orang ke betilitka nasit, tang TUHAN Allah Taala kita enda ngasuh kita ngereja nya.

Siku Nabi Baka Moses

15 # SKR 3.22; 7.37. “Lalu TUHAN Allah Taala kita deka meri kita siku nabi ke baka aku, ari bansa kita empu, lalu kita enda tau enda ngasika iya. 16Laban tu utai ti dipinta kita ari TUHAN Allah Taala kita ba Bukit Sinai, alai kita ke begempuru bebala mayuh, lebuh kita nyebut, ‘Enti kami agi majak ninga munyi nyawa TUHAN Allah Taala kami, tauka meda api ti mau, kami tentu mati.’ 17Lalu ku TUHAN bejaku ngagai aku, ‘Jaku sida endang ngena. 18Aku deka meri sida siku nabi ke baka nuan, ari bansa sida empu. Aku deka nepuka leka jaku Aku ke dalam mulut iya, lalu iya deka madahka semua pesan Aku ngagai sida. 19#SKR 3.23. Barang sapa enda mendingka jaku ti disebut nabi nya dalam nama Aku, Aku deka ngasuh orang nya betanggungjawapka diri empu. 20Tang enti nabi berani bejaku mai pesan dalam nama petara bukai, tauka ngumbai diri bejaku dalam nama Aku, tang ukai ari asuh Aku, iya enda tau enda mati ketegal nya.’

21“Kita nyangka berunding dalam ati diri, ‘Baka ni ku jalai kitai nemu jaku nya ukai jaku TUHAN?’ 22Enti nabi nya bejaku dalam nama TUHAN, tang utai ti ku iya nya nadai nyadi, nya nunjukka pesan nya ukai ari TUHAN. Nabi nya bejaku ngena kuasa iya empu. Anang takutka jaku nya.

Currently Selected:

Ulang Adat 18: BK

Highlight

Copy

Compare