गलाती 5
5
ख्रीष्टने स्वतन्त्र
1स्वतन्त्र क्यूरजे लागि ख्रीष्टदे ङीनने स्वतन्त्र चीम्मे ख्यङ्। येरे क्यूत्देबे स्वतन्त्र क्यूर ख्यङ् यदेबे बूल्ल्यो क्यूत्देबे मेर्नू, मेस्ये फेरि त्वोजे बन्धन्ने अम्पर्दीलाची।
2ङ पावलदे नमयूने यीय, नमयूदे खतना चीत्देयलो ख्रीष्टदे नमयूजे लागि चेफाइदाये चीम्मीस्ये त्वो। 3खतना क्यूरबयू क्वादेने मोशाजे नियमयू टक्कने मन्देने कर लादीय यदेबे ङ फेरि नमयूने बोङ्बे आर्तीय। 4नमयू, सू मोशाजे नियम मन्दीदेबे धर्मी ठर्दे मैय, हम्बयू क्वाने ख्रीष्टप्रे आलाक् क्यूरे ख्यङ्। परमेश्वरजे अनुग्रहट्यादे हम्बयू चीन्तङ् क्यूरे ख्यङ्। 5चेनेयलो पवित्र आत्मादे ङीनने विश्वास चीस्स्ये पीन्देबे परमेश्वरजे खूम्ने धर्मी ठर्तीमेजे लागि आशा चीत्देबे लम् लेन्नब चीम्मीय। 6खतना चीक्कब मीप्रे अन्चीक्कब मीजे ख्रीष्ट येशूप्रे चै नताये अन्क्यूर्। तर पोत्याजेत्या अर्थ ख्यङ् हम्ब च ख्यङ् यलो माया चीत्देबे काम फरब विश्वास ख्यङ्।
7नमयू चेलाबेने ग्येबीन ख्य। सूदे नमयूने परमेश्वरजे सत्य वचन मन्दीसे अम्पीन? 8अम्ब होम्देबे वचन मन्दीसे अम्पीन्ब काम नमयूने क्वब परमेश्वरट्यादे र दी। 9#१ कोरिन्थी 5:6छीत्यात्या खमिरदे टक्क ता-छ्योङ्बने प्वब बन्दीय। 10ङैदे यब पो यली सूजो पो नमयूदे मन्दीस्ये त्वो यदेबे ङ प्रभुने भर् चीक्क्य। नमयूने पेर्तेब सूने ख्यङ्लीने हम्बदे सजाइ प्रेक्क्य। 11तर अत-च्योन्यू, ङैदे खतना क्यूर पर्तीय यदेबे प्रचार चीक्कदे यलो, ङै फ्याने अम्ब सतनम् चेने पर्ती र? अम्ब पो तम्दम्ने यलो क्रूसने बलि क्यूरब प्रचारने सूदेये विरोध अन्चे ख्यङ्दे। 12नमयूने पेर्तेबयूदे बरू खतना चेब रङ्से अङ्ग थमयूदेने बोर् ख्वापीली क्यूक्क्य।
पवित्र आत्मादे पीनब जीया
13अत-अची च्योन्यू, नमयूब स्वतन्त्र क्यूरने क्व ख्यङ्। हम्ब स्वतन्त्रने पाप चेब स्वभावजे लागि चील्लेब अन्क्यूस्स्य। तर नमयू प्रेमने त्यादे त्याजे सेवा चेब क्यूर्। 14#लेवी 19:18चेनेयलो मोशाजे साप्ता नियमयू पो त्यानेने पूरा क्यूरीक ख्यङ्, “नदे रङ्सेने माया चेप्र, रङ्से खीम्चेने माया ची।” 15तर नमयू त्यादे त्याने चेब ब्यवहरा नाजे चेन् ओम्दे चेप्र च्यादेबे जीङ ख्यङ्दे यलो होस्स्यार क्यूर्, नमयू त्यादे त्याने नाश चेब क्यूक्क्य।
16येरेक्यूत्देबे ङ यीय, पवित्र आत्मादे च्योल अनुसार चीन्नू, मेस्ये रङ्सेजे पाप चेब स्वभावजे इच्छा च ख्य हम्बत्या पूरा चे अम्मल्लाची। 17#रोमी 7:15-23चेनेयलो पाप चेब स्वभावजे इच्छा च ख्य हम्ब पवित्र आत्माजे विरुद्धने क्यूक्क्य, होर्दे पवित्र आत्मादे पाप चेब स्वभावजे इच्छाजे विरुद्ध चीक्क्य। नदे च चे मे हम्बदे नमयूने चीस्स्ये अम्पीनजे लागि अम्ब ङ्ही त्यात्याजे विरुद्धने ख्यङ्। 18तर नमयू पवित्र आत्मादे च्योल अनुसार चीक्क्य यलो नमयू मोशाजे नियम हक नङ्ने क्यूस्से त्वो।
19पाप चेब स्वभावजे चीत्तीङ्रब इच्छाजे कामयू चेलाबे तङ्क्य। अम्ब येर ख्यङ् वेश्य काम चे, पवित्र अन्क्यूर, नो-मून् अन्ज्य पोयूनेत्या लादीनब, 20मूर्तिने पूस्ते, ङा-थूक्, शत्रु, च्य-फा, म्यातब, छी, रङ्सेत्या चे मे, अन्थून, हूलया, 21ठेन, नो-मून् ची-नादूदे स्योनब, मोज-मज्जा चेब मेस्ये येरप्रने सूजो कामयूजे बारेने ङैदे मालाङ् खूम् येयेप्र नमयूने दीनीये बोङ्बे आर्तीय। सू-सूदे येर कामयू चीक्क्य, होरमीयूदे परमेश्वरजे राज्यने क्योबब हक अम्प्रे।
22तर पवित्र आत्मादे पीनब फल अम्ब ख्यङ्- प्रेम, आनन्द, शान्ति, सैदीदेबे टूनख्वब, ङ्येमब सेम्, भलो चेब, भर् पर्ते ख्वब, 23चीद क्यूरब, रङ्सेदे रङ्सेने कबूने येन ख्वब ख्यङ्। येर पोयूजे विरुद्ध चेब कम्ब नियमये त्वो। 24सू ख्रीष्ट येशूजे ख्यङ् थमयूदे पाप चेब स्वभावने हम्बजे अन्ज्य इच्छा सजने खील् ठोक्दीदेबे क्रूसने पील्क ख्यङ्।
25कादेये ङीन पवित्र आत्माजे अनुसारने जीया चीय यलो आत्मादे यप्रने प्रपर्दीय। 26ङीन केन्त्वे अन्क्यूर्, त्यादे त्याने छी अन्लङ्लाची मेस्ये त्यादे त्याप्रे ठेन अन्क्यूर्।
Currently Selected:
गलाती 5: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
