मूल स्यूस्स्यायूजे कामजे किताब 20
20
पावल माकेडोनियाने मेस्ये ग्रीसने
1अम्ब खैलाबैला थम्दीयेमेस्ये पावलदे स्यूस्स्यायूने कोबीदे, मेस्ये थमयूने अर्ती पीन्दे, थमयूप्रे बीदा क्यूत्देबे माकेडोनियातेले गीलीदे। 2होनेजे नेयूने गीलीदेबे ङूदे मीयूने कूम आँट क्यूरब वचनयू क्यम्दे मेस्ये होर्देङ्येदे ग्रीसने गीलीदे। 3पावल हैयाने ल सोम्सेमे टूङ्दे। ङू क्यू जहाजने टदेबे सिरियातेले प्रमेब यहूदीयूदे ङूजे विरुद्धने जाल चीन्नब पो था प्रेत्देबे ङूदे माकेडोनिया क्यूत्देबेने ल्वारब पक्क चीत्दे। 4होर्दे बेरियाने टूङब मी पुरसजे च सोपात्रोस, थेसलोनिकेदे अरिस्तार्खस प्रे सिकन्दस, डर्बीजे गायस, होर्दे तिमोथी मेस्ये एशियाजे तुखिकस मेस्ये त्रोफिमस ङूप्रे गीलीदे। 5थमयू खूम्ने फ्योइदेबे ङीने त्रोआसने रेन्न ख्य। 6होर्दे ङीब अखमिरी क्यङ्जे दीन्बर जेङ्कङ्येदे फिलिप्पीदे क्यू जहाजने टदेबे ङर्याने त्रोआसने थमयू ट्याने फ्योरदे मेस्ये हैयाने ङ्यीर्यासेमे टूङ्दे।
त्रोआसने यूटीकस सोम्बो चीम्मेब
7सतजे खूम्जे दिनने कन्छ्वाब ङी क्यङ् क्य्वेने फूङ् क्यूत्दे, अन्छ्वाब पावलदे नैदेरेदे प्रब सेम् चीत्देबे थमयूप्रे मून्गूङ्सेमे टूङ्देबे बात् सेत्दे। 8ङी फूङ् क्यूरब फ्या ताल्ल्याजे कोठाने बत्तीयू कूम ख्य। 9युटिकस यब स्योर्ब त्या झ्यालने टून ख्य। पावलदे बेस्से कूमसेमे बात् सेन्नूब ङू ङ्यूम्म्या गीलीदेबे ङ्यूम्म्याने ङू तल्ल्या सोम्दे मो तेलीदे मेस्ये ङूजे सीयेब ङ्वने थमयूदे तो लङ्दे। 10होर्दे पावल मो तल्रदे, मेस्ये कूत्तू क्यूत्देबे ङूने हाथम्देबे यदे, “सूर्त अन्चील्लाची, चेनेयलो ङू सोम्बोने ख्यङ्।” 11होर्दे ङू तो ताल्ल्याने टेयीदे, मेस्ये क्वादेने क्यङ् क्योत्देबे च चेनङ्येदे ङू नप् अन्क्यूत्दासेमे बात् सेत्देबे टूङ्दे। होर्देङ्येदे ङू गीलीदे। 12होर्दे थमयूदे हम्ब स्योर्ब सोम्बो चीत्देबे स्योल्गीदे मेस्ये थमयू क्वादेने कूम सान्त्वना प्रेत्दे।
त्रोआसदेमेस्ये मिलेटससेमे
13पावलने पोङ्गीदेवे ङी क्वाने त्रोआसट्यादे क्यू जहाजने टदेबे अस्सोसने गीलीदे। पावलनेब अस्सोससेमे तोप्दे प्रब सेम् क्यूत्देबे ङू रङ्सेदेने अस्सोसनेत्यामे क्यू जाहजने टब चजो-पजो चे ख्य। 14होर्दे ङूदे ङीने अस्सोसने तूदेबे ङूने क्यू जहाजने टस्येपीन्देबे मितिलेनेने फ्योरदे। 15हैयादे नैदेरेदे खियसजे ट्याने फ्योरदे, मेस्ये नङ्नीरेदे सामोसने फ्योरदे। हम्बजे त्याब दिनने मिलेटसने फ्योरदे, 16एशियाने कूम टूङ्तीङ् अन्रदेबे पावल एफिससने अन्क्योबलाबे प्रब पक्क चीत्दे, चेनेयलो खूदासेमे पेन्तिकोसजे दिन यरूशलेमने फ्योबने ङूदे अतूर् चीन्न ख्य।
एफिससजे एल्डरयूप्रे बिदा चेब
17पावलदे मिलेटसदे एफिससने मी कूल्बीदेबे मण्डलीजे एल्डरयूने कोबीदे। 18थमयूट्याने फ्योयीदेबे ङूदे थमयूने यदे, “ङैदे एशियाने तोप् छेरब दिनदेमेस्ये दीनीसेमे कूम सेमे नमयूजे अन्द्रने कर किसिमदे जीया चदे हम्ब नमयूने थाने ख्यङ्। 19सोरो चीद क्यूत्देबे म्यायू तेल्देबे, यहूदीदे फतूर् लैदीलीने ङैदे प्रभुजे सेवा चीत्दे। 20ङैदे नमयूने ज्य क्यूरब पो टक्कने स्योत्दे, मेस्ये खोत्ताजे कीम् कीम्ने प्रेये-प्रेये शिक्षा पीन्दे। 21यहूदीयूदे मेस्ये ग्रीकयूदे पश्चात्ताप चीत्देबे परमेश्वरतेले ल्वरस्य मेस्ये ङीनजे प्रभु येशू ख्रीष्ट फ्याने विश्वास चीस्स्य यदेबे ङैदे गवाही पीने ख्यङ्।
22“जेम्से ले, पवित्र आत्मादे प्र यदेबे ङ यरूशलेमतेले प्रेन ख्यङ्, हैयाने ङैने चम पर्दीय हम्ब ङैने चैये था त्वो। 23अन्छ्वाब था ख्यङ्, यी सहरजे पीछीने कैद मेस्ये सकस् ङै फ्याने रीय यब पो पवित्र आत्मादे ङैने गवाही पीन ख्यङ्। 24#२ तिमोथी 4:7तर ङैजे रङ्से जीयाजे चैये ख्याल् अन्ची, मेस्ये ङ रङ्सेने माया अन्चील्लाबे रदे। परमेश्वरजे अनुग्रहदे सूगब खबरजे गवाही पीनने प्रब ङैजे काम मेस्ये प्रभु येशूदे पीनब ङैजे जिम्मा ङैदे पूरा चे खूस्य यदेबे, अन्छूत्यात्या मन ख्यङ्।
25“जेम्से ङैने था ख्यङ् नमयू खोत्तानेने ङैदे परमेश्वरजे राज्यजे पो स्योदे-स्योदे प्रदे, नमयूदे ङैजे त्वा फेरि कलङ्बेये तङ्स्ये त्वो। 26होरेक्यूत्देबे दीनीजे दिनने ङ नमयूने गवाही पीन्क्य, ङ सूजेये काजे दोषी क्यूस्स्ये त्वो। 27चेनेयलो परमेश्वरदे यब पोयू टक्कने ङैदे नमयूने स्योत्दे। 28नमयूजे लागि मेस्ये रङ्से बगलजे लागि होस्स्यार क्यूत्देबे टूङ्। पवित्र आत्मादे नमयूने बगलजे जिम्मा प्लेब मी बन्देब कारण ङूदे रङ्सेजे कादे कीनब परमेश्वरजे मण्डलीजे स्याहार नमयूदे चीदो। 29चेनेयलो ङैने था ख्यङ्, ङ प्रमेस्ये नमयूजे अन्द्रने फत्या च्यूङ्कूयू क्योरीय, हम्बदे बगलने बाँकी येस्स्ये त्वो। 30नमयूजे अन्द्रदेने लूच्च शिक्षा पीनब मीयू योङ्रीय। थमयूदे स्यूस्स्यायूने रङ्सेजे अन्ज्य लम्तेले कूबीय। 31होरेक्यूत्देबे अम्ब ह्वे च्यीत्देबे होस्स्यार क्यूर, वर्ष सोम्सेमे नो-मून म्यामू तेलेतेले मी त्यात्याने ङैदे बोङ्बे आर्तीदे।
32“जेम्से ङ नमयूने परमेश्वरजे लाने सूम्दीपीय। ङूजे अनुग्रहदे फ्यायेब सूगब खबरजे भर्ने क्यापीय। अम्ब वचनदे नमयूने विश्वासने बोल्यो बन्दीय मेस्ये रङ्सेजे पवित्र मीयूने असी प्रेब चीक्क्य। 33ङैदे सूमीजेये मर्, चाँदी, कोलाजे लोभ अन्ची। 34नमयू रङ्सेदेने था ख्यङ् ङैजे अम्ब लादेने काम फर्देबे ङैजे रङ्सेजे मेस्ये ङैप्रे ख्यब मीयूजे हर्जो पूरा चे ख्यङ्। 35ङैदे साप्ता पोने नमयूने नमूना पीन ख्यङ्, नमयूदेये येर्बेने बोङ्बे काम फर्देबे बोङ् त्वब मीयूने तोङ्मे पर्दीय। प्रभु येशूजे वचन ह्वे ची, केरे ङू रङ्सेदेने य ख्यङ्, “यी कीन यली पीनबदे अझ असी प्रेक्क्य।”
36हन्छ्वा यदेबे ङूदे पूजी चोदेबे थमयू क्वाप्रेने प्रे-प्रे प्रार्थना चीत्दे। 37थमयू क्वाने ङूदे, मेस्ये पावलने हाथम्देबे म्वाइँ चीत्दे। 38थमयूदे फेरि कलङ्बेये ङूजे त्वा अन्तङ् यदेबे पावलदे यब पोने थमयू सोरो अन्सूग क्यूत्दे। होर्दे थमयूदे क्यू जहाजने सयीदे।
Currently Selected:
मूल स्यूस्स्यायूजे कामजे किताब 20: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
