मूल स्यूस्स्यायूजे कामजे किताब 12
12
पत्रुस झ्यालखानने
1हन्छ्वाब हेरोद मूरुम्दे मण्डलीजे कोला मीयू फ्याने सोरो अन्ज्य अन्-न्याय चेने सुरु चीत्दे। 2ङूदे यूहन्नाजे अत याकूबने पार्ज्यादे सेस्स्ये पीन्दे। 3अम्ब कामदे यहूदीयू सूगब तङ्देबे पत्रुसनेये चूङने छ्योत्दे। अम्ब घटना अखमिरी क्यङ्जे दीन्बरजे बीलने क्यूर ख्य। 4#प्रस्थान 12:1-27हेरोददे पत्रुसने झ्यालखानने स्योप्देबे स्यी-स्यीजे टोली बन्दीदेबे सीन्त्री हीत्दे। निस्तार दीनबरङ्येदे ङूने यहूदीयूजे खूम्दे रेस्स्ये यब हेरोदजे सेम् ख्य।
5येर्बे पत्रुस जेलने हीत्दे, तर ङूजे लागि मण्डलीदे परमेश्वरने बोङ्बे हूत्दे प्रार्थना चीन्न ख्य।
6हेरोददे ङूने फीने योन्देबे रेमेब मून्दे, पत्रुस सङ्लो ङ्हीदे ख्यादेबे सिपाई ङ्हीजे अन्द्रने ङ्यूम्न ख्य। थमयूये ख्यो लने मेर्देबे झ्यालखानजे सीन्त्री टून ख्य। 7त्याफेने प्रभुजे स्वर्गदूत त्या हैयाने तङ्रदे, मेस्ये कोठा ओथ्याङ् क्यूत्दे। स्वर्गदूतदे पत्रुसजे खैजेने ठरीदेबे “छ्योटो लङ्” यदेबे ङूने लङ्दे। होर्दे सङ्लोयू ङूजे लादे फाइदेबे तली।
8स्वर्गदूतदे ङूने यदे, “कोला प्रे पीङ्गी ह्वे” होर्दे ङूदे होरेने चीत्दे। ङूदे ङूने यदे “खट्टो कूदेबे ङै ङ्ये-ङ्ये ख।” 9स्वर्गदूतजे ङ्ये-ङ्ये रदेबे पत्रुस झ्यालखानदे योङ्रदे। तर स्वर्गदूतदे चेब अम्ब पो तम्दम्ने ख्यङ् यदेबे ङूदे थाने अम्प्रे। तर ङूदे दर्शन तङ्न ख्यङ् यदेबे मन्दे। 10कन्छ्वाब कप पर्त्या ठ्वादे मेस्ये कप पर् ङ्ही ठ्वाब सहरने क्योबब जङ्जे ख्योने थमयू फ्योयीदे, हन्छ्वाब हम्ब ख्यो ङूदेने थमयूजे लागि पूग्यी, मेस्ये थमयू फीने योङ्देबे गल्लीजे लम् त्याने गीलीदे, मेस्ये तुरुन्तै स्वर्गदूतदे पत्रुसने पङ्गीदे गीली।
11कन्छ्वाब पत्रुसजे होस् रदे, हन्छ्वाब ङूदे यदे, “जेम्से ङैने तम्दम्ने था क्यूत्दे, प्रभुदे रङ्से दूत कूल्बीदेबे हेरोद मूरुम्जे लादे, मेस्ये यहूदीयूदे च-चेमे ख्य हम्ब साप्ताकूरूदेने ङैने जूक्दीमीदे।”
12अम्ब पो ङूदे था प्रेमेस्ये, ङू मर्कूस यब यूहन्नाजे म मरियमजे कीम्ने गीलीदे। हैयाने कूम मीयू फूङ् क्यूत्देबे प्रार्थना चीन्न ख्य। 13ङूदे ख्योने ठ्याक्-ठ्याक् चीन्नूब रोदा मीन् ख्यब त्वोम ख्यो पूकने रदे। 14पत्रुसजे के चीन्तेमेस्ये ङू सूग्देबे ख्योने अम्पूक्लाबे नङ्ने ग्येयीदे “पत्रुस ख्यो-लने मेर्न ख्यङ्” यदेबे खबर स्योत्दे।
15तर थमयूदे ङूने यदे, “न पर औ।” तर ङूदे यब पो तम्दम्ने ख्यङ् यदेबे ङूदे जिद्दी चीत्दे। होर्दे थमयूदे यदे, “हम्ब ङूजे स्वर्गदूत स्येन्।”
16तर पत्रुसदेये ख्योने ठ्याक्-ठ्याक् चीन्नूदे। ख्यो पूक्प ङू तङ्देबे थमयू छाक्के पर्दीकदे। 17ङूदे “पारा अम्पूत्लाची” यदेबे लादे लतप् चीत्दे, मेस्ये प्रभुदे ङूने केर्बे झ्यालखानदे फीने योन्दे यदेबे थमयूने स्योत्दे। अम्ब पोजे खबर याकूब मेस्ये सूजो अत-च्योन्यूने स्य्वे यदेबे ङू बीदा क्यूत्देबे सूजो नेने थे-चेकीदे।
18नप्दे म्या तङमेस्ये पत्रुसने च क्यूत्दे यदेबे सिपाईयूजे अन्द्रने सोरो ड्वाङ्गे क्यूत्दे। 19हेरोददे पत्रुसने मल्देबेये प्रेअङ्खूब, होर्दे ङूदे सिपाईयूजे पूरा जाँच चीत्देबे थमयूने सेब दण्डजे हुकुम पीन्दे।
हेरोद सीयेब
हेरोदब यहूदियादे कैसरिया गीलीदेबे हैयानेने टूङ्दे।
20हेरोद टुरोस मेस्ये सीदोनजे मीयूप्रे सोरो नाराज क्यूरे ख्य। थमयू मील्लीदेबे ङू ट्याने रदेबे मूरुम्जे नङ्जे काम फरब बलस्तसप्रे नङ्सू पो स्याका-स्यूकू चीत्देबे मील्लेजे लागि बिन्ती चीत्दे। चेनेयलो थमयूजे देश च-सेजे लागि मूरुम्जे देशने भर् चे पर्देख्य।
21तोक्तेब दिनने मूरुम्दे ह्वे पर्तेब कोला होत्देबे हेरोद ङूजे सिंहासनने टूङ्दे, मेस्ये थमयूने ङूदे भाषण चीत्दे। 22मीयूदे “अम्ब ईश्वरजे बोली ख्यङ्, मीजे दी!” यदेबे पारा पूत्दे। 23तर परमेश्वरने मान अन्चीत्देबे हन्छ्वाबने प्रभुजे स्वर्गदूत त्यादे ङूने ठरीदे मेस्ये स्याउ-स्याउ लूङ् चङ्देबे ङू सीइ।
24तर प्रभुजे वचन कूम थेप् का-मुलुकने थेप्-थेप् फ्यायी। 25बारनाबास मेस्ये शाऊलदे रङ्से काम पूराचे जेनमेस्ये यरूशलेमदे ल्वाइदे। थमयूप्रे मर्कूस यब यूहन्नाये गीलीदे।
Currently Selected:
मूल स्यूस्स्यायूजे कामजे किताब 12: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
