२ कोरिन्थी 8
8
दान पीनजे लागि सेम्ने आँट पीनब
1 #
रोमी 15:26
अत-अची च्योन्यू, माकेडोनियाने ख्यब मण्डलीयूने परमेश्वरदे पीनब अनुग्रहजे पोयू ङी नमयूने स्योस्स्ये मन ख्यङ्। 2सोरो फत्या सकस्यू प्रेन्नूलीने बेस्से सेम् सूग्दे मेस्ये सोरोने फत्या दूख्प्रे क्यूल्लीने दान कूम पीनने थमयूजे सेम् सोरो यङ्दे। 3चेनेयलो थमयू रङ्सेदे पीन ख्व अनुसार मेस्ये पीन-ख्व यली थेप्ये रङ्सेजे इच्छा अनुसार पीन्दे यब पोजे गवाही ङ पीन्क्य। 4थमयूदे परमेश्वरजे पवित्र मीयूने तोङ्मेब मौका प्रेदे यदेबे ङीयूने सोरो बिन्ती चीत्दे। 5ङीदे सेम् टनेये अम्मन्नब काम थमयूदे चीत्दे, पात्ता खूम् थमयूदे रङ्से जीया परमप्रभुने पीन्दे मेस्ये परमेश्वरजे इच्छा अनुसार ङीयूने पीन्दे। 6येरेक्यूत्देबे खूम्मेस्येने तीतसदे नमयूने दान पीनने आँट पीन ख्य, मेस्ये चूजो नमयू ट्याने रदेबे हम्ब दान पीनब काम पूरा चीस्स्य यदेबे ङीदे ङूने बिन्ती चीत्दे। 7तर नमयू विश्वासने, शिक्षा पीनब कामने, ज्ञानने, साप्ता काम फरब जङ्कर्ने, मेस्ये ङीने चेब प्रेमने होरदे साप्ताकूरूने केरे सोरो ज्य क्यूप्पीन ख्यङ्, होरप्रने अम्ब दान पीनब कामनेये नमयू थेप् पीनब क्यूप्पीनूस्य यदेबे ङी सेम् चीन्न ख्यङ्।
8ङैदे अम्ब आज्ञा पीन दी, तर सूजो मीयूप्रे नमयूजे जोस् कर्देबे लेप्प नमयूजे प्रेमये तम्दम् ख्यङ् यदेबे प्रमाण पीनने ङैदे अम्ब य ख्यङ्। 9चेनेयलो ङीनजे प्रभु येशू ख्रीष्टजे अनुग्रह नमयूदे स्ये ख्यङ्, ङू फ्योबो ख्यङ्लीने नमयूजे लागि दूख्प्रे क्यूत्दे, होरदे ङू दूख्प्रे क्यूरब कामदे नमयू फ्योबो क्यूर खूस्स्य।
10अम्ब पोने ङैजे मोतो येर ख्यङ्- वर्षत्या खूम् दान पीनब काम नमयूदे सुरुत्यामे चे दी, तर हम्ब काम चेब सोरो सेम्ये चीन्न ख्य, जेम्से हम्ब काम पूरा चील्लो नमयूने सोरो ज्य क्यूक्क्य। 11हम्ब काम चेब करप्र जोस् नमयूने ख्य हम्ब अनुसार रङ्सेदे पीन ख्वब पीन्देबे अम्ब कामने पूरा ची। 12चेनेयलो पीन्तीङ्रब सेम् ख्यङ्लो, नेप्रे ख्य अनुसार पीनब दानने प्रभुदे ज्य मन्दीय, तर नेप्रे त्व अनुसार दी।
13नमयूने क्वी ले केल्देबे सूजोयूने क्वी यङ क्यूस्स्य यब ङैजे सेम् त्वो। 14तर बरेबर् क्यूरजे लागि अम्ब दीनीजे सेमेने नमयूप्रे कूम म्यूर्नबदे थमयूजे हर्जो टर्तीस्य, मेस्ये थमयूजे कूम म्यूर्नबदे नमयूजे हर्जो पूरा चीम्मीस्य। येर्बे क्वाप्रेने बरेबर् क्यूस्स्य, 15#प्रस्थान 16:18धर्मशास्त्रने येरे लिख्दीये ख्यङ्, “कूम फूङ् प्वेयूप्रे कूम लमये अन्ड, मेस्ये छीत्या फूङ् प्वेयूने हर्जोये अन्क्यूर्।”
कोरिन्थने तीतस
16ङैजे सेम्ने नमयूजे लागि कर सूर्त ख्य होरप्र सूर्त परमेश्वरदे तीतसजे सेम्ने येम्मे ख्यङ्, होरेक्यूत्देबे ङ परमेश्वरने धन्यवाद पीन्क्य। 17चेनेयलो ङैजे पो ङ्यीन्देबेत्यामे दी, तर ङूजे रङ्से इच्छा अनुसार सोरो जोसीलो क्यूत्देबे नमयू ट्याने रेन ख्यङ्। 18होरदे मण्डलीयूजे अन्द्रने सूगब खबर स्य्वेने सोरो न मीन् ख्यब च्योन् त्या ङीदे तीतसप्रे कूल्बीन ख्यङ्। 19होरदे हन्छूत्यात्या दी, तर प्रभुजे महिमाजे लागि मेस्ये ङीजे सेम् ज्य ख्यङ् यदेबे तनने, ङीदे दान फूङ् पून्नब कामने ङीप्रे प्रजे लागि मण्डलीदे ङूने सेल्दे। 20सेम् सोरो यङ्लाबे पीनब दान ङीदे चील्लीब सूदेये अम्बजे लागि दोष अन्लैदीस्य मन ख्यङ्। 21#हितोपदेश 3:4चेनेयलो ङी प्रभुजे खूम्नेत्या दी, तर मीयूजे खूम्नेये च-ज्य तङ्क्य हम्ब फरब सेम् चीक्क्य।
22थमयूप्रे ङीनजे सूजो च्योन्नेये कूल्बीन ख्यङ्, ङीदे कूम फे ङूजे कामयू लेप्प कूम पोयूने जोसीलो क्यूरब तङ्दे। ङूदे नमयू फ्याने सोरो भर्चीन्न ख्यङ् होरेक्यूत्देबे ङू सोरो थेप् जोसीलो क्यूर ख्यङ्। 23तीतसजे पो ये-यलो, ङू नमयूजे सेवाने ङैप्रे-प्रे काम फरब ख्योन् ख्यङ्, मेस्ये सूजो च्योन्यू ब ख्रीष्टने महिमा पीनजे लागि मण्डलीदे कूल्बेब दूतयू ख्यङ्। 24नमयूदे चेब प्रेम होर्दे नमयूजे बारेने ङी चेने केन् त्वे टोङ् यब पोजे प्रमाण मण्डलीयूजे खूम्ने मी क्वानेने पीन्।
Currently Selected:
२ कोरिन्थी 8: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
