२ कोरिन्थी 12
12
पावलजे दर्शन मेस्ये ङूजे ङ्वने ख्यब च्वो
1अम्बदे चैये फाइदा अन्क्यूल्लीने ङ त्वोन्न पर्ते ख्यङ्। प्रभुदे पीन्देबे प्रेब दर्शनयू मेस्ये ङूदे तम्मेब नङ्सू पोयू ङैदे येन ख्यङ्। 2ख्रीष्टने विश्वास चेब मीत्याने ङैदे स्ये ख्यङ्, परमेश्वरदे हम्ब मीने चौध वर्षखूम् पात्ता फ्याब स्वर्गसेमे चूङ्देबे कूदीदे। ङू अम्ब ङ्वसजने कूदीदे या ङ्वने ते कूदीदे, हम्ब ङैदे अन्स्ये, परमेश्वरदेत्या स्ये ख्यङ्। 3होरदे फेरि ङ यीय, हम्ब मीने ङैदे स्ये ख्यङ्, हम्ब मी ङ्वसजने कूदीदे या ङ्वने ते कूदीदे, हम्ब ङैने था त्वो, अम्ब पो परमेश्वरदेत्या स्ये ख्यङ्। 4मेस्ये स्य्वेने अङ्ख्वब पोयू हैयाने ङूदे तदे, हम्ब पो मीजे ङूर्दे यये अन्क्यूर्। 5हम्ब मीजे पोयूने ङ केन् त्वोक्क्य, तर ङ रङ्सेजे कमजोर तङब पोयूने केन् त्वोक्क्य, सूजो पोयूने केन् अन्त्वे। 6कोदेये ङ केन् त्वेब सेम् चीक्क्य यलीने ङ मूर्ख मीप्र क्यूस्से त्वो, चेनेयलो ङैदे तम्दम् पो क्यम्नब क्यूक्क्य। तर मीयूदे तङब मेस्ये तब पोयूयली थेप् सूदेये ङैने केन् अम्मन्स्य यदेबे ङ केन् त्वेब पो कूम अन्चील्लाबे टून ख्यङ्।
7तर परमेश्वरदे कूम नङ्सू पोयू ङैने तम्मीब ङ कूम केन् अन्त्वोस्स्य यदेबे ङैने सतनम् पीनने मेस्ये कूम केन् अन्त्वेब चेने शैतान्जे दूतत्या या च्वोत्या ङैजे ङ्वने येम्मीदे। 8हम्ब च्वो मल्बस्य यदेबे ङैदे प्रभुने सोम्फेसेमे बिन्ती चीत्दे। 9तर प्रभुदे ङैने यदे, “ङैजे अनुग्रह नैजे लागि सोरो कूम ख्यङ्, चेनेयलो न कमजोर क्यूप्प ङैजे बोङ्दे पूरा रुप्ने काम चीक्क्य।” येरेक्यूत्देबे ख्रीष्टजे शक्ति ङै फ्याने क्यूस्स्य यदेबे ङ कमजोर क्यून्नूली थेप् सूग्देबे केन् त्वोक्क्य। 10येरेक्यूत्देबे ख्रीष्टजे लागि बोङ् त्व क्यूप्प, मीयूदे न पूप्प, सकस्यू पर्तीब, सतनम्यूने पर्तीब, आपद्यूने पर्तीब ङ सूग्क्य। चेनेयलो कन्छ्वाब ङ बोङ् त्वब क्यूक्क्य, हन्छ्वाब ङ थेप् बोल्यो क्यूक्क्य।
कोरिन्थीयूजे लागि पावलदे चीन्नब सूर्त
11मूर्ख मीदे प्रने ङैदे चीन्न ख्यङ्। नमयूदे ङैने येरे चेने कर चङ्दे। तम्दम्ने नमयूदे ङैजे सार्या चे पर्ते ख्य। चेनेयलो ङ चैत्याये दीलीने पात्ता केन् मूल स्यूस्स्यायू यली चैपोनेये कम् त्वो। 12तम्दम्जे मूल स्यूस्स्याने क्यूरब गुणयू पूरा धेरेन् क्यूत्देबे, च्यूनूयू, हार्मन्देत्या कामयू मेस्ये शक्तिजे कामयूने ङैदे नमयूजे अन्द्रने तम्मीक ख्य। 13सूजो मण्डलीयूने यली ङैदे नमयूने चै पोने अन्ज्य चीम्मीदे स्व? ङैने हर्जो पर्तीब ङैदे नमयूने अन्स्यब पोत्या ते, अम्ब पोने नमयूदे ङैने क्षमा चीम्मी।
14जेम्से ङ नमयू ट्याने रने छ्योन्न ख्यङ्। येरे रब पोलो-सोम् क्यूक्क्य। ङैजे हर्जो टर्देजे लागि नमयूने छरङ् अम्पीन्, चेनेयलो नमयूप्रे ख्यब सेयू दी, तर ङैने नमयू चैदे ख्यङ्। चेनेयलो च-चीमीदे प-मजे लागि दी, तर प-मदे च-चीमीजे लागि रुप् पूत्देबे येक्क्य। 15ङ सोरो सूग्देबे नमयूजे लागि साप्ताने पीन्क्य, मेस्ये ङैजे जीयाये नमयूजे लागि पीन्क्य। कादेये ङैदे नमयूने कूम प्रेम चीत्दे यलो च नमयूदे ङैने छीत्या प्रेमचे औ? 16ङैजे हर्जो टर्तेजे लागि नमयूने छरङ् अम्पीन्, अम्ब ज्य पो ख्यङ्, तर ङ छट्टू क्यूत्देबे नमयूने फस्तीबे मन्न औं। 17ङैदे नमयू ट्याने कूल्बेब कोइ मीयूजे लादे नमयू फ्याने ङैदे फाइदा कीन्क औं? 18ङैदे नमयू ख्यनेने प्र यदेबे तीतसने बिन्ती चीत्दे, मेस्ये ङूप्रे च्योन्त्याने कूल्पीदे। च तीतसदे नमयू फ्याने चत्या फाइदा कीन्क औं? च ङी सेम् त्या क्यूत्देबे फर तेया? च ङीदे त्याप्र काम फर्देबे प्र तेया?
19अन्छ्वासेमे नमयूजे खूम्ने ङी रङ्से जूक्तेने अम्ब पोयू येनब मन्न औं? छेब ख्योन्यू, परमेश्वरजे खूम्ने ख्रीष्टप्रे क्यूत्देबे ङी चै पो क्यम्न ख्यङ्, हम्ब पोयू क्वाने नमयू बल्यो चेजे लागि ख्यङ्। 20ङ नमयू ट्याने रब ङैदे सेम् चीन्नप्रने नमयू ज्य क्यून्नब अन्तूने, मेस्ये नमयूदे सेम् चीन्नप्र ङैये अन्तूने यदेबे ङ सोरो फैन ख्यङ्। होने च्य-फा, ठेन, छी, रङ्सेत्यामे लेब, फ्राचे, न प्वे, केन् त्वे मेस्ये गज्याङ् गूज्यूङ् क्यूक्की मन्न ख्यङ्। 21ङ फेरि होने रब, मालाङ् पाप चेब मेस्ये अशुद्ध काम, वेश्य काम चेब मेस्ये छाडा बनीयू क्याबेने पश्चात्ताप अन्चेब कूम मीयूजे लागि ङैदे शोक् चेपर्तीने। येर्बे ङैदे पूस्तीनब परमेश्वरदे नमयूजे खूम्ने ङैने चीद चीम्मीइ च यदेबे फैन ख्यङ्।
Currently Selected:
२ कोरिन्थी 12: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
