رٛمَعٜنْ 11
11
حِنُّيٜ اَللَّه حَا إِسْرَاءِيلَ
1نغَمْ مَاجُمْ ࢨَمَنْمِ: اَللَّه وُدِنِ يِمْࢡٜ مُمْ نَ؟ نَا نٛنْ سَمْ! مِنْ بٜى حٛورٜ عَمْ مِ غٛطّٛ إِسْرَاءِيلَ، مِ دَࢩْغٛلْ إِبْرَاهِيمَ، مِ غٛطّٛ لٜࢩٛلْ بٜنْيَمِنْ#ڢِلِݠِّعٜنْ 3:5؞؞ 2اَللَّه وُدِنَايْ يِمْࢡٜ مُمْ ࢡٜ عٛ سُࢡِ دِغَ ڢُطَّمْ؞ شِڢْتٛرٜ کٛ دٜڢْتٜرٜ عَنْدِنِ دٛوْ إِلْيَاسُ غُلِّيطٛ إِسْرَاءِيلَعٜنْ حَا اَللَّه، 3عٛوِعِ: «يَا جَوْمِرَاوٛ، ࢡٜمبَرِ اَلنَّبِعٜنْ مَ، ࢡٜنغِبِّنِ کِرْسِرْطٜ مَ؞ مِنْ ڢٜىٰرٜ عَمْ لُتِّ، ࢡٜطٛنْ طَࢡَّ مبَرُغٛ يَمْ مِنْ بٛو#1 لَامِيࢡٜ 19:10،14؞؞» 4طُمٜ اَللَّه جَابِمٛ؟ عٛوِعِ: «مِلُتَّنِ حٛورٜ عَمْ وٛرْࢡٜ عُجِنٜ نجٛوٜىٰطِطٛ (7,000) ࢡٜشُجِدَنَايْ بَعَلْ#1 لَامِيࢡٜ 19:18؞؞» 5بَنَ نٛنْ جٛنْتَ بٛو: وٛودِ سُࢡَاࢡٜ سٜطَّ ࢡٜ اَللَّه لُتِّ نغَمْ دَلِيلَ مٛعّٜرٜ مُوطُمْ؞ 6تٛ شُࢡٛلْ اَللَّه دَرِنٛ دٛوْ کُوطٜ يِمْࢡٜ، ندٜنْ کَمْ مٛعّٜرٜ مَاکٛ لَاتَاکِ مٛعّٜرٜ؞
7کَدِ نٛيْ جٛنْتَ؟ کٛ إِسْرَاءِيلَعٜنْ طَࢡِّتِ، ࢡٜکٜࢡَايْ طُمْ؞ سٜيْ سُࢡَاࢡٜ اَللَّه ندٜرْ مَࢡّٜ کٜࢡِ طُمْ؞ لُتُّࢡٜ مَࢡّٜ ࢡٜسَاتَ-کٛعٜعٜنْ، 8بَنَ کٛ وِنْدَ:
«اَللَّه حٛکِّ ࢡٜ رُوحُ طٛيْنغٛلْ تٜدُّنغٛلْ؞ غِتٜ مَࢡّٜ نغِعَتَا، نٛݠِّ مَࢡّٜ بٛو نَنَتَا حَا وَرْغٛ حَنْدٜ#تٛوکْتَاکِ تَوْرٜىٰتَ 29:5؛ عٜسَايَ 29:10؞؞»
9دَاوُدَ بٛو وِعِ:
«ڢَادَ ࢩَامْدُ مَࢡّٜ لَاتَنٛ ࢡٜ تُوڢٛرْغٛلْ، ࢡٜنَسْتَ نغٛلْ،
ࢡٜندٛعّٛ، ࢡٜکٜࢡَ نغٜىٰنَارِ کُوطٜ مَࢡّٜ؞
10غِتٜ مَࢡّٜ مبُمَ نغَمْ تَا ࢡٜنغِعَ؞
ࢡَاوٜ مَࢡّٜ تُرٛ ڢٛرٛيْ#جَبُورَ 69:23-24؞؞»
وَلَا دَلِيلَ مَوْنِتَاغٛ
11نغَمْ مَاجُمْ ࢨَمَنْمِ: طُمْ وَطِ إِسْرَاءِيلَعٜنْ نٛنْ نغَمْ حَا ࢡٜݠٜرْغٛ، ࢡٜندٛعّٛ نَ؟ نَا نٛنْ سَمْ! نغَمْ دَلِيلَ عَيْبٜ مَࢡّٜ، يِمْࢡٜ عُمَّاتٛوجٜ غٛطّٜ کٜࢡِ کِسْندَمْ؞ اَللَّه وَطِ طُمْ نغَمْ حَا عٛعُمِّنَ کَاجَلْ إِسْرَاءِيلَعٜنْ؞ 12عَيْبٜ مَࢡّٜ وَدَّنِ عُمَّاتٛوجٜ بَرْکَاجِ طُوطِّ، عَسَرْ مَࢡّٜ لَاتِ رِسْکُ عُمَّاتٛوجٜ؞ سَکّٛمَا تٛ إِسْرَاءِيلَعٜنْ ڢُو تُوبِ، ندٜنْ کَمْ بَرْکَاجِ ࢡٜسْدَنْ طُوطُغٛ مَسِنْ!
13عٛنٛنْ عُمَّاتٛوجٜ غٛطّٜ، جٛنْتَ مِطٛنْ وٛلْوَنَ عٛنْ: مِنْ وٛنِ نٜلَاطٛ حَا عُمَّاتٛوجٜ غٛطّٜ، نغَمْ مَاجُمْ مِطٛنْ سَمْطِنَ کُوغَلْ عَمْ بٛو؞ 14مِتَمِّ بٜى مَاغَلْ مِحٜࢡَتَ عُمِّنْغٛ کَاجَلْ يِمْࢡٜ لٜࢩٛلْ عَمْ، حَا مِحِسْنَ وٛطْࢡٜ مَࢡّٜ؞ 15سَاعِ ࢡٜنغُدِنَ، دُنِيَارُ ڢُو حٜࢡِ سُلْحٛتِرَلْ بٜى اَللَّه؞ کَدِ طُمٜ وَطٛتٛ تٛ اَللَّه جَࢡِ ࢡٜ ڢَحِنْ؟ ࢡٜلَاتٛتٛ بَنَ عُمِّتِنَاࢡٜ دِغَ مَايْدٜ!
16تٛ غٛطّٛ لِيعَنَکٜ اَللَّه تَمْسٜىٰرٜ عَارْتُندٜ، تَمْسٜىٰجٜ لُتُّطٜ ڢُو طٜ شٜنَاطٜ؞ تٛ طَطِ لٜکِّ لَاتَنَکٜ اَللَّه، ندٜنْ کَمْ لِشٜ بٛو کَنغْکٛ جٜيِ؞ 17إِسْرَاءِيلَ نَنْدِ بٜى جَيْتُنْحِ جَرْنٜ؞ لِشٜ غٛطّٜ تَعَامَ حَا مَاکِ؞ عٛنٛنْ عٛنْ نَسْتِنَاࢡٜ حَا ݠٜلّٜلْ مَاجٜ بَنَ لِشٜ کٜسٜ عِوْطٜ جَيْتُنْحِ لَدّٜىٰحِ؞ عٛنْ کَوْتِ بٜى لِشٜ لُتُّطٜ، عٛنْ طٛنْ کٜࢡَ سٜمْبٜ دِغَ طَطٛلْ جَيْتُنْحِ جَرْنٜ؞ 18نغَمْ مَاجُمْ تَا نجَوٜ لِشٜ تَعَاطٜ غٛ؞ عٛنْ نغَلَا دَلِيلَ مَوْنِتَاغٛ؞ نغَمْ نَا عٛنٛنْ نجٛغِ طَطٛلْ، عَمَّا طَطٛلْ جٛغِ عٛنْ؞
19تٜىٰمَ عٛنْ مبِعَنْ جٛنْتَ: «لِشٜ مَنْ تَعَامَ نغَمْ حَا مِنْ نَسْتَ ݠٜلّٜلْ مَاجٜ؞» 20غٛونغَ کَمْ، عَمَّا طٜ تَعَامَ نغَمْ طٜ شَلِ نُطِّنْغٛ؞ عٛنٛنْ بٛو عٛنْ تَبِتِنَامَ نغَمْ عٛنْ نُطِّنِ؞ نغَمْ مَاجُمْ تَا مَوْنِتٜ؞ ندِکَّ عٛنْ کُلَ؞ 21نغَمْ اَللَّه عٜنْطَايْ إِسْرَاءِيلَعٜنْ، کٛو ندٜ ࢡٜ لِشٜ عَسْلِيجٜ؞ کَدِ عٛنْ تَمِّ عٛعٜنْطَنْ عٛنْ نَ؟ نغَمْ مَاجُمْ سٜيْ کَکِّلٛنْ؞ 22ندَارٜ مبٛوطٜىٰنغَ اَللَّه عٜ شَاتَلْ مُمْ ڢُو؞ عٛطٛنْ سَاتَنَ عَشُّࢡٜ مٛ، عَمَّا عٛطٛنْ وٛونَنَ عٛنْ ندٜ عٛنْ طٛنْ تَبِتِ ندٜرْ مبٛوطٜىٰنغَ مَاکٛ؞ تٛ نَا نٛنْ، عٛنٛنْ بٛو عٛنْ تَعٜتٜىٰࢡٜ؞ 23تٛ إِسْرَاءِيلَعٜنْ لٛرْتَکٜ، نُطِّنِ، ندٜنْ کَمْ اَللَّه نَسْتِنَنْ ࢡٜ ڢَحِنْ ندٜرْ جَيْتُنْحِ، نغَمْ اَللَّه وٛودِ بَاوْطٜ وَطْغٛ طُمْ؞ 24ندٜ اَللَّه تَعِ عٛنْ دِغَ جَيْتُنْحِ لَدّٜىٰحِ، نَسْتِنِ عٛنْ جَيْتُنْحِ جَرْنٜ، طُمْ لُوتِ طَبِيَ تَغْدِ ڢُو؞ تٛ نٛنْ کَمْ، طُمْ کٛيْطُمْ حَا اَللَّه نَسْتِنَ لِشٜ عَسْلِيجٜ ڢَحِنْ ندٜرْ جَيْتُنْحِ کِ طٜ عِوِ حَا مُوطُمْ؞
بٛعِّتِنْکِ إِسْرَاءِيلَ
25دٜىٰرْطِرَاࢡٜ عَمْ، مِيِطِ وَنغِنَنْغٛ عٛنْ سِرِّ، نغَمْ تَا ندَارٛنْ کٛعٜ مٛنْ بَنَ عٛنْ حِکْمَعٜنْ؞ إِسْرَاءِيلَعٜنْ وٛطْࢡٜ لَاتِ سَاتَ-کٛعٜعٜنْ؞ عَمَّا طُمْ تِمَّنْ تٛ لِمْغَلْ سُࢡَاࢡٜ اَللَّه عِوْࢡٜ دِغَ عُمَّاتٛوجٜ غٛطّٜ شِکِ؞ 26ندٜنْ کَمْ إِسْرَاءِيلَ ڢُو حِسَنْ، بَنَ کٛ وِنْدَ:
«کِسْنٛووٛ وَرَنْ دِغَ حٛوسٜىٰرٜ سِيٛنَ،
عِتَّنْ غٜدَّلْ يِمْࢡٜ يَعْقُوبُ ڢُو#عٜسَايَ 59:20؞؞
27کَنْجُمْ وٛنِ عَلْکَوَلْ عَمْ بٜى مَࢡّٜ،
سَاعِ عِتَّنْمِ عَيْبٜىٰجِ مَࢡّٜ#يٜرٜمِيَ 31:33-34؞؞»
28کَمْࢡٜ ࢡٜنجَࢡَايْ لِنْجِيلَ، ࢡٜلَاتَکٜ کٛنّٜعٜنْ اَللَّه، نغَمْ حَا کٜࢡٛنْ نَنُغٛ لِنْجِيلَ؞ عَمَّا، ࢡٜ يِطَاࢡٜ اَللَّه نغَمْ عٛسُࢡِ ࢡٜ دَلِيلَ کَاکِرَاࢡٜ مَࢡّٜ؞ نغَمْ مَاجُمْ ࢡٜ يِطَاࢡٜ مَاکٛ؞ 29نغَمْ اَللَّه حٛوسِتِتَّ دٛکّٜ مُوطُمْ، ڢَاسِتِتَّا عٜوْنَاندُ مُوطُمْ؞ 30ࢡٛويْمَ، عٛنٛنْ عٛنْ طٛوْتَنَاکِنٛ اَللَّه؞ عَمَّا جٛنْتَ عٛنْ کٜࢡِ عٜنْطَمْ مُوطُمْ، نغَمْ يَحُودُعٜنْ طٛوْتَنَاکِمٛ؞ 31بَنَ نٛنْ جٛنْتَ، کَمْࢡٜ بٛو، ࢡٜشَلِ طٛوْتَنَاغٛ اَللَّه مٛ عٜنْطِ عٛنْ نغَمْ حَا کَمْࢡٜ بٛو ࢡٜکٜࢡَ عٜنْطَمْ طَعَمْ؞ 32اَللَّه حَࢡِّ يِمْࢡٜ ڢُو ندٜرْ سٛويْندٜ طٛوْتَارٜ، نغَمْ عٛمُويِ عٜنْطُغٛ ࢡٜ ڢُو؞
تٜدُّنغَلْ اَللَّه
33کَيْ! جٜيْنِتَارٜ اَللَّه طُوطِ مَسِنْ! ڢَامُ مَاکٛ عٜ عَنْدَلْ مَاکٛ کٜࢡْتَتَاکٜ؞ مٛيْ ڢٛتِ لِࢩُغٛ عَنِّيَاجِ اَللَّه؟ مٛيْ ڢَامَتَ لَابِ مَاکٛ#عٜسَايَ 55:8؞؟ 34دٜڢْتٜرٜ وِعِ:
«مٛيْ عَنْدِ نُمٛوجِ جَوْمِرَاوٛ؟
مٛيْ لَاتِ دَوْرٛووٛ مَاکٛ#عٜسَايَ 40:13؞؟
35مٛيْ عَارْتِ حٛکُّغٛ مٛ حُوندٜ نغَمْ حَا حٜࢡَ مبَرْجَارِ#أَيُوبَ 41:3؞؟»
36اَللَّه تَغِ کُوجٜ ڢُو؞ حَا مَاکٛ طٜ عِوِ، طٜ طٛنْ نغَمْ مَاکٛ؞ تٜدُّنغَلْ لَاتَنٛ مٛ حَا ڢٛرٛيْ؞ عَامِينَ#1 کٛرِنْتُعٜنْ 8:6؞!
Currently Selected:
رٛمَعٜنْ 11: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
