لِمْلٜ 20

تُورْتٛلْ إِسْرَاءِيلَعٜنْ حَا کَادٜسْ

(غُرْتَاکِ 17‏:1‏-7)

1ندٜرْ لٜوْرُ عَرَنْدُ، يِمْࢡٜ جَمَعَارٜ إِسْرَاءِيلَ ڢُو نجٛتِّ لَدّٜ شِينْ؞ ࢡٜشَنغِنِ حَا کَادٜسْ؞ مِرِيَمْ مَايِ، ࢡٜعُوِمٛ تٛنْ؞

2يِمْࢡٜ جَمَعَارٜ حٜࢡَايْ ندِيَمْ؞ نغَمْ مَاجُمْ ࢡٜمٛوࢡٛتِرِ دٛوْ مُوسَى عٜ هَـٰرُونَ؞ 3ࢡٜنجٛکِّرِ بٜى مُوسَى، ࢡٜمبِعِ‏: «تٛ مِنْ کَلْکِنٛ سَاعِ بَنْدِرَاࢡٜ عَمِنْ کَلْکَ يٜىٰسٛ جَوْمِرَاوٛ ࢡُرِ‏! 4کٛنِ نغَدُّطٛنْ مٛوࢡْتٛرْدٜ جَوْمِرَاوٛ ندٜرْ لَدّٜ ندٜعٜ؟ حَا مِنْ مَايَ عٜ دَبَّاجِ عَمِنْ بٛو مبَاتَ‏! 5کٛنِ نغُرْتِنْطٛنْ مِنْ لٜسْدِ مِصْرَ، نغَدُّطٛنْ مِنْ حَا نٛکُّورٜ حَلُّندٜ ندٜعٜ؟ مِنْ کٜࢡَتَا عَاوُغٛ حَا طٛ، وَلَا عِبّٜ، وَلَا عِنَبٛوجٜ، وَلَا رُمَّانٛوجٜ؞ کٛو ندِيَمْ حَا مِنْ نجَرَ بٛو وَلَا؞» 6مُوسَى عٜ هَـٰرُونَ عَشِّ جَمَعَارٜ، نجٜحِ حَا دَمُّغَلْ لَيْمَارُ ڢٛتِّرْدٜ، شُجِدِ تٛنْ؞ تٜدُّنغَلْ جَوْمِرَاوٛ وَنغَنِ ࢡٜ؞

7جَوْمِرَاوٛ وِعِ مُوسَى‏: 8«حٛوعُ سَوْرُ مَ؞ عَنْ عٜ دٜىٰرْطَ هَـٰرُونَ، مٛوࢡْتٜ جَمَعَارٜ؞ مبٛلْوَنٜ تَݠَارٜ ندٜعٜ يٜىٰسٛ يِمْࢡٜ ڢُو، حَا ندٜ عِلْنَ ندِيَمْ؞ بَنَ نٛنْ نغُرْتِنِرْتٛنْ ندِيَمْ حَا تَݠَارٜ حَا يِمْࢡٜ نجَرَ، عٛنْ نجَرْنَ دَبَّاجِ بٛو؞» 9مُوسَى يٜحِ، حٛوعِ سَوْرُ وٛنْدُ يٜىٰسٛ جَوْمِرَاوٛ بَنَ عٛعُمْرُنٛ مٛ؞

10مُوسَى عٜ هَـٰرُونَ مٛوࢡْتِ يِمْࢡٜ يٜىٰسٛ تَݠَارٜ مَنْ؞ مُوسَى وِعِ ࢡٜ‏: «نَنٜ، عٛنٛنْ تُورْتٛوࢡٜ‏! مِنْ نغُرْتِنَنَنْ عٛنْ ندِيَمْ دِغَ تَݠَارٜ ندٜعٜ نَ؟» 11ندٜنْ عٛࢡَنغْتِ جُنغٛ مَاکٛ، عٛڢِيِ تَݠَارٜ بٜى سَوْرُ مَاکٛ ندٜ طِطِ؞ ندِيَمْ طُوطَّمْ وُرْتِ، عُمَّاتٛورٜ عٜ دَبَّاجِ ڢُو نجَرِ؞

مُوسَى نَسْتَتَا کَنَانَ

12عَمَّا جَوْمِرَاوٛ ڢٜلِ مُوسَى عٜ هَـٰرُونَ، وِعِ ࢡٜ‏: «عٛنْ نُطِّنَايْ يَمْ، عٛنْ شٜىٰدَايْ سٜنَارٜ عَمْ يٜىٰسٛ إِسْرَاءِيلَعٜنْ؞ نغَمْ مَاجُمْ عٛنْ نَسْتِنْتَا ࢡٜ ندٜرْ لٜسْدِ ندِ ندٛکَّنْمِ ࢡٜ؞» 13کَنْجُمْ وٛنِ ندِيَمْ مٜرِبَ#20‏:13 مٜرِبَ يِطِ وِعْغٛ جٛکِّرْغٛلْ؞ حَا إِسْرَاءِيلَعٜنْ نجٛکِّرِ بٜى جَوْمِرَاوٛ، کَنغْکٛ بٛو عٛوَنغِنَنِ ࢡٜ سٜنَارٜ مَاکٛ؞

لَامِيطٛ عٜدٛومْ حَطِ إِسْرَاءِيلَعٜنْ سَالَاغٛ

14مُوسَى نٜلِ نٜلَاࢡٜ دِغَ کَادٜسْ حَا لَامِيطٛ عٜدٛومْ، ࢡٜمبِعَ مٛ‏: «ندَا کٛ دٜىٰرْطِرَاوٛ مَاطَ إِسْرَاءِيلَ وِعِ‏: عَعَنْدِ تٛرَّ کَ حٜࢡِ مِنْ ڢُو؞ 15کَاکِرَاࢡٜ عَمِنْ نجٜحِ مِصْرَ، مِنْ نجٛوطِ تٛنْ دُوࢡِ طُوطِّ؞ مِصْرَعٜنْ تٛرِّ مِنْ عٜ کَاکِرَاࢡٜ عَمِنْ؞ 16مِنْ تٛرِ جَوْمِرَاوٛ؞ عٛجَࢡِ تٛرْندٜ عَمِنْ، عٛنٜلِ مَلَاعِکَاجٛ غُرْتِنْطٛ مِنْ مِصْرَ؞ جٛنْتَ مِنْ طٛنْ حَا وُرٛ کَادٜسْ، حَا کٜىٰرٛلْ مَرَلْ مَ؞ 17مِنْ نغِطِ سَالَاغٛ لٜسْدِ مَ، تٛ عَجَࢡِ، مِنْ نَسْتَتَا غٜسٜ عَلْکَمَارِ مَلَّ غٜسٜ عِنَبٛوجٜ، مِنْ نجَرَتَا ندِيَمْ حَا ࢡُلِّ مٛنْ بٛو؞ مِنْ تٛکّٛتٛ بُووٛلْ مَنغٛلْ، مِنْ شٜلَتَا نغٛلْ کٛو حَا ࢩَامٛ مَلَّ حَا نَنٛ، حَا تٛ مِنْ شَالَکٜ مَرَلْ مَ؞»

18عَمَّا لَامِيطٛ عٜدٛومْ جَابِ‏: «عٛنْ شَالَتَاکٛ لٜسْدِ عَمْ؞ تٛ عٛنْ نغَرِ، مِنْ کِݠّٛتٛ عٛنْ بٜى کَاڢَاجٜ‏!» 19إِسْرَاءِيلَعٜنْ مبِعِ‏: «مِنْ تٛکّٛتٛ بُووٛلْ کَدِ؞ تٛ دَبَّاجِ عَمِنْ مَلَّ مِنِنْ بٜى کٛعٜ عَمِنْ مِنْ نجَرِ ندِيَمْ مٛنْ، مِنْ نجٛࢡَنْ طَمْ؞ وَلَا کٛ مِنْ نغِطِ، سٜيْ سَالَاغٛ تَنْ؞» 20عَمَّا عٛجَابِ‏: «عٛنْ شَالَتَاکٛ سَمْ‏!» ندٜنْ جَمَعَارٜ کٛنُ عٜدٛومِعٜنْ طُوطْندٜ، سٜمْبِطْندٜ وُرْتِ نغَمْ ڢٛتُّغٛ بٜى إِسْرَاءِيلَعٜنْ؞ 21بَنَ نٛنْ عٜدٛومِعٜنْ کَطِرِ ࢡٜ سَالَاغٛ مَرَلْ مُوطُمْعٜنْ؞ إِسْرَاءِيلَعٜنْ شٜلِ، تٛکِّ لَاوٛلْ غٛطْنغٛلْ؞

مَايْدٜ هَـٰرُونَ

22جَمَعَارٜ إِسْرَاءِيلَ ڢُو عُمِّ کَادٜسْ، وَرِ لٜسْ حٛوسٜىٰرٜ حٛرْ، 23حَا کٜىٰرٛلْ لٜسْدِ عٜدٛومْ؞ تٛنْ جَوْمِرَاوٛ وِعِ مُوسَى عٜ هَـٰرُونَ‏: 24«هَـٰرُونَ نَسْتَتَا لٜسْدِ ندِ ندٛکُّمِ إِسْرَاءِيلَعٜنْ نغَمْ عٛنْ تُورْتَنِ عُمْرٛورٜ عَمْ حَا ندِيَمْجِ مٜرِبَ؞ عٛحَوْتٛيَنْ بٜى يِمْࢡٜ لٜعِ مَاکٛ؞ 25عَنْ مُوسَى، وَعّٛدَ بٜى هَـٰرُونَ عٜ ࢡِيِيکٛ عٜلِعَزَارُ دٛوْ حٛوسٜىٰرٜ حٛرْ؞ 26ࢡٛرْتُ هَـٰرُونَ لِمْشٜ مُمْ، ࢡٛرْنُ طٜ ࢡِيِيکٛ عٜلِعَزَارُ، نغَمْ هَـٰرُونَ مَايَنْ تٛنْ، عٛحَوْتٛيَنْ بٜى يِمْࢡٜ مَاکٛ؞» 27مُوسَى وَطِ بَنَ جَوْمِرَاوٛ عُمْرِمٛ؞ ࢡٜمبَعِّ دٛوْ حٛوسٜىٰرٜ حٛرْ غِتٜ جَمَعَارٜ ڢُو؞ 28مُوسَى ࢡٛرْتِ هَـٰرُونَ لِمْشٜ لِمَنْکُ، ࢡٛرْنِ طٜ عٜلِعَزَارُ؞ هَـٰرُونَ مَايِ تٛنْ دٛوْ يٜىٰرٜىٰرٜ حٛوسٜىٰرٜ؞ ندٜنْ مُوسَى عٜ عٜلِعَزَارُ نجِݠِّ؞ 29ندٜ جَمَعَارٜ ڢَامِ هَـٰرُونَ مَايِ، إِسْرَاءِيلَعٜنْ ڢُو مبٛيِمٛ ࢩَلْطٜ شَݠَّنْطٜ تَتِ؞

Currently Selected:

لِمْلٜ 20: داَ

Highlight

Copy