لِمْلٜ 10
10
لُوٜ شَرْدِ
1جَوْمِرَاوٛ وِعِ مُوسَى: 2«سٜيْ عَوَطَ لُوٜ طِطِ کُووْرَاطٜ بٜى شَرْدِ طُوطْندِ؞ عَحُووْتِنِرَ طٜ نغَمْ مٛوࢡْتُغٛ جَمَعَارٜ عٜ نغَمْ عٜغُّکِ بٛو؞ 3تٛ ࢡٜݠُوڢِ لُوٜ طِطِ ڢُو، جَمَعَارٜ ڢُو مٛوࢡٛ کٛمْبِ مَ حَا نَسْتِرْدٜ لَيْمَارُ ڢٛتِّرْدٜ؞ 4تٛ ࢡٜݠُوڢِ لُوَلْ غٛوتَلْ، سٜيْ عَرْدِيࢡٜ لٜعِ، عَرْدِيࢡٜ عُجِنٜىٰجٜ إِسْرَاءِيلَ تَنْ مٛوࢡٛتٛ کٛمْبِ مَاطَ؞ 5تٛ لُوٜ ݠُوڢَامَ عَرَنْدٜ، ڢُوڢْرٜ کٛنُ، لٜعِ غٛنْطِ حَا سَنغٜىٰرٜ ڢُونَانغٜ عُمّٛ؞ 6تٛ طٜ ݠُوڢَامَ طِطَوْرٜ، ڢُوڢْرٜ کٛنُ، لٜعِ غٛنْطِ حَا سَنغٜىٰرٜ ڢٛمْبِنَ عُمّٛ؞ تٛ عٛنْ نغِطِ عُمِّنْغٛ شَنغٜىٰجٜ، ݠُوڢٜ ڢُوڢْرٜ کٛنُ؞ 7عَمَّا نغَمْ مٛوࢡْتُغٛ يِمْࢡٜ، تَا ݠُوڢٜ ڢُوڢْرٜ کٛنُ؞ 8لِمَنْعٜنْ ࢡِࢡّٜ هَـٰرُونَ ݠُوڢَتَ لُوٜ طٜعٜ؞ طُمْ لَاتٛتٛ ڢَرِلَّ ندُومِيکَ نغَمْ مٛوطٛنْ عٜ نغَمْ غِدٜ مٛنْ ڢُو؞
9«تٛ عٛنْ نَسْتِ حَࢡْرٜ ندٜرْ لٜسْدِ مٛوطٛنْ بٜى کٛنّٜعٜنْ کِݠِّيࢡٜ عٛنْ، ݠُوڢٜ ڢُوڢْرٜ کٛنُ بٜى لُوٜ مَنْ؞ ندٜنْ کَمْ مِنْ جَوْمِرَاوٛ اَللَّه مٛنْ مِسِڢْتٛرَنْ عٛنْ، مِحِسْنَ عٛنْ جُوطٜ مَࢡّٜ؞ 10بَنَ نٛنْ بٛو، ندٜرْ ࢩَلَادٜ سٜيٛ مٛنْ، ندٜرْ جُولْدٜ حَکُّندٜ لٜبِّ، ݠُوڢٜ لُوٜ مَنْ سَاعِ عٛنْ طٛنْ لِيعَنٛ يَمْ غُلٜتٜىٰطِ مٛنْ عٜ کِرْسٜتٜىٰطِ مٛنْ نغَمْ کَوْتَلْ يِمْࢡٜ بٜى عَمْ؞ ندٜنْ مِسِڢْتٛرَنْ عٛنْ؞ مِنْ وٛنِ اَللَّه جَوْمِرَاوٛ مٛنْ؞»
عُمَّاکِ إِسْرَاءِيلَعٜنْ دِغَ لَدّٜ سِنَ
11ندٜرْ ندُوࢡُ طِطَࢡُ، لٜوْرُ طِطَࢡْرُ، ࢩَنْدٜ نٛوغَسْرٜ مَارُ، رُولْدٜ عُمِّ، عَشِّ جٛوطٛرْدٜ سٜىٰدَمْکُ عَلْکَوَلْ؞ 12إِسْرَاءِيلَعٜنْ عُمِّ، ندِلِّ لَدّٜ سِنَ، مٛوࢡٜ مَࢡّٜ طٛنْ تٛکِّندِرِ؞ رُولْدٜ جِݠِّ ندٜرْ لَدّٜ ݠَرَنْ؞ 13جَحَانغَلْ مَࢡّٜ ڢُطِّ دٛوْ عُمْرٛورٜ ندٜ جَوْمِرَاوٛ عُمْرُنٛ بٜى حُنْدُکٛ مُوسَى؞
14يٜࢡْرٜ يَحُودَ بٜى تُوتَوَلْ مُمْ عَارْتِ عُمَّاغٛ، ڢٛدّٜ مٛوࢡٜ کٛنُ مُمْ؞ نَحَسُنُ ࢡِي عَمِّنَدَبُ طٛوِ حٛنٛوࢡٜ مَارٜ؞ 15نَتَنٜيٜلْ ࢡِي شُعَرْ طٛوِ مٛوࢡْرٜ کٛنُ لٜࢩٛلْ عِسَّکَرْ؞ 16عٜلِيَبُ ࢡِي حٜلٛنْ بٛو طٛوِ مٛوࢡْرٜ کٛنُ لٜࢩٛلْ زَبُلٛنْ؞
17ندٜنْ ࢡٜتَغِّ جٛوطٛرْدٜ جَوْمِرَاوٛ؞ غٜرْسٛنِعٜنْ عٜ مٜرَارِعٜنْ ندٛونْدِ ندٜ، ندٜنْ ࢡٜعُمِّ؞
18ندٜنْ يٜࢡْرٜ رُبٜنْ بٜى تُوتَوَلْ مُمْ عُمِّ، ڢٛدّٜ مٛوࢡٜ کٛنُ مُمْ؞ عٜلِشُرُ ࢡِي سٜدٜوُرْ طٛوِ مٛوࢡْرٜ کٛنُ مَارٜ؞ 19سٜلُمِيٜلْ ࢡِي شُرِسَدَّيْ طٛوِ جَمَعَارٜ کٛنُ لٜࢩٛلْ سِمٜيٛنْ؞ 20عٜلِيَسَڢْ ࢡِي دٜعُوٜلْ بٛو طٛوِ مٛوࢡْرٜ کٛنُ لٜࢩٛلْ غَدَ؞
21ندٜنْ کٜحَتِعٜنْ ندٛونْدِ کُوجٜ شٜنِيطٜ، ࢡٜعُمِّ؞ جٛوطٛرْدٜ بٛو طٛنْ دَرْنٜ حِدّٜ ࢡٜنجٛتّٛ؞
22ندٜنْ يٜࢡْرٜ عٜڢْرَيِمْ بٜى تُوتَوَلْ مُمْ عُمِّ، ڢٛدّٜ مٛوࢡٜ کٛنُ مُمْ؞ عٜلِيسَمَ ࢡِي عَمِّحُدُ طٛوِ مٛوࢡْرٜ کٛنُ مَارٜ؞ 23غَمَلِيٜلْ ࢡِي ݠٜدَشُرُ طٛوِ مٛوࢡْرٜ کٛنُ لٜࢩٛلْ مَنَسَّ؞ 24عَبِدَنْ ࢡِي غِدِعٛنِ بٛو طٛوِ مٛوࢡْرٜ لٜࢩٛلْ بٜنْيَمِنْ؞
25حَا ࢡَاوٛ، يٜࢡْرٜ دَنْ بٜى تُوتَوَلْ مُمْ عُمِّ، ڢٛدّٜ مٛوࢡٜ کٛنُ مُمْ؞ عَحِعٜزٜرْ ࢡِي عَمِّسَدَّيْ طٛوِ مٛوࢡْرٜ کٛنُ مَارٜ؞ 26ݠَغِيٜلْ ࢡِي عٛکْرَنْ طٛوِ مٛوࢡْرٜ کٛنُ لٜࢩٛلْ عَسٜرْ؞ 27عَحِيرَ ࢡِي عٜنَنْ بٛو طٛوِ مٛوࢡْرٜ کٛنُ لٜࢩٛلْ نٜڢْتَلِ؞ 28مٛوࢡٜ إِسْرَاءِيلَعٜنْ تٛکِّندِرِ بَنَ نِي، کٛو ندٜيٜ ࢡٜعُمِّ ڢُو؞
29مُوسَى وِعِ عٜىٰکِرَاوٛ مُمْ حٛبَبْ ࢡِي رٜعُوٜلْ#10:29 عِنْدٜ رٜعُوٜلْ وٛطْندٜ يٜتِرٛ؞ لَارْ غُرْتَاکِ 3:1؞ مٜدِيَنِيجٛ: «مِنْ طٛنْ ندِلَّ حَا نٛکُّورٜ ندٜ جَوْمِرَاوٛ عِينَنِ مِنْ؞ يَحْدُ بٜى عَمِنْ؞ مِنْ مبٛونَنْتٜ، نغَمْ جَوْمِرَاوٛ وِعِ عٛوٛونَنَنْ إِسْرَاءِيلَ؞» 30حٛبَبْ جَابِ: «مِيَحْدَتَا بٜى مٛوطٛنْ، عَمَّا مِلٛرٛتٛ حَا لٜسْدِ عَمْ عٜ حَا بَنْدِرَاࢡٜ عَمْ؞» 31مُوسَى تِطِّنِمٛ، وِعِ: «عُسٜنِ، تَا عَشُّ مِنْ، نغَمْ عَنْ عَنْدِ نٛکُّوجٜ ندٜرْ لَدّٜ حَا مِنْ تَمِّ سَنغِنغٛ، عَلَاتٛ طٛوٛووٛ مِنْ؞ 32تٛ عَيَحْدِ بٜى عَمِنْ، عَنَڢْتٛرْتٛ بٛو مبٛوطٜىٰنغَ نغَ جَوْمِرَاوٛ تَمِّ وَطَنْغٛ مِنْ؞»
33إِسْرَاءِيلَعٜنْ عُمِّ دِغَ حٛوسٜىٰرٜ جَوْمِرَاوٛ، مبَطِ ࢩَلْطٜ تَتِ دٛوْ لَاوٛلْ؞ سُنْدُکْرُ عَلْکَوَلْ جَوْمِرَاوٛ طٛنْ عَرْدِ ࢡٜ، وَطِ کَࢩُمْ بٛو ࢩَلْطٜ تَتِ دٛوْ لَاوٛلْ نغَمْ تٜڢَنغٛ ࢡٜ ݠٜلّٜلْ سِوْتَارٜ؞ 34بٜى ࢩَلَوْمَ، رُولْدٜ جَوْمِرَاوٛ طٛنْ دٛوْ مَࢡّٜ وَکَّتِ ࢡٜطٛنْ نغُرْتٛ سَنغٜىٰرٜ؞ 35ندٜ سُنْدُکْرُ عَلْکَوَلْ عُمِّ ڢُو، مُوسَى وِعَ:
«عُمَّ، يَا جَوْمِرَاوٛ،
حَا کٛنّٜعٜنْ مَ شَنغْکِتٛ،
وَࢩْࢡٜ مَ ندٛغَّ يٜىٰسٛ مَاطَ!»
36تٛ سُنْدُکْرُ دَرَکٜ بٛو، عٛوِعَ:
«يَا جَوْمِرَاوٛ، لٛرْتَ
حَا جَمَعَارٜ إِسْرَاءِيلَ طُوطْندٜ ندٜعٜ!»
Currently Selected:
لِمْلٜ 10: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
