مِکَ 7

بٛجِّ اَلنَّبِيجٛ

1کَيْتٛ‏! مِطٛنْ بَنَ غٛطّٛ جَحَنْطٛ تٜࢡُغٛ ࢡِࢡّٜ لٜطّٜ سَاعِ عِتُّغٛ کٛ لُتِّ حَا غٜسٜ عِنَبٛوجٜ وَکَّتِ تٜࢡْکِ‏: وَلَا عِنَبٛورٜ حَا مِࢩَامَ سَمْ‏! وَلَا عِبّٜرٜ عَارْتُندٜ ندٜ ࢡٜرْندٜ عَمْ يٜنْوَتَ‏! 2حٛولَاࢡٜ نغَلَا ندٜرْ لٜسْدِ، وَلَا غٛونغْطُࢡٜ شَکَ يِمْࢡٜ؞ ࢡٜ ڢُو ࢡٜطٛنْ مبَالْتٛ نغَمْ رُڢُغٛ ࢨِيࢨَمْ، کٛو مٛيْ مَࢡّٜ طٛنْ لٛوحٛ دٜىٰرْطُمْ بٜى تُوڢٛرْغٛلْ؞ 3جُوطٜ مَࢡّٜ عَنْدِ وَطُغٛ کَلُّطُمْ مَسِنْ؞ عَرْدِيࢡٜ عٜ حِيتٛوࢡٜ طٛنْ ࢨَمَ دٛکّٜ، مَوْࢡٜ طٛنْ مبَنغِنَ سُونٛ مُوطُمْعٜنْ؞ 4وٛوطَ-غِکُّوجٛ شَکَ مَࢡّٜ نَنْدِ بٜى وُمْرٜ غِعٜ؞ غٛونغْطُطٛ مَࢡّٜ ࢡُرِ وُمْرٜ غِعٜ حَلُّغٛ؞ ࢩَلَادٜ کِيتَ ندٜ عَيْنٛوࢡٜ مٛنْ مبِعْنٛ عٛنْ طٛنْ وَرَ؞ ندٜنْ کَمْ سَکْلٜرٜ حٛوعَنْ عٛنْ؞ 5تَا نُطِّنْ سٛوبَاجٛ مَ، تَا حٛولَ بٛووْرَاطٛ مَ‏! عَيْنُ حُنْدُکٛ مَ کٛو يٜىٰسٛ دٜبّٛ مَ غِطَاطٛ؞ 6نغَمْ ࢡِطّٛ غٛرْکٛ يَوٛتٛ بَابَ مُمْ، ࢡِطّٛ دٜبّٛ عُمَّنْتٛ دَادَ مُمْ، دٜبّٛ بٛو عُمَّنْتٛ عٜسُمْ دٜبّٛ؞ يِمْࢡٜ سَارٜ غٛطّٛ لَاتٛتٛ وَࢩْوَࢩْࢡٜ مُمْ#مَتَّ 10‏:35‏-36؛ لُکَ 12‏:53؞؞

تَمُّندٜ عُرُسَلِيمَ

7عَمَّا مِنْ، غَلْ جَوْمِرَاوٛ مِتِيتٛتٛ، مِطٛنْ تَمّٛرٛ اَللَّه مٛ حِسْنَتَمْ، اَللَّه عَمْ نَنَتَمْ؞ 8عَنْ کٛنّٜىٰجٛ عَمْ، تَا سٜيٛرَ دٛعّٜرٜ عَمْ‏! نغَمْ کٛو تٛ مِدٛعَّکٜ، مِعُمّٛتٛ‏! کٛو تٛ مِطٛنْ جٛوطِ ندٜرْ ࢩِࢡْرٜ، جَوْمِرَاوٛ وٛنِ أَلنّٛورَ عَمْ‏! 9سٜيْ مِࢡُسَ تِکّٜرٜ جَوْمِرَاوٛ، نغَمْ مِوَطِ حَکّٜ دٛوْ مَاکٛ، حَا تٛ عٛجِنغِ يَمْ، عٛتَبِتِنِ غٛونغَ عَمْ؞ عٛوُرْتِنْتَمْ حَا أَلنّٛورَ نغَمْ مِلَارَ عَدِلَاکُ مَاکٛ؞ 10کٛنّٜىٰجٛ عَمْ يِعَنْ طُمْ، سٜمْتَنْ، کَنغْکٛ بِعْنٛوطٛ يَمْ‏: «تٛيْ جَوْمِرَاوٛ اَللَّه مَاطَ؟» غِتٜ عَمْ ندَارَنْ کٛنّٜىٰجٛ عَمْ، سَاعِ ࢡٜنجَاࢡَتَ مٛ بَنَ ࢡٜنجَاࢡِرْتَ لٛوݠٜ دٛوْ لَاوٛلْ؞

11عَنْ عُرُسَلِيمَ، ࢩَلَادٜ ࢩِࢡْتُکِ مَحِ مَ وَرَنْ، ࢩَنْدٜ مَنْ کٜىٰرِ مَ نجَاجَنْ؞ 12ࢩَلَادٜ مَنْ يِمْࢡٜ نغَرَنْ حَا مَاطَ دِغَ عَسُّورَ عٜ دِغَ بٜرْنِيجِ مِصْرَ، دِغَ مِصْرَ حَا يٛتِّ مَايٛ عٜڢْرَتِسْ، دِغَ مبٜىٰلَ نغَعَ حَا نغَيَ، دِغَ حٛوسٜىٰرٜ ندٜعٜ حَا ندٜيَ؞ 13عَمَّا دُنِيَارُ لَاتٛتٛ وِنْدٜ دَلِيلَ جٛوطِيࢡٜ ندٜرْ مَارُ عٜ دَلِيلَ نغٜىٰنَارِ حَلّٜىٰندٜ مَࢡّٜ؞

تٛرْندٜ نغَمْ يَاڢُيٜ عٜ بٛعِّتِنٜىٰکِ

14يَا جَوْمِرَاوٛ، عَيْنُ عُمَّاتٛورٜ مَ بٜى سَوْرُ مَ، طُمْ تٛکّٜرٜ مَ، عَنْ مَرِ ندٜ؞ نغَمْ ندٜ طٛنْ ڢٜىٰرٜ مَارٜ ندٜرْ لَيْندٜ حَا شَکَ غٜسٜ بٛوطّٜ؞ دُرُ ندٜ بَنَ ࢡٛويْمَ حَا بَاسَنْ عٜ غِلٜعَتْ؞ 15جَوْمِرَاوٛ وِعِ‏: «بَنَ ندٜرْ ࢩَلْطٜ غُرْتَاکِ مَ دِغَ مِصْرَ، مِيِعْنَنْ ندٜ کُوجٜ کَيْطِنِيطٜ؞» 16عُمَّاتٛوجٜ غٛطّٜ نغِعَنْ طُمْ، طٜ شٜمْتَ بٜى بَاوْطٜ مَاجٜ ڢُو؞ کُنْدُطٜ مَاجٜ مَࢡّٛتٛ، نٛݠِّ مَاجٜ ݠَحْطَنْ؞ 17طٜ تَحَنْ مبُلْوُلْدِ بَنَ مبٛودِ، بَنَ لَدٛوجِ؞ طٜ نغُرْتٛتٛ شُوطِ مَاجٜ شٜمْبِطِّ بٜى دِوْنُغٛ يٜىٰسٛ جَوْمِرَاوٛ اَللَّه مٜنْ؞ طٜ مَاتَنْ کُلٛلْ عٜ ࢡٜکُلٜتٜ؞

18مٛيْ طٛوَنْتٜىٰطٛ نَنْدِ بٜى مَاطَ#7‏:18 عِنْدٜ مِکَ يِطِ وِعْغٛ مٛيْ نَنْدِ بٜى جَوْمِرَاوٛ؟؟ عَيَاڢٛتٛ عَيْبٜ، عَڢَلَتَا تُورْتٛلْ يِمْࢡٜ مَاطَ لُتُّࢡٜ؞ تِکّٜرٜ مَاطَ دُورَتَا حَا ڢٛرٛيْ نغَمْ عَيٜرْدِ وٛونَنْغٛ مِنْ؞ 19عَحِنّٛتٛ مِنْ ڢَحِنْ، عَدَمَّنْ عَيْبٜىٰجِ عَمِنْ لٜسْ کٛسْطٜ مَاطَ، عَوُدِنَنْ حَکّٜىٰجِ عَمِنْ حَا لُغُّطُمْ مبٜىٰلَ؞ 20عَوَنغِنَنَنْ يَعْقُوبُ غٛونغَاکُ عٜ دَࢩْغٛلْ إِبْرَاهِيمَ بٛو حٛولَارٜ، بَنَ نٛ کُنَنِيطَ کَاکِرَاࢡٜ عَمِنْ ندٜرْ زَمَنُ ࢡٛويْمَ‏!

Currently Selected:

مِکَ 7: داَ

Highlight

Copy