مَتَّ 6

عٜکِّتِنٛلْ دٛوْ وَلُّغٛ تَلَکَعٜنْ

1«کَکِّلٜ‏: تَا کُووٜ کُوطٜ عَدِلَاکُ نغَمْ يِمْࢡٜ نغِعَ عٛنْ؞ تٛ عٛنْ مبَطِ نٛنْ، عٛنْ کٜࢡَتَا مبَرْجَارِ حَا بَابِرَاوٛ مٛوطٛنْ مٛ عَسَمَ#مَتَّ 23‏:5؞؞

2«تٛ عَطٛنْ حٛکَّ تَلَکَاجٛ حُوندٜ، تَا وٛويْنُ طُمْ، بَنَ نَاڢِکِعٜنْ مبَطَتَ ندٜرْ شُوطِ دٜوَلْ عٜ دٛوْ لَابِ؞ ࢡٜطٛنْ مبَطَ نٛنْ نغَمْ يِمْࢡٜ تٜدِّنَ ࢡٜ؞ غٛونغَ مبِعَنْمِ عٛنْ‏: ࢡٜکٜࢡِ مبَرْجَارِ مَࢡّٜ، جِنِّ؞ 3عَمَّا عَنْ، تٛ عَطٛنْ حٛکَّ تَلَکَاجٛ حُوندٜ، تَا جُنغٛ مَ نَنٛ عَنْدِتَ کٛ ࢩَامٛ وَطَتَ، 4نغَمْ حَا دٛکَّلْ مَ وٛنَ ندٜرْ شُوطِيطُمْ، بَابِرَاوٛ مَ غِعَنْطٛ کٛ مبَطَتَ ندٜرْ شُوطِيطُمْ، وَرْجٛتٛ مَ؞»

عٜکِّتِنٛلْ دٛوْ دٛعَ

(لُکَ 11‏:2‏-4)

5«ندٜ عٛنْ طٛنْ مبَطَ دٛعَ ڢُو، تَا لَاتٜ بَنَ نَاڢِکِعٜنْ؞ کَمْࢡٜ ࢡٜنغِطِ دَرَاغٛ ندٜرْ شُوطِ دٜوَلْ عٜ حَا کَوْتِرْطٜ لَابِ، ࢡٜمبَطَ دٛعَ نغَمْ يِمْࢡٜ نغِعَ ࢡٜ؞ غٛونغَ مبِعَنْمِ عٛنْ‏: ࢡٜکٜࢡِ مبَرْجَارِ مَࢡّٜ، جِنِّ#لُکَ 18‏:10‏-14؞؞ 6عَمَّا عَنْ، ندٜ عَيِطِ وَطُغٛ دٛعَ ڢُو، نَسْتُ سُودُ مَ، مَࢡُّ دَمُّغَلْ، ندٜنْ تٛرَ بَابِرَاوٛ مَ غٛنْطٛ ندٜرْ شُوطِيطُمْ، بَابِرَاوٛ مَ غِعَنْطٛ کٛ مبَطَتَ ندٜرْ شُوطِيطُمْ، وَرْجٛتٛ مَ؞

7«تٛ عٛنْ طٛنْ مبَطَ دٛعَ، تَا طُطِّنٜ بٛلّٜ مٜىٰرٜىٰجٜ بَنَ حٜىٰڢٜىٰرْࢡٜ مبَطَتَ؞ ࢡٜطٛنْ تَمّٛ اَللَّه نَنَنْ دٛعَ مَࢡّٜ تٛ ࢡٜطُطِّنِ بٛلّٜ؞ 8تَا مبَطٜ بَنَ مَࢡّٜ، نغَمْ بَابِرَاوٛ مٛوطٛنْ عَنْدِ حَاجٜ مٛوطٛنْ دِغَ عٛنْ شِوَا تٛرَاغٛ مٛ؞»

دٛعَارٜ بَابِرَاوٛ

9نغَمْ مَنْ، عٛنٛنْ، تٛ عٛنْ طٛنْ مبَطَ دٛعَ، ندَا نِي مبِعٛتٛنْ‏:

«يَا بَابِرَاوٛ عَمِنْ مٛ عَسَمَ،

عَ شٜنِيطٛ، وَطْ کٛو مٛيْ تٜدِّنَ عِنْدٜ مَ؞

10لَامُ مَاطَ وَرَ؞

مُويٛ مَ لَاتٛ ندٜرْ دُنِيَارُ

بَنَ حَا عَسَمَ؞

11حٛکُّ مِنْ ࢩَامْدُ دٜيْدٜيْ حَاجٜ عَمِنْ حَنْدٜ؞

12يَاڢَنَ مِنْ عَيْبٜىٰجِ عَمِنْ، بَنَ نٛ مِنِنْ بٛو

مِنْ نجَاڢٛرَنِ وَطْࢡٜ مِنْ عَيْبٜ#6‏:12 عَيْبٜ مَلَّ غَشّٜ؞؞

13عَيْنُ مِنْ نغَمْ تَا مِنْ نَسْتَ جَرِّبٜىٰکِ،

عَمَّا حِسْنُ مِنْ دِغَ کَلُّطٛ؞

‏[‏نغَمْ عَنْ مَرِ لَامُ عٜ بَاوْطٜ عٜ تٜدُّنغَلْ،

حَا ڢٛرٛيْ؞ عَامِينَ‏!]‏

14تٛ عٛنْ نجَاڢَنَکٜ وٛطْࢡٜ عَيْبٜىٰجِ مُوطُمْعٜنْ، بَابِرَاوٛ مٛوطٛنْ مٛ عَسَمَ يَاڢَنْتٛ عٛنْ بٛو؞ 15عَمَّا تٛ عٛنْ نجَاڢَنَاکِ وٛطْࢡٜ، ندٜنْ کَمْ بَابِرَاوٛ مٛوطٛنْ بٛو يَاڢَنْتَاکٛ عٛنْ حَکّٜىٰجِ مٛوطٛنْ#مَرْکُسْ 11‏:25‏-26؞؞»

عٜکِّتِنٛلْ دٛوْ سُومَيٜ

16«ندٜ عٛنْ طٛنْ شُومٛ ڢُو، تَا مبَطٜ بَنَ نَاڢِکِعٜنْ‏: ࢡٜطٛنْ ࢩِࢡِّنَ غٜىٰسٜ مَࢡّٜ، ࢡٜطٛنْ ࢩٛبَّ طٜ نغَمْ حَا يِمْࢡٜ نغِعَ ࢡٜطٛنْ شُومِ؞ غٛونغَ مبِعَنْمِ عٛنْ‏: ࢡٜکٜࢡِ مبَرْجَارِ مَࢡّٜ، جِنِّ؞ 17عَمَّا عَنْ، تٛ عَطٛنْ سُومٛ، سُلْمُ عٜ وُجَ يٜىٰسٛ مَ، 18نغَمْ تَا يِمْࢡٜ عَنْدِتَ عَطٛنْ سُومِ؞ سٜيْ بَابِرَاوٛ مَ غٛنْطٛ ندٜرْ شُوطِيطُمْ کَنغْکٛ تَنْ عَنْدِ؞ عٛطٛنْ يِعَ کٛ مبَطَتَ ندٜرْ شُوطِيطُمْ، عٛوَرْجٛتٛ مَ؞»

جٜيْنِتَاجٜ حَا عَسَمَ

(لُکَ 12‏:33‏-34)

19«تَا ݠَغَّنٜ کٛعٜ مٛوطٛنْ جَوْدِ حَا دُنِيَارُ، حَا غِلْطِ عٜ ݠٜىٰوٛلْ مبٛنَّتَ طُمْ، حَا وُيْࢡٜ بٛو نغَسَتَ شُوطِ، نغُجَّ طُمْ#يَاکُبَ 5‏:2‏-3؞؞ 20عَمَّا ݠَغَّنٜ کٛعٜ مٛوطٛنْ جَوْدِ حَا عَسَمَ، حَا تٛنْ غِلْطِ عٜ ݠٜىٰوٛلْ مبَاوَتَا وٛنُّغٛ ندِ، وُيْࢡٜ بٛو مبَاوَتَا سُمْݠِتِتْغٛ شُوطِ، نغُجَّ ندِ؞ 21نغَمْ حَا جَوْدِ مَاطَ وٛنِ، تٛنْ ࢡٜرْندٜ مَاطَ بٛو وٛنَتَ؞»

أَلنّٛورَ عٜ ࢩِࢡْرٜ

(لُکَ 11‏:34‏-36)

22«غِتٜ لَاتِ ݠِتِّرْلَ ࢡَنْدُ؞ تٛ غِتٜ مَاطَ نجَمٜ، ࢡَنْدُ مَاطَ ڢُو طٛنْ ندٜرْ أَلنّٛورَ؞ 23عَمَّا تٛ غِتٜ مَاطَ نجَمْطَايْ، ࢡَنْدُ مَ ڢُو طٛنْ ندٜرْ ࢩِࢡْرٜ؞ نغَمْ مَاجُمْ تٛ أَلنّٛورَ نغٛنْکَ ندٜرْ مَ ࢩِࢡِّ، ندٜنْ کَمْ ࢩِࢡْرٜ مَنْ ࢩِࢡَّنْ جَمُمْ؞»

جَغَّنَاغٛ اَللَّه عٜ جَوْدِ

(لُکَ 16‏:13)

24«وَلَا مٛ وَاوَتَ جَغَّنَاغٛ جَاغٛرْࢡٜ طِطٛ، نغَمْ عٛوَࢩَنْ عٛو عٜ عٛيِطَنْ عٛيَ مَلَّ عٛطَکّٛتِرَ بٜى عٛو عٜ عٛمٜىٰرِطِنَ عٛيَ؞ عٛنْ مبَاوَتَا جَغَّنَاغٛ اَللَّه عٜ جَوْدِ؞»

حٛولَاغٛ اَللَّه

(لُکَ 12‏:22‏-31)

25«نغَمْ مَاجُمْ مِطٛنْ وِعَ عٛنْ‏: تَا شَکْلَنٜ نغُورٜ مٛوطٛنْ، وَاتٛ کٛ عٛنْ ࢩَامَتَ مَلَّ کٛ عٛنْ نجَرَتَ مَلَّ کٛ عٛنْ ࢡٛرْنٛتٛ؞ يٛنغْکِ ࢡُرِ ࢩَامْدُ سَمَنْ، ࢡَنْدُ بٛو ࢡُرِ لِمْشٜ سَمَنْ، نَا نٛنْ نَ؟ 26ندَارٜ شٛلِّ‏: طِ عَاوَتَا، طِ شٛدَتَا، طِ مٛوࢡْتَتَا کٛو طُمٜ ندٜرْ بٜىٰمبٜ، عَمَّا بَابِرَاوٛ مٛوطٛنْ مٛ عَسَمَ طٛنْ ࢩَامْنَ طِ؞ عٛنْ ࢡُرَتَا طِ سَمَنْ ݠِوْ نَ؟ 27مٛيْ شَکَ مٛوطٛنْ وَاوِ ࢡٜسْدُغٛ بَلْطٜ مُوطُمْ کٛو سٜطَّ بٜى سَکْلٜرٜ مُوطُمْ؟

28«نغَمْ طُمٜ عٛنْ شَکْلَنْتٛ حَالَ لِمْشٜ؟ ندَارٜ ݠِنْدِ لَدّٜ نٛ ندِ مَوْنِرْتَ؞ ندِ حُووَتَا، ندِ سَنْࢩَتَا، 29عَمَّا مِطٛنْ وِعَ عٛنْ‏: کٛو سُلَيْمَـٰنُ بٜى دَرَجَ مُوطُمْ ڢُو مٜىٰطَايْ ࢡٛرْنَاغٛ لِمْشٜ بٛوطّٜ بَنَ نغٛورِ مَنْ#1 لَامِيࢡٜ 10‏:4‏-5؛ 2 حَبَرُوجِ ࢩَلَاطٜ 9‏:3‏-6؞؞ 30اَللَّه ࢡٛرْنِ حُطٛوجِ طِ تَوٜ حَنْدٜ ندٜرْ لَدّٜ، جَنغٛ بٛو طِ شَکِّنٜ ندٜرْ يِيتٜ؞ تٛ نٛنْ کَمْ، عٛࢡٛرْنَتَا عٛنْ کٛ ࢡُرِ نٛنْ نَ، عٛنٛنْ ڢَمْطَ-نُطِّنْکِعٜنْ؟ 31نغَمْ مَاجُمْ تَا شَکْلٜ کٛعٜ مٛوطٛنْ بٜى وِعْغٛ‏: طُمٜ مِنْ ࢩَامَتَ؟ مَلَّ‏: طُمٜ مِنْ نجَرَتَ؟ مَلَّ‏: طُمٜ مِنْ ࢡٛرْنٛتٛ؟ 32حٜىٰڢٜىٰرْࢡٜ شُکْلَنْتٛ کُوجٜ طٜعٜ ندٜ وٜىٰتِ ڢُو؞ عَمَّا بَابِرَاوٛ مٛوطٛنْ مٛ عَسَمَ عَنْدِ عٛنْ نغٛودِ حَاجٜ کُوجٜ طٜعٜ ڢُو؞ 33عَارْتٜ سُکْلَنَاغٛ لَامُ اَللَّه عٜ عَدِلَاکُ مُوطُمْ، ندٜنْ کَمْ عٛحٛکَّنْ عٛنْ کُوجٜ طٜعٜ ڢُو بَنَ ࢡٜسْدَارِ#مَرْکُسْ 10‏:29؞؞ 34تَا شَکْلَنٜ حَالَ جَنغٛ، نغَمْ جَنغٛ سَکْلَنْتٛ حٛورٜ مُوطُمْ؞ ࢩَلَادٜ ڢُو، تٛرَّ مَارٜ حٜعِ ندٜ؞»

Currently Selected:

مَتَّ 6: داَ

Highlight

Copy