لُکَ 1
1
1يَا تٜيٛڢِلُسْ تٜدُّطٛ: يِمْࢡٜ طُوطْࢡٜ کَࢡْدِ وِنْدُغٛ کُبَرُوٛلْ کُوجٜ لَاتِيطٜ شَکَ مٜىٰطٜنْ؞ 2ࢡٜمبِنْدِ کٛ مِنْ نَنِ حَا يِعْࢡٜ کُوجٜ طٜعٜ بٜى غِتٜ مُوطُمْعٜنْ دِغَ ڢُطَّمْ، حَلْڢِتِنَاࢡٜ کُوغَلْ عَنْدِنْغٛ کُبَرُوٛلْ مَنْ؞ 3نغَمْ مَاجُمْ ندٜ مِحُمْݠِتِ لَاࢡْکَ کُوجٜ طٜعٜ ڢُو دِغَ ڢُطّٛودٜ مَاجٜ، طُمْ حَانْدَنِ يَمْ حَا مِوِنْدَنٜ طُمْ بٜى تٛکِّنْدِرْکِ، يَا تٜيٛڢِلُسْ تٜدُّطٛ؞ 4مِوَطِ طُمْ نغَمْ حَا عَڢَامَ حٛولْطِنَارٜ عٜکِّتِنٛلْجِ طِ کٜࢡْطَ؞
مَلَاعِکَاجٛ وَنغِنِ دَࢩٜىٰکِ يُحَنَّ
5ندٜرْ زَمَنُ حِرُدُسْ طٛنّٛ لَامَنِ لٜسْدِ يَحُدِيَ، وٛودِنٛ غٛطّٛ لِمَنْجٛ، مٛ عِنْدٜ مُوطُمْ زَکَرِيَا، غٛنْطٛ ندٜرْ يٜࢡْرٜ#1:5 يٜࢡْرٜ مَلَّ ڢٜشّٜرٜ؞ لِمَنْعٜنْ عَبِيَ؞ عِنْدٜ دٜبّٛ مَاکٛ عٜلِزَبٜتْ، مٛ دَࢩْغٛلْ هَـٰرُونَ، حٛورٜىٰجٛ لِمَنْعٜنْ#1 حَبَرُوجِ ࢩَلَاطٜ 24:10؞؞ 6ࢡٜ طِطٛ ڢُو ࢡٜ عَدِلِعٜنْ يٜىٰسٛ اَللَّه، ࢡٜطٛنْ طٛوْتَنٛ عُمْرٛوجٜ جَوْمِرَاوٛ عٜ ڢَرِلَّاجِ مُوطُمْ ڢُو بٜى بٛوطُّمْ؞ 7عَمَّا ࢡٜنغَلَانٛ ࢡِنغٜلْ، نغَمْ عٜلِزَبٜتْ لَاتِنٛ دِمَرٛ عٜ نٛنْ بٛو ࢡٜ طِطٛ ڢُو ࢡٜ نَيْوِ؞
8ࢩَنْدٜ ڢٜىٰرٜ زَکَرِيَا طٛنْ حُووَ کُوغَلْ لِمَنْکُ مُوطُمْ يٜىٰسٛ اَللَّه، نغَمْ طُمْ وَکَّتِ کُوغَلْ يٜࢡْرٜ مَاکٛ؞ 9لِمَنْعٜنْ مبٛووِ سٜنْدُغٛ کُوطٜ حَکُّندٜ مُوطُمْعٜنْ بٜى وَطُغٛ کُرْعُ؞ ࢩَلَادٜ مَنْ، زَکَرِيَا سُࢡَامَ، عٛحٜࢡِ نَسْتُغٛ ندٜرْ حَيْکَلِيرُ نغَمْ وُلُغٛ عُورْلٜ يٜىٰسٛ جَوْمِرَاوٛ؞ 10سَاعِ عٛطٛنْ وُلَ عُورْلٜ، مٛوࢡْرٜ عُمَّاتٛورٜ ڢُو طٛنْ وَطَ دٛعَ حَا يَاسِ؞ 11طٛنْ نِي، زَکَرِيَا يِعِ مَلَاعِکَاجٛ طٛنْ دَرِ حَا وَکٜىٰرٜ غُلْدُطُمْ عُورْلٜ ࢩَامْرٜ؞ 12ندٜ عٛيِعِمٛ، عٛحُلْتٛرِ، عٛسَکْلِ؞ 13عَمَّا مَلَاعِکَاجٛ وِعِمٛ: «تَا حُلْتٛرْ، زَکَرِيَا، نغَمْ اَللَّه نَنِ دٛعَارٜ مَاطَ؞ دٜبّٛ مَاطَ عٜلِزَبٜتْ دَࢩَنْتٜ ࢡِنغٜلْ، عَعِنْدَ نغٜلْ يُحَنَّ؞ 14عَسٜيٛتٛ مَسِنْ، يِمْࢡٜ طُوطْࢡٜ شٜيٛدٛتٛ بٜى مَاطَ نغَمْ دَࢩٜىٰکِ مَاغٜلْ؞ 15نغَمْ عٛلَاتٛتٛ مَوْطٛ يٜىٰسٛ جَوْمِرَاوٛ؞ عٛيَرَتَا عِنَبٛوجَمْ مَلَّ نغُيْکِنٛوجَمْ کٛو طَمٜ؞ عٛ کٜبِّنْتٜىٰطٛ بٜى رُوحُ شٜنِيطٛ دِغَ ندٜرْ رٜىٰدُ دَادَ مَاکٛ#لِمْلٜ 6:3؞؞ 16عٛلٛرْنَنْ إِسْرَاءِيلَعٜنْ طُوطْࢡٜ حَا جَوْمِرَاوٛ اَللَّه مَࢡّٜ؞ 17عٛعَارْتَنْ جَوْمِرَاوٛ وَرْغٛ ندٜرْ رُوحُ عٜ بَاوْطٜ طٜ اَلنَّبِي إِلْيَاسُ حٜࢡْنٛ، نغَمْ عٛلٛرْتِنَ ࢡٜرْطٜ بَابِرَاࢡٜ حَا ࢡِکّٛيْ مُوطُمْعٜنْ، عٛوَرْتِرَ ࢡٜرْطٜ تُورْتٛوࢡٜ حَا حِکْمَ کَ عَدِلِعٜنْ، عٛتَاسْکِتِنَ عُمَّاتٛورٜ نغَمْ جَوْمِرَاوٛ؞»
18عَمَّا زَکَرِيَا وِعِ مَلَاعِکَاجٛ: «نٛيْ عَنْدِرَنْمِ طُمْ غٛونغَ؟ نغَمْ مِنْ مِ نَيْوِ، دٜبّٛ عَمْ بٛو دُوࢡِ مُوطُمْ طُوطِ؞» 19مَلَاعِکَاجٛ جَابِمٛ: «مِنْ مِ جِبْرِيلَ، مِطٛنْ دَرٛ يٜىٰسٛ اَللَّه نغَمْ حُووَنْغٛ مٛ؞ کَنغْکٛ نٜلِ يَمْ مِوٛلْوَنٜ، مِعَنْدِنٜ کُبَرُوٛلْ بٜلْنغٛلْ نغٛعٛلْ#دَنِيٜلْ 8:16؛ 9:21؞؞ 20عَمَّا عَنُطِّنَايْ بٛلّٜ عَمْ تَمِّيطٜ غٛونغْطُغٛ تٛ وَکَّتِ مَنْ وَطِ؞ نغَمْ مَاجُمْ عَلَاتٛتٛ مُوکَاجٛ، عَوَاوَتَا وٛلْوُغٛ حَا تٛ کُوجٜ طٜعٜ لَاتَکٜ؞»
21سَاعِ مَنْ يِمْࢡٜ طٛنْ ندٜىٰنَ زَکَرِيَا؞ ࢡٜکَيْطِنِ نغَمْ عٛنٜىٰࢡِ ندٜرْ حَيْکَلِيرُ؞ 22ندٜ عٛوُرْتِ، عٛوَاوَايْ وٛلْوَنْغٛ ࢡٜ، ࢡٜݠَامِ عٛيِعِ کَايٜىٰڢِ ندٜرْ حَيْکَلِيرُ؞ عٛطٛنّٛ وَطَنَ ࢡٜ عَلَامَاجِ بٜى جُوطٜ، نغَمْ عٛوَاوَايْ وٛلْوُغٛ؞
23ندٜ وَکَّتِ کُوغَلْ زَکَرِيَا ندٜرْ حَيْکَلِيرُ تِمِّ، عٛحٛوتِ سَارٜ مَاکٛ؞ 24ࢩَلْطٜ سٜطَّ ࢡَاوٛطٛنْ، دٜبّٛ مَاکٛ عٜلِزَبٜتْ رٜىٰدِ، عٛسُوطِ بَاکِنْ لٜبِّ جٛوِ؞ عٛوِعِ: 25«ندَا کٛ جَوْمِرَاوٛ وَطَنِ يَمْ: عٛعِتَّنِ يَمْ سٜمْتٜىٰندٜ ندِمَرَاکُ عَمْ شَکَ يِمْࢡٜ ڢُو؞»
مَلَاعِکَاجٛ وَنغِنِ دَࢩٜىٰکِ عِيسَى
26ندٜ عٜلِزَبٜتْ رٜىٰدِ، وَطِ لٜبِّ جٛوٜىٰغٛ، اَللَّه نٜلِ مَلَاعِکَاجٛ جِبْرِيلَ حَا بٜرْنِوٛلْ بِعٜتٜىٰنغٛلْ نَسَرَتُ ندٜرْ لٜسْدِ غَلِيلِ؞ 27عٛنٜلِمٛ حَا ݠَاࢩٛ دٜبّٛ، کَࢡَّنَاطٛ غٛرْکٛ بِعٜتٜىٰطٛ يُوسُڢُ، مٛ دَࢩْغٛلْ دَاوُدَ؞ عِنْدٜ ݠَاࢩٛ دٜبّٛ بٛو مَرِيَمَ#مَتَّ 1:18؞؞ 28مَلَاعِکَاجٛ وَرِ حَا مَاکٛ، وِعِمٛ: «سٜيَ، عَنْ کٜࢡْطٛ مٛعّٜرٜ اَللَّه! جَوْمِرَاوٛ طٛنْ وٛنْدِ بٜى مَاطَ!» 29بٛلّٜ طٜعٜ شَکْلِ مَرِيَمَ مَسِنْ، عٛنُمِ کٛ طُمْ يِطِ وِعْغٛ؞ 30مَلَاعِکَاجٛ وِعِمٛ: «تَا حُلْتٛرْ، مَرِيَمَ، نغَمْ عَحٜࢡِ مٛعّٜرٜ اَللَّه؞ 31عَتَمِّ رٜىٰدُغٛ، عَدَࢩَنْ ࢡِطّٛ غٛرْکٛ، عَعِنْدَنْ مٛ عِيسَى#مَتَّ 1:21؞؞ 32عٛلَاتٛتٛ مَوْطٛ، ࢡٜعٜوْنٛتٛ مٛ ࢡِطّٛ اَللَّه ࢡَنغِيطٛ؞ جَوْمِرَاوٛ اَللَّه حٛکَّنْ مٛ لَامُ کَاکَ مَاکٛ دَاوُدَ؞ 33عٛلَامَنْتٛ عُمَّاتٛورٜ إِسْرَاءِيلَ حَا ڢٛرٛيْ، لَامُ مَاکٛ تِمَّتَا سَمْ#2 سَمُيِلَ 7:12-13،16؛ عٜسَايَ 9:6؞؞»
34مَرِيَمَ وِعِ مَلَاعِکَاجٛ: «نٛيْ طُمْ لَاتٛرْتٛ، ندٜ مِنْ مِعَنْدَا غٛرْکٛ سَمْ؟»
35مَلَاعِکَاجٛ وِعِمٛ: «رُوحُ شٜنِيطٛ وَرَنْ دٛوْ مَاطَ، بَاوْطٜ اَللَّه ࢡَنغِيطٛ سُدّٜتٜ بَنَ طٛوْدِ؞ نغَمْ مَاجُمْ ࢡِطّٛ مٛ عَتَمِّ دَࢩُغٛ، لَاتٛتٛ شٜنِيطٛ عٜ ࢡٜعٜوْنٛتٛ مٛ ࢡِطّٛ اَللَّه؞ 36عٜلِزَبٜتْ، بَنْدِرَاوٛ مَاطَ طٛنْ بٜى رٜىٰدُ، عٛدَࢩَنْ ࢡِنغٜلْ غٛرْغٜلْ، کٛو ندٜ عٛ نَيْوِ، ࢡٜمبِعْنٛ مٛ عٛ دِمَرٛ بٛو، عَمَّا جٛنْتَ عٛطٛنْ بٜى رٜىٰدُ لٜبِّ جٛوٜىٰغٛ؞ 37نغَمْ وَلَا کٛ سَطَنِ اَللَّه#لَاتَانٛوجِ 18:14؞؞»
38مَرِيَمَ وِعِ: «مِنْ مِ کٛرْطٛ جَوْمِرَاوٛ، طُمْ لَاتَنٛ يَمْ بَنَ مبِعْطَ؞» ندٜنْ مَلَاعِکَاجٛ دِلِّ، عَشِّمٛ؞
مَرِيَمَ يٜحِ حَا عٜلِزَبٜتْ
39ندٜرْ بَلْطٜ مَنْ مَرِيَمَ عُمِّ، دِلِّ بٜى جَاوَلْ حَا وُرٛ وٛطْنغٛ، ندٜرْ کٛوسٜىٰجٜ لٜسْدِ يَحُدِيَ؞ 40عٛنَسْتِ سَارٜ زَکَرِيَا، عٛحٛوڢْنِ عٜلِزَبٜتْ؞ 41سَاعِ عٜلِزَبٜتْ نَنِ کٛوڢْنغٛلْ مَرِيَمَ، ࢡِنغٜلْ ڢُطِّ دِمْبَاغٛ ندٜرْ رٜىٰدُ مَاکٛ؞ ندٜنْ عٜلِزَبٜتْ حٜىٰوِ رُوحُ شٜنِيطٛ، 42وِعِ بٜى سَوْتُ: «عَ بَرْکِطِنَاطٛ شَکَ رٜوْࢡٜ ڢُو، ࢡِنغٜلْ نغٜلْ عَتَمِّ دَࢩُغٛ بٛو بَرْکِطِنَانغٜلْ! 43مِنْ مِ مٛيٜ حَا دَادَ#1:43 دَادَ مَلَّ عِنَّ؞ جَوْمِرَاوٛ عَمْ وَرَ حَا عَمْ؟ 44نغَمْ ندَا، سَاعِ مِنَنِ کٛوڢْنغٛلْ مَ، ࢡِنغٜلْ دِمْبِ ندٜرْ رٜىٰدُ عَمْ نغَمْ سٜيٛ؞ 45بَرْکَ لَاتَنِ مَ نغَمْ عَنُطِّنِ کٛ جَوْمِرَاوٛ وِعِ مَ، طُمْ لَاتٛتٛ؞»
يِمْرٜ مَرِيَمَ
46ندٜنْ مَرِيَمَ وِعِ:
«نَڢْسُ عَمْ طٛنْ مَنغْتَ جَوْمِرَاوٛ،
47ࢡٜرْندٜ عَمْ طٛنْ حٜىٰوِ سٜيٛ نغَمْ اَللَّه عَمْ، کِسْنٛووٛ يَمْ!
48نغَمْ عٛيٜرْدِ لَارُغٛ کٛرْطٛ مَاکٛ لٜىٰسْطٛ؞
ڢَکَتْ، دِغَ جٛنْتَ يِمْࢡٜ غِدٜ ڢُو مبِعَنْ مِ بَرْکِطِنَاطٛ،
49نغَمْ اَللَّه بَاوْطٛ وَطَنِ يَمْ کُوجٜ مَوْطٜ!
عِنْدٜ مَاکٛ وٛنِ شٜنِيطٛ،
50عٜنْطَمْ مَاکٛ طٛنْ دٛوْ حُلْࢡٜ مٛ دِغَ يِدٜرٜ حَا يِدٜرٜ؞
51عٛحُووِ کُوطٜ مَوْطٜ بٜى جُنغٛ مَاکٛ سٜمْبِطْنغٛ،
عٛسَنغْکِتِ مَوْنِتِيࢡٜ ندٜرْ نُمٛوجِ مُوطُمْعٜنْ؞
52عٛجِݠِّنِ سٜمْبِطْࢡٜ دِغَ لٜىٰسٜ لَامُ مُوطُمْعٜنْ،
عٛࢡَنغْتِ لٜىٰسْࢡٜ؞
53عٛحَارْنِ دٛلْࢡٜ بٜى کُوجٜ بٛوطّٜ،
رِسْکُࢡٜ بٛو، عٛرِيوِ ࢡٜ جُوطٜ مٜىٰرٜ؞
54عٛوَلِّ إِسْرَاءِيلَ، جَغَّنِيطٛ مٛ،
عٛسِڢْتٛرِ عٜنْطَمْ مَاکٛ،
55بَنَ عٛوِعْنٛ کَاکِرَاࢡٜ مٜىٰطٜنْ، وَاتٛ إِبْرَاهِيمَ عٜ دَࢩْغٛلْ مُوطُمْ حَا ڢٛرٛيْ#لَاتَانٛوجِ 17:7؛ 1 سَمُيِلَ 2:1-10؞؞»
56مَرِيَمَ جٛوطٛدِ بٜى عٜلِزَبٜتْ کٛ دِلَّنِ لٜبِّ تَتِ، ندٜنْ عٛحٛوتِ سَارٜ مَاکٛ؞
دَࢩٜىٰکِ يُحَنَّ بَطٛووٛ بَݠْتِسْمَ
57ندٜ سَاعِ عٜلِزَبٜتْ دَࢩَتَ يٛتِّ، عٛدَࢩِ ࢡِطّٛ غٛرْکٛ؞ 58حٜىٰدِّطِّرَاࢡٜ مَاکٛ عٜ بَنْدِرَاࢡٜ مَاکٛ نَنِ جَوْمِرَاوٛ وَطَنِمٛ عٜنْطَمْ طُوطَّمْ، ࢡٜشٜيٛدِ بٜى مَاکٛ؞ 59ندٜ ࢩَلَادٜ جٛوٜىٰتَتَࢡْرٜ وَطِ، ࢡٜنغَرِ نغَمْ جُولْنُغٛ#1:59 جُولْنُغٛ مَلَّ رٜمْنُغٛ؞ ࢡِنغٜلْ غٛ، ࢡٜنغِطْنٛ عِنْدُغٛ نغٜلْ زَکَرِيَا، بَنَ عِنْدٜ بَابَ مَاغٜلْ#ڢَرِلَّاجِ لٜوِعٜنْ 12:3؞؞ 60عَمَّا دَادَ مَاغٜلْ وِعِ: «عَاعَ، نَا نٛنْ، نغٜلْ عِنْدٜتٜ يُحَنَّ؞» 61ࢡٜمبِعِمٛ: «وَلَا کٛو غٛوتٛ ندٜرْ بَنْدِرَاࢡٜ مَ مَرِ عِنْدٜ ندٜعٜ؞»
62ندٜنْ ࢡٜمبَطَنِ بَابَ مَاغٜلْ عَلَامَ بٛلّٜ بٜى جُوطٜ، نغَمْ حَا ࢡٜࢨَمَ مٛ عِنْدٜ ندٜيٜ عٛيِطِ عِنْدُغٛ نغٜلْ؞ 63زَکَرِيَا عَنْدِنِ ࢡٜ، ࢡٜندٛکَّ مٛ عَلُّحَ؞ ندٜنْ عٛوِنْدِ: «عِنْدٜ مَاغٜلْ يُحَنَّ؞» يِمْࢡٜ ڢُو کَيْطِنِ؞ 64سَاعِ مَنْ ندٜنْ حُنْدُکٛ زَکَرِيَا مَࢡِّتِ، طٜمْنغَلْ مَاکٛ ڢِيسْتِ، عٛڢُطِّ وٛلْوُغٛ، عٛمَنغْتِ اَللَّه بٜى سَوْتُ؞ 65حٜىٰدِّطِّرَاࢡٜ مَاکٛ ڢُو کُلْتٛرِ مَسِنْ؞ حَا لٜسْدِ کٛوسٜىٰجٜ يَحُدِيَ ڢُو ࢡٜمبٛلْوِ حَالَ کُوجٜ طٜعٜ؞ 66نَنْࢡٜ طُمْ ڢُو تٛکِّ نُمُغٛ: «طُمٜ ࢡِنغٜلْ نغٜعٜلْ تَمِّ لَاتَاغٛ؟» نغَمْ ڢَکَتْ، بَاوْطٜ جَوْمِرَاوٛ طٛنْ نغٛنْدِ بٜى مَاغٜلْ؞
عَنَّبَاکُ زَکَرِيَا
67زَکَرِيَا، بَابَ ࢡِنغٜلْ غٛ حٜىٰوِ رُوحُ شٜنِيطٛ، عٛوَطِ عَنَّبَاکُ، عٛوِعِ:
68«يٜتّٛورٜ لَاتَنٛ اَللَّه، جَوْمِرَاوٛ إِسْرَاءِيلَ،
نغَمْ عٛحَکِّلَنِ عُمَّاتٛورٜ مَاکٛ، عٛرِمْطِنِ ندٜ؞
69عٛدَرْنَنِ عٜنْ کِسْنٛووٛ شٜمْبِطّٛ،
ندٜرْ دَࢩْغٛلْ دَاوُدَ، جَغِّيطٛ مَاکٛ؞
70کَنْجُمْ وٛنِ کٛ عٛعَنْدِنّٛ دِغَ ࢡٛويْمَ
بٜى کُنْدُطٜ اَلنَّبِعٜنْ مَاکٛ سٜنِيࢡٜ،
71عٛوِعْنٛ عٛرِمْطِنَنْ عٜنْ دِغَ جُوطٜ کٛنّٜعٜنْ مٜىٰطٜنْ،
عٜ بَاوْطٜ وَࢩْࢡٜ عٜنْ ڢُو؞
72عٛوَنغِنَنِ کَاکِرَاࢡٜ مٜىٰطٜنْ عٜنْطَمْ مَاکٛ،
عٛسِڢْتٛرِ عَلْکَوَلْ مَاکٛ شٜنِينغَلْ؞
73نغَمْ اَللَّه حُنَنِ کَاکِرَاوٛ مٜىٰطٜنْ إِبْرَاهِيمَ،
74عٛحِسْنَنْ عٜنْ بَاوْطٜ کٛنّٜعٜنْ مٜىٰطٜنْ،
حَا عٜنْ نجَغَّنٛ مٛ بِلَا کُلٛلْ،
75نغَمْ حَا عٜنْ لَاتٛ يِمْࢡٜ مَاکٛ سٜنِيࢡٜ عٜ عَدِلِعٜنْ ندٜرْ بَلْطٜ نغٜىٰندَمْ مٜىٰطٜنْ ڢُو؞
76عَنْ بٛو، ࢡِنغٜلْ ݠَمَرٜلْ، ࢡٜعٜوْنٛتٛ مَ اَلنَّبِيجٛ اَللَّه ࢡَنغِيطٛ،
نغَمْ عَعَارْتَنْ جَوْمِرَاوٛ نغَمْ حَا عَمٛعِّنَنَ مٛ لَاوٛلْ#مَلَکِيَ 3:1؞؞
77عَعَنْدِنَنْ يِمْࢡٜ مَاکٛ عٛحِسْنَنْ ࢡٜ،
بٜى يَاڢَنغٛ ࢡٜ حَکّٜىٰجِ مَࢡّٜ؞
78اَللَّه مٜىٰطٜنْ عٛ کٜىٰوْطٛ عٜنْطَمْ،
دَلِيلَ عٜنْطَمْ طَعَمْ، عٛيَيْنَنْ دٛوْ مٜىٰطٜنْ بَنَ نَانغٜ ݠُطَنْنغٜ،
79نغَمْ يَيْنَنْغٛ وٛنْࢡٜ ندٜرْ ࢩِࢡْرٜ عٜ لٜسْ طٛوْدِ مَايْدٜ
عٜ طٛوُغٛ کٛسْطٜ مٜىٰطٜنْ دٛوْ لَاوٛلْ سَلَامَنْ#عٜسَايَ 9:3؞؞»
80يُحَنَّ مَوْنِ، عٛسٜمْبِطِ بٛو ندٜرْ رُوحُ؞ عٛجٛوطِ ندٜرْ لَدّٜ حَا يٛتِّ وَکَّتِ عٛوَنغِ حَا عُمَّاتٛورٜ إِسْرَاءِيلَ؞
Currently Selected:
لُکَ 1: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.